Maariko 1
1
Yohana arasëëmërya Yëësu enshera
(Mataayo 3:1-12; Ruuka 3:1-18; Yohana 1:19-28)
1Kono nko okosemoka ukwa Amangʼana Amaiya agha Yëësu Kiristo,#1:1a Kiristo. Uyö we Waryobha yaahööyë igha, atööri abhantö na okobhatonga mo-Bhokama ubhwaye. Maaha mo-faharaasa. Omoona uwa Waryobha.#1:1b Omoona uwa Waryobha. Maaha mo-faharaasa. 2Ömörööti Isaaya yaandëkirë mo-ketabho ikyaye igha,
“Tamaaha, nendaatome umuhiri uwaane uwa amangʼana,
ono araakösëëmëri enshera.#1:2 Tamaaha, nendaatome umuhiri uwaane uwa amangʼana, ono araakösëëmëri enshera. Ensonga iyaamo ni-igha, asëëmi senkoro isya abhantö kya hano abhantö bhasëëmërya omokama enshera ahete-ko. Maaha mo-ketabho ikya Maraaki 3:1.
3Umuhiri uwa amangʼana uwaane uyö,
we arekonganga ku-riköngö igha,
‘Mösëëmëri Omonene Waryobha enshera,
mokore bhuuya ahasë hano araahete! ’#1:3 Maaha mo-ketabho ikya Isaaya 40:3.”
4Umuhiri uwa amangʼana uyö, yaabherekerwanga igha, Yohana Omobhatiisya. Mbe, Yohana uyö akaraarekera abhantö ku-riköngö iyö igha, bhahongore ëbhëbhë ibhyabho, bhabhitighe, bhabhatiisibhwi, okore Waryobha abhaabhere ëbhëbhë ibhyabho. 5Abhantö abhaaru ukurwa mu-mughi ughwa Yërusarëëmu#1:5 Yërusarëëmu. Maaha mo-faharaasa. na mo-mokowa ughwa Yudea ghonswe igho, bhakaghya ku-Yohana. Yohana akabhabhatiisya mo-mooro ughwa Yorodani, na eno bharaghamba harabhu igho ëbhëbhë ibhyabho.
6Yohana yaatooranga singibho isya amabhuri agha ityënyi eno ekobherekerwa igha engamia. Yaaibhohanga orokobha urwa riseero mo-bhokende. Ibhyakorya ibhyaye bheno yaaryanga, n-singighë na öbhöökë.
7Yohana yaaraarekanga araghamba igha, “Ömöntö naraashe nyuma iyaane, ono aana obhotoro konkera. Kora öni tiningʼarëëyi ukwihiinya ndamutighinkanera kya omoghorwa, ndatashora siinuugha isya ebheraatö ibhyaye.#1:7 Okotashora siinuugha isya ebheraatö. Hano ömöghëni yaasohanga mu-nyumba, omoghorwa uwa ubhwera obhoke okokera bhonswe igho, we yaatashoranga ebheraatö ibhya ömöghëni ko-maghörö, na ukumwisaabhya amaghörö. 8Öni na-manshë nkobhabhatiisirya, kasi umwene uyö, narebhabhaatiisya na Umwika Ömöhörëëru.”
Okobhatiisibhwa na ukushaashwa ukwa Yëësu ku-riköngö
(Mataayo 3:13–4:11; Ruuka 3:21-22, 4:1-13)
9Sinsikö siyösiyö igho, Yëësu akarwa mu-mughi ughwa Nazarëëti, mo-mokowa ughwa Ghariraaya, akaghya ku-Yohana. Yohana akamobhatiisya mo-mooro ughwa Yorodani. 10Hano Yëësu yaaibhokanga ukurwa mo-manshë, akamaaha mu-ryobha hahönyökirë, na Umwika Ömöhörëëru akamwitoomera kya ikighuuti. 11Engamba ekarwera mu-ryobha, ekaghamba igha, “Uwe no-Moona uwaane omoghonshe örë, ono ököntëghërya bhököngʼu.”
12Hayöhayö igho, Umwika Ömöhörëëru akatangata Yëësu ukughya ku-riköngö. 13Akabha-yo sinsikö merongo ene, arashaashwa na Oghosambwa.#1:13 Oghosambwa. Maaha mo-faharaasa. Yaarenga hamwë na sityënyi isya mwi-sisi. Abhamaraika ukurwa ku-Waryobha mbaamutighinkaneranga.
Abheegha bhano Yëësu yaashaaghööyë urwa mbere
(Mataayo 4:12-22; Ruuka 4:14-15, 5:1-11)
14Sekaheta-ho sinsikö sinsharu, Yohana akahirwa mo-kebhohe.#1:14 Yohana akahirwa mo-kebhohe. Yaahirrwë mo-kebhohe ko bhoora yaabhëëhirë ömötöngi Herode Antipa ko okoghera iya ëbhëbhë ibhyaye. Hano yaarenga mo-kebhohe, Yëësu akaghya mo-mokowa ughwa Ghariraaya. Akabha araraareka Amangʼana Amaiya agha Waryobha. 15Hano yaaraarekanga, yaaghambanga igha, “Enkaagha eno yaaröötirwë, ihikirë. Obhokama ubhwa Waryobha n-haangʼë bhörë. Mbe, ni-igha mohongore ëbhëbhë ibhyënyu, na mukumi Amangʼana Amaiya ghayö.”
