มาระโก 11
11
อัห ตอนฮับ เยซู เป็น พะเจายูฮัว แมะ
มัดทิว 21:1-11, ลูกา 19:28-40, ยอน 12:12-19
1เจ็นนัน เยซู เคิบ ลูกนอง ก็ เริล เมือง เยรูซาเล็ม ญาม อัห ติ เล็ห ตัก เมือง เยรูซาเล็ม นัน อัห ก็ เล็ห ตัก งวัล เบฟายี เคิบ งวัล เบทานี ตัก อุ นดิ ญวัง แพะ ค็อก นัน เยซู ก็ ไล ลูกนอง เปียะ ล็อง เพีย เริล ตัก นัน วาล 2เยซู ไล ปาม คือเน “ปา เริล งวัล งคม นัน ดาย ปา ก็ เม็จ ลา แย็ด มี นัง ตัก นัน ท็อก อุ ลา แย็ด นัน ไอ มี ซีเอ ตัน ต็อก ปา ก็ ต็อง อีด ทาล ซวร ซับ ตัก เอิญ แต็ห เน ดาย 3กัน อัห ซ็วน ปา เค็ย ‘ปา เอิด ลา แย็ด เริล อังวะ’ ปา ก็ ต็อง ไล อัห เค็ย ‘งกีจ็อง โซะ กุญ งวะ นำ ก็ ซับซง อน’ ปา ต็อง ซวัล อัห จังนะ ดาย” เยซู ไล ปาม จังนะ
4ปาม ก็ เริล ออ ปาม ก็ เม็จ ลา แย็ด มี นัง นัน ซีเละ อัห ท็อก เย็ห อุ ตัก ปะตู เปล รวง เย็ห ก็ ญ็อง อุ นัน
ปาม ก็ อีด ทาล 5ญาม ปาม กำลัง อีด ทาล นัน ก็ มี ครำ ญ็อง อุ ติ พานัน อัห เม็จ ปาม อีด ทาล ลา นัน อัห ก็ ซ็วน ปาม “ปา อีด ทาล ลา แย็ด นัน อังวะ เต็ห” อัห อัง 6ปาม ก็ ซวัล ฮุน เยซู ไล อน นัน อัห ก็ ระ ปาม เอิด ลา แย็ด นัน เริล 7ปาม ก็ ซวร ซับ ลา แย็ด นัน อน ตัก เยซู อัห ก็ เอิด โกบ ออ ลาบ ตัก เคา ลา นัน ระ เยซู ต็อก เริล เยซู ก็ ต็อก ลา นัน เริล รวง เมือง เยรูซาเล็ม 8ทาเน ก็ มี ดก ครำ อุ ติ งวัล เบทานี นัน อัห เอิด โกบ เอิด วะ ลาบ ตัก รวง จ็อง มบรัห ก็ มเพ็จ เอิด งกอง นทู ลำ ลาบ ตัก รวง จ็อง นัน 9ครำ ตัก เริล วาล เยซู เคิบ ครำ ตี เริล แทะ ลอล อัห งกรอ อัห ลือ นำ เริล คือเน
“ครอ ลือ มัห ดาย มัห แกะ ทีซุด มัห เป็น ล็อง นัน ตี เอาซาง ไล โตะ ตัก อิห เน ครอ ระ เอาซาง แอง เลาะๆ ซิห มัห เนอ ครอ ระ มัห จเริน เริล ติกๆ ดาย 10ครอ ระ เอาซาง แอง เลาะๆ ซิห พะเจายูฮัว ล็อง เน ตัก เป็น ควัน งา ดาวิด เอาจ็อง คอง แอ ตัก อิง นำ บัก และ โตะ ตัง เมือง แมะ แลว ไซโยๆ ครอ ลือ เอาซาง ตัก แกะ ทีซุด เนอ” ปึง พซาซน อัง
11เยซู ก็ กุด เริล เมือง เยรูซาเล็ม นำ ลด กุด ตัก วิฮาน เอาซาง นำ กวา โละ ดอม ซะ จู มบลึ ทัว วิฮาน มด ทาเน ก็ บัก และ แจ็ล แอ็ม แลว เยซู เคิบ ลูกนอง ก็ ลด ทอก เจ็น เมือง เยรูซาเล็ม เริล ตัก งวัล เบทานี
