Marko̱ 14

Nga inchaꞌbenda xu̱ta̱ nga mejénre tsikꞌien Jesuu̱

(Mt 26.1-15; Lk 22.1-2; Jua 11.45-53)

1Ngi jó ni̱tjin chajare nga bitju sꞌuiꞌe Paskua̱. Kui sꞌui tekuácha be xu̱ta̱ xuku sꞌuiꞌe ni̱pan xi Najmíre lebadura̱. Ngieje kui ni̱tjin xu̱ta̱ chanaꞌmi xi inchatetjun kju̱ chjine Kju̱a̱kixiꞌe Namiña Diuu̱, inchamangitsjai kúcha ꞌbanachajo Jesuu̱, tuxi manga kjabeꞌñu ku tsikꞌien. 2Ku̱i̱cha inchatsure̱ xikjin: «Yaña, ku̱i̱cha siaꞌanña, ta̱nga ngajínꞌenjín sꞌui, kútsa kitsitjo xu̱ta̱ ku ñá ꞌyetꞌaña.»

Ngu chjun kitsiꞌínre ndijua sinjen Jesuu̱

(Mt 26.6-13; Jua 12.1-8)

3Nangi jma nga ꞌmí Betania̱ kjitjián Jesuu̱, nga niꞌyaꞌe Ximo, xi kisꞌere̱ chiꞌin xi tsikjíndujun tji̱u̱xinña. Nga tjikjien Jesuu̱ jichú ngu chjun xi jichuju̱ ngu lometa̱ ndijuasinjen xi tuxi ꞌñu chji. Kitsitiñare yajo̱ꞌe, ikjan lometa̱ ku itejun ndijuasinjen ngatsjá tku̱ Jesuu̱.

4Tjín xu̱ta̱ xi kꞌi̱a̱ sindu xi kitsiti ku ku̱i̱cha kitsú: «¡Mí xi ku̱i̱cha ñaꞌan nga najmi nikjetsun! 5Kumáni tsa uchan tón tiaba kisteña kui ndijuasinjen, ku kuma tsanga kui tón kixinchajuña kjín xu̱ta̱ xi ni̱ma̱ tjima.»

Ku chꞌo tsichjaya kui chjun, 6ta̱nga ku̱i̱cha kitsúre̱ Jesuu̱:

«¡ꞌmí siaꞌanjínjnu! Mí kju̱a̱ nga tjinitjojnu. Najmi xi Ndátjin kitsꞌiju̱nna. 7Tiñare jmá ꞌbemájnu tutjsai nga kꞌue xu̱ta̱ xi ni̱ma̱ tjima, ku ma nga minchajujnu tukjia nga mejénre anima̱jnu. Ta̱nga án je xati nga kite kꞌuijí fabixijínjnu. 8Kui chjun tu najmi xi matse xi kitsꞌiju̱nna: itejun ndijuasinjen tkuꞌan, ku janda bejí tsanga yajo̱ꞌna kjiꞌbendaya ꞌbenda nga fañajínna. 9Kju̱a̱xikjain najmi xi xinjnu nga kui najmi xi kitsꞌiju̱nna, tsikjaitsjen xu̱ta̱ xi tujmáni ngande jma nga Enꞌen Namiña Diuu̱ xi tjínre kju̱a̱ndá tjinikjaitse.»

Juda̱ kitsikasꞌen Jesuu̱

(Mt 26.14-16; Lk 22.3-6)

10Juda̱ Iskariote̱, ngu xiꞌin xi kꞌi̱a̱ tjenjínre xu̱ta̱ xi kjibakuyáre̱ Jesuu̱, kikasere̱ xu̱ta̱ chanaꞌmi xi inchatetjun ku kitsjuáre̱ en nga basenjun tuxi manga chjabeꞌñu Jesuu̱. 11Tsjua kumáre kui xu̱ta̱ nga tsitꞌe kui én, ku tón kiningitꞌare. Ku janda kjiaku̱a̱, Juda̱ tsangitsjai ngande nga mejénre kitsikasꞌenre̱ Jesuu̱ kui xu̱ta̱.

Chayaji nga tsakjienjun nga ni̱tje̱n ja xi kjibakuyáre̱ Jesuu̱

(Mt 26.17-29; Lk 22.7-23; Jua 13.21-30; 1Co 11.23-26)

12Ni̱tjin xi tjúnre sꞌuiꞌe ni̱pan xi najmíre lebadura̱ kjia nga nikꞌen chu̱tsa̱nga̱ xi xu̱ta̱ Paskua̱. Kui ni̱tjin xu̱ta̱ xi kjibakuyáre̱ Jesuu̱ tsinengiyare̱ Jesuu̱:

—Jmá mejenri nga ꞌbendaña xi chine nga ni̱tje̱n ngajín sꞌuiꞌe Paskua̱.

