Yohane 12

Yesu watukutizgika mafuta ku Betaniya

(Mateyu 26.6-13; Marko 14.3-9)

1Mazuŵa ghankhonde ndi limoza lenga lindaze Phaska lo Yesu wanguza mu Betaniya, ko wenga Lazaro, mweniyo wangumuyuska ku ŵakufwa. 2Wangumunozge kurgha kwa mazuru kwenukuwa; ndipo Marta ndiyo wanguŵateŵete; kweni Lazaro wenga yumoza waku wo ŵatekanga pamoza nayo pa kurgha. 3Viyo Mariya, wanguti wato mwesu wa chema cha nardo leneko lakuzirwa, wangughapunguliya mu marundi ghaku Yesu, wangughaleska marundi gho ndi sisi lake: ndipo nyumba yo yinguzizika ndi kununkha kwa chema. 4Ndipo Yuda mKeriote yumoza wa ŵasambizi ŵake (yo wakhumbanga kumpachiya), wanguti, 5“Chifukwa chine chema ichi chengavi kusaskika ndrama machumi pe chumi ghatatu, ndi kupaskika ku ŵakavu?” 6Wangukamba ichi pa chifukwa chakuphwere ŵakavu cha; kweni chifukwa wenga munkhungu, ndipo pakuŵa wakusunga chikwama, wajitoliyanga vyo vya ŵikikangamo. 7Viyo wanguti Yesu, “Mureke; mwakuti cho wenacho wachisungiye ku zuŵa langu lakundiŵikiya. 8Chifukwa mwe nawo ŵakavu pamoza namwe nyengo zose; kweni kuti mwe ndi ine nyengo zose cha.”

9Viyo urapasi wa ŵaYuda po ŵanguvwa kuti wenga kweniko: ŵanguza, pa chifwa chaku Yesu pe cha, kweni so kuti ŵakamuwone Lazaro, yo wanguyuska ku ŵakufwa. 10Ŵazukuru ŵara ŵangupangirana kuti Lazaro nayo Wabaye; 11pakuti ŵanandi ŵa ŵaYuda pa chifwa chake ŵarutanga ndi Wavwananga mwaku Yesu.

Kasereredu ka ufumu kaku Yesu mu Yerusalemu

(Mateyu 21.1-11; Marko 11.1-11; Luka 19.28-40)

12Ndi mlenji mzinda ukuru, wo unguziya dghera, ŵachivwa kuti Yesu watuza ku Yerusalemu 13ŵanguto mphanda za ŵakanchindu, ŵangutuwa kwachikumana nayo, ndipo Wakamburanga, “Hosana! Ngwakutumbikika yo watuza mu zina la Mbuya, Karonga waku Yisraele!” 14Ndipo Yesu, wanguti wasaniya kambunda, wangujapo; mo kwalembeke,

15“Mungopanga cha, mwa ŵanthu ŵaku Zioni:

awona, Karonga wako watuza,

wakugara pa mwana wa mbunda.”

16Ŵasambizi ŵake ŵengavi kuwamo ichi pa mtendeku; kweni penipo Yesu wangukankhuskika sono Wangukumbuka kuti ivi vingulembeke iyo, ndi kuti ŵangumchitiya iyo vyenivi. 17Viyo wasimikizganga mzinda wo wenga pamoza nayo, wachidana Lazaro ku muunda, ndi kumyuska ku ŵakufwa. 18Chifukwa chenichi mzinda wo ungwachikumana nayo, pakuti wanguvwa kuti wanguchita chisimikizgu ichi. 19Viyo ŵaFarisi ŵangunenerana mwaku ŵija, “Kuti kutitanduliya kanthu cha; awonani, charu chose chiruta pavuli pake.”

20Ndipo ŵanguŵapo ŵaGriki ŵanyake mwaku wo ŵangukwere ku Yerusalemu kwachisopa pa dghera. 21Yaŵaŵanguza kwaku Filipu, waku Betesaida waku Galile, ndipo ŵamuŵeyerenga, ŵakuti, “Bwana, tikhumba kuwona Yesu.” 22Filipu wanguza wangunene Andreya: Andreya ndi Filipu, ŵanguza ŵangumnene Yesu. 23Ndipo Yesu wanguŵamuka, “Ora lo laza, lakuti wakankhuskike Mwana wa munthu. 24Nadidi ndikuneneskiyani, kwambura kuti nje ya trigu yawa mu charu ndi kufwa, yijaririya yija pe, kweni asani yingafwa, yipasa vipasi vinandi. 25Wakwanja umoyo wake wautaya; ndipo wakutinkha umoyo wake mu charu wakausungiyanga ku umoyo wamuyaya: 26asani yumoza watinditeŵete, wandirondonge; ndipo ko nde ine, kweniko waŵenge mteŵete wangu nayo: asani yumoza watinditeŵete, Ada amrumbenge.

