Mataayo 23
23
Yëësu arahamera Abhafarisaayo na abhëëghya abha amaraghërryö agha Mosa
(Maariko 12:38-40; Ruuka 11:37-52, 20:45-47)
1Mbe, Yëësu akatëëbhya amakomo agha abhantö na abheegha abhaaye igha, 2“Abhëëghya abha amaraghërryö agha Mosa na Abhafarisaayo, bhaana ubhwera ubhwa ukwëghya abhantö amaraghërryö agha Mosa. 3Moghoote bhuuya ghano bhakwëghya, na okokora kya bhoora bhakobhatëëbhya. Kasi motakaakora ghano bhakokora. Ko bhoora abheene tebhakokora na okoghoota ghaara bhakwëghya hë. 4Bho ni-mirigho imirito#23:4 Imirigho imirito. Ensonga iyaamo ni-igha, amaraghërryö agha abhëëghya m-maköngʼu ghaarë kya umurigho umurito ghono ömöntö ataatore ukughweteeka. ighya amaraghërryö bhakobhoha, bhaitëëkya abhandë ko-mareko, kasi abheene, tebhakughikunia-ko hë. 5Amangʼana ghonswe igho ghano bhakokora, nkokora bharë, okore bhamaahwe na abhantö. Ko bhoora nkotoora bharë ku-bhusyö na ko-mabhoko aghaabho, ibhighushi#23:5a Ibhighushi. Bhaabhibhohanga ku-bhusyö na ko-kobhoko ukwa bhömösi ko-nkaagha yonswe igho iya okosaasaama ku-Waryobha. Ghano ngo amaandeko ghano ghaatorwanga mu-bhighushi muyö. Maaha mo-ketabho ikya Ukurishoka 13:1-16; Eheetoko iya Etoraati 6:4-9, 11:13-21. ebhenene ibhya amaseero bheno bhyandëkirwë-mo amaraghërryö nyabhorebhe. Nkwëngërya bharë obhonene ubhwa amapindo agha singibho isya okosaasaamera Waryobha.#23:5b Obhonene ubhwa amapindo agha singibho isya okosaasaamera Waryobha. Abhëëghya abha amaraghërryö agha Mosa hamwë na Abhafarisaayo, bhaashonanga amapindo amanene agha singibho isyabho isya okosaasaamera, okore abhantö bhabhamaahe igha mbaingʼarëëyë ku-Waryobha. Kasi ti-igho Waryobha yaarenga abharaghërrëëyi mo-maraghërryö igha bhakore. Maaha mo-ketabho ikya Okobhara 15:37-41; Eheetoko iya Etoraati 22:12. 6Hano bhaaghya ku-nyangi, ni-bhitumbë ibhya abhantö abharito bhakutuna igha bhaikarre. Kora mu-sinyumba isya esango iya Abhayahudi, ni-bhitumbë ibhya mbere mbyo bhakutuna bhaikarre. 7Ghwiki nkutuna bharë bhököngʼu bhasookwenga na abhantö ko okobhakëërya mo-meteera, na ökötöönibhwa igha ‘Raabhi.’
8“Kasi bhëënyu motakaikërrya abhantö bhabhabherekere igha, ‘Raabhi.’ Ko bhoora Umwëghya uwëënyu nö-ömwë, na bhëënyu bhonswe igho m-bamwë mörë. 9Motakaasha okobherekera ömöntö wowonswe oora ko-kebhara kono, igha ‘Taata,’ ono atarëngë suwëënyu, ko bhoora Suwëënyu nö-ömwë igho, ono arëngë mu-ryobha. 10Motakaikërrya abhantö bhabhabherekere igha, ‘Umwëghya’ ko bhoora umwëghya uwëënyu nö-ömwë umwene igho, Kiristo. 11Ömöntö wowonswe ono akutuna igha abhe omonene mö-bhëënyu muyö, ni-igha akorre abhantö abhandë emeremo. 12Ömöntö wowonswe ono akwinënëhya, Waryobha nkumusuuhya arë. Kasi ömöntö ono akwisuuhya, Waryobha nkömönënëhya arë.
13“Haahö, bhare abhëëghya abha amaraghërryö agha Mosa, na bhëënyu Abhafarisaayo, bhëënyu m-baiköri mörë, ko bhoora igha, nkorebherra mörë abhantö okosoha mo-Bhokama ubhwa Waryobha kö amëëghyö aghëënyu. Bhëënyu abheene bhonswe temokosoha-mo hë. Kora mbe bhano bhakutuna okosoha, timukutigha bhasohe hë.
