มาระโก 14
14
ปึง มอ เคิบ ปึง อาจาน กึด อง มเบิล เยซู
มัดทิว 26:1-5, ลูกา 22:1-2, ยอน 11:45-53
1ทาเน ควะ เปียะ งิ ก็ เล็ห งิ เทซกาน เปซา#ค 1 เปซา เป็น งิ ตี อัห ซะลอง นอย อัห ซะลอง งิ ตี เอาซาง เว็น ควัน เกา ครำ อิซราเอล ตัก อิง ตัก ปะเทด อียิบ เทซกาน เน อัห แอง 7 งิ ตึง 7 งิ นัน อัห ป็อง คนมปัง ตัก ไอ มี ซิห เจือ ยีด เป็น งิ ตี อัห ป็อง คนมปัง ตัก ไอ มี ซิห เจือ ยีด ญาม นัน ปึง มอ เอาซาง แกะ เคิบ ปึง อาจาน ครำ ยิว อัห ก็ กึด และ รวง ลอด เญ็บ เยซู อัห ซีรอก มเบิล แอ็ม นำ 2ปึง ซะ แกะ นัน อัห ก็ ไล นอย คือเน “ตัก งิ ป็อง เลียง เน แอ อำ งเคาะ เญ็บ นำ เตาะ นเจิก ตืน พซาซน เลอะ ญุง จ็อง วัล” อัห อัง
อัหเม เงด นำฮอม ตัก กึ เยซู
มัดทิว 26:6-13, ยอน 12:1-8
3ญาม นัน เยซู เริล ตัก งวัล เบทานี นำ ก็ พัก อุ ตัก เจิง ซีโมน ตี เกย เป็น คีเฮือน อัห กำลัง ป็อง จะ อุ ก็ มี อัหเม มี ล็อง นำ ก็อง ควด นำฮอม นาระดา โตะ และ เยซู#ค 3 อัห เอิด เกียง แอง ควด เลาะลัห ซีเละ นำฮอม นัน อัห เอิด เกา นาระดา แอง ซียุม ซีเละ ควด ก็ เป็น เกียง เลาะลัห แปง ซีเละ นำฮอม ก็ เป็น นาระดา ล็อนๆ แปง ญิม ซีเละ
ทาเน นำ ก็ เซ็ม แอ็ม งอก ควด นำฮอม เงด ซิห ตัก กึ เยซู 4เจ็นนัน ก็ มี ครำ แกด ล็อง ไอ มี ปอใจ อัง อัหเม ล็อง นะ อัห ก็ แร็ด จ็อก ซิห อัหเม ล็อง นะ อัห ก็ โป นำ คือเน “มัห ไจ นำฮอม เปือง ไบ 5กัน เท็จ ก็ กุญ เงิน ดก ดาย กุญ 300 เลียน มอก ญิม ลับจาง มี วาง#ค 5 เงิน เลียน อัห นัน เป็น ญิม จาง มี งิ เอิด เงิน นัน แจก อน ตัก ครำ ตุก ครำ ญาก ก็ กุญ” อัห แร็ด จ็อก เคิบ นำ ฮุนนะ 6แต เยซู ไล อัห คือเน “ตามแต นำ เตาะ อำ แป โป นำ ดาย นำ แอง อน เอิญ คือเน ก็ เลาะ ซีเละ 7ครำ ตุก ก็ มี ดก อัห อุ เคิบ แป ตลอด แป จวย อัห ญาม นเดย ก็ กุญ แต เอิญ เน ไอ มี ควะ อุ เคิบ แป ตลอด ดาย 8อัหเม ล็อง เน นำ แอง เลาะ เตา ตี นำ แอง กุญ นำ ก็ เพีย ตา นำฮอม ตัก นัง เอิญ วาล เอิญ เปิล วาล อัห เทิ๊บ เอิญ 9เอิญ ไล แป นังเลาะ นะ ดาย กัน มี ครำ เริล เลามุน คาว เลาะ คาว แลม คอง เอิญ ตัก นเดย ทัว โลก แพนซิก เน อัห ก็ ต็อง เลามุน เลือง อัหเม ล็อง เน ระ ครำ ลุห นโทล อัง นำ บัดนะ” เยซู อัง
ยูดาด ตกลง ฮักลัง เยซู
มัดทิว 26:14-16, ลูกา 22:3-6