13-14Jó kui xu̱ta̱ xi ku̱i̱cha kitsúre̱ Jesuu̱:

—Tangijnu Jerusalen; kꞌi̱a̱ yajnu kꞌi̱a̱ kua ngu xu̱ta̱ xi yaꞌa ngu tiji ndijua. Tangitjengijnu janda niꞌya jma nga basꞌen, ku nukju̱a̱jujnu xi tse̱ꞌe niꞌya: “Mejénre̱ be maestro̱jni jmá kjitjián ngande jma nga kjienju̱n xu̱ta̱ xi kjibakuyáre̱ ni̱tjenꞌen sꞌui Paskua̱.” 15Ku kui bakujnu ngu ngande xi teya ku je tjinda piso xi ngakꞌa. Tꞌenda ngiejejnu kꞌi̱a̱ kua.

16Kijí na̱xi̱nanda ꞌñu ngiajo xu̱ta̱ xi kjibakuyáre̱ Jesuu̱ ku ngieje nga ku̱i̱cha sakutsjaire xukúcha kitsúre̱ kui, ku ꞌyenda xi chine nga ni̱tje̱n ngajín sꞌuiꞌe Paskua̱.

17Nga je kjamajñu, Jesuu̱ kju̱ ngieje xi tejó xiꞌin ma xu̱ta̱ xi kjibakuyáre̱ kijí salo̱n. 18Nga je inchakjien nga ni̱tje̱n, tjitsu Jesuu̱:

—Xi tsikasꞌenna ngaya tsja xi tónreꞌan, kꞌui jña tjikjienjúnna.

19Tuxi ngi kumáre xu̱ta̱ xi kjibakuyáre̱ Jesuu̱, ku ngu ngu tsinengiyare̱:

—A án tjibateina, a kjáin.

20Ku̱i̱cha skengi Jesuu̱:

—Kꞌui kjitjianjínña, kjatꞌeima sijíndare nipanꞌen ngaya tiba jmá sijíndana tsaꞌan. 21Tuxi chji kjitꞌa ngaya Xu̱ju̱n Enꞌen Namiña Diuu̱ nga án, Kjindiꞌe xu̱ta̱ nga̱sunde, tsubáre nga beyaꞌan. Ta̱nga xi án kjifatjijunna ngu najmi xi tuxi chꞌo tjin kumataꞌin. ¡Ngisa chjiꞌere̱ tsa kitjukjaji tsakain!

22Ku nga inchakjien, kiskabe Jesuu̱ ngu ni̱pan ku kitsjuáre̱ nikꞌuechjii̱ Namiña Diuu̱. Xki̱ kiti itsjé kui ni̱pan, ku kitsjuáre̱ xu̱ta̱ xi kjibakuyáre̱, ku ku̱i̱cha kitsúre̱:

«Chjabejnu, yajo̱ꞌna kua.»

23Ku te̱ skabeni ngu kopa̱ xi tjikitse bino ku kitsjuáre̱ nikꞌuechjii̱ Namiña Diuu̱. Ku kitsjuáre̱ nga xu̱ta̱ xi kjibakuyáre̱, ku ngieje nga kitsꞌi. 24Ku̱i̱cha kitsúre̱ Jesuu̱:

«Jinꞌna xikꞌui, ku kui tjitsichjen Namiña Diuu̱ nga kjiꞌbendajujnu. Machjen kui jín tuxi kjín xu̱ta̱ ꞌbangi. 25Kꞌui kjuetꞌa nga jña tjiꞌyuña kui bino. Ta̱nga nga je jña tijñaña ngande jmá batexuma Namiña Diuu̱, kjia ꞌyuña bino xi tjatse.»

Pe kitsjua enꞌen nga tsikjaꞌabasenjín Jesuu̱

(Mt 26.30-35; Lk 22.31-34; Jua 13.36-38)

26Jaskan kise ngu sun ku kijí xu̱ta̱ Tjengiꞌe̱ ya Olibo̱, 27Ku nga jichú ku̱i̱cha kitsúre̱ Jesuu̱ xu̱ta̱ xi kjibakuyáre̱:

—Ngiejejnu nga kite sꞌejinjínjnu nga̱tꞌaꞌna. Nga̱tꞌa ku̱i̱cha tjichja Xu̱ju̱n Enꞌen Namiña Diuu̱:

“Tsikꞌienꞌan xu̱ta̱ xi ndá yaꞌana,

ku stetsajo na̱xi̱nandaꞌna.”

