ลูกา 1
1
ลูกา เคียน เลือง เยซู อน ตัก ทีโอฟีลัด
1-2ทีโอฟีลัด เฮย เอิญ ลูกา ดาย เอิญ นับทือ มัห ซีเละ ทาเน เอิญ ซีรอก เคียน นังซือ เน อน ตัก มัห นเซอะ มัห เคาใจ เค็ย เลือง เยซู คริด ตี อัห ไล มัห แลว นัน กิว เป็น เลือง นังเลาะ ซีเละ เลือง ครำ ตี อง โตะ จวย แอ นัน ปึง ลาม เอาซาง ตัก อิง อัห ก็ เพีย เคียน ระ อน แลว นำ ต็อง เป็น จังนักๆ อัห ก็ จด ระ อน มด มานะ เน แอ ก็ เม็จ คาว เค็ย นำ กิว โตะ ตัก แอ มอก ลาม เพีย ไล อน ซีเละ เจ็นนัน ก็ มี ดก ครำ เม็จ เลือง เยซู อัห ก็ เคียน เลือง นำ วัล 3เลือง ตี อัห เคียน นัน เอิญ ก็ ไท อาน แลว ครำ ตี เม็จ เลือง เน เคิบ มัด เคิบ มุห ออ นัน เอิญ ก็ ที ซ็วน อัห แลว ญาม เอิญ ที ปัง เจ็น เกา จำ จบ เลาะๆ แลว เอิญ ก็ ลด กึด เคียน แมะ วัล ระ ครบ ระ ซมบูน ระ เลือง เน ตอ นอย เลาะ เอิญ เคียน เลือง เน มด เจ็น เกา จำ จบ อน มัห เน 4ระ มัห เคาใจ เลาะๆ เค็ย เลือง ตี อัห ไล มัห นัน กิว เป็น เลือง นังเลาะ ซีเละ ดาย
ปะวัด เซคารียา เคิบ เอลีซาเบด
5เกา เลือง ก็ มอก เน ดาย กำนา ญาม เฮโรด#ค 5 เฮโรด ล็อง เน นำ เป็น พะเจายูฮัว ซามซิบ เจ็ด วาง วาล เยซู ไอ มี ตัน เกิด นัน เยซู เกิด โตะ ซี วาง แลว เฮโรด ล็อง นัน ก็ เปิล ควัน นำ ก็ เป็น ตอ วัล ควัน นำ ก็ ซือ เฮโรด เมือนนอย เป็น พะเจายูฮัว ตัก จังวัด ยูเดีย นัน ก็ มี มอ เอาซาง มี ล็อง ซือ ตัก เซคารียา เซคารียา เน นำ เป็น กรอก อาโรน นำ แองกาน ตัก วิฮาน เอาซาง นำ แองกาน เลิม เคิบ มวด อาบียา ฮัก#ค 5 ซะไม นัน ปึง มอ เอาซาง อัห แบง นอย เป็นมวดๆ อัห เปียน เวน นอย แองกาน ตัก วิฮาน เอาซาง ยัห นำ ซือ ตัก เอลีซาเบด เอลีซาเบด เน นำ ก็ เป็น กรอก อาโรน เมือนนอย 1 ปะวัด 24:3-19
6ทาเน เซคารียา เคิบ เอลีซาเบด เน ก็ แอง เลาะ แอง ซือ เคิบ เอาซาง ตลอด ปาม แอง ฮุน กด เอาซาง ไล อน มด ไอ มี ตี ติ ตี คอล ซัก มี ติด เตาะ 7ปาม ก็ มแบร็ห แอ็ม แลว ซีเละ แต ปาม ไอ มี ควัน เตาะ เพาะวา เอลีซาเบด เน นำ เป็น มัน
เทวาดา โตะ ไล เซคารียา เค็ย นำ มี ควัน
