ลูกา 18
18
เลือง แมมาย เคิบ ครำ ตัดซิน
1ทาเน เยซู นำ ซีรอก ระ ปึง ลูกนอง เคาใจ เค็ย แอ ต็อง มัน ครอ วอน เอาซาง ซัง เลาะ จับ จา เอาซาง ซวัล แอ ไอ มี เนา ซวัล แอ แอ ต็อง ครอ วอน เอาซาง ติกๆ ต็อง ไอ มี นาย แอ็ม ใจ ซัง เลาะ นำ ก็ ลด มเบิด ไล เลือง แมมาย เคิบ ครำ ตัดซิน อน อัห ปัง
2ทาเน เยซู ก็ มเบิด ไล อัห คือเน “ตัก มี งวัล นะ ก็ มี ครำ ตัดซิน มี ล็อง นำ ไอ มี ทือ เอาซาง นำ ก็ ไอ มี ตึ อัง อีเอ เตาะ 3มี แมมาย มี ล็อง ตัก งวัล นะ พอดี แมมาย ล็อง นะ มี เลือง เคิบ อัหซอ นำ ซีรอก ระ มี ครำ จวย ออ นำ ก็ โตะ ครอ ระ ครำ ตัดซิน ล็อง นะ จวย ตัดซิน ออ เลาะๆ แคระๆ ซือๆ 4ครำ ตัดซิน นะ ก็ ไอ มี ซนใจ จวย นำ เตาะ แต แมมาย ล็อง นะ เฮง มัน โตะ ครอ ระ นำ จวย ออ ติกๆ ‘ครอ เคิบ มัห เตาะ ครอ มัห จวย เอิญ ดาย’ นำ อัง นำ มัน ครอ จังนัน อิง แลว ครำ ตัดซิน นะ ก็ ลด จวย นำ ครำ ตัดซิน นะ ก็ จ็อก เคิบ นัง ออ คือเน ‘อา เอิญ ไอ มี ทือ เอาซาง เอิญ ก็ ไอ มี ตึ อัง ซีเอ เตาะ 5แต แมมาย ล็อง เน นำ มัน โตะ ครอ ระ เอิญ จวย ออ ซีเละ กัน เอิญ ไอ มี จวย นำ ก็ วาง ครอ อุ นัน เอิญ ต็อง จวย นำ ฮัห ญอน นำ มัน ครอ อุ นัน เพาะวา เอิญ แร็ง ปืด อัง นำ’ ครำ ตัดซิน นัน จ็อก เคิบ นัง ออ จังนะ” เยซู ไล อัห จังนะ
6เยซู ก็ ไล อัห คือเน วัล “เจ็นเน ครอ ระ แป ดอม เอิด จาง ตัก ครำ ตัดซิน ไอ มี ซือ นัน ดาย นำ ไอ มี ทือ เอาซาง นำ ก็ ไอ มี ตึ อัง อีเอ เตาะ แต ซุดทาย นำ ก็ ตัดซิน แคระ ญอน แมมาย ล็อง นัน มัน ครอ ระ นำ จวย ออ นัน 7ทาเน เอาซาง ก็ เลาะ กวา ครำ ตัดซิน ล็อง นัน วัล ซำรับ ครำ ตี เอาซาง เลือก เอิด แลว ตี มัน ครอ วอน เอาซาง จวย ออ มด งิ มด แจ็ล นัน เอาซาง แอง เลาะ แอง ซือ เคิบ อัห นำ ก็ ไอ มี เซย อุ เตาะ นำ ไอ มี แอง ฮุน ครำ เกลิบ นโทล ซิห อัห เตาะ แป ซอดแซ็ง ครอ เคิบ นำ ก็ เลาะ 8นำ ก็ เลิบ แอง เลาะ แอง แคระ ซิห แป ฮัก ดาย เอิญ ไล แป นังเลาะ นะ เอาซาง ก็ แอง เลาะ ซิห แป นำ ก็ จวย แป นำ ไอ มี เซย อุ เตาะ ดาย แต บัดนะ นโดน ญาม เอิญ โตะ ตัก โลก เน วัล เอิญ เม็จ ควะ มี ครำ เจือ เอาซาง แซะ ล็อง บ็อห นอ แป กึด จังนัก บ็อห” เยซู อัง
ครำ ฟาริซี เคิบ ครำ เก็บ พาซี ครอ วอน เอาซาง
