ยอน 6
6
เยซู เลียง ครำ ฮา พัน ล็อง
1-4แทะ นัน วัล บัก และ เล็ห งิ เทซกาน เปซา แลว เยซู ก็ คาม นอก ทะเล กาลิลี ตี อัห เค็ย ทะเล ทิเบเรียด นัน นำ คาม ทะเล นัน เริล พาโนน โตะ พาโนน แลว นำ ก็ ก็อห ญวัง ทึห นำ ก็ คุด อุ ตัก ญวัง นัน เลิม เคิบ ปึง ลูกนอง ออ
ทาเน ก็ มี ปึง พซาซน ดก ล็อง เริล เคิบ นำ ตี อัห เริล เคิบ นำ นัน ก็ เป็น ตัก อัห เม็จ นำ แอง ซะ แปลก กุญ อัห เม็จ นำ จวย ครำ โซะ ระ เลาะ เล็ห กุญ อัห ก็ เคริบ นำ เริล
5ทาเน เยซู ก็ ดอม ปึง พซาซน นำ เม็จ พซาซน โตะ และ ออ ดก ล็อง ฮุนนัน นำ ก็ ลด ซ็วน ฟีลิบ คือเน “แอ และ ทน ซะ ป็อง พานเดย อน อัห ป็อง บ็อห” นำ อัง
6-7ฟีลิบ ก็ ซวัล นำ “ก็ ตอ นะ เงิน ซาม มืน ทน ซะ ป็อง อน อัห ก็ ไอ มี ปอ แอ อน ตีดต็อง แอ็ด ตัก อัห ก็ ไอ มี ค็อย ล็อง เตาะ ไอ มี ปอ เตาะ” ฟีลิบ อัง ตี เยซู ซ็วน ฟีลิบ ฮุนนัน ก็ นำ ซีรอก ลอง ใจ ฟีลิบ แต เยซู เม็จ แลว นำ และ แอง จังนัก 8ลูกนอง นำ ตัก อันดรู ควน เปโตร ก็ ไล อัห คือเน 9“ดอม เน กา มี ควัน แย็ด มี ล็อง นำ มี คนมปัง บาเล ฮา แพ็น เคิบ คา เปียะ นัง เตานะ ดก ครำ จังเน ก็ ไอ มี ปอ ก้า” อันดรู อัง 10เยซู ก็ ไล ลูกนอง ออ คือเน “แป ไล ปึง พซาซน คุด วาล ดาย” นำ อัง ตัก นัน มี แญ็น ดก แดๆ เลาะลัห ตี คุด ปึง พซาซน ก็ คุด ตัก นัน นับ อัหคล็อง ก็ มี ปะมาน ฮา พัน ล็อง 11เยซู ก็ เอิด คนมปัง นัน ลด คอบคุน เอาซาง นำ ก็ ลด แจก อน ตัก อัห คา นำ ก็ เอิด คอบคุน เอาซาง นำ แจก อน อัห เมือนนอย อัห โซะ ป็อง ปานเดย อัห ก็ กุญ ป็อง อิม มด 12แลว อัห ป็อง อิม มด จู ล็อง แลว เยซู ก็ ไล ลูกนอง ออ เก็บ อัน ตี ควะ เลือ ไอ มี ระ เซีย แอ็ม ลือ เตาะ 13อัห ก็ เก็บ คนมปัง บาเล ตี ควะ เลือ นัน กุญ ซิบซอง บุง ปิ
14แลว ปึง พซาซน เม็จ เยซู แอง ระ คนมปัง เคิบ คา ดก เล็ห มอก นัน แลว อัห ก็ เลามุน เคิบ นอย คือเน “แมน แลว เยซู ล็อง เนๆ เป็น ลาม เอาซาง นำ เน ตี เอาซาง อง ระ โตะ ตัก โลก เน แมน ล็อง เน ซีเละ” อัห อัง 15เยซู เม็จ อัห อง คนาบ ออ เป็น พะเจายูฮัว คอง อัห นัน นำ ก็ ลบ วัล เริล อุ ตัก ซะร็อห ทึห มี ล็อง ฮัก
เยซู นจาง คอม นอก ลัห ทึห