8ทาเน มี มี ลบ นัน ก็ เล็ห เวน กรอก อาบียา ต็อง แองกาน ตัก วิฮาน งกีจ็อง อัห ต็อง ฮับพิดซอบ งาน ตัก วิฮาน นัน เซคารียา ก็ เริล แองกาน เคิบ มวด อาบียา นัน 9ทาเน มวด อาบียา นัน อัห ก็ เญ็บ ซะลาก ตาม แบบ มอ เอาซาง ฮัก อัห เญ็บ ซะลาก อ็อญ เจือ ซีเอ กุญ แองกาน ซีวะ เซคารียา ก็ เญ็บ ซะลาก พอดี นำ ก็ กุญ งาน เคิม ยา ซียุม#ค 9 “ยา ซียุม” เป็น ลำ มี มบลึ นะ อัห ตาก งเคา อัห ก็ ไจ เคิม ซะ ทวาย อน ตัก เอาซาง อัห เคิม แลว ก็ ยุม ซีเละ นำ ต็อง กุด เคิม ยา ซียุม ควังใน วิฮาน งกีจ็อง นัน 10ญาม นำ เคิม ยา ซียุม อุ ควังใน วิฮาน นัน ก็ มี อัหซอ ดก ล็อง เพา นำ อุ บัดซะ อัห ครอ วอน เอาซาง อุ เป็น ปึง 11ญาม เซคารียา เคิม ยา ซียุม อุ นัน ก็ พด เล็ห เทวาดา คอง งกีจ็อง เทวาดา โตะ มแบละ นัง ออ ตัก นำ เทวาดา โตะ ญ็อง อุ เพียห เลาะ ติๆ เคิบ ตี อัห เคิม ยา ซียุม นัน 12เซคารียา ก็ เพลิด นทัน ญ็อก ซีดุง แซ็ง นำ มด นำ ก็ แร็ง นเจิก ซีเละ
13แต เทวาดา ล็อง นัน ก็ ไล เซคารียา ฮุนเน “อำ มัห นเจิก อัง เอิญ เตาะ ดาย เอิญ โตะ ไล คาว เลาะ ตัก มัห ตี มัห ซีรอก กุญ ควัน ออ นัน เอาซาง ก็ เม็จ แญง มัห ครอ วอน ออ แลว บัดนะ ยัห มัห ก็ เกิด ควัน อัหคล็อง อน ตัก มัห มัห ต็อง มพึ ซือ ควัน ออ ตัก ยอน 14บัดนะ มัห ก็ เลาะใจ อุ ซีเละ ดาย ตี ควัน มัห เกิด นัน ก็ มี ครำ ดก ล็อง เลาะใจ เลิม เคิบ มัห วัล
15อัห เลาะใจ ก็ เพาะวา งกีจ็อง ระ ควัน มัห นัน เป็น ซะ แกะ บัดนะ งกีจ็อง ก็ ไอ มี ระ นำ ออก ปุจ องุน ไอ มี ระ นำ ออก ปุจ เตาะ นำ ก็ มี แร็ง คอง ซีมาล เอาซาง อุ เลิม เจ็น ควะ อุ ตัก มพุล เม 16ควัน มัห นัน บัดนะ นำ ก็ แอง ระ ครำ อิซราเอล เอิด ใจ แมะ ดก ล็อง ระ อัห วัล โตะ และ เอาซาง งกีจ็อง คอง อัห วัล 17ควัน มัห นัน นำ ก็ มี ซีมาล เอาซาง อุ เลิม นำ มี แร็ง ดก ฮุน เอลียา ลาม เอาซาง ตัก อิง นัน#ค 17 เอลียา เป็น ลาม เอาซาง ตัก อิง ตี เพีย ไล พซาซน ระ อัห เจือ เอาซาง ลาม เอาซาง ตัก มาลาคี ก็ เพีย ไล อน เค็ย ต็อง มี เอลียา มี ล็อง วัล โตะ เตียม รวง อน ตัก ล็อง ตี เอาซาง ระ โตะ ตัก โลก เน บัดนะ ญาม ควัน มัห แกะ แลว นำ ก็ เพีย เริล วาล มัด งกีจ็อง นำ เพีย ไล พซาซน มอก เอลียา ตัก อิง นัน นำ ระ อัห เอิด ใจ แมะ ระ อัห พอม ปัง แญง งกีจ็อง บัดนะ นำ ก็ แอง ระ เอา เคิบ ควัน อุ เลาะ เคิบ นอย วัล นำ ก็ ระ ครำ ลืน ครำ ดาน เอิด ใจ แมะ ลด มี ปันญา กึด เลาะ กึด แคระ มอก ครำ เลาะ ครำ ซือ ฮัก บัดนะ นำ เพีย เตียม ครำ อิซราเอล ระ อัห พอม ปัง งกีจ็อง ญาม นำ โตะ บัดนะ นัน” เทวาดา ไล เซคารียา จังนะ