9ทาเน ก็ มี แกด ล็อง อัห เปิง นัง ออ ฮัก อัห เค็ย ออ เป็น ครำ เลาะ ครำ ซือ แต อัห ดูทูก อัหซอ เค็ย ไอ มี เลาะ วัล เยซู ก็ ลด มเบิด ไล อัห คือเน 10“มี อัหคล็อง เปียะ ล็อง นะ ปาม เริล ครอ วอน เอาซาง ตัก เด็นเตะ วิฮาน เอาซาง นัน มี ล็อง นัน เป็น ครำ ฟาริซี นำ ทือ เอาซาง เน็ด ซีเละ มี ล็อง นัน วัล เป็น ครำ เก็บ พาซี”
11“ทาเน ครำ ฟาริซี ก็ ญ็อง อุ โตน มี ล็อง ฮัก นำ อวด นัง ออ นำ ก็ ครอ วอน เอาซาง ฮุนเน ‘เอาซาง เฮย เอิญ คอบคุน มัห ตี เอิญ ไอ มี เมือน อัหซอ ดาย อัห เป็น ครำ โลบ ครำ อืม อัห เป็น ครำ ไอ มี เลาะ ไอ มี ซือ อัห ปิล จู คอบคุน มัห ซีเละ ดาย ตี เอิญ ไอ มี เมือน ครำ เก็บ พาซี โตน นัน 12เอิญ เน แอง เลาะ ซีเละ มี อาทิด นเดย เอิญ ก็ อด จะ เปียะ งิ เอิญ กุญ ซีวะ ซิบ ซวน เอิญ ก็ ทวาย อน มัห มี ซวน’ ครำ ฟาริซี อัง นำ ครอ วอน เอาซาง มอก นัน”
13“แต ครำ เก็บ พาซี นัน จึด กึ ออ นำ ญ็อง อุ เยอะ ซะ ไอ มี ฮาน นำ ดอม วาง เตาะ นำ ก็ จึด กึ คัล งก็อห ออ นำ แร็ง เซียใจ ตี นำ เป็น ครำ ลุห นัน นำ จ็อก คือเน ‘เอาซาง เฮย ครอ เคิบ มัห ตึ อัง เอิญ ดาย เอิญ เป็น ครำ ลุห ครำ เพอะ ซีเละ’ ครำ เก็บ พาซี อัง” เยซู ไล อัห จังเน
14เจ็นนัน เยซู ก็ ไล อัห ตอ วัล “เอิญ ไล แป นังเลาะ นะ ดาย เปียะ ล็อง เน เอาซาง ไอ มี ทือ ลุห ครำ เก็บ พาซี ญาม นำ วัล เจิง ออ เอาซาง ก็ เค็ย นำ เลาะ อุ เคิบ เอาซาง แลว ไอ แมน ครำ ฟาริซี นัน เตาะ เอา นเดย ตัก อวด นัง ออ เอาซาง ก็ เค็ย ไอ มี เลาะ เตาะ แต เอา นเดย ตี ไอ มี อวด นัง ออ เอาซาง ก็ เค็ย เอา นัน เลาะ วัล” เยซู ไล อัห จังเน
เยซู รัก ควัน แย็ด
มัดทิว 19:13-15, มาระโก 10:13-16
15เจ็นนัน วัล ก็ มี แกด ล็อง อัห แกบ ซับ ควัน ออ โตะ และ เยซู อัห ซีรอก ระ นำ คอบ ซิห ควัน ออ นัน ระ นำ อวยพอน ควัน ออ ทาเน ปึง ลูกนอง เยซู เม็จ อัห ก็ มบราง ไอ มี ระ อัห ซับ ควัน แย็ด นัน โตะ และ เยซู 16แต เยซู งกรอ ควัน แย็ด นัน โตะ และ ออ ฮัก นำ ก็ ไล ลูกนอง ออ คือเน “ระ ควัน แย็ด นัน โตะ และ เอิญ ดาย อำ มบราง อัห เตาะ เพาะวา ซีเอ ตี แอง มอก ปึง ควัน แย็ด เน อัห ก็ กุญ ปกคอง เลิม เคิบ เอาซาง บัดนะ นโดน 17เอิญ ไล แป นังเลาะ นะ ดาย กัน ซีเอ ไอ มี ญอม ท็อม นัง ออ โตะ และ เอิญ มอก ควัน แย็ด เน บัดนะ ญาม เอาซาง โตะ ปกคอง โลก เน อัห ก็ ไอ มี กุญ อุ เลิม เคิบ เอาซาง เตาะ” เยซู ไล ลูกนอง ออ จังนะ
ครำ ฮัง โตะ และ เยซู
มัดทิว 19:16-30, มาระโก 10:17-31
