ลูกา 5
5
เลือง เยซู มพอล ลูกนอง เริล เคิบ ออ
มัดทิว 4:18-22, มาระโก 1:16-20
1แทะ นัน วัล เยซู ก็ เริล จังวัด กาลิลี มี มี งิ นัน นำ ญ็อง นเจ็น พซาซน อุ ตัก เปล นอก ทะเล กาลิลี นัน ปึง พซาซน ก็ แดก นอย โตะ ปัง แญง เอาซาง ตัก นำ 2ทาเน นำ ก็ เม็จ เฮือ เปียะ ลำ จอด อุ ตัก เปล นอก ทะเล นัน เป็น เฮือ ครำ โละ คา แต ไอ มี ควะ ครำ ตัก เฮือ นัน เตาะ ครำ โละ คา นัน อัห ทอก เจ็น เฮือ แลว อัห กำลัง พุห อวน อุ#ค 2 อวน อวน อัง ฮุน แน็ง แต จ็อง พลัห ดัว ซีเละ 3เฮือ มี ลำ นัน เป็น เฮือ ซีโมน เปโตร ทาเน ดก ครำ แดก เยซู เยซู ก็ ไอ มี ซีรอก ระ อัห แดก ออ เยซู ก็ ลด ต็อก เฮือ ซีโมน นัน นำ ก็ ไล ซีโมน ญู เฮือ เริล ตัก นอก ตีดต็อง นำ ก็ ลด คุด ตัก เฮือ นัน ซอน อัห ปึง พซาซน ก็ ปัง นำ อุ ตัก ซะร็อห
4แลว เยซู นเจ็น อัห แลว นำ ก็ ไล ซีโมน คือเน “แป ทอย เฮือ ซับ ตัก นอก จุๆ โตน นัน ดาย แป ซิห อวน เอิด คา ตัก นัน” นำ อัง
5ซีโมน ก็ ซวัล นำ คือเน “อาจาน อิห และ คา มด แจ็ล เคิน แลว ไอ มี อิห กุญ ซีวะ ซัก มี นัง แต กัน มัห ไล อิห ลอง ซิห อ็อญ วัล อิห ก็ ลอง ซิห อ็อญ นอ” ซีโมน อัง
6เจ็นนัน อัห ก็ ซับ เฮือ เริล ตัก นอก จุๆ นัน อัห ก็ ลาก อวน ตัก นัน แคระ คา ดก ซีเละ แร็ง ดก แคระ คา อวน ก็ บัก และ กิด แอ็ม 7แร็ง ดก กุญ คา อัห ก็ งกรอ เปือน ตัก อุ เฮือ มี ลำ วัล โตะ จวย เอิด คา อัห ก็ กุญ คา ปิ เฮือ ตึง เปียะ ลำ เฮือ ก็ บัก และ จม แอ็ม วัล
8ซีโมน เปโตร เม็จ กุญ คา ดก ฮุนนัน นำ ก็ คุกโคล กราบ ไว เยซู นำ ไล เยซู ฮุนเน “อาจาน เอิญ เป็น ครำ ลุห ครำ บาบ ซีเละ อำ มัห ติ อุ เคิบ เอิญ เตาะ ครอ ระ มัห อุ เยอะๆ ซะ เจ็น เอิญ ดาย เอิญ ไอ มี ซมควน ติ อุ เคิบ มัห ซัง” นำ อัง 9ตี ซีโมน ไล เยซู คือนัน ก็ เพาะวา นำ แร็ง งึด อัง คา นัน จู ล็อง ตี เริล โละ คา เลิม อัห เม็จ กุญ คา ดก คือนัน อัห ก็ ญ็อก งึด มด
10ทาเน ก็ มี ยากอบ เคิบ ยอน อุ นัน เลิม ปาม ก็ และ คา เลิม เคิบ ซีโมน นัน ปาม เป็น ควัน เซเบดี ปาม ก็ งึด อัง เมือนนอย ทาเน เยซู ก็ ไล ซีโมน คือเน “มัห อำ นเจิก เตาะ ดาย เจ็นเน นโดน เอิญ ไล มัห เริล และ ครำ ฮัก ไอ แมน โละ คา เตาะ” นำ อัง 11อัห ก็ ซับ เฮือ ตัก ซะร็อห อัห ก็ ลด พระ เฮือ พระ อวน มด จู มบลึ ลด เต็ก เยซู เริล
เยซู จวย ครำ คีเฮือน
มัดทิว 8:1-4, มาระโก 1:40-45