18เซคารียา ก็ ซ็วน เทวาดา คือเน “ซะ ตี มัห เค็ย นะ กิว เป็น เลือง นังเลาะ อัน เอิญ เคิบ ยัห ก็ มแบร็ห แอ็ม แลว ดุห เยอะ จบ มี ควัน กุญ จังนัก บ็อห” เซคารียา อัง
เซคารียา เป็น เล็ห ครำ ไบ
19เทวาดา ก็ ไล เซคารียา คือเน วัล “มัห กิว มี ควัน ฮุน เอิญ ไล มัห เน ซีเละ มัห แก็นใจ เจือ แญง เอิญ เน กุญ ดาย เพาะวา เอิญ เป็น กาเบรียล เอิญ ฮับไจ เอาซาง อุ ตลอด เป็น เอาซาง นัน ฮัก ระ เอิญ โตะ ไล คาว เลาะ เน อน ตัก มัห ดาย 20มัห ดอม ดาย ญอน มัห ไอ มี เนา เจือ แญง ตี เอิญ ไล มัห เน มัห ก็ ต็อง เป็น เล็ห ครำ ไบ ดาย เจ็นเน นโดน มัห จ็อก ไอ มี กุญ เตาะ จำปอ เอลีซาเบด เกิด ควัน ฮุน เอิญ ไล มัห นะ กัน เล็ห เวลา ตี เอาซาง กำนด ระ อน แลว ควัน มัห ก็ กิว เกิด ซีเละ เกิด ควัน มัห แลว มัห ก็ จ็อก กุญ วัล” เทวาดา อัง
21ทาเน ก็ มี ดก ล็อง เพา อุ บัดซะ วิฮาน นัน อัห ควะ เพา เซคารียา อุ นัน อัห ก็ งึด ตี นำ จา ทอก เจ็น ควังใน วิฮาน นัน 22ญาม นำ ทอก โตะ ออ แลว นำ ก็ ไอ มี จางรู จ็อก เคิบ อัห เตาะ นำ ก็ ต็อง ไจ ที แอง เป็น พาซา ไบ ซิห อัห นำ แอง ที ออ ไล อัห ติกๆ อัห ก็ เคาใจ เค็ย นำ ต็อง เม็จ ซะ แปลก ควังใน วิฮาน นัน#ค 22 “ซะ แปลก” นำ เม็จ ซะ มอก มเพาะ ซะไม นัน เอาซาง โตะ จ็อก เคิบ อัห นำ ระ อัห เม็จ ซะ 23ทาเน แลว จบ เวน มวด อาบียา แลว เซคารียา ก็ วัล เจิง
24แทะ นัน วัล ไอ มี อิง เอลีซาเบด ก็ มพุ ควัน นังเลาะ นำ บม อุ ตัก เจิง ฮา ซัวะ ไอ มี ทอก เจ็น เจิง เตาะ นำ ก็ จ็อก ฮุนเน 25“งกีจ็อง แอง เลาะ เคิบ เอิญ ซีเละ นำ ระ เอิญ มี ควัน นังเลาะ เจ็นเน เอิญ ก็ ไอ มี กราญ#ค 25 อัหเม ครำ ยิว กัน อีเอ ไอ มี ควัน อัห ก็ ดูทูก ซีเละ นำ ก็ กราญ ซีเละ วัล เตาะ ตี เอิญ กราญ ญอน เอิญ เป็น มัน เน งกีจ็อง ก็ แอง ระ เอิญ งาล กราญ แลว” เอลีซาเบด อัง
เทวาดา โตะ ไล มารี เค็ย มี ควัน