18ทาเน ก็ มี ฮัวนา ครำ ยิว มี ล็อง โตะ ซ็วน เยซู คือเน “อาจาน มัห เป็น ครำ เลาะ ซีเละ ดาย เอิญ ก็ ซีรอก ซ็วน มัห มี เลือง นะ เอิญ ต็อง แอง จังนัก เลาะ บ็อห ซัง รีด อุ จำ นเดย จำ กวา” นำ อัง
19เยซู ก็ ซวัล นำ คือเน “มัห เค็ย เอิญ เน เป็น ครำ เลาะ อังวะ บ็อห ไอ มี ซีเอ เป็น ครำ เลาะ ซัง มี เอาซาง มี ล็อง เดียว ฮัก เลาะ ทีซุด 20แต เลือง ตี มัห ซ็วน เอิญ เน มัห ก็ เม็จจึด กด เอาซาง แลว นอ กด นัน เค็ย อำ ปิล จู อำ มเบิล อัห อำ ลอด ซะ อัห อำ จบ แอง คีอู โตด อัห เค็ย อัห ต็อง นับทือ เอา เม ออ กด เอาซาง ไล จังนะ นอ มัห แอง ตาม กด เน ก็ เลาะ” เยซู อัง
21เอา ล็อง นะ ก็ ซวัล เยซู คือเน “กด มด จู คอ เน เอิญ ก็ แอง มด เจ็น แย็ด แลว” นำ อัง
22เยซู เม็จ ล็อง นะ ซวัล ออ คือนัน นำ ก็ ไล ล็อง นะ คือเน วัล “เออะ ดิห มัห ต็อง แอง มี มบลึ วัล ดาย มัห ต็อง วัล เจิง มัห ต็อง เท็จ แอ็ม ซะ จู มบลึ ตี มัห มี อุ นัน แลว มัห เท็จ แอ็ม แลว มัห ก็ เอิด เงิน นัน ปัน อน ตัก ครำ ตุก ครำ ญาก เจ็นนัน มัห ก็ เริล เคิบ เอิญ บัดนะ มัห ก็ มี รางวัน ดก นทม ระ ตัก ซะวัน ทึห” เยซู อัง
23ทาเน เอา ล็อง นะ นำ เม็จ เยซู ไล ออ ฮุนนะ นำ ก็ ตุกใจ เซียใจ ซีเละ เพาะวา นำ เป็น ครำ ฮัง มี ซะ ดก ซีเละ นำ ก็ ไอ มี ซีรอก เท็จ แอ็ม ซะ คอง ออ เตาะ
24เยซู เม็จ นำ ตุกใจ คือนัน นำ ก็ ไล ลูกนอง ออ คือเน “ครำ ฮัง กุด ซะวัน ก็ ญาก ซีเละ ดาย 25อูด กุด มพุง งาด ก็ ซำ งาย กวา ครำ ฮัง กุด ซะวัน วัล” เยซู อัง 26ทาเน ครำ ตี เม็จ เยซู จ็อก คือนะ อัห ก็ ซ็วน เยซู คือเน “อาจาน กัน ญาก จังนะ ก็ ไอ มี ซีเอ ปน แอ็ม เจ็น ลุห เตาะ ก้า” อัห อัง 27เยซู ก็ ไล อัห คือเน “ซะ ตี ครำ แอง ไอ มี กุญ เอาซาง ก็ แอง กุญ เอาซาง นำ ซับ ครำ ฮัง กุด ซะวัน ก็ กุญ มด” เยซู อัง
28ทาเน เปโตร ก็ ซ็วน เยซู คือเน “อาจาน อิห เน ดุห อิห พระ เจิง พระ กวัห ออ แลว อิห ลด เริล เคิบ มัห อิห เป็น จังนัก บัดนะ นโดน บ็อห” เปโตร อัง
29เยซู ก็ ไล อัห คือเน “ซีเอ ตี ซะละ พระ เจิง พระ กวัห พระ เอา พระ เม พระ ยัห พระ ควัน พระ ควน นไจ ออ ญอน อัห ระ เอาซาง ปกคอง ออ นัน 30เอาซาง ก็ อน ตัก อัห ดก กวา นัน วัล ญาม อัห ควะ อุ ตัก โลก เน เอาซาง ก็ อน ตัก อัห ดก เตา วัล บัดนะ นโดน อัห ก็ ซำ กุญ รีด อุ เคิบ เอาซาง จำ นเดย จำ กวา วัล” เยซู อัง
เยซู เพีย ไล เลือง นัง ออ แพะ ลบ ตึง เน