10ทาเน ก็ มี ยูดาด อิซคารีโอด นำ เป็น ลูกนอง เยซู ใน ปึง ซิบซอง ล็อง นัน นำ ก็ ทอก เริล และ ปึง มอ เอาซาง แกะ นำ ซีรอก ฮักลัง เยซู มอบ เยซู อน ตัก อัห 11อัห เม็จ แญง ยูดาด ไล ออ อัห ก็ เลาะใจ อัห ก็ ซันญา อง อน เงิน ตัก นำ เจ็นนัน ยูดาด ก็ และ รวง มอบ เยซู อน อัห
เยซู ไล อัห เตียม งาน งิ เปซา
มัดทิว 26:17-25, ลูกา 22, ยอน 13:21-30
12เจ็นนัน ก็ เล็ห นวจ ครำ ยิว ซะลอง เทซกาน ป็อง คนมปัง ตี ไอ มี ซิห เจือ ยีด นัน อัห ซะลอง เทซกาน เปซา งิ แรก เป็น งิ ตี อัห มเบิล ควัน แกะ ซำรับ อัห ป็อง ซะลอง เปซา นัน#ค 12 “อัห มเบิล ควัน แกะ” ทวาย อน เอาซาง ดอม อิซราเอล ญาย 12:3-9 ปึง ลูกนอง ก็ ซ็วน เยซู “อาจาน มัห ระ อิห เพีย เริล เตียม ระ ซะ เคิง นเดย ซำรับ แอ ป็อง ซะลอง บ็อห” อัห อัง 13นำ ก็ ไล ลูกนอง เปียะ ล็อง เพีย เริล และ ตี นำ ไล ปาม คือเน “ปา กุด เริล ใน เมือง ดาย ปา ก็ เม็จ อัหคล็อง มี ล็อง ตอล ปม ออก โตะ ปา ก็ ต็อง เคริบ เอา นัน เริล 14กัน นำ กุด เจิง นเดย ปา ก็ กุด เจิง นัน ปา ก็ ซ็วน งกี เจิง นัน คือเน ‘อาจาน ไล เยอะ ซ็วน มัห เลือง ฮ็อง ป็อง เปซา ดาย ฮ็อง นะ ตี มัห ระ อิห ป็อง เลียง เคิบ เยซู นัน อุ ตัก นเดย บ็อห’ ปา ต็อง ซ็วน นำ คือนะ ดาย 15กัน ปา ซ็วน นำ งกี เจิง ก็ ซับ ปา ดอม ฮ็อง จ็อง อุ จัน ลัห ทึห ฮ็อง นัน อัห จัด เตียม เลียบลอย แลว ปา ก็ แอง ซะ ป็อง ระ เคิง นัน บึด แอ ก็ ป็อง ตัก นัน ดาย” เยซู อัง 16ลูกนอง เปียะ ล็อง นัน ก็ เริล ใน เมือง ปาม ก็ กิว เม็จ จู มบลึ ฮุน แญง ตี เยซู ไล อน ซีเละ ปาม ก็ เพีย แอง ระ ซะ ป็อง มด ซำรับ อัห ป็อง ซะลอง งิ เปซา นัน
เยซู เค็ย มี ครำ อง ฮักลัง ออ
17ทาเน ก็ แจ็ล เยซู เคิบ ลูกนอง ซิบซอง ล็อง ก็ โตะ 18ญาม อัห กำลัง ป็อง เลียง อุ เยซู ก็ ไล อัห คือเน “เอิญ ไล แป นังเลาะ นะ ดาย มี มี ล็อง ใน ปึง แอ เน ฮักลัง เอิญ งวะ นำ ก็ คุด ป็อง คนมปัง เลิม เคิบ เอิญ เน” เยซู อัง 19ปึง ลูกนอง ก็ เลอะ เซียใจ มด อัห ก็ ซ็วน นำ มี ล็อง มี จุบ “ซีเอ บ็อห ไอ แมน เอิญ ก้า” อัห อัง 20นำ ก็ ซวัล อัห “มี มี ล็อง ใน ปึง แป ซิบซอง ล็อง เน นำ ก็ เอิด คนมปัง จิ มี ท็วย เดียว เลิม เคิบ เอิญ เน 21เอิญ ตี เอาซาง ระ เกิด เป็น ครำ เน เอิญ ต็อง เปิล ฮุน นังซือ เอาซาง เคียน ระ อน ซีเละ แต เอา นัน ตี ฮักลัง เอิญ นำ ต็อง กุญ โทด ดก กัน นำ ไอ มี เกิด โตะ เป็น ครำ ก็ เลาะ” เยซู อัง