[14“Haahö, bhare abhëëghya abha amaraghërryö agha Mosa na Abhafarisaayo, bhëënyu na-bhaikörya mörë. Ko bhoora mokosaasaama Waryobha ku-ribhagha ritambë bhököngʼu okore momaahwe na abhantö, na eno mbe nkuruusya mörë abhasinö ëbhëntö ibhyabho. Ko okoghera iya amangʼana ghayö, murishibhibhwa bhököngʼu na Waryobha.]#23:14 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.
15“Haahö, bhare abhëëghya abha amaraghërryö agha Mosa na Abhafarisaayo, bhëënyu moraikörya. Ko bhoora nkwinaaranaara mörë ku-riköngö na kora moraamboka ukughya humbu, okore munyoore ömöntö ono araabhasoorane. Kasi hano mwamunyoora, nkomokora mörë abha omoona uwa mo-morro ghotakurima okokera bhëënyu abheene.
16“Haahö, bhare abhatangati bhano mörëngë abhahukuru. Ko bhoora nkwëghya mörë abhantö igha, ‘Te-bhoghogho hë, ömöntö ukutyana inyumba iya Waryobha. Kasi obhoghogho, hano araatyane esahaabhu eno iruusiibhwi esadaaka mu-nyumba iya Waryobha, hayö bhoono ni-igha ömöntö uyö, akore kya bhuyö atyanirë.’ 17Bhëënyu m-bakangi mörë, kora monga kya abhahukuru. N-këëhë ikya ubhwera okokera ikyëndë? Esahaabhu eno iruusiibhwi esadaaka mu-nyumba iya Waryobha, kasi ni-nyumba iya Waryobha eno ekoghesaabhuura? 18Ghwiki nkwëghya mörë abhantö igha, ‘Te-bhoghogho ömöntö ukutyana rimwensero irya mwi-sengerro irya Waryobha. Kasi obhoghogho, hano araatyane ikimwenso keno kërëngë ku-rimwensero. Hayö bhoono ni-igha ömöntö uyö, akore kya bhuyö atyanirë.’ 19Bhëënyu m-maheene igha, monga abhahukuru. N-këëhë ikya ubhwera okokera ikyëndë? Ni-kimwenso, kasi n-dimwensero reno rekosaabhuura ikimwenso kiyö? 20Mbe, hano ömöntö yatyana rimwensero irya mwi-sengerro irya Waryobha, nkunyoora örë atyanirë ikimwenso keno kërëngë ku-rimwensero. 21Hano ömöntö yatyana inyumba iya Waryobha,#23:21 Inyumba iya Waryobha. Maaha mo-faharaasa. uyö nkunyoora örë atyanirë na ku-Waryobha ono amuyö. 22Na ömöntö ono atyanirë mu-ryobha, uyö nkunyoora örë atyanirë ikitumbë ikya ekekama ikya Waryobha na ku-Waryobha ono akwikara ku-kitumbë ikya ekekama kiyö.
23“Haahö, bhare abhëëghya abha amaraghërryö agha Mosa na Abhafarisaayo, bhëënyu moraikörya. Ko bhoora nkuruusya mörë ikitweno ikya ikömi ikya ëbhëntö ibhya ubhwera obhoke kya imyöngö, ibhinshaari, na amaghuta. Kasi moranga amangʼana agha ubhwera ubhurito ubhwa amaraghërryö agha Mosa, kya ghaara agha okokora amangʼana agha heene, ikyabhera, na okobha ömöntö uwa heene ku-Waryobha na ko-bhantö. Kasi ni-igha mokore ghonswe igho, amake na amarito ghayö. 24M-batangati bhahukuru mörë, ko bhoora nkokenena mörë ensona, kasi moramera engamia.
25“Haahö, bhare abhëëghya abha amaraghërryö agha Mosa na Abhafarisaayo, bhëënyu moraikörya. Ko bhoora nkwikora mörë ko-bhantö igha m-bahörëëru mörë, mörööghya kebhara iya ekekombe na esahaani, kasi timukwöghya mönsë hë. Mönsë muyö haishööyë ubhwibhi na obhohoobhaaru. 26Bhëënyu Abhafarisaayo, monga kya abhahukuru, mutighe ëbhëbhë ibhyënyu bheno bhenga ubhunyanku bhono bhörëngë mo-kekombe. Hayö ho na emeremo ighyënyu ghyonswe, gheraashome kya hano ekekombe kyarabha hano kyöghibhwa kebhara.