เยซู จม งวย เกา แพะ คุล
มัดทิว 21:18-19
12คือ งิ กรัก ตัก งกร็อห เยซู เคิบ ลูกนอง ก็ เริล เจ็น งวัล เบทานี และ กุด เมือง เยรูซาเล็ม เยซู ก็ โซะ จะ 13นำ ก็ เม็จ เกา แพะ คุล มี เกา นำ เม็จ เจ็น เยอะ ซะ แคร็วๆ นทู นัน นำ ก็ เริล โละ และ แพละ นำ ซีรอก ป็อง ญาม นำ โตะ เคิ๊ด เกา แพะ คุล นัน แลว นำ ก็ ไอ มี เม็จ แพละ ซัก มี และ มี แต นทู ลือๆ มด ตึง เกา เป็น ตัก ไอ มี ตัน เล็ห นวจ แพละ 14เยซู ก็ ลด จม งวย เกา แพะ คุล นัน “เจ็นเน นโดน ไอ มี ซีเอ กุญ ป็อง แพละ คอง มัห วัล เตาะ” นำ อัง นำ จ็อก คือนัน ปึง ลูกนอง ก็ เม็จ แญง นำ มด
เยซู มบรึห ปึง ปอกา ปัด เจ็น วิฮาน
มัดทิว 21:12-17, ลูกา 19:45-48, ยอน 2:13-22
15ทาเน อัห ก็ เริล ติกๆ อัห ก็ เล็ห ตัก เมือง เยรูซาเล็ม เยซู ก็ กุด ตัก วิฮาน เอาซาง ทาเน นำ ก็ เม็จ อัห เท็จ ซะ ทน ซะ อุ ตัก วิฮาน นัน นำ ก็ มบรึห อัห ปัด มด นำ ก็ ควำ แอ็ม โตะ ตี อัห แลก เงิน ตี อัห คุด เท็จ เซ็ม งกรุก นำ ก็ ควำ แอ็ม มด 16ครำ ตี คน ซะ ลัด เริล ลัด วัล ตัก เด็นเตะ วิฮาน นัน เยซู ก็ มบราง อัห มด นำ ไอ มี ระ ซีเอ คน ซะ ลัด พาน เริล ตัก เด็นเตะ วิฮาน นัน เตาะ 17นำ ก็ โป อัห คือเน “นังซือ เอาซาง เคียน ระ อน คือเน ‘วิฮาน คอง เอิญ มี ระ อน ซำรับ ครำ จูกรอกๆ ทัว มด ครอ วอน เอาซาง แต แป วัล แอง ระ เป็น ตี อุ ปึง โจน’” นำ อัง 18ทาเน ปึง มอ เอาซาง แกะ เคิบ ปึง อาจาน ครำ ยิว เม็จ เยซู จ็อก คือนัน อัห ก็ และ รวง มเบิล แอ็ม นำ เป็น ตัก อัห นเจิก อัง นำ เพาะวา ปึง พซาซน เลอะ งึด อัง แญง ตี เยซู ไล อัห ตลอด 19แจ็ล แมด ซะ เยซู เคิบ ลูกนอง ก็ ทอก เริล เจ็น เมือง อิซยา 56:7, เยเรมี 7:11
ลูกนอง เยซู งึด อัง เกา แพะ คุล มเบิล
มัดทิว 21:20-22
20ตัก งกร็อห อัห ก็ นจาง เริล รวง เครม นัน อัห และ เริล เมือง เยรูซาเล็ม วัล อัห ก็ เม็จ เกา แพะ คุล นัน มเบิล แอ็ม มด มเบิล เจ็น มแบ็จ จำ เกรด นเซ็บ 21เปโตร ก็ พุล ลุห นโทล ตี เยซู งวย เกา แพะ คุล งิ เซ็น นำ ก็ ซ็วน เยซู “อาจาน เกา แพะ คุล ตี มัห งวย นัน มเบิล แอ็ม แลว นอ” นำ อัง