16ตัก แจ็ล แมด ซะ งิ นัน ปึง ลูกนอง นำ ก็ เริล ตัก นอก ทะเล กาลิลี 17เล็ห เปล นอก แลว อัห ก็ ต็อก เฮือ เริล ออ อัห และ เริล งวัล คาเปอนาอุม ทาเน ก็ แจ็ล ม็อญ ซะ แลว เยซู ก็ ไอ มี ตัน โตะ อัห ก็ ต็อก เฮือ เริล ออ ติก 18ญาม อัห ต็อก เฮือ เริล นัน งกริม ก็ เฮง เคริบ แร็ง เล็ห ติกๆ นอก ก็ เคริบ โท็ล นโดน โท็ล นแด็ห 19อัห เริล ปะมาน ฮา ฮก กีโล แลว อัห ก็ ปัก เม็จ เยซู นจาง โตะ คอม นอก ลัห ทึห อัห เม็จ นำ กำลัง ติ โตะ ตัก เฮือ อัห ก็ แร็ง นเจิก ซีเละ 20แต เยซู ไล อัห คือเน “เอิญ ดาย อำ แป นเจิก เตาะ” นำ อัง 21อัห เม็จ เค็ย เป็น เยซู ซีเละ อัห ก็ เลาะใจ เลาะ คอ อัห ก็ ลด เอิด นำ กุด ใน เฮือ ท็อบ เยซู กุด ตัก เฮือ นะ อัห ก็ พด โตะ เคิง ตี อัห อง เริล นัน
ปึง พซาซน โตะ และ เยซู
22คือ งิ กรัก วัล ปึง พซาซน ตี ควะ อุ เคิง ตี เยซู เลียง คนมปัง อัห งิ เซ็น อัห ซงไซ เยซู เริล พานเดย ฮุ อัห ก็ จำ กุญ เค็ย งิ เซ็น อัห เม็จ มี เฮือ อุ นัน มี ลำ เดียว อัห เม็จ เค็ย ปึง ลูกนอง เยซู ต็อก เฮือ ลำ นัน เริล ออ แลว แต อัห ไอ มี เม็จ เยซู เริล เลิม เคิบ ลูกนอง ออ อัห ไอ มี เม็จจึด เยซู อุ ตัก นเดย 23อัห กึด เลือง นัน อุ ก็ พอดี มี อัหซอ ซับ เฮือ โตะ เจ็น เมือง ทีเบรีอัด เฮือ ลำ ซอ นัน โตะ จอด อุ ติๆ ตัก ตี เยซู เอิด คนมปัง เลียง ครำ ดก แทะ นำ คอบคุน เอาซาง นัน 24ญาม ปึง พซาซน ไอ มี เม็จ ควะ เยซู เคิบ ลูกนอง อุ เคิง นัน อัห ก็ จบ ต็อก เฮือ นัน คาม นอก เริล และ เยซู ตัก งวัล คาเปอนาอุม
เยซู เป็น คนมปัง ตี ระ ครำ รีด อุ ตลอด
25อัห เม็จ เยซู แลว อัห ก็ ซ็วน นำ คือเน “อาจาน มัห โตะ เน ญาม นเดย” อัห อัง 26เยซู ก็ ซวัล อัห “เอิญ ไล แป นังเลาะ นะ ตี แป โละ และ เอิญ เน ก็ เป็น ตัก เอิญ เลียง คนมปัง แป ระ แป ป็อง อิม มี มบลึ นัน แต เลือง เอิญ แอง ซะ ป็อง อน แป ป็อง อิมๆ นัน เอิญ แอง เพือ ระ แป เคาใจ เค็ย เอิญ เป็น ครำ ตี เอาซาง ระ โตะ จวย แป ตัก โลก เน เลือง เน แป ไอ มี ซนใจ เตาะ 27เอิญ ไล แป นังเลาะ นะ ดาย อำ แป ปาย โละ และ ซะ ป็อง ตัก ไอ มี กุม อิง เตาะ แป ต็อง โละ และ ซะ ป็อง ตัก กุม อิงๆ ฮัก ซัง เลาะ ซะ ป็อง ตัก กุม อิง นัน ก็ ซีแล็ม เค็ย ซีวิด รีด อุ จำ นเดย จำ กวา เอิญ เน ตี เอาซาง ระ เกิด เป็น ครำ เอิญ มี ซิด มี อำนาด ระ แป รีด อุ จำ นเดย จำ กวา กุญ ตี เอิญ แอง ซะ ป็อง ระ แป กุญ ป็อง อิม งิ เซ็น ก็ เป็น เอาซาง รับรอง เค็ย เอิญ เน เป็น ครำ จวย ระ แป รีด อุ จำ นเดย จำ กวา นัน” เยซู อัง