26-27ทาเน ก็ มี ควัน มอน มี ล็อง ซือ ตัก มารี นำ อุ งวัล นาซาเร็ด จังวัด กาลิลี ควัน มอน ล็อง นะ เป็น ควัน มอน เลาะ นำ ไอ มี เกย เอิด คล็อง เตาะ แต นำ มัน ระ นอย เคิบ โยเซบ แลว โยเซบ ล็อง เน นำ เป็น ควัน งา ดาวิด ญาม นัน เอลีซาเบด มพุ ควัน กุญ ฮก ซัวะ แลว เอาซาง ก็ ไล เทวาดา ตัก ซือ กาเบรียล นัน เริล จ็อก เคิบ มารี ตัก จังวัด กาลิลี นัน 28เทวาดา นัน ก็ โตะ ไล มารี ฮุนเน “มารี เฮย งกีจ็อง แอง เลาะ เคิบ มัห ซีเละ ดาย นำ อุ เคิบ มัห นังเลาะ” เทวาดา อัง
29มารี เม็จ เทวาดา ไล ออ ฮุนนะ แลว นำ ก็ เพลิด นทัน ซีดุง แซ็ง มด นำ ก็ กึด ใน ใจ ออ เค็ย แญง เทวาดา เค็ย นัน ซีแล็ม เค็ย ซีวะ บ็อห
30เทวาดา เม็จ มารี กึด ใน ใจ ออ ฮุนนัน นำ ก็ ลด ไล มารี คือเน วัล “อำ มัห นเจิก เตาะ ดาย มารี เอาซาง แอง เลาะ เคิบ มัห ซีเละ 31ดอม เนอะ เจ็นเน นโดน มัห ก็ มพุ ควัน เป็น ควัน อัหคล็อง เกิด ควัน มัห แลว มัห ก็ ต็อง มพึ ซือ นำ ตัก เยซู 32ควัน แย็ด ล็อง เน อัห นับทือ นำ บัดนะ อัห เค็ย นำ เป็น ควัน เอาซาง ตัก แกะ ทีซุด นำ เป็น ซะ แกะ ซีเละ เอาซาง งกีจ็อง ตัง นำ เป็น พะเจายูฮัว ระ นำ ซืบ เอิด ตำแน็ง พะเจายูฮัว ดาวิด ตัก เป็น เอาจ็อง คอง นำ ตัก อิง นัน 33เอาซาง ก็ ระ นำ เป็น พะเจายูฮัว ปกคอง ครำ อิซราเอล จำ นเดย จำ กวา นโดน” เทวาดา อัง
34มารี ก็ ซ็วน เทวาดา คือเน “เอิญ ไอ มี ตัน เอิด คล็อง เอิญ จบ มพุ ควัน กุญ จังนัก บ็อห” มารี อัง 35เทวาดา ก็ ไล นำ คือเน วัล “มารี เฮย ตี มัห มพุ ควัน เน ก็ ไอ แมน แบบ ครำ ทำมาดา ดาย ตี มัห มพุ ควัน เน ก็ เป็น ตัก ซีมาล เอาซาง โตะ อุ เคิบ มัห ฮัก แร็ง คอง เอาซาง ตัก แกะ ทีซุด นัน ระ มัห มพุ ควัน ฮัก ควัน แย็ด ตี เกิด ตัก มัห บัดนะ นัน ก็ พิเซด ซีเละ อัห ก็ มพึ นำ ตัก ควัน เอาซาง 36-37ไอ มี ซีวะ ตี เอาซาง งกีจ็อง แอง ไอ มี กุญ ดาย เอาซาง นำ แอง ซีวะ ก็ กุญ มด ดอม กา ควน นไจ มัห ตัก เอลีซาเบด ตี มแบร็ห แอ็ม แลว นัน กำนา อัห เค็ย นำ เป็น มัน นอ แต มานะ เน นำ ก็ มพุ ควัน กุญ ฮก ซัวะ แลว เป็น ควัน อัหคล็อง ดาย” เทวาดา อัง