มัดทิว 20:17-19, มาระโก 10:32-34
31ทาเน เยซู เคิบ ลูกนอง ก็ ทอก เริล ออ นำ ก็ ไล ลูกนอง ออ คือเน “แอ เริล เมือง เยรูซาเล็ม ดาย ซะ จู มบลึ ตี ลาม เอาซาง เพีย เคียน ระ อน เลือง ล็อง นัน ตี เอาซาง ระ เกิด เป็น ครำ นัน ก็ เกิด เล็ห ตัก เมือง เยรูซาเล็ม ฮัก ดาย 32อัห ก็ ต็อง เญ็บ ล็อง นัน ตี เอาซาง ระ เกิด เป็น ครำ อัห ก็ ต็อง มอบ นำ อน ตัก ครำ กรอก ซอ อัห ก็ ปิล มัด ปิล มุห นำ อัห ดูทูก ดูแควน นำ อัห จ็วห ซิห มัด นำ 33อัห วาง มบัด วาง คัล นำ ยาง แร็ง อัห ลด มเบิล แอ็ม นำ นำ เปิล แพะ งิ แลว นำ ก็ รีด เล็ห วัล” เยซู เพีย ไล ลูกนอง ออ จังนะ 34แต อัห ไอ มี เคาใจ เลือง ตี เยซู ไล นัน มอก เอาซาง แอง ระ ปึง อัห ไอ มี เคาใจ เลือง ตี นำ ไล นัน นำ ซีแล็ม เค็ย นัง ออ นัน อัห ก็ ไอ มี เคาใจ เตาะ
เยซู จวย ครำ บอด มัด ตัก เมือง เยรีโค
มัดทิว 20:29-34, มาระโก 10:46-52
35ทาเน อัห ก็ เริล ติกๆ ญาม อัห บัก และ เล็ห ตัก เมือง เยรีโค แลว ก็ มี ครำ บอด มัด มี ล็อง คุด ครอ ทาน อุ ตัก เปล รวง 36ครำ บอด มัด นัน เม็จ นเซิง อัห ดก ล็อง นจาง พาน เริล รวง นัน นำ ก็ ซ็วน ครำ ติ อุ นัน เค็ย “นเซิง ซีวะ นะ บ็อห” นำ อัง 37ครำ ติ อุ นัน ก็ ไล นำ เค็ย “โตะ เยซู ครำ นาซาเร็ด นำ กำลัง พาน เริล รวง เน ดาย” ล็อง นะ อัง 38นำ เม็จจึด เค็ย เป็น เยซู นำ ก็ ลด งกรอ เยซู จวย ออ “เยซู ควัน ดาวิด เฮย ครอ มัห ตึ อัง เอิญ ดาย” นำ อัง 39ทาเน ปึง ครำ ตี เริล วาล มัด เยซู นัน อัห ก็ มบราง นำ งกรอ เยซู อัห ไล นำ เค็ด อุ แต นำ เฮง งกรอ แร็งๆ วัล “เยซู ควัน งา ดาวิด เฮย ครอ เคิบ มัห ตึ อัง เอิญ จวย เอิญ แด ดาย” ครำ บอด มัด อัง
40เยซู เม็จ นเซิง นำ งกรอ ออ เยซู ก็ ญ็อง อุ นำ ก็ ไล อัห ซับ ครำ บอด มัด นัน ตัก ออ 41เยซู ก็ ซ็วน นำ ฮุนเน “มัห ซีรอก ระ เอิญ จวย ออ จังนัก บ็อห” เยซู อัง “เอิญ ซีรอก ตาด มัด เอิญ ซีรอก ดอม ซะ กุญ” เอา ล็อง นะ อัง 42เยซู ก็ ไล นำ คือเน “ตาด มัด นทึห เตาะ มัห งาล บอด มัด ก็ ญอน มัห เจือ ดาย” เยซู อัง 43มัด ล็อง นะ ก็ ลด เลาะ เล็ห นำ ดอม ซะ ก็ ตาด มด เม็จ ซะ มด นำ ก็ ลือ เอาซาง นำ ลด เคริบ เยซู เริล ปึง อัห ตี เม็จ มัด ล็อง นัน เลาะ เล็ห อัห ก็ อวด ลือ เอาซาง เมือนนอย
Markert nå:
ลูกา 18: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