เยซู ป็อง คนมปัง เคิบ ออก ปุจ องุน ลบ ซุดทาย
มัดทิว 26:26-30, ลูกา 22:15-20, 1 โคริน 11:23-25
22ญาม อัห กำลัง ป็อง เลียง นอย อุ นัน เยซู ก็ เอิด คนมปัง มี แพ็น คอบคุน เอาซาง นำ ก็ เพก อน ตัก ลูกนอง ป็อง นำ ลด ไล อัห คือเน “ป็อง นทึห เตาะ ดาย เน เป็น นัง คอง เอิญ” นำ อัง 23เจ็นนัน นำ ก็ เอิด ปุจ องุน คอบคุน เอาซาง นำ ก็ อน ตัก อัห ออก กวัด มด 24“พุย ตัก จอก เน ซีแล็ม เค็ย เมียม คอง เอิญ เอาซาง ซันญา แลว เค็ย นำ ญ็อก แอ็ม ตี ลุห ครำ จู ล็อง ก็ กุญ เอาซาง เม็จ เมียม เอิญ เน นำ ก็ กิว ญ็อก แอ็ม ตี ลุห ครำ ซีเละ เอิญ เซีย เมียม ออ เพือ จวย ครำ ดก ซีเละ#ค 24 มานะ เน แอ ออก ปุจ องุน ระ แอ กึด เลือง เยซู ตี นำ เซีย เมียม เปิล แตน แอ มอก เมียม แกะ ตัก อิง ระ ครำ เครม กึด เลือง ครำ แก แอ็ม ลุห อง โตะ เปิล แตน อัห แทะ ลอล ซะไม นัน ไอ มี ตัน โตะ เยซู 25เอิญ ไล แป นังเลาะ นะ เจ็นเน นโดน เอิญ ไอ มี ออก ปุจ องุน เน วัล เตาะ เอิญ ไอ มี ออก จำปอ เล็ห งิ ตี เอาซาง โตะ ปกคอง โลก งิ นัน ซัง เอิญ ออก แมะ” นำ อัง แลว เยซู ไล อัห คือนะ แลว อัห ก็ ลอง เพลง ลือ เอาซาง 26แลว อัห ลอง เพลง ลือ เอาซาง แลว อัห ก็ ลด ทอก เริล ตัก ญวัง แพะ ค็อก เทด พาโนน #ค 26 ญวัง แพะ ค็อก เทด นัน อุ ติ ซะ เมือง เยรูซาเล็ม นัน
เยซู เค็ย ปึง ลูกนอง ปัด พระ ออ
มัดทิว 26:31-35, ลูกา 22:31-34, ยอน 13:36-38
27อัห เล็ห ตัก ญวัง แพะ ค็อก แลว เยซู ก็ เพีย ไล ลูกนอง ออ คือเน วัล “งวะ แป จู ล็อง ก็ พระ แอ็ม เอิญ มอก ลาม เคียน ระ อน ตัก นังซือ เอาซาง คือเน ‘เอิญ มเบิล แอ็ม ครำ เลียง แกะ แกะ ก็ เลอะ ปัด เริล มี นัง มี ตี’ นำ อัง เซคารียา 13:7
28แต ญาม เอิญ เปิล ลบ รีด เล็ห แลว เอิญ ก็ เพีย เริล วาล เพา แป อุ ตัก จังวัด กาลิลี” เยซู อัง
29เปโตร ก็ เทียง เยซู คือเน “เอิญ ไอ มี พระ มัห ดาย อัห จู ล็อง พระ แอ็ม มัห มด ก็ ตึก แต เอิญ ไอ มี จบ พระ มัห เตาะ” นำ อัง 30เยซู ก็ ไล เปโตร คือเน “มัห จำ ระ อน ดาย แจ็ล เน งวะ วาล ไอ ตัน ตอด ไก เปียะ ลบ มัห ก็ ไล อัห แพะ ลบ เค็ย ไอ มี เม็จจึด เอิญ” เยซู อัง 31แต เปโตร เฮง เทียง เยซู “กัน มัห เปิล เอิญ ก็ ญอม เปิล เลิม เคิบ มัห เอิญ ไอ มี จบ มแบล มัห เตาะ” นำ อัง ปึง ลูกนอง จู ล็อง ก็ ไล นำ คือนัน มด อัห เค็ย ญอม เปิล เลิม เคิบ เยซู มด