28»Ta̱nga nga te̱ tsindayánina Namiña Diuu̱, án tjún fichuꞌan Ngalilea̱ tukꞌuajíre nga jun.

29Kjia ku̱i̱cha kitsúre̱ Pe:

—Ndatsa ngieje xi tsikjaꞌabasenri, ta̱nga án tsikjaꞌabasenjínra.

30Ku̱i̱cha skengire Jesuu̱:

—Pe, tukuajicha kixí nukju̱a̱i; tekjie nga se jó ndiya xa̱nda̱ xicha, ján ndiya je kibixii̱ni nga yijína.

31Ta̱nga tsúrani Pe:

—Ndatsa nikꞌienna, najmi ni̱tjin nga xinꞌan nga bejíra.

Ngieje xu̱ta̱ xi kjibakuyáre̱ Jesuu̱ tekuácha inchatsú.

Tuxi ngi tjínre Jesuu̱ nga tjichjatꞌare Namiña Diuu̱

(Mt 26.36-46; Lk 22.39-46)

32Jesuu̱ ku xu̱ta̱ xi kjibakuyáre̱ kijí ngu ngande xi ꞌmí Jetsemaní, ku ku̱i̱cha kitsúre̱: «Tijñanjnu kꞌui, faichjatꞌamana Namiña Diuu̱.»

33Jesuu̱ kitsikitꞌe Pe, Santia kju̱ Jua tuxi jña ngatjaiju. Tsaꞌángire̱ nga tuxi ngi kisꞌere̱, 34ku tjitsure̱ ngiaján: «Ngi tjínna, ku xuku xi je makeyaꞌan nga kjimana; tijñanjnu kꞌui ku tu sufejijnu.»

35-36Kitsikjín chu̱ba̱ yajo̱ꞌe Jesuu̱, incha tkuꞌe̱ nangi ku tsichatꞌáre Namiña Diuu̱: «¡Nami!, ¡nami!, tsanga ma, ngatu̱ yujíri nga tsé kju̱a̱ꞌon feyana. Jí tsa ngieje najmi nga mari. ¡Tuxi mejénna tsakain nga chjubaꞌina kui kju̱a̱niꞌin! Ta̱nga xukujícha tetsikjoꞌan najmi xi kuma, tu xukúcha nga jí xi mejénri.»

37Jiꞌini Jesuu̱ jma nga sindu xu̱ta̱ xi kjibakuyáre̱, ta̱nga sindufetse kui xu̱ta̱. Ku kjia kitsúre̱ Pe:

«Ximo, a kisufeitseji̱. A kumajín kisꞌejnichin ndatsa ngu ura. 38Ngatu sufejijnu; chji̱nengitꞌajnu kju̱a̱ndá Namiña Diuu̱ tuxi chukju̱a̱jnu kju̱a̱chutꞌakakún xi je kjimatiña. Jun mejénjnu nga ñaꞌánjnu najmi xi Ndátjin, ta̱nga majín xi ñaꞌánjnu tsa tu ngaꞌñu subajnútse.»

39Ngi ngu ndiya tꞌaxin te̱ kijíni Jesuu̱, ku tuku ku̱i̱cha te̱ tsinengitꞌanire̱ kju̱a̱ndá Namiña Diuu̱. 40Nga te̱ jichuni jmá sindu ngiaján xu̱ta̱ xi kjibakuyáre̱, te̱ sinduféni nga kube, nga̱tꞌa tuxi jenda kui xu̱ta̱. Jesuu̱ kitsikjaꞌare̱, ku tu bejí ꞌmí xi tsu. 41Ku te̱ kijíni xima xu̱ta̱ ndiya nga kikinengire kju̱a̱ndá Namiña Diuu̱, ku nga tsꞌutjíni ku̱i̱cha kitsúre̱: «A tuku tjinikjayájnu ku tuku tjisufejnu. ¡Tisitjenjnu! Je ndiba xu̱ta̱ xi xaba nga kju̱a̱ꞌi kjabeꞌñuna, án xi Kjindiꞌe xu̱ta̱ ngasundeꞌan. 42Tisitjenjnu ku ndibajnu kꞌui, kꞌi̱a̱ ndiba kꞌi̱a̱ xi tsikasꞌenna.»