12มี ลบ นัน เยซู ก็ เริล อุ ตัก งวัล มี งวัล วัล ก็ โตะ อัหคล็อง มี ล็อง นำ เป็น คีเฮือน มด ตึง นัง นำ เม็จ เยซู แลว นำ ก็ โตะ กราบ ไว เยซู นำ ครอ ระ เยซู จวย ออ
“อาจาน ครอ ระ มัห จวย เอิญ ดาย กัน มัห ซีรอก แอง ระ เอิญ งาล คีเฮือน เน มัห ก็ แอง กุญ มด” ครำ คีเฮือน นัน อัง
13เยซู ก็ นจืน ที พระ ซิห ตัก เอา ล็อง นัน#ค 13 ซะไม นัน ครำ ยิว อัห ก็ นเจิก อัง คีเฮือน ซีเละ กด โมเซด ก็ มบราง อัห เริล ติ ซะ ครำ ตี เป็น คีเฮือน นัน ไอ มี ระ แคระ อัง นัง อัห ซัก มี ติด เยซู ก็ ไล นำ ฮุนเน “เอิญ จวย มัห ดาย มัห งาล คีเฮือน นทึห เตาะ” นำ อัง เอา นัน ก็ ลด เลาะ เล็ห งาล แอ็ม คีเฮือน มด ตึง นัง
14แลว เยซู รักซา นำ แลว เยซู ก็ มบราง นำ ไอ มี ระ นำ ไล อัหซอ เค็ย เยซู จวย นำ “อำ ไล ซีเอ เด็ดคาด เค็ย เอิญ แอง ระ มัห งาล โซะ เน ดาย อำ ไล อัห เตาะ แต มัห ต็อง เริล มแบละ นัง ออ อน ตัก มอ เอาซาง ระ มอ เอาซาง ตวด ดอม นัง มัห วาล แลว มอ เอาซาง ตวด ดอม นัง มัห แลว มัห ต็อง ทวาย ซะ อน ตัก เอาซาง มอก กด โมเซด ไล อน เลือง ครำ งาล คีเฮือน นัน โมเซด ไล ครำ งาล คีเฮือน ทวาย ซีวะ มัห ก็ ต็อง ทวาย ซะ นัน นเซอะ อัหซอ จู ล็อง เม็จจึด เค็ย มัห กิว งาล คีเฮือน เลาะ แลว” เยซู อัง
15เยซู ไอ มี ระ ล็อง นัน ไล อัหซอ แต เอา ล็อง นัน นำ ไอ มี ปัง เตาะ นำ ไล อัห ติกๆ เลือง เยซู แอง ครำ งาล โซะ ก็ แปร เริล ติกๆ ครำ พานเดย พากวา ก็ เลอะ เม็จ คาว เลือง เยซู มด อัห ก็ รูบ โตะ ปัง แญง นำ อัห ก็ รูบ โตะ รักซา โรก ออ ตัก นำ ดก มบลึ 16แต ดก ลบ เยซู ปัด เริล ครอ วอน เอาซาง ตัก ซะร็อห ทึห ตัก ตี ไอ มี ครำ นัน กด เอาซาง 14:2-32
เยซู จวย ครำ แว็ล
มัดทิว 9:1-8, มาระโก 2:1-12
17มี มี งิ นัน เยซู ก็ นเจ็น แญง เอาซาง อน อัห มี ตี นะ ทาเน ก็ มี ปึง ฟาริซี เคิบ ปึง อาจาน ไล กด โมเซด คุด ปัง อุ เลิม นัน ปึง ฟาริซี เคิบ ปึง อาจาน เน อัห โตะ เจ็น ดก ตี อัห โตะ มด จู งวัล ทัว จังวัด กาลิลี ครำ จังวัด ยูเดีย ครำ เมือง เยรูซาเล็ม ก็ โตะ แด ทาเน เยซู ก็ ซอน อัห อุ นัน นำ ก็ มี แร็ง มี อำนาด คอง งกีจ็อง อุ เลิม จวย ระ นำ รักซา ครำ โซะ กุญ มด