38มารี เม็จ เทวาดา ไล ออ คือนะ นำ ก็ ไล เทวาดา คือเน วัล “เออะ ดิห เอิญ เน ก็ เป็น ลูกนอง คอง งกีจ็อง นอ ครอ ระ งกีจ็อง แอง ฮุน มัห เค็ย นะ” มารี ไล เทวาดา คือนะ เจ็นนัน เทวาดา ก็ ทอก เริล ออ
39-40ทาเน ญาม เทวาดา ทอก เริล ออ แลว มารี ก็ เลิบ เตียม คัว เตียม วะ เริล แอว เจิง เซคารียา เคิบ เอลีซาเบด ปาม อุ ตัก งวัล ซะร็อห ทึห ตัก จังวัด ยูเดีย มารี ก็ โตะ แอว และ ปาม
41-42โตะ มารี ตัก เจิง ปาม แลว นำ ก็ งกรอ เอลีซาเบด ญาม เอลีซาเบด เม็จ แญง มารี งกรอ ออ นัน ควัน แย็ด ตัก มพุล เอลีซาเบด ก็ แร็ง นดิ ซีเละ ซีมาล เอาซาง ก็ ซับรวง เอลีซาเบด จ็อก เคิบ มารี แร็งๆ ฮุนเน “มารี เฮย เอาซาง แอง เลาะ ไบ เลาะ เบอ เคิบ มัห จังนะ นำ แอง เลาะ ซิห มัห กวา อัหเม ซอ มด จู ล็อง เอาซาง ก็ แอง เลาะ เคิบ ควัน มัห วัล 43-45ตี เอาซาง แอง เลาะ ซิห มัห เน ก็ ญอน มัห เจือ เค็ย งกีจ็อง กิว แอง ฮุน นำ ไล อน นำ ระ มัห เป็น เม งกีจ็อง เอิญ แลว เลาะ ไบ เลาะ เบอ นำ ระ มัห โตะ แอว และ เอิญ เน ญาม เอิญ เม็จ นเซิง มัห งกรอ เอิญ มันเนวะ ควัน เอิญ ตัก มพุล เอิญ เน นำ ก็ เลาะใจ แร็ง นดิ ซีเละ” เอลีซาเบด อัง
46แลว เอลีซาเบด ไล มารี คือนัน แลว มารี ก็ จ็อก วัล “เอิญ ลือ งกีจ็อง ซีเละ 47เอิญ เลาะใจ ตี งกีจ็อง เป็น งกี เอิญ นำ ก็ จวย เอิญ ปน แอ็ม เจ็น ลุห
48เอิญ ลือ เอาซาง ก็ เพาะวา นำ แอง เลาะ เคิบ เอิญ เอิญ ไอ มี เป็น ซะ แกะ ซีวะ เตาะ เอิญ เป็น ลูกนอง นำ พาลือ แต นำ ก็ แอง เลาะ ซิห เอิญ ฮัก เจ็นเน ครำ จู เจ็น จู จาด ก็ เค็ย เอาซาง แอง เลาะ ซิห เอิญ ซีเละ
49เอาซาง มี ริด มี แร็ง ซีเละ นำ ก็ แอง เลาะ แอง ซือ ตลอด ไอ มี ซีเอ เมือน นำ เตาะ นำ ก็ พิเซด ซีเละ 50ครำ จู เจ็น จู จาด ตี เกงใจ อัง เอาซาง นัน เอาซาง ก็ รัก อัห ตึ อัง อัห แอง เลาะ ซิห อัห ตลอด
51นำ มี แร็ง มี อำนาด นำ แอง ซีวะ ก็ กุญ ครำ ตี อวด นัง ออ นำ ก็ มบรึห แอ็ม อัห ระ อัห แยก นอย เริล มี ตี มี ล็อง
52นำ ก็ ญุด แอ็ม อำนาด ญุด แอ็ม ตำแน็ง คอง ปึง พะเจายูฮัว มด แต ครำ ตุก ครำ ญาก นำ ก็ จวย ระ อัห เป็น ซะ แกะ วัล นำ อน เกียด ตัก อัห ดก วัล