Xu̱ta̱ xi tao̱nre ku kiskabeꞌñu Jesuu̱

(Mt 26.47-56; Lk 22.47-53; Jua 18.2-11)

43Tuku tjichja ngisa Jesuu̱ nga jichú Juda̱, xi tekuácha kjibakuyáre̱ Jesuu̱. Jña kjitje̱jun kjín xu̱ta̱ xiꞌin xi tjimajun michilu ku ya. Já chanaꞌmi xi inchatetjun kju̱ chjine kju̱a̱kixiꞌe Namiña Diuu̱ ku kju̱ xi inchatetjunre̱ na̱xi̱nanda judio̱ xi kitsingiya. 44Je ku̱i̱cha kitsúre̱ Juda̱: «xu̱ta̱ xi tsindsuꞌaꞌan, kui xi ꞌmí Jesuu̱. Chjabeꞌñujnu, tꞌeꞌñujnu ku tangijujnu.»

45Juda̱ kitsitiñare Jesuu̱ yajo̱ꞌe ku kitsúre̱: «¡Jí kua Chji̱ne!» Ku tsindsuꞌa.

46Kiskabeꞌñu Jesuu̱ xu̱ta̱ xi jichú. 47Ta̱nga ngu xi kjitsuꞌba kꞌi̱a̱ kua itsjé spadaꞌe̱, ku tsate ngu ñajun xu̱ta̱ xi tjitsixatꞌare xi siantetjunre xu̱ta̱ chanaꞌmi.

48Ku tsinengiyare̱ Jesuu̱ kui xu̱ta̱:

—Mí kju̱a̱ nga michilu ku ya tjimajunjnu, xuku xi xu̱ta̱ tetsikꞌienꞌan. 49Ngieje ni̱tjin nga kju̱a̱kitakun tebakuyaꞌan ni̱ngu̱xi̱, ku najmi ni̱tjin nga tjin xi skabeꞌñuna kꞌi̱a̱ kua. Ta̱nga ngieje kui najmi tuxa nga ku̱i̱cha kuma, tuxi bitjusún xukúcha tjichja Xu̱ju̱n Enꞌen Namiña Diuu̱.

50Ku kꞌi̱a̱ kui chu̱ba̱ ngieje xu̱ta̱ xi kjibakuyáre̱ Jesuu̱ nga kitsikjaꞌabasen ku tsanga. 51Ngu xu̱ta̱ xi kjibakuyáre̱ Jesuu̱, xi nisti, xi tu tiangatse kjitsa. Nga kiskabe jun, 52kitsikjaꞌa tianga ku tsanga kjiti.

Kúcha kisꞌendá kju̱a̱ꞌi Jesuu̱

(Mt 26.57-68; Lk 22.54-55,63-71; Jua 18.12-14,19-24)

53-54Pe kijitjengi kjínre Jesuu̱, ku jichú skanda kjíndetsinꞌen ndabaxaꞌe xi siantetjunre xu̱ta̱ chanaꞌmi. Kꞌi̱a̱ kisꞌejñajínre jun xi inchabasere ngande tꞌa ndiꞌi tuxi maꞌasure.

Tekui chu̱ba̱, ja xi kiskabéꞌñú Jesuu̱ kiju̱ ma sindu ja chanaꞌmi xi inchatetjún. Kꞌi̱a̱ sindutku ja chanaꞌmi xi incha ngitku, xi inchatetjúnre̱ xu̱ta̱ judio̱ kju̱ chjine Kju̱a̱kixiꞌe̱ Namiña Diuu̱.

55Chanaꞌmi xi inchatetjun ku ngieje Tjiꞌñuꞌen xu̱ta̱ xá xi kꞌa, inchamangitsjai kꞌi̱a̱ xi batejené Jesuu̱, tuxi ma nga tsijere nga nikꞌen; Ta̱nga inchasakujire̱ kꞌi̱a̱. 56Kjín xi jichú ku kju̱a̱ndesútse inchatsindare Jesuu̱ ku tekꞌiani tu ndsijín xikjíntse inchabatekajojo. 57Tjín xi kixinchakixi ku kju̱a̱ndesu kitsindá nga ku̱i̱cha kitsú: 58«Jin kinuꞌyájni Jesuu̱ nga ku̱i̱xu tsikixundu ni̱ngu̱xi̱ xi jín kinindajni. Kuima xi kua kitsú nga janxutse ni̱tjin tsindá ni̱ngu̱xi̱ ku ngujíxu xu̱ta̱ machjenre.» 59Ta̱nga inchamakjínjínjnu ndsijínjín kui xi inchabatejene Jesuu̱.