18ทาเน ญาม เยซู ซอน อัห อุ ควังใน เจิง มี ลัง นะ ก็ มี ครำ งโกง ซับ ครำ อำมาพาด มี ล็อง ตัก เยซู อัห งโกง ซับ นำ มด ตึง ตี อวย นัน อัห และ รวง กุด ซับ นำ ตัก เยซู 19อัห และ รวง กุด ไอ มี กุญ แร็ง ดก ครำ ปุด ปิ เจิง มด ไอ มี อัห กุญ ซับ นำ ตัก เยซู เตาะ ทาเน อัห ก็ งโกง ซับ ครำ แว็ล นัน ตัก ซีนุม ทึห อัห ก็ รึห แอ็ม ซีนุม ตีดต็อง ซือ เยซู ซอน อัห อุ นัน อัห รึห ปอ มพลิห ครำ แว็ล นัน กุญ เจ็นนัน อัห ก็ ท็อก ทาล ตี อวย ครำ แว็ล นัน มพลิห นำ เลิม เคิบ ตี อวย นัน อัห มพลิห นำ เคิง มัด เยซู นัน
20เยซู เม็จ ครำ ตี งโกง ล็อง นัน เจือ ออ เลาะ คือนัน นำ ก็ ลด ไล ครำ แว็ล นัน คือเน “ควัน เฮย ตี ลุห คอง มัห เอิญ ญ็อก แอ็ม แลว ดาย” เยซู อัง
21ทาเน ปึง ฟาริซี เคิบ ปึง อาจาน ซอน กด โมเซด นัน อัห เม็จ เยซู จ็อก คือนัน อัห ก็ กึด ใน ใจ ออ คือเน “เอ ล็อง เน นำ เป็น ซีเอ บ็อห นำ ญ็อก แอ็ม ตี ลุห ครำ ไอ มี กุญ ก้า นัก ฮาน นำ เค็ย ออ ญ็อก แอ็ม ตี ลุห อัห กุญ มี เอาซาง มี ล็อง เดียว ตี ญ็อก แอ็ม ตี ลุห ครำ กุญ นำ จ็อก จังนะ ก็ นำ โป ดูทูก ดูแควน เอาซาง แอ็ห” อัห อัง
22แต เยซู เม็จจึด แลว อัห ไอ มี ปอใจ ตี นำ เค็ย ญ็อก แอ็ม ตี ลุห ล็อง นัน นำ ลด ซ็วน อัห คือเน วัล “ก็ เป็น ตัก ซีวะ แป กึด ฮุนนัน บ็อห 23เอาซาง มี ล็อง เดียว มี ซิด ญ็อก แอ็ม ตี ลุห ก็ แมน เอาซาง มี ล็อง เดียว ตี แอง ระ ล็อง เน งาล ก็ แมน
24แต เอิญ ไล แป นังเลาะ นะ เอิญ ตี เอาซาง ระ เกิด เป็น ครำ เน ตัก โลก เน เอิญ กิว มี ซิด มี อำนาด ญ็อก แอ็ม ตี ลุห ครำ ก็ กุญ ดาย เอิญ ระ ล็อง เน งาล โซะ แป ก็ เคาใจ กุญ” เยซู ไล อัห จังนะ
เยซู ก็ ลด ไล ครำ โซะ นัน คือเน “มัห ร็อห ดาย มัห เอิด ตี อวย ออ วัล เจิง ดาย” นำ อัง 25แลว เยซู ไล ครำ แว็ล นัน ร็อห แลว ครำ แว็ล นัน ก็ ลด คุล ร็อห กาง มัด ครำ ดก นัน นำ ก็ เพล็ว ตี อวย ออ ตอล ซับ เจิง นำ ก็ ลือ เอาซาง เริล 26อัห เม็จ นำ เลาะ เล็ห ฮุนนัน อัห ก็ เลอะ งึด เลอะ นเจิก มด อัห ลด มพอล นอย ลือ เอาซาง วัล อัห ก็ จ็อก เคิบ นอย คือเน “บัห นอ งิ นะ เน แอ เม็จ ซะ แปลก ไบ แปลก เบอ นอ” อัห อัง
เยซู มพอล เลวี เริล เคิบ ออ
มัดทิว 9:9-13, มาระโก 2:13-17
27แทะ นัน วัล เยซู ก็ เริล ออ นำ ก็ เม็จ ครำ เก็บ พาซี มี ล็อง ซือ ตัก เลวี นำ คุด เก็บ พาซี อุ ตัก ดาน เก็บ พาซี นัน เยซู ก็ มพอล นำ เริล เคิบ ออ “มัห เริล เคิบ เอิญ ดาย” เยซู อัง 28เลวี ก็ ลด พระ ซะ พระ วะ มด จู มบลึ ลด เริล เคิบ เยซู
29ทาเน เลวี ก็ จัด งาน ป็อง เลียง จ็อง ตอนฮับ เยซู ตัก เจิง ออ มี ครำ เก็บ พาซี เคิบ อัหซอ ดก ล็อง คุด ป็อง เลียง อุ เลิม