เลือง เยซู ครอ วอน เอาซาง ตัก ซวน เกดเซมะนี
มัดทิว 26:36-46, ลูกา 22:39-46
32เจ็นนัน อัห ก็ เริล ตอ วัล อัห โตะ ตัก มี ตี นัน ซือ ตัก เกดเซมะนี เยซู ก็ ไล ปึง ลูกนอง คือเน “แป คุด เพา เอิญ ตัก เน วาล ดาย เอิญ เริล ครอ วอน เอาซาง วาล” นำ อัง 33เยซู ซับ เปโตร เคิบ ยากอบ เคิบ ยอน เริล เลิม นำ แร็ง ตุกใจ ไอ มี เลาะใจ ซัก มี ติด เตาะ 34นำ ก็ ไล อัห คือเน “เอิญ ไอ มี จบ เลาะใจ เตาะ เอิญ เซียใจ บัก และ เปิล ดาย แป เพา ปัง นึง อุ เน วาล อำ แป อวย ดาย” นำ อัง
35นำ ก็ นจาง เริล ซม มี ตีดต็อง นำ ลด ญุล คุด ครอ วอน เอาซาง “เอา กัน แอง กุญ ก็ ครอ ระ ควัน ปน แอ็ม เจ็น ซะ ตุก ซะ ญาก เน ดาย” เยซู อัง 36นำ ก็ ครอ วอน เอาซาง วัล “อับบา#ค 36 อับบา ซีแล็ม เค็ย “เอา” เอา เฮย มัห แอง จู มบลึ ก็ กุญ ครอ อำ มัห ระ เอิญ ต็อง โซะ ต็อง เปิล แต อำ แอง ตาม ใจ เอิญ ดาย ครอ ระ มัห แอง ตาม ใจ ออ ฮัก” เยซู อัง
37เยซู ครอ วอน เอาซาง แลว นำ ก็ วัล โตะ และ ปึง ลูกนอง นำ เม็จ อัห ลิงลัก อวย อุ นัน นำ ก็ ลด ซ็วน เปโตร คือเน “ซีโมน เฮย มัห อวย อังวะ เต็ห มัห เพา เอิญ มี ญาม เดียว ไอ มี กุญ เออะ 38แป ต็อง ปัง นึง ปัง นาง อุ เลาะๆ ดาย แป ต็อง ครอ วอน เคิบ เอาซาง เพือ ไอ มี ระ ซีวะ ลอง ใจ แป ระ แป แอง ลุห วัล ใจ แป ซีรอก แอง เลาะ แต นัง แป แมด” นำ อัง
39นำ ก็ เริล ครอ วอน เอาซาง วัล มี ลบ นำ ก็ ครอ มอก เครม นัน 40นำ ก็ วัล โตะ และ อัห เม็จ อัห ควะ อวย อุ วัล แร็ง เจ็ม มัด อัห อัห เม็จ เยซู โตะ และ ออ อัห ก็ ไอ มี จางรู จ็อก จังนัก 41-42ทาเน นำ ก็ เริล ครอ วอน เอาซาง วัล นำ ลบ วัล โตะ และ อัห เป็น แพะ ลบ ตึง ลบ เน ก็ ไอ มี ตัน อัห ร็อห ลัก นำ ก็ พร็อห อัห วัล “ร็อห เนอ แป วาง อวย ระ งาล ฮิว กา ปอ เตาะ แอ เริล ดาย เล็ห เวลา อัห บัก และ เญ็บ เอิญ มอบ อน ตัก ครำ ไอ มี เลาะ แลว เอา นัน ตี ฮักลัง เอิญ ก็ ติ โตะ แลว” เยซู อัง
อัห เญ็บ เยซู
มัดทิว 26:47-56, ลูกา 22:47-53, ยอน 18:3-12