60Ku kjia xi siantetjunre xu̱ta̱ chanaꞌmi kisasenkixi ku tsinengiyare̱ Jesuu̱:

—A ndá tjinuꞌyei jee xi tjifaneri. Mí xi bixiji nga nukju̱a̱tjaiji yajori.

61Ta̱nga Jesuu̱ ngují én skengi, tusatse kitsikenda yajo̱ꞌe.

Xi siantetjunre xu̱ta̱ chanaꞌmi, te̱ tsinengiyanire̱:

—A jí kua Xi ꞌBatsjengi xu̱ta̱, Kjindiꞌe Namiña Diuu̱ xi ngieje xu̱ta̱ inchabe xu̱ta̱.

62Ku̱i̱cha kiskengire Jesuu̱:

—Kju̱a̱xikjain, Ku chajnu jun nga án, Kjindiꞌe xu̱ta̱ nga̱sunde, nga ndibaꞌan ngajín yufiꞌe ndiu̱jmi ku ꞌbena ngaꞌñu ku xá xi tsjuana Namiña Diuu̱ xi tjingatsja ngieje ngaꞌñu xi tjin.

63-64Nga tsitꞌe kui én xi siantetjunre xu̱ta̱ chanaꞌmi kiskendiyá ñajñuꞌen nga ikú yajo̱ꞌe nga kutire̱, ku ku̱i̱cha kitsú:

—Kúcha Chaséjnu. Mí xi sꞌendajnu. Tjitsu kꞌui nga Namiña Diuu̱. ¡Kitꞌe ngují najmi chaja xi chusúnre!

Ku ngieje nga ndsijín kuma nga tsubáre nga nikꞌen Jesuu̱. 65Tjín xi inchabate tejun Jesuu̱. Inchaꞌbechjare xkun, inchabasenre ku ku̱i̱cha inchatsure̱: «¡A yiji kꞌi̱a̱ xi isenri!»

Ku xu̱ta̱ jun xi chja̱ ni̱ngu̱xi̱ kitsiꞌin xki̱ Jesuu̱ ku tuxi ndá tsꞌujín nga skabe.

Kitsibeji yajo̱ꞌe Pe nga bejin Jesuu̱

(Mt 26.69-75; Lk 22.56-62; Jua 18.15-18,25-27)

66Nga kjima ngieje kui najmi, Pe sa kjíndetsinꞌen ndabaxá kjitsuꞌba. Tjatse jichú ngu chjun xi chji̱neꞌoꞌe xi siantetjunre xu̱ta̱ chanaꞌmi, 67ku kube Pe nga tjitsiꞌasure yajo̱ꞌe tꞌa ndiꞌi; tsase ndandáre̱ ku ku̱i̱cha kitsúre̱:

—Jí tutjsai nga Jesuu̱ tsutjaji, xu̱ta̱ xi xu̱ta̱ Nasare.

68Ku̱i̱cha skengi Pe:

—Kju̱a̱ndesu kui én; ¡bejí én xi tjibixiji!

Ku kijí jmá tjen kjíndetjuaꞌe kjíndetsín. Ku kuima chu̱ba̱ kise xa̱nda̱ xicha. 69Ngutjútse xu̱ta̱ꞌan, tuku kui chjun chji̱neꞌoꞌe te̱ kubéni Pe, ku kui kitsúre̱ xu̱ta̱ xi kꞌi̱a̱ sindu:

—Kui xu̱ta̱ kju̱ kui xi tsuꞌbatje̱ngire̱ Jesuu̱.

70Te̱ kitsibejíni yajo̱ꞌe Pe.

Te̱ sꞌeimani ngisa, tjin xi tekꞌiani tjima te̱ kitsúnire Pe:

—Kju̱a̱xikjain nga jí xi tsutjaitjengii̱ri Jesuu̱; tekuácha ngande Ngalilea̱ nukju̱a̱iji.

71Tusá ꞌñu kiskengi ngisa Pe:

—¡Je kua texinjnu nga bejíꞌa̱n kui xu̱ta̱! ¡Ngatsijéna Namiña Diuu̱ tsanga kju̱a̱xikjainjín en xi texinꞌan!

72Kuima chu̱ba̱ xima jó ndiya kise xa̱nda̱ xicha, xi jitsjenre Pe en xi kitsúre̱ Jesuu̱: «Tekjie nga jó ndiya se xa̱nda̱ xicha, xu̱ta̱ ndiya je kibixini nga yijína.» Ku tuxi ndá skinda ngi Pe.

Markert nå:

Marko̱ 14: MZI

Marker

Del

Kopier