30ทาเน ก็ มี ปึง ฟาริซี แด เคิบ ปึง อาจาน ซอน กด โมเซด แด อัห เม็จ เยซู เคิบ ลูกนอง ป็อง จะ เลิม เคิบ ครำ เก็บ พาซี นัน อัห ก็ โป ลูกนอง เยซู คือเน “ซีวะ แป ป็อง เลิม ออก เลิม เคิบ ครำ เก็บ พาซี เน ซีวะ แป เปาะ ครำ เจอะ ครำ เพอะ เน ไอ มี จบ เลาะ เปาะ อัห ดาย” อัห อัง
31เยซู เม็จ อัห โป ลูกนอง ออ คือนัน นำ ก็ มเบิด ไล อัห คือเน “ครำ เลาะใจ อุ ไอ มี ต็องกาน และ มอ เตาะ ครำ โซะ ซัง ต็องกาน และ มอ 32เอิญ ไล แป นังเลาะ นะ แป กึด เค็ย นัง ออ เลาะ นอ แป กึด เค็ย ครำ เก็บ พาซี เน เจอะ แต เอิญ โตะ ใน โลก เน เอิญ ไอ มี จบ โตะ และ ครำ เลาะ แต เอิญ โตะ และ ครำ ลุห ครำ เพอะ ระ อัห เอิด ใจ แมะ ฮัก” เยซู อัง เค็ย อัห
เยซู ไล อัห เลือง อด จะ
มัดทิว 9:14-17, มาระโก 2:18-22
33ทาเน ก็ มี แกด ล็อง โตะ ซ็วน เยซู คือเน “ซีวะ ลูกนอง มัห ไอ มี อด จะ มอก อัห ลูกนอง ยอน เคิบ ลูกนอง ปึง ฟาริซี อัห ก็ ทือ เน็ด ซีเละ อัห มัน อด จะ อัห ก็ มัน ครอ วอน เอาซาง แต ลูกนอง มัห ไอ มี แอง มอก อัห ลูกนอง มัห ป็อง จะ จู งิ จู คาบ” อัห อัง 34ทาเน เยซู ก็ ซวัล อัห “กัน มี ครำ ซะลอง นอย ตัก งิ แตงงาน แคก ก็ ไอ มี จบ อด จะ ก้า อัห ก็ ต็อง ป็อง ซะลอง นอย ฮัก 35แต ต็อง เล็ห มี งิ บัดนะ ตี อัห เญ็บ เจาบาว นัน อัห ลู เอิด นำ เริล ตี ซอ เปือน เจาบาว นัน ก็ เซียใจ ญาม นัน ซัง อัห อด จะ มานะ เน ไอ มี เลาะ อด จะ เตาะ” เยซู อัง
36เยซู ก็ มเบิด ไล อัห คือเน วัล “ไอ มี เลาะ แร็ห เอิด โกบ แมะ ตาบ โกบ เครม ซัง กัน ตาบ คือนัน โกบ แมะ นัน ก็ เซีย แอ็ม มาลือ พา แมะ นัน ก็ ไอ มี จับ อัง โกบ เครม เตาะ ไอ มี ซีเอ แอง จังนัน เตาะ 37ไอ มี ซีเอ เอิด พุย องุน แมะ ซิห ตัก ทง ซวัห เครม ตัก งแกร็บ แอ็ม แลว เพาะวา พุย องุน แมะ นัน ไอ มี ตัน อี พู กัน แอ ซิห ตัก ทง ซวัห เครม แลว อี ก็ พู วัล อี แอง ระ ทง เครม นัน แตก แอ็ม มด ปุจ องุน ก็ เซอ แอ็ม พาลือ 38พุย องุน แมะ ก็ ต็อง ซิห ตัก ทง ซวัห แมะ ฮัก ซัง เลาะ 39เลือง ปุจ องุน เอิญ ครอ ไล แป มี มบลึ วัล ดาย กัน ซีเอ ลืด ออก ปุจ องุน เครม แลว อัห ก็ ไอ มี มัก ออก ปุจ องุน แมะ วัล เตาะ เพาะวา อัห เค็ย ปุจ องุน เครม นัน เลาะ อุ แลว” เยซู มเบิด ไล อัห คือนะ
Markert nå:
ลูกา 5: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