28อัห ก็ ลด ซ็วน เยซู คือเน “อิห ต็อง แอง จังนัก ซัง เอาซาง ปอใจ อัง อิห บ็อห” อัห อัง 29เยซู ก็ ซวัล อัห ฮุนเน “กัน แป ซีรอก ระ เอาซาง ปอใจ แป ก็ ต็อง เจือ เอิญ เน ต็อง เจือ เค็ย เอิญ เป็น ล็อง นัน ตี เอาซาง ไล โตะ ตัก โลก เน” เยซู อัง
30อัห ก็ ลด ไล เยซู คือเน “กัน จังนะ ก็ มัห แอง ซะ แปลก อน อิห ดอม วาล ระ อิห เม็จจึด เค็ย มัห กิว มี แร็ง เอาซาง ซัง อิห เจือ เค็ย มัห เป็น ล็อง นัน ตี เอาซาง ไล โตะ มัห แอง ซะ แปลก จ็อง อน อิห ดอม กุญ อัน มัห แอง ซีวะ อน อิห ดอม บ็อห 31เอาจ็อง คอง อิห ตัก อิง อัห ก็ กุญ ป็อง มานา#ค 31 “มานา” เป็น แญง ฮีบรู มานา เน เป็น ซะ ป็อง ตี เอาซาง อน ครำ ยิว ตัก อิง ญาม อัห อุ ตัก ตี แลง 40 ปี นัน ตัก ตี แลง นัน ซีเละ มอก อัห เคียน ระ ตัก นังซือ เอาซาง ฮุนเน ‘นำ เอิด ซะ ป็อง เจ็น วาง ตัก ทึห อน ตัก อัห ป็อง’ นังซือ เอาซาง อัง ดุห ตี เอาซาง เลียง อัห นัน เป็น ซะ แปลก จ็อง ซีเละ มัห ดุห มัห แอง ซะ แปลก จ็อง มอก นัน กุญ อัน” อัห อัง#อิซราเอล ญาย 16:4, 15, เพลง เอาซาง 78:24
32เยซู เม็จ อัห จ็อก คือนะ นำ ก็ ซวัล อัห จังเน “เอิญ ไล แป นังเลาะ นะ ตัก อิง นัน เก็ย จบ แมน โมเซด อน ซะ ป็อง ตัก แป ดาย แต เป็น เอา เอิญ ฮัก อน ซะ ป็อง นัน ตัก แป มานะ เน เอา เอิญ ตัก ซะวัน นทึห นำ เอิด ซะ ป็อง เลาะ ทีซุด ตัก ซะวัน นทึห อน ตัก แป เน 33ซะ ป็อง ตี เอาซาง อน เน ซีแล็ม เค็ย นัง เอิญ เน ตี จูล โตะ เจ็น ซะวัน ทึห เอิญ เน ระ ครำ ทัว โลก รีด อุ กุญ” เยซู อัง
34ปึง อัห ก็ ลด ไล เยซู คือเน วัล “อาจาน กัน จังนะ ก็ ครอ ระ มัห อน ซะ ป็อง นัน ตัก อิห ตลอด ดาย” อัห อัง 35เยซู ก็ ลด มเบิด ไล อัห คือเน “เอิญ เน เป็น ซะ ป็อง ตัก ระ ครำ รีด เอา นเดย ตี โตะ และ เอิญ อัห ก็ อิม ไอ มี โซะ จะ วัล เตาะ เอา นเดย ตี เจือ เอิญ อัห ก็ อิม ไอ มี โซะ ออก วัล เตาะ 36เอิญ ไล แป แลว เค็ย แป เม็จ เอิญ เคิบ มัด ออ แลว แป ก็ ควะ ไอ มี ญอม เจือ เอิญ เอิญ ไล แป จังเน แลว นอ