43เยซู จ็อก ไอ มี ตัน จบ ก็ พด โตะ ยูดาด ตัก เป็น ลูกนอง ใน ปึง ซิบซอง ล็อง นัน ทาเน ก็ มี ครำ ดก ล็อง โตะ เลิม เคิบ ยูดาด เพาะวา มี ปึง มอ เอาซาง แกะ มี ปึง เอา แกะ ซอ วัล มี ปึง อาจาน ครำ ยิว วัล ปึง ซะ แกะ เน ไล อัห โตะ อัห ก็อง ดาบ ก็อง ซีงคัล โตะ และ เยซู 44ยูดาด เพีย ไล อัห วาล แลว คือเน “เอิญ มุก คาง ล็อง นเดย แป ก็ เอิด ล็อง นัน แป เญ็บ คุม นำ เริล แก็นๆ เลาะๆ” นำ อัง 45ทาเน ยูดาด ก็ โตะ นำ ติ โตะ ตัก เยซู นำ จ็อก คือเน “อาจาน” นำ อัง นำ ลด จูบ ซิห คาง เยซู 46อัห ก็ ลด เญ็บ เอิด เยซู ลด 47แต มี มี ล็อง นะ ญ็อง อุ เลิม เคิบ เยซู นำ โรจ เอิด ดาบ มพาด แล็ห นโทล ลูกนอง มอ เอาซาง จ็อง 48เยซู ก็ ไล อัห คือเน “แป ก็อง ดาบ ก็อง งคัล โตะ เญ็บ เอิญ มอก เอิญ เป็น โจน นอ 49เอิญ อุ เคิบ แป เอิญ นเจ็น แป ตัก วิฮาน เอาซาง จูงิๆ แป ก็ ไอ มี เญ็บ เอิญ (ก็ ซีวะ แป โตะ เญ็บ เอิญ มานะ) แต ตี แป แอง ฮุนเน มานะ ก็ ต็อง กิว เป็น เล็ห ซีเละ ต็อง เป็น เล็ห ฮุน อัห เคียน ระ ตัก นังซือ เอาซาง ซีเละ” นำ อัง
50ทาเน ปึง ลูกนอง ก็ ปัด พระ แอ็ม เยซู มด 51มี อัหคล็อง นุมๆ มี ล็อง นะ นำ จึห คัว พา ลินนิน มี พลัห เดียว นำ เคริบ เยซู เริล อัห ก็ เล็ว เญ็บ นำ 52แต นำ ปรึห พระ แอ็ม คัว ลด ปัด แอ็ม นัง ลือ
ปึง ซะพา ซอบ ซวน เยซู
มัดทิว 26:57-68, ลูกา 22:54-55, 22:63-71, ยอน 18:13-14, 18:19-24
53เจ็นนัน อัห ก็ เอิด ซับ เยซู ตัก เจิง มอ เอาซาง จ็อง ทาเน ปึง มอ เอาซาง แกะ ปึง อาจาน ครำ ยิว เคิบ ปึง ซะ แกะ อัห ก็ รอม นอย อุ พอม มด เคิง นัน 54แต เปโตร เคริบ เยซู เริล เยอะ ซะ แดๆ จำปอ โตะ ตัก เด็นเตะ เจิง มอ เอาซาง จ็อง นำ ก็ คุด จืล โอด อุ เคิบ ปึง เพา ญาม 55ปึง มอ เอาซาง แกะ เคิบ ปึง คนะ กำมะกาน มด อัห ก็ โตะ พซุม นอย อัห และ ครำ เป็น พญาน พอง นำ ระ อัห มเบิล นำ กุญ แต อัห และ พญาน ตี เม็จ เยซู แอง ลุห ก็ ไอ มี กุญ เตาะ
56ทาเน ปึง มอ นัน ก็ ลบ วัล และ พญาน คีอู ดก ล็อง วัล แต อัห ไล มี ยาง มี ล็อง 57มี แกด ล็อง จบ แอง คีอู คือเน 58“อิห เม็จ แญง นำ เค็ย นำ อง รึห แอ็ม วิฮาน เน ตัก ครำ แอง นำ ก็ เค็ย แอง วิฮาน แมะ วัล แพะ งิ ก็ แลว นำ อัง แต นำ เค็ย วิฮาน แมะ นัน ไอ แมน เป็น ครำ แอง เตาะ” อัห จบ แอง คีอู คือนะ 59แต ปึง พญาน นัน ก็ ไล ไอ มี เมือนนอย