53ครำ ตี มี วิดๆ คาดๆ นำ ก็ จวย ระ อัห มี เลือ ป็อง เลือ ไจ ระ อัห อิม อุ ตลอด แต ปึง ครำ ฮัง นัน นำ ก็ ไล อัห ปัด นังลือ
54นำ ลุห นโทล อัง ครำ อิซราเอล แอ เน นำ ตึ อัง แอ นำ แอง เลาะ ซิห แอ ซีเละ นำ กิว จวย แอ ตี เป็น ลูกนอง นำ
55นำ ซันญา เคิบ เอา เม กรอก อิซราเอล แอ เน ตัก อิง แลว นำ ซันญา เคิบ อับราฮัม นำ ก็ ซันญา เคิบ ควัน งา อับราฮัม วัล มานะ เน นำ ก็ กิว แอง ฮุน นำ เพีย ไล อน นัน” มารี จ็อก ฮุนเน
56ทาเน มารี ก็ พัก อุ ตัก เจิง เอลีซาเบด นัน แพะ ซัวะ เจ็นนัน นำ ก็ วัล เจิง ออ นเซ็บ
ยอน กิว เกิด ซีเละ
57ทาเน เล็ห งิ เกิด ควัน เอลีซาเบด แลว ก็ เป็น ควัน อัหคล็อง ซีเละ 58ควน นไจ นำ เคิบ ครำ ใน งวัล เม็จ คาว เค็ย งกีจ็อง กิว จวย ระ เอลีซาเบด มี ควัน แลว อัห ก็ เลาะใจ เลิม เคิบ นำ
59แลว ควัน เจะ นัน เกิด กุญ แปด งิ แลว ปึง ควน ปึง นไจ นำ อัห ก็ รูบ โตะ แอง พิที ซุนัด อน ตัก ควัน เจะ นัน แลว อัห แอง พิที แลว อัห ก็ และ ซือ อน นำ อัห บัก และ มพึ ซือ นำ ตัก เซคารียา ฮุน เอา นำ ฮัก 60แต เม นำ ก็ มบราง อัห นำ เค็ย “ไอ มี กุญ ดาย อำ มพึ ซือ นำ ตัก เซคารียา เตาะ ดาย แอ ต็อง มพึ ซือ นำ ตัก ยอน ฮัก” เม นำ อัง
61อัห ก็ ไล เอลีซาเบด คือเน “บัห นอ ไอ มี ควน นไจ นำ ซือ ตัก ยอน ซัก มี ล็อง แอ มพึ ซือ นำ ตัก ยอน ก็ ไอ มี เลาะ ก้า” อัห อัง 62อัห ก็ แอง พาซา ไบ ซ็วน เซคารียา คือเน “มพึ ซือ ควัน มัห จังนัก บ็อห” อัห อัง 63เซคารียา ก็ ซ็วน กะดาน แย็ด ตัก อัห อัห อน กะดาน แย็ด ตัก นำ แลว นำ ก็ เคียน ตัก กะดาน แย็ด เค็ย “นำ ซือ ตัก ยอน” อัห เม็จ นำ เคียน คือนัน อัห ก็ งึด อัง นำ ซีเละ 64ท็อบ นำ เคียน ซือ ยอน ตัก กะดาน นัน นำ ก็ ลบ จ็อก กุญ วัล นำ ก็ ลด ลือ เอาซาง เค็ย เอาซาง เลาะ ซีเละ
65ครำ งวัล นัน เม็จ จู มบลึ เลือง ยอน เกิด นัน อัห ก็ เลอะ งึด มด อัห ก็ เลามุน เลือง ควัน แย็ด นัน แพ็ว งวัล ซะร็อห ทึห ทัว จังวัด ยูเดีย มด 66อีเอ ตี เม็จ คาว เลือง ควัน แย็ด นัน อัห ก็ กึด ใน ใจ ออ เค็ย “เอ ควัน แย็ด ล็อง เน งกีจ็อง อุ เคิบ นำ เลาะ ซีเละ นำ เป็น จังนัก บัดนะ นโดน บ็อห” อัห อัง
67ทาเน เอา ยอน ตัก เซคารียา นัน นำ ก็ มี ซีมาล เอาซาง อุ เลิม เคิบ ออ ซีมาล เอาซาง ก็ ซับรวง นำ เพีย ไล อน ฮุนเน