16Urusikö urwöndë hano Yëësu yaahetanga mbareka iya inyansha iya Ghariraaya, akamaaha Simööni bhaana mura uwaabho enda ëmwë, ono yaabherekerwanga igha Anderea. Bhaarenga na emetegho ighyabho bharategha sinswë, ko bhoora m-batëghi bhaarë. 17Yëësu akabhatëëbhya igha, “Monsoorane, mobhe abheegha abhaane. Nendaabhëëghi ököghöötya abhantö, kya bhono mwaarë ököghöötyanga sinswë.” 18Kamwë igho, bhakatigha hayö emetegho ighyabho, bhakasoorana Yëësu.
19Hano yaaghëëyë mbere hake igho, hamwë na abheegha abhaaye abhabhërë bhayö, akamaaha Yaakobho bhaana mura uwaabho omoke ono yaabherekerwanga igha Yohana, bhayö m-bamura abha Zebhedaayo bhaarë. Bhaarenga mu-bhwato bharasobhoora emetegho ighyabho. 20Këmwë igho, akabhabherekera igha bhamosoorane, bhabhe abheegha abhaaye. Bhakatigha hayö suwaabho na abhaköri abha emeremo abhaaye mu-bhwato muyö, bhakasoorana Yëësu.
Yëësu araata risambwa ukurwa kö-möntö
(Ruuka 4:31-37)
21Mbe, Yëësu na abheegha abhaaye abhane bhayö, bhakaghya Kaperenaumu. Hano urusikö urwa Obhotooro#1:21a Obhotooro. Ko-Bhayahudi nu-rusikö urwa okosengerra na ukumuunya ukwene igho. Maaha mo-faharaasa. rwaahikirë, bhakasoha mu-nyumba iya esango iya Abhayahudi,#1:21b Inyumba iya esango iya Abhayahudi. Mu-Kiyunaani ni-igha, risinaghööghi. Maaha mo-faharaasa. Yëësu akasimya ukwëghya. 22Abhantö bhonswe igho bhano bhaamwitegherranga, bhakaroghoora kya bhono yëëghyanga. Keno kyaaghërrë bhakaroghoora, m-boora Yëësu atëëghyanga kya abhëëghya abha amaraghërryö agha Mosa.#1:22 Abhëëghya abha amaraghërryö agha Mosa. M-basömi abha amaraghërryö agha Mosa bhaarë, mbaasesoranga amaraghërryö ghayö na ukwëghya abhantö eteemo iyaako. Maaha mo-faharaasa. We yëëghyanga kya ömöntö ono aana obhotoro ukurwa ku-Waryobha.
23Mu-nyumba iyö iya esango iya Abhayahudi, yaare-mo ömöntö uwa risambwa, kamwë igho ömöntö uyö akakonga igha, 24“Uwe Yëësu uwa Nazarëëti, n-kë ukututuna-ko? Kasi wishirë igha utusiki? Nenkomanyirë igha, uwe nö-Möhörëëru uwa Waryobha örë.”
25Yëësu akahamera risambwa riyö igha, “Ukire kiri, urwe kö-möntö ono!” 26Risambwa riyö rekasingisya bhököngʼu ömöntö uyö, rekakuura bhököngʼu, rekamurwa-ko. 27Abhantö bhonswe igho bhakaroghoora bhököngʼu, bhakabhoorania igha, “Bhamurë eno ne-ngʼana kë? Amëëghyö amahya ghayö, ngaana ubhwera! Ghwiki, maaha, aana obhotoro ubhwa okohamera amasambwa, kora agheene ghonswe nkumwighwera gharë.” 28Ryaahëtirë ibhagha ike igho, abhantö abha mo-mokowa ughwa Ghariraaya ghwonswe igho, okanyoora bhaaighuurë amangʼana agha Yëësu.
Yëësu arahwënia abhantö
(Mataayo 8:14-17; Ruuka 4:38-41)
29Yëësu na abheegha abhaaye, Simööni, Anderea, Yohana na Yaakobho, bhakarishoka ukurwa mu-nyumba iya esango iyö, bhakaghya ka waabho Simööni na Anderea. 30Ni-igho bhaahikirë igho, Yëësu akatëëbhibhwa igha, nyakubhyara waabho Simööni nkö-bhörrë arë, araayë, aröörrë ehooma. 31Mbe, Yëësu akamusuntarra, akamoghoota okobhoko, akamöghörrökya. Enkaagha iyöiyö nyakubhyara uwaabho Simööni akahwena ehooma, akasimya okobhatighinkanera.
