Tobit 5
5
Tobías mi' majlel ti' tejklum Media
1Jiñi Tobías tsi' jak'ä:
—Ktat, muk'ix kajel kmel pejtelel jiñi tsa'bä asu'beyoñ. 2Kojach yom ma' su'beñoñ ¿Bajche' mi' mejlel kcha' sutk'ibeñtel jiñi tak'iñ lotbilbä icha'añ Gabael che' mach kämbiloñik icha'añ jiñi wiñik yik'ot mach käñäyik ja'el? ¿Chuki yejtal mik päsbeñ jiñi wiñik cha'añ mi' käñoñ, cha'añ mi' ñopoñ yik'ot cha'añ mi' sutk'iñ jiñi tak'iñ? ¡Che' ja'el mach käñäyik jiñi bij cha'añ mik mejlel ti k'otel k'äläl ya' ti yumäñtel!— Che'eñ.
3Che' jiñi Tobit tsi' jak'be chuki woli yäl Tobías:
—Gabael yik'ot joñoñ tsa' kts'ijbulojoñ junk'ejl juñ, che' jiñi tsa' kt'oxo lojoñ ti cha'k'ejl, jujunk'ejl tsa' kloto lojoñ ti jujuñtikil. Tsa' käk'ä junk'ejl cha'añ ba'añ jiñi tak'iñ. Yomix itaj junk'al ja'bil tsa' käk'ä ti lojtel jiñi tak'iñ. Yom ma' sajkañ juñtikil wiñik kämbilbä acha'añ, cha'añ mi' majlel ipi'äleñet, che' bakibä k'iñ ma' cha' sujtel awik'ot, mi kaj käk'eñla itojol, yom ma' majlel acha' taj jiñi tak'iñ.
Jiñi ángel Rafael mi' pi'leñ majlel Tobías
4Jiñi Tobías tsa' lok'i isajkañ juñtikil wiñik ikäñäbä jiñi bij, cha'añ mi' majlel yik'ot ti Media. Che' tsa' lok'i, tsa' k'oti itaj juñtikil ángel ik'aba' Rafael, kojach ma'añik tsi' ña'ta mi jiñäch iyángel Lak Yum.
5Che' jiñi Tobías tsi' k'ajtibe:
—Ch'itoñ, ¿Baki ch'oyolet?
Jiñi ch'itoñ tsi' jak'ä:
—Joñoñ lok'emoñ ti' p'olbal Israel, lajal bajche jatet. Wäle wolik sajkañ jiñi e'tel.
Tobías tsi' su'be:
—¿Käñä acha'añ jiñi bij majlembä ti Media? —Che'eñ.
6Jiñi ángel tsi' jak'ä:
—¡Kämbilku kcha'añ! Ti' pejtelel k'iñ mij kajñel ya'i. K'otemoñ ti jijlel ya' ti iyotot jiñi Gabael, juñtikil israelitabä chumulbä ya' ti Ragües ti Media. Ti Ecbatana k'äläl ti Ragües cha'p'ejl k'iñ mi lak xäñ majlel che' uts'atäch jiñi bijlel. Ili tejklumtak ya'añob ti iyojlil jiñi witstak.
7Jiñi Tobías tsi' isu'be:
—Awokolik yom ma' pijtañoñ cha'añ mik majlel ksu'beñ jiñi ktat, kom cha'añ ma' tilel awik'otoñ, ti wi'il che' mi lak kulel mi' kaj käk'eñet atojol.
8Awilañ, jiñi ángel tsi' iyälä:
—Mi kaj pijtañet, kojach mach yomik mi' ajalijel.
9Jiñi Tobías tsa' majli isu'beñ itat cha'añ tsa'ix itaja juñtikil wiñik ipi'älob tilembä ti Israel.
Jiñi itat tsi' yälä:
—Päyä tilel cha'añ mij k'ajtibeñ majki jiñi ipi'älob yik'ot majki jiñi iñojte'el, cha'añ che' jiñi muk'ix lak weñ käñe' majki mi' kaj imajlel awik'ot.
Jiñi Tobías tsa' lok'i, tsi' päyä tilel yik'ot tsi' su'be:
—Ch'itoñ, jiñi ktat woli ipäyet.
10Che' tsa' ochi jiñi ángel ti otot, ixku Tobit tsi' ñaxañ ak'ä ibä cha'añ mi' chukbeñ ik'äb. Jiñi ángel tsi' jak'ä:
—¡Yom ma' wu'biñ ka'bäl tijikñäyel!
Tsa' ijak'ä Tobit:
—¡Chukitobä tijikñäyel mejl ku'biñ. Xpotso'ñix yik'ot ma'añix mik mejlel k'el jiñi k'äk'al pañchañ; ik'toñañ baki añoñ bajche' chämeño'bixbä machbä woli yilañob jiñi k'iñ; kuxuloñ bajche' juñtikil sajtemixbä, mi' ku'bibeñ it'añ jiñi wiñikob, kojach ma'añik mij kilañob!
Jiñi ángel tsi' yälä:
—¡Yom axuk'chokoñ apusik'al ti Lak Yum, jiñi mi' kaj its'äkañet ti' se'el!
Tobit tsi' su'be:
—Jiñi kalobil Tobías yom majlel ti Media. ¿Mejl api'leñ majlel cha'añ ma' apäs jiñi bij? Joñoñ mij käk'beñet atojol.