68“ครอ ลือ งกีจ็อง ตัก เป็น งกี กรอก อิซราเอล แอ เน งกีจ็อง โตะ แอว ดอม แอ แลว นำ โตะ จวย ครำ คอง ออ ปน แอ็ม เจ็น ลุห แลว
69เอาซาง ระ ครำ โตะ จวย แอ แลว ล็อง นะ นำ มี แร็ง ดก เอาซาง ระ นำ โตะ เกิด ตัก กรอก ดาวิด ตี เป็น ลูกนอง คอง นำ ฮัก 70ตัก อิง ตัก นา เอาซาง ก็ เพีย ไล เลือง เน อน ตัก ลาม ออ แลว มานะ เน เอาซาง ก็ กิว แอง มอก นำ ไล อน ซีเละ
71เอาซาง ซันญา อง โตะ จวย แอ ระ ปน แอ็ม เจ็น อำนาด ซะตรู นำ อง จวย แอ ระ ปน แอ็ม เจ็น อำนาด ครำ ตี เซ็ห อัง แอ 72-73เอาซาง ใจ ดัว ซีตึ อัง แอ นำ ตึ อัง แอ ฮุน นำ ไล อน ตัก เอาจ็อง แอ เจ็น ตัก อิง นัน นำ ก็ ลุห นโทล อัง แญง ออ ตี นำ ซาบาน เคิบ อับราฮัม เจ็น ตัก อิง นัน 74นำ ซาบาน เค็ย แลว แอ ปน แอ็ม เจ็น อำนาด ซะตรู แลว แอ ก็ เป็น ลูกนอง นำ แอ เลาะใจ ฮับไจ นำ วัล แอ ก็ ไอ มี จำเป็น นเจิก อัง นำ เตาะ 75นำ ก็ แอง เลาะ ซิห แอ ระ แอ เป็น ครำ เลาะ ครำ ซือ คอง ออ ฮัก นำ ก็ ระ แอ อุ เลาะ เคิบ ออ จำ นเดย จำ กวา” เซคารียา อัง
76ทาเน เซคารียา ก็ ไล ควัน เจะ นัน คือเน “ควัน เฮย บัดนะ อัห มพึ มัห ตัก ลาม เอาซาง ตี แกะ ทีซุด มัห เพีย เริล วาล มัด งกีจ็อง มัห เพีย แอง รวง อน นำ 77บัดนะ มัห ก็ เพีย ไล ครำ คอง งกีจ็อง ระ อัห เม็จจึด เค็ย เอาซาง อง ญ็อก แอ็ม ตี ลุห อัห ระ อัห ปน แอ็ม เจ็น โทด
78ตี เอาซาง ใจ ดัว ซีตึ อัง แอ นัน นำ ก็ โตะ นโจง รวง อน แอ เจ็น ทึห ระ ทาง เล็ห ซะ ตัก แอ ฮุน เล็ห งิ ตัก งกร็อห 79มานะ เน แอ อุ ตัก ตี ม็อญ ซะ เน ก็ มอก ครำ บัก และ เปิล แลว แต งกีจ็อง โตะ จวย นโจง รวง อน แอ ระ ทาง ซะ นซึล นำ ก็ ซับรวง แอ นจาง เริล รวง เลาะ คอง นำ” เซคารียา อัง
80ทาเน ยอน ก็ เคริบ แกะ นัง ติกๆ ซีมาล เอาซาง ก็ เฮง จวย ระ นำ มี แร็ง มี กำลัง#ค 80 “แกะ นัง” มี ความมาย เปียะ มบลึ เคิบ แกะ นัง ดก วัล เจ็นนัน แกะ นำ แลว นำ ก็ เริล อุ ตัก ตี แลง ยอน อุ ตัก ตี แลง นัน จำปอ เล็ห งิ ตี นำ โตะ ไล เลือง เอาซาง อน ตัก ครำ อิซราเอล
Markert nå:
ลูกา 1: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