60ทาเน มอ เอาซาง จ็อง ก็ ซีนุก ร็อห นำ ก็ ซ็วน เยซู กาง มัด อัห ฮุนเน “อัห จบ เค็ย มัห จ็อก คือนะ มัห ไอ มี ซวัล อัห ซัก มี แญง เออะ” นำ อัง 61แต เยซู เค็ด อุ ไอ มี นำ ซวัล อัห เตาะ มอ เอาซาง จ็อง ก็ ซ็วน นำ วัล “มัห กิว เป็น เมซียา ซีเละ อัน มัห กิว เป็น ควัน เอาซาง ตี มี เกียด ดก นังเลาะ อัน” มอ เอาซาง อัง
62“เออะ บัดนะ แป ก็ เม็จ เอิญ ตี เอาซาง ระ เกิด เป็น ครำ เน คุด อุ เพียห เลาะ คอง เอาซาง แป ก็ เม็จ เอิญ โตะ เลิม เคิบ บด เจ็น วาง ทึห” เยซู อัง 63มอ เอาซาง จ็อง ก็ ซาก แร็ห โกบ ออ นำ ลด ไล อัห คือเน “แอ และ พญาน วัล อังวะ เตาะ 64แป ก็ เม็จ แญง นำ โป ดูทูก เอาซาง แลว แป อัง นำ จังนัก” นำ อัง “นำ ต็อง เปิล” อัห อัง 65แกด ล็อง ก็ จ็วห มัด เยซู อัห ปอก มัด นำ อัห กุย นำ อัห ก็ ซ็วน นำ คือเน “มัห กะ เอิด ซีเอ กุย มัห เน” อัห อัง ปึง เพา ญาม ก็ มพัห มัด นำ วัล
เปโตร มแบล เค็ย ไอ มี เม็จจึด เยซู
มัดทิว 26:69-75, ลูกา 22:56-62, ยอน 18:15-18, 18:25-27
66ทาเน เปโตร ควะ อุ เซ็บ ตัก เด็นเตะ เจิง มอ เอาซาง จ็อง นัน เจ็นนัน ก็ โตะ อัหเม มี ล็อง เป็น ครำ ฮับไจ คอง มอ เอาซาง จ็อง นัน 67นำ เม็จ เปโตร จืล โอด อุ นัน นำ ลด ไล เปโตร คือเน “มัห ก็ อุ เลิม เคิบ เยซู ครำ นาซาเร็ด นัน ดุห” นำ อัง 68เปโตร ก็ มแบล แอ็ม “มัห เค็ย ซีวะ นะ เอิญ ไอ มี เคาใจ ซัง” เปโตร อัง เปโตร ลด ปัด เพา อุ นดิ ปะตู งเกริก เจ็นนัน ก็ ตอด ไก
69ทาเน อัหเม ล็อง นัน ลบ วัล เม็จ เปโตร นำ ก็ ไล อัห ตัก ญ็อง อุ พานัน “เอา เน เป็น ปึง เยซู เต็ห” นำ อัง 70แต เปโตร ก็ มแบล วัล เค็ย “เอิญ ไอ มี เม็จจึด เคิบ เยซู เตาะ” นำ อัง อุ ซม มี ญาม วัล ปึง อัห ตี ญ็อง อุ พานัน ก็ ไล เปโตร คือเน “มัห เป็น ครำ ปึง เยซู ซีเละ มัห เป็น ครำ กาลิลี ดุห” อัห อัง 71แต เปโตร เฮง เคิบ คิน นัง ออ “ล็อง ตี แป เค็ย นัน เอิญ ไอ มี เม็จจึด นำ” เปโตร อัง
72ทาเน ไก ก็ ตอด วัล เป็น เปียะ ลบ อี ตอด เปโตร ก็ ลด พุล ลุห นโทล อัง แญง ตี เยซู ไล นำ เคิน “วาล ไอ ตัน ตอด ไก เปียะ ลบ มัห ก็ มแบล เค็ย ไอ มี เม็จจึด เอิญ แพะ ลบ” เยซู อัง เปโตร ลุห นโทล แลว นำ ก็ แร็ง ลุหใจ เซียใจ นำ ก็ ลด นซาก เญ็ม จ็อง
Markert nå:
มาระโก 14: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