37แต จู ล็อง ตี เอา เอิญ อน ตัก เอิญ นัน บัดนะ อัห โตะ และ เอิญ มด อัห เจือ เอิญ มด จู ล็อง เอิญ ก็ เอิด อัห เป็น ครำ คอง ออ มด จู ล็อง ซีเอ ก็ ตึก ตี โตะ และ เอิญ เอิญ ก็ ไอ มี พระ แอ็ม อัห ไอ มี มบรึห อัห ซัก มี ล็อง เตาะ
38เอิญ จูล เล็ห เจ็น ซะวัน ตัก ทึห ก็ เอิญ โตะ แอง จู มบลึ มอก เอา เอิญ ไล เอิญ ไอ มี โตะ แอง ตาม กำกึด ออ เตาะ เอิญ โตะ แอง ตาม แพนกาน ตี เอา เอิญ กึด ไล เอิญ แอง ฮัก
39เอาซาง ตี ระ เอิญ โตะ ตัก โลก เน นำ มี แพนกาน จังเน ดาย นำ ซีรอก ระ เอิญ เอิด ครำ ตี นำ อน ตัก เอิญ แลว นัน แอง ระ อัห รีด เล็ห วัล ตัก งิ ซุดทาย นัน บัดนะ ตัก งิ ซุดทาย นัน บัดนะ ครำ ตี เอาซาง อน ตัก เอิญ นัน เอิญ ก็ ระ อัห รีด เล็ห มด จู ล็อง เอิญ ไอ มี พระ ระ อัห เปิล อุ ซัก มี ล็อง เตาะ
40ก็ ฮุนเน ดาย จู ล็อง ตี เคาใจ เค็ย เอิญ เป็น ควัน เอาซาง ลด เจือ เอิญ วัล เอา เอิญ ซีรอก ระ อัห รีด อุ จำ นเดย จำ กวา มด จู ล็อง เอิญ ก็ ปัง แญง เอา ออ เอิญ ระ อัห รีด เล็ห มด บัดนะ” เยซู ไล อัห จังนะ
41ตี เยซู เค็ย นัง ออ เป็น ซะ ป็อง ตี จูล โตะ เจ็น ซะวัน ตัก ทึห นัน ครำ ยิว นัน ก็ ไอ มี เลาะใจ เตาะ อัห ก็ เซาะ นำ อัห เค็ย นำ 42อัห เค็ย นำ จังเน “เยซู ล็อง เน นำ เป็น ควัน โยเซบ พาลือ ไอ แมน เออะ เอา เม คอง นำ แอ ก็ เม็จจึด อุ แลว นำ จบ เค็ย นัง ออ จูล โตะ เจ็น ซะวัน ตัก ทึห กุญ จังนัก นำ จ็อก จังนัน ก็ คีอู คีลม นำ ก้า” อัห อัง
43เยซู เม็จ อัห เซาะ อัห เค็ย ออ คือนะ นำ ก็ ลด ไล อัห คือเน “อำ โป อำ เค็ย เอิญ เตาะ ดาย 44ไอ แมน จู ล็อง โตะ และ เอิญ กุญ ดาย ครำ ตี เอาซาง ซับรวง ฮัก ซัง โตะ และ เอิญ กุญ กัน เอาซาง ไอ มี ซับรวง แป โตะ และ เอิญ แป ก็ ไอ มี กุญ โตะ และ เอิญ เตาะ แต จู ล็อง ตี เอาซาง ซับรวง อัห โตะ และ เอิญ นัน ตัก งิ ซุดทาย นัน บัดนะ เอิญ ก็ ระ อัห รีด เล็ห วัล 45ลาม เอาซาง ตัก อิง อัห เคียน เลือง ครำ ตี โตะ และ เอิญ นัน อัห เคียน คือเน ‘ครำ ปึง นัน อัห ปัง แญง เอาซาง ไล ออ มด จู ล็อง’ อัห อัง แอ ก็ ลด เม็จจึด เค็ย ครำ ตี กิว ปัง แญง เอาซาง นังเลาะ นัน อัห ก็ โตะ และ เอิญ มด อิซยา 54:13
46ตี เอิญ เค็ย แป ต็อง ปัง แญง เอาซาง ก็ ไอ แมน แป เม็จ มัด เอาซาง ดาย ไอ มี ซีเอ เม็จ มัด เอาซาง มี แต เอิญ มี ล็อง เดียว เน เม็จ มัด เอาซาง เอิญ เล็ห เจ็น เอาซาง แลว เอิญ เน เกย เม็จ มัด เอาซาง นังเลาะ แป เจือ เอิญ ก็ เลาะ