22เยซู ก็ ซวัล ปึง ลูกนอง “แป เจือ เอาซาง ดาย 23เอิญ ไล แป นังเลาะ นะ กัน เอา นเดย เจือ เอาซาง ไอ มี ซงไซ ซีวะ ใน ใจ ออ นำ ไล ญวัง เน ญาย เริล มพลิห อุ ตัก นอก ทะเล ก็ กุญ กัน นำ เจือ เค็ย แอง กุญ ก็ กิว กุญ นังเลาะ 24เอิญ ไล แป ซีเละ นะ ญาม แป ครอ วอน เอาซาง เลือง ซีวะ แป ต็อง เจือ เค็ย กุญ กัน แป เจือ ก็ กิว กุญ นังเลาะ ดาย
25ทาเน ญาม แป ครอ วอน เอาซาง กัน แป ควะ ลุห เคิบ ซีเอ แป ก็ ต็อง อู นอย ระ เคาใจ นอย เลาะๆ วาล ดาย แอง คือเน เอา คอง แป ตัก อุ วาง นทึห นำ ก็ ญ็อก แอ็ม ลุห แป” เยซู อัง 26#ค 26 นังซือ เอาซาง แกด เล็ม มี คอ 26 วัล “แต กัน แป ไอ มี ญอม ญ็อก แอ็ม โทด นอย เอา คอง แป ตัก อุ วาง นทึห นำ ก็ ไอ มี ญ็อก แอ็ม โทด แป เมือนนอย” เยซู อัง
อัห เทียง เยซู เลือง อำนาด คอง นำ
มัดทิว 21:23-27, ลูกา 20:1-8
27ทาเน อัห ก็ ลบ วัล โตะ เมือง เยรูซาเล็ม วัล มี ลบ เยซู ก็ นจาง อุ ใน วิฮาน เอาซาง ปึง มอ เอาซาง แกะ เคิบ ปึง อาจาน ครำ ยิว เคิบ ปึง ซะ แกะ ซอ อัห ก็ โตะ และ นำ 28อัห ซ็วน นำ คือเน “มัห มี ซิด ซีวะ มบรึห อัห ปัด บ็อห ซีเอ ไล มัห แอง” อัห อัง
29เยซู ก็ ซ็วน อัห วาล “เอิญ ครอ ซ็วน แป มี คอ เดียว วาล ดาย กัน แป ซวัล กุญ เอิญ ก็ ไล อน ตัก แป เค็ย ซีเอ ระ เอิญ มี ซิด แอง ซะ เน 30เอิญ ก็ ซ็วน แป คือเน วาล ยอน ตี จุบ อัห ตัก นอก นัน เอาซาง ไล นำ แอง ลู ครำ ไล นำ แอง แป ซวัล เอิญ วาล กา” เยซู อัง
31ปึง นัน ก็ ไอ มี จางรู ซวัล นำ เตาะ อัห ก็ ซ็วน นอย คือเน “แอ ซวัล นำ จังนัก เลาะ บ็อห กัน แอ เค็ย เอาซาง ไล ยอน จุบ อัห ตัก นอก นำ ก็ โป แอ คือเน วัล ‘ซีวะ แป ไอ มี เจือ ยอน’ 32แต กัน แอ ซวัล เค็ย ‘ยอน แอง ตาม กำกึด ออ ฮัก’ ก็ ไอ มี เลาะ ปึง พซาซน ก็ ไอ มี ปอใจ เคิบ แอ วัล” อัห อัง เค็ย นอย เจ็นนัน อัห ก็ ไอ มี ฮาน ซวัล เยซู เตาะ เป็น ตัก อัห นเจิก อัง พซาซน เพาะวา ปึง พซาซน เจือ เค็ย ยอน เป็น ลาม เอาซาง ซีเละ 33อัห ก็ ลด ซวัล เยซู คือเน “ตอ อิห ไอ มี เม็จจึด” อัห อัง เยซู ก็ ซวัล อัห “เออะ ดิห เอิญ ก็ ไอ งกิ ไล แป เมือนนอย ซีเอ ระ เอิญ มี ซิด แอง ซะเน เอิญ ก็ ไอ งกิ ไล แป เตาะ” นำ อัง
Markert nå:
มาระโก 11: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