32Urusikö ruyöruyö hano Obhotooro bhwaahööyë,#1:32 Hano Obhotooro bhwaahööyë. N-Jumamöösi omoghoroobha yaarë, ko bhoora Abhayahudi bhaabharanga urusikö ukusimirya omoghoroobha okohekera omoghoroobha ughwa urusikö ruyö rokoroobhera. Abhëëghya abha amaraghërryö agha Mosa, bhëëghyanga igha, m-mughiro ukuhwënia ömöntö urusikö rwa Obhotooro. Ko okoghera iya engʼana iyö, nkyo okomaaha abhantö mbaaghanyirë ekahika omoghoroobha, ho bhakamanya okoreetera Yëësu abharööyë abhaabho. ko-moghoroobha, abhantö abha mu-mughi muyö, bhakareetera Yëësu abharööyë abhaaru, na bhano bhaarë na amasambwa. 33Abhantö abhaaru ukurwa mu-mughi ghuyö, bhakasikanera kö-bhööri ubhwa inyumba iyaabho Simööni na Anderea. 34Yëësu akahwënia abharööyë abha amarööyë hagharë hagharë. Ghwiki, akaata amasambwa amaaru, kasi tiyaaghategheranga umweya ughwa okoghamba engʼana yoyonswe igho, ko bhoora ngaamanyirë igha, Yëësu m-Moona uwa Waryobha.
Yëësu araghya okosaasaama kinyabhubhise
(Ruuka 4:42-44)
35Hano bhwaakëëyë, Yëësu akamuta nyinkyo shiri, akaghya ahasë hano abhantö bhatarë, akasimya okosaasaama. 36Mbe, Simööni na bharikyaye bhakaghya ukumutuna. 37Hano bhaamunyöörrë, bhakamötëëbhya igha, “Abhantö abhaaru bhaishirë, nu-uwe bhakutuna!”
38Kasi Yëësu akabhahonshora igha, “Toghende mu-bhishishi ibhyëndë bheno bhërëngë haangʼë na hano, okore ndaareke iyö honswe, ko bhoora emeremo ghiyö ngyo ghyaandeeta.” 39Mbe, akabha araghenda mo-mokowa ghonswe igho ughwa Ghariraaya, arëëghya mu-sinyumba isyabho siyö isya esango, na ukwata amasambwa ko-bhantö.
Yëësu arahwënia omoghenge
(Mataayo 8:1-4; Ruuka 5:12-16)
40Urusikö urwöndë omoghenge#1:40 Omoghenge. Nö-mörööyë uwa ekekobha ikya ömöbhërë. Abhaghenge tebhatunwanga igha bhaishooghane na bhano bhatarëngë abhaghenge. Kora okosoha mwi-sengerro, tebhaikërribhwanga hë. yaaishirë ku-Yëësu, akamotemera hansë ibhiru, akamosaasaama igha, “Hano oraahanshe, oratora ukunhwënia mbe na esaabhuuro iya ikidiini!”
41Yëësu akamwabhera, akarambora okobhoko ukwaye, akakunia omoghenge uyö. Akamötëëbhya igha, “Ni-igho nkutuna igha uhwene, obhe na esaabhuuro iya ikidiini.” 42Kamwë igho, omoghenge uyö akahwena, akarama. 43Yëësu akamuruusya-ho bhöngöbhöngö, 44aramokangʼasërrya igha, “Otakaatëëbhya ömöntö wowonswe oora amangʼana ghano. Kasi, kaghi wiyöröki kö-mösëngëri#1:44 Ömösëngëri. Amaraghërryö agha Mosa ghaaghambanga igha, ömösëngëri we akwitaaha nyoore ömöntö ahwënirë obhongenge. Maaha mo-ketabho ikya Amangʼana agha Abharaawi 14:1-32; Eheetoko iya Etoraati 24:8. Maaha mo-faharaasa engʼana, Abhasëngëri. uwa Waryobha. Oghende okore ikimwenso ikya okorama ukwaho, kya bhono Mosa yaaghambirë igha, abhaghenge bhano bharamirë obhoghenge bhakorenga igho, okore abhasëngëri hamwë na abhantö abhandë, bhamaahe bhono Waryobha akökörëëyë.” 45Kasi hano ömöntö uyö yaatanööyë ukurwa hayö, akasimya okoraareka amangʼana agha ukuhwena ukwaye kera ahasë. Ku bhuyö Yëësu akataamibhwa kya bhono araasohenga mu-mughi ghoghonswe igho ghoora,#1:45 Yëësu akataamibhwa kya bhono araasohenga mu-mughi ghoghonswe igho ghoora. Abhantö m-baaru bhano bhakaamwihöndërrëëyë okore abhahwëni. abhantö bhatamörööshë. Akabha araikara ahasë hano abhantö bhatarë, nokaanyoora igha ni-igho yaarë, kasi abhantö mbaashanga ku-Yëësu ukurwa hasë honswe igho.
Markert nå:
Maariko 1: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