Yesu wakamba ndi kukomwa kwake ndi nyifwa yake

27“Sono usuzgika mzimu wangu; ndipo ndikambengenji? ‘Ada, nditaskeni ku ora lenili?’ Awa pakuti pa chifwa chenichi ndikuziya ku ora lenili. 28‘Ada, kankhuskani zina linu.’ ” Viyo kunguza liu lakutuwa kuchanya, lakuti “Ndalikankhuska, ndipo ndilikankhuskenge so.” 29Viyo mzinda wo ungumapo unguvwa, ndipo kunguti, “Kwagunda.” Wamwenga ŵanguti, “Mungelo warongoro nayo.” 30Wangwamuka Yesu, wanguti, “Liu lo kuti laziya pa chifwa chaku ine cha, kweni chifukwa chinu. 31Sono kwe cheruzgu cha charu chino: sono wakapong'ekanga kubwaro muusi wa charu ichi. 32Ndipo ine, asani ndasoskeka panupasi, ndiguziyenge ŵanthu wose kwaku ndamweni.” 33Kweni wangukamba ichi, pakusimikizgiya nyifwa yo wangwenere kufwa. 34Mzinda wo ungumwamuka, “Ifwe tavwa ku langulu lo, kuti Kristu wakajaririyanga muyaya. Ukamba uli iwe, mwana wa munthu watenere kusoskeka? Njani uyu Mwana wa munthu?” 35Wanguŵanene Yesu, “Nyengo yimanavi Kungweruka kweche mukati mwinu. Mwendenge mweche nako kungweruka, winu mdima ungamsaniyani; pakuti wakwenda mu mdima kuti waziŵa ko watiya cha. 36Mweche nako kungweruka, vwanani mu Kungweruka ko, alinga kuti muŵe ŵana ŵa Kungweruka.”

Wanguti warongoro yagha Yesu, wanguruta ndi wangubisama kutuwako kwaku wo. 37Kweni chingana wanguchita visimikizgu vyenivinandi viyo paurongo paku wo, kuti wanguvwana mwake cha; 38mwakuti ghafiskike mazu ghaku Yesaya, mchimi, ghakuti,

“Ambuya, njani wavwana mu chitaula chidu?

Ndipo janja la Ambuya lavumbulikiya kwaku yani?”

39Chifukwa chenichi kuti wanguziwa kuvwana cha, pakuti wangukamba so Yesaya,

40“Waburumutuzga maso ghawo,

ndipo wanonopeska mtima wawo;

vinu ŵangalereska ndi maso ghawo,

ndi ŵangawamo ndi mtima wawo,

ŵangang'anamukiya kwaku ine

ndipo ine ndingaŵachizga.”

41Vyenivi wangukamba Yesaya, pakuti wanguwona unkhankhu wake; ndipo wangurongoro vyapaku iyo. 42Ndikweni chingana ndimu ŵara ŵanandi ŵanguvwana mwaku iyo; kweni chifukwa chakopa ŵaFarisi wo reka ŵatondekanga kumzomera pakweru vinu wangasezgeka ku sinagoge: 43chifukwa ŵangwanja kurumbika ndi ŵanthu kwakuruska kurumbika ndi Chiuta.

44Viyo Yesu wangukambura, wanguti, “Wakuvwana mwaku ine, kuti wavwana mwaku ine cha, kweni mu Wakundituma. 45Ndipo yo wawona ine wawona Wakundituma. 46Ndaza Kungweruka mu charu, alinga kuti yose wakuvwana mwaku ine wangajaririyanga mu mdima cha. 47Ndipo asani yumoza wangavwa mazu ghangu, ndi wareka kughasunga, ine kuti nditumweruzga cha; chifukwa kuti ndinguziya kuti nderuzge charu cha, kweni kuti ndichitaske charu. 48Wakupata ine ndi wakureka kuronde makambidu ghangu, we nayo wakumweruzga: mazu gho ndarongoro, ghenagha ghakumweruzga mu zuŵa lakumariya. 49Chifukwa ine kuti ndajirongorore gha paku ndija cha; kweni Dada wakundituma, ndiyo wandilanguliya cho ndikambenge, ndi cho ndirongoronge. 50Ndipo ndiziŵa kuti langulu lake mbumoyo wamuyaya. Viyo cho ndirongoro ndicho Dada wandikambiya, kuti ndirongoro.”

Markert nå:

Yohane 12: TongaMw

Marker

Del

Kopier