Jiñi ángel tsi' jak'ä:
—Uts'atäch cha'añ mik majlel kik'ot, cha'añ klaj käñäyäch ti' pejtelel jiñi bijtak yik'ot ajñemoñäch ti Media, laj xäñäläch kcha'añ ti' pejtelel ijoktälel bajche' ja'el iwitstak yik'ot käñä kcha'añ pejtelel ibijlel.
11Tobit tsi' su'be:
—Awomba asu'beñoñ, ¿Majki jiñi api'älob yik'ot majki jiñi añojte'el?
12Jiñi ángel tsi' jak'ä:
—¿Chuki ye'tel ma' k'ajtiñ majki kpi'äl yik'ot majki kñojte'el?
Jiñi Tobit tsi' chäñ k'ajtibe majki iñojte'el.
13Jiñi ángel tsi' jak'ä:
—Joñoñäch Azarías, yalobiloñ jiñi ñukbä Ananías, juntikil israelitabä bajche jatet. Che'eñ.
14Che' jiñi Tobit tsi' iyälä:
—¡Ocheñ yik'ot tijikñäyel! Mach amich'esañ ti ikaj pejtlel chuki tsa'bä k'ajtibeyet, k'älä wäle muk'ix ña'tañ cha'añ jatet kp'iäletäch lojoñ. Uts'atobäch ba' tilemet ti api'älob.
»Che' ja'el jkäñä jiñi Ananías yik'ot Natán iyalobil jiñi xñox Semelías. Che'bä wolik majlel lojoñ ti Jerusalén, temel wolik pejkañ lojoñ Lak Ch'ujutat, ixku ma'añik bakibä k'iñ tsi' wis tajayob isojkemal, che' bakibä k'iñ tsa' yajliyob ti mulil jiñi ipi'älob, pejtelel awerañob laj xuk'ulob ipusik'al, ixku añojte'el weñ uts ipusik'al ja'el. Jiñ cha'añ tijikñesañ apusik'al.
15Jiñi Tobit tsi' su'be:
—Mi kaj käk'eñet cha'añ atojol ch'ämp'ej iyalel säklemañbä tak'iñ bajche'äch tojbil e'tel ti jujump'ejl k'iñ, mi añ yambä chukitak awom lajal mi kaj käk'eñet che' bajche' jiñi kalobil. 16Pi'leñ majlel kalobil, che' jiñi mu'to kcha' ak'eñet yambä atojol.
17Jiñi ángel tsi' jak'ä:
—Mach ma' mel apusik'al, joñoñ mi kaj kmajlel temel yik'ot awalo'bil; che' bajche' uts'at wolik majlel lojoñ che'äch mi kaj kcha' sujtel lojoñ, kome uts'atäch jiñi bij yik'ot weñ kämbil kcha'añ ja'el. —Che'eñ.
Tsa' ijak'be Tobit:
—¡La' ichujutesañet Lak Ch'ujutat!— Che'eñ.
Che' jiñi, Tobit tsi' päyä iyalobil ya'i tsi' iyälä:
—Chajpañ abä cha'añ ma' lok'el majlel ti bij temel yik'ot api'äl ti xämbal. Jiñi Lak Ch'ujutat ambä ti pañchañ mi' käñtañetla yik'ot uts'at mi la' cha' sujtel ti ktojlel. La' ipi'äleñetla majlel ti bij iyángel Lak Ch'ujutat yik'ot la' ikäñtañetla.
Che'bä tsa'ix ujti ichajpañob ibä, jiñi Tobías, tsi its'ujts'u itat yik'ot iña'.
—Uts'at mi' amajlel ya' ti bij.—Che'eñ jiñi Tobit.
18Ixku jini iña' tsa' kaji ti uk'el, tsa' kaji isu'beñ jiñi Tobit:
—¿Chukoch tsa' axik'i majlel ti ñajtäl jiñi kalobil? ¡Mach ba' jiñik lak ñä'te' che' bakibä k'iñ wä'añ lak kik'ot, jiñäch mi' majlel baki lak kom yik'ot mi tilel baki lak kom majlel! 19¿Chuki to ik'äjñibal che' añ ka'bäl lak tak'iñ che' mi lak sät jiñi lak kalo'bil? Mach ba' ñumeñik ik'äjñibal che' mi lak weñ käñtañ lak kalobil. 20¡Yik'ot cha'añ mu'bä iyäk'eñoñla Lak Yum jasäl cha'añ mi lak k'äñ ti chumtäl!—Che'eñ.
21Jiñi Tobit tsi' su'be:
—¡Mach amel apusik'al! K'ok' tsa' majli jiñi lak kalo'bil, k'okäch mi' kaj icha' julel che' bakibä k'iñ mi' k'otel iyorajlel cha'añ mi' cha' sujtel baki añet. 22Ixik, mach amel ach'ijiyemal, mach acha'leñ bäk'eñ, kome juñtikil jiñi ángel uts'atbä mi' pi'äleñ majlel ya' ti' pejtelel bij, mi' kajel icha' päybeñoñla tilel che' k'ok'äch yik'ot che' koltäbiläch.
23Che' jiñi, jiñi Sara tsa' ñäjch'i ti uk'el.
Markert nå:
Tobit 5: CholDc
Marker
Del
Kopier
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fno.png&w=128&q=75)
Vil du ha høydepunktene lagret på alle enhetene dine? Registrer deg eller logg på
© Biblia Chol de estudio con DC- Derechos reservados por SBM