Maariko 16
16
Ukuryoka ukwa Yëësu
(Mataayo 28:1-8; Ruuka 24:1-12; Yohana 20:1-10)
1Hano urusikö urwa Obhotooro rwaahööyë, Sarome, Maryamu uwa Maghidara, na Maryamu nyakuwaabho Yaakobho, bhakaghora amaghuta ghano ghakurumbaasa bhuuya, okore bhaghende okohaka ikihundughu ikya Yëësu. 2Urusikö urwa Jumapiri nyinkyo, hano iryobha ryaatoranga, bhakaghya ko-mbeehera iya Yëësu. 3Hano waanyöörrë bhakëërëngë ko-nshera, bhakabhoorania igha, “Bhoono, n-nawë araaturuusiri-ho reghena reera rërëngë ku-munywa ughwa embeehera haara?” 4Kasi hano bhaahikirë haangʼë, bhakamaaha reghena rinene reera rihingirrwë, ne-mbareka rërë.
5Hano bhaasöhirë mo-mbeehera, bhakamaaha-mo umumura ono yaarenga aibhöhirë singibho sendabhu. Aikaayë orobhareka urwa bhoryo ubhwa embeehera. Abhakari bhayö bhakaitakya bhököngʼu, 6kasi umumura uyö akabhatëëbhya igha, “Motakaitakya. Nemanyirë igha Yëësu uwa Nazarëëti ono bhaahanëkirë ko-mosarabha, we mukutuna. Aryökirë, ta-ahano hë! Momaahe hayö bhaamötöörrë. 7Bhoono moghende, mötëëbhi Peetero na abheegha bharikyaye igha, Yëësu abhatangatëëyë ukughya mo-mokowa ughwa Ghariraaya. Iyö yo moraasikane nawe kya bhono yaabhatëëbhëri.”#16:7 Maaha mo-ketabho ikya Maariko 14:28. 8Hano bhaaighuurë igho, bhakoobhoha bhakarighita, kora bhakaroghoora. Bhakarishoka kebhara, bhakatanora bharasenseera ukurwa mo-mbeehera hayö. Taaho ömöntö ono bhaatëëbhëri engʼana iyö, ko bhoora mbööbhöhirë bhököngʼu.
Yëësu arabhooshokera Maryamu uwa Maghidara
(Mataayo 28:9-10; Yohana 20:11-18)
[9Hano Yëësu yaaryökirë urusikö urwa Jumapiri nyinkyo shiri, yaabhööshökëëyë Maryamu uwa Maghidara ekembere, oora yaatirë-ko amasambwa muhungatë. 10Maryamu uwa Maghidara akaghya akatëëbhya bhano bhaabhanga hamwë na Yëësu. Enkaagha iyö mbaakuuranga bhabhaabhayëëyë. 11Kasi hano bhaaighuurë igha Maryamu uwa Maghidara arööshë Yëësu igha m-möhöru, tebhaakumiri hë.
Yëësu arabhooshokera abheegha bhabhërë
(Ruuka 24:13-35)
12Urusikö ruyöruyö, Yëësu akabhooshokera abheegha abhaaye bhabhërë. Abheegha bhayö nko-roghendo bhaarë, bharaghya mu-kishishi. Tebhaamomanyërrëëyi hë, ko bhoora n-tuubho iyëndë igho yaarë nayo. 13Hano bhaamanyirë igha we, bhakakyora ökötëëbhya bharikyabho, kasi bharikyabho bhayö, tebhaakumiri engʼana iyö hë.
Yëësu arabhooshokera abheegha ikömi na ömwë
(Mataayo 28:16-20; Ruuka 24:36-49; Yohana 20:19-23; Amangʼana agha Abhatomwa 1:6-8)
14Ekahekera-ho enkaagha, Yëësu akabhooshokera abheegha abhaaye ikömi na ömwë, hano bhaaryanga ibhyakorya. Akabhahamera ko bhoora bhaangirë ukukumya, ko bhono senkoro isyabho, syaangirë okoghoota amangʼana ghano bhaatëëbhiibhwi na bharikyabho bhano bhaamörööshë igha m-möhöru, aryökirë ukurwa mo-bhaku. 15Akabhatëëbhya igha, “Moghende ko-kebhara kyonswe igho, moraarekere abhantö bhonswe igho Amangʼana Amaiya. 16Ömöntö wowonswe igho ono araakumi, abhatiisibhwi, naraatööribhwi. Kasi, ömöntö wowonswe igho ono ataakumi, uyö naraabhotorrwe ikiina. 17Abhantö bhano bharaakumi, mbaaraakorenga ebhemanyërryö ibhya ukwata amasambwa ko-bhantö, ku iriina iryane, mbaraaghambenga ebheghambo ebhehya, 18na okoghoota sinshoka. Kora mbakaanywa ëkëntö keno keena isumu, tekebhakore ngʼana hë. Mbaraatoorrenga abharööyë amabhoko, bhahwena.”
Yëësu araghya mu-ryobha
(Ruuka 24:50-53; Amangʼana agha Abhatomwa 1:9-11)
19Hano Omonene Yëësu yaamarrë kushumaasha nabho, akagheghwa, ukughya mu-ryobha. Akaikara bhoryo ubhwa Waryobha. 20Abheegha abhaaye bhakatanora ukurwa hayö. Bhakaghya okoraareka Amangʼana Amaiya kera hasë. Omonene Yëësu yaabhahaananga obhotoro ubhwa ebhemanyërryö, ku bhuyö ni-igho yöörökëri igha, amangʼana ghayö n-ga obhoheene.]#16:9-20 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.
Markert nå:
Maariko 16: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