27“Haahö, bhare abhëëghya abha amaraghërryö agha Mosa na Abhafarisaayo, bhëënyu na-bhaikörya mörë. Ko bhoora monga sembeehera seno sehakirwë ishokaa. Kighörö eno, nkunyoora örë sishömirë, kasi mönsë, na-maghuha agha abhaku agheene ghaamo, na ubhunyanku ubhwöndë bhwöndë igho bhishööyë-mo. 28Na bhëënyu bhonswe ni-igho mörë. Ko-bhantö moramaahekana igha, m-bantö abha heene mörë ku-Waryobha, kasi obhoheene ni-igha, mo-senkoro isyënyu, nu-bhwikörya ubhwenebhwene na öbhötëëyu mbo bhwishööyë-mo.
Yëësu ararootera ukushibhibhwa ukwa abhëëghya na Abhafarisaayo
(Ruuka 11:47-51)
29“Haahö bhare abhëëghya abha amaraghërryö agha Mosa na Abhafarisaayo, bhëënyu moraikörya. Ko bhoora nkohaghaasha mörë sembeehera isya abharööti abha Waryobha, na okosekona bhuuya sembeehera isya abhantö abha heene ku-Waryobha. 30Ho bhoono bhëënyu mukwighambera igha, ‘Singa twaare-ho ko-nkaagha eera iya abhakörö abhëëtö, tetokaaikererraini handë okobhatöörrya ukwita abharööti abha Waryobha.’ 31Nkwörökya mörë igha, bhëënyu bhonswe m-baghogho mörë kya abhakörö abhëënyu bhano bhaaitirë abharööti. 32Bhoono mbe momarërri ghaara abhakörö abhëënyu bhaatangirë kokora. 33Bhëënyu n-sinshoka, urwebhoro urwa sinshoka. Iyakë moraaibhashe ubhushibhu ubhwa Waryobha ubhwa okobharekera mo-morro ghotakurima?
34“Ko okoghera iya amangʼana ghayö, tamaaha, nendaatome abharööti, abhantö abhangʼaini na abhëëghya abha amaraghërryö agha Mosa. Abhandë moraabhaite, na okobhahaneka ko-mesarabha. Abhandë moraabhateme imishariti mu-sinyumba isya esango iyëënyu. Abhandë moraabhashobherenga kera umughi ghono bhakughya, okore mobhateese. 35Kiyö nkyo kereghera Waryobha abhashibhi, ko bhoora mukwita abhantö abha heene. Mwaakörrë igho, ukusimirya haara Kaini yaaitirë Abhëëri ono ataarenga na obhosarya bhwobhwonswe bhoora, okohekera ukwitwa ukwa Zakaria omoona uwa Bharakia. Zakaria uyö, yaakwërëëyë mwi-sengerro irya Waryobha, ghatë iya inyumba iya Waryobha na rimwensero.#23:35 Maaha mo-ketabho ikya Okosemoka 4:8; 2 Amangʼana agha Senkaagha 24:20-22. 36No-bhoheene nkobhatëëbhya igha, Waryobha narishibhya abhantö abha rekora reno ko amaghogho ghonswe igho ghano bhakokora.”
Righonshe irya Yëësu ku-mughi ughwa Yërusarëëmu
(Ruuka 13:34-35)
37Mbe, Yëësu akaghamba igha, “Bhëënyu abhantö abha Yërusarëëmu, bhëënyu! Moraita abharööti, na okotema na amaghena abhantö bhano Waryobha yaatoma. N-kaaru naakora omotono ughwa okobhakomania, kya hano engoko yakomania ibhishuushu mo-mabhabha aghaayo, kasi mokaanga. 38Ku bhuyö m-maheene igha, inyumba iyëënyu#23:38 Inyumba iyëënyu. Ensonga iyaamo eratora okobha igha, risengerro irya Yërusarëëmu haara, umughi ughwa Yërusarëëmu, handë ikyaro ikya Abhayahudi kyonswe igho. Maaha mo-ketabho ikya Mataayo 12:4, 21:23. neraabhe na ekesoma. 39Ndabhatëëbhya igha, temoremmaaha ghwiki hë, okohekera hano moreghamba igha, ‘Waryobha akongʼoore ono akuusha ko okohetera iriina irya Omonene Waryobha.’”#23:39 Maaha mo-ketabho ikya Zabhuri 118:26.
Markert nå:
Mataayo 23: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