47เอิญ ไล แป นังเลาะ นะ อีเอ เจือ เอิญ อัห ก็ รีด อุ จำ นเดย จำ กวา 48ซีเละ นะ เอิญ เน เป็น ซะ ป็อง ตี ระ ครำ รีด อุ ดาย 49เอาจ็อง เมจ็อง แป ตัก อิง อุ ตัก ตี แลง ตี ไอ มี ซีวะ ป็อง นัน เอาซาง อน มานา ตัก อัห อัห จู ล็อง กุญ ป็อง มานา นัน แต อัห ควะ เปิล อุ อัห ไอ มี รีด อุ จำ นเดย จำ กวา เตาะ
50แต มานะ เน มี ซะ ป็อง ตี เล็ห เจ็น ซะวัน ตัก ทึห ซีเอ ตี ป็อง ซะ ป็อง เน อัห ก็ ไอ มี เปิล เตาะ
51เอิญ ไล แป ซีเละ นะ เอิญ เน เป็น ซะ ป็อง นัน ตี จูล เล็ห เจ็น ซะวัน ตัก ทึห อีเอ ป็อง ซะ ป็อง เน อัห ก็ รีด อุ จำ นเดย จำ กวา ซะ ป็อง เน ตี เอิญ อน ตัก ครำ ทัว โลก เน ก็ เป็น เซ็จ เอิญ เน ฮัก เซ็จ เน ตี ระ ครำ รีด อุ ตลอด จำ นเดย จำ กวา ฮัก” เยซู ไล อัห จังนะ
52ทาเน ปึง ครำ ยิว นัน อัห ก็ เทียง นอย “ล็อง เน นำ เค็ย เอิด เซ็จ ออ อน ตัก แอ ป็อง ก็ ซีแล็ม เค็ย ซีวะ บ็อห นำ เอิด เซ็จ ออ อน ตัก แอ ป็อง กุญ จังนัก” อัห เทียง นอย จังนะ 53อัห ไอ มี เคาใจ เยซู ก็ ลด มเบิด ไล อัห จังเน วัล “เอิญ ไล แป นังเลาะ นะ เอิญ เป็น ล็อง นัน ตี เอาซาง ระ เกิด เป็น ครำ กัน แป ไอ มี ป็อง เซ็จ เอิญ กัน แป ไอ มี ออก เมียม เอิญ แป ก็ ไอ มี กุญ รีด อุ จำ นเดย จำ กวา เตาะ
54แต ซีเอ ป็อง เซ็จ เอิญ ออก เมียม เอิญ เน ตัก งิ ซุดทาย นัน บัดนะ เอิญ ก็ แอง ระ ล็อง นัน รีด อุ ตลอด จำ นเดย จำ กวา 55เซ็จ เอิญ เน กิว เป็น ซะ ป็อง นังเลาะ เป็น ซะ ป็อง ตี แอง ระ ครำ รีด อุ จำ นเดย จำ กวา นังเลาะ เมียม เอิญ เน ก็ กิว เป็น ออก นังเลาะ เป็น ออก ตี แอง ระ ครำ รีด อุ จำ นเดย จำ กวา นังเลาะ 56ซีเอ ป็อง เซ็จ เอิญ ออก เมียม เอิญ เอา นัน ก็ เป็น ครำ คอง เอิญ ซีเละ นำ อุ เคิบ เอิญ เอิญ ก็ อุ เคิบ นำ
57เอา เอิญ รีด อุ ตลอด นำ ก็ ระ เอิญ โตะ ตัก โลก เน ทาเน เอิญ รีด อุ ก็ ญอน เอา เอิญ ฮัก แป รีด อุ ก็ ญอน เอิญ ฮัก กัน แป ป็อง เซ็จ เอิญ เน แป ก็ รีด 58ซะ ป็อง เอิญ เน ไอ มี เมือน ซะ ป็อง เอาจ็อง เมจ็อง แอ ตัก อิง เอาจ็อง แอ ตัก อิง นัน อัห ป็อง มานา ซีเละ แต อัห ก็ ควะ เปิล อุ แต เซ็จ เอิญ เน เป็น ซะ ป็อง เลาะ ตี จูล โตะ เจ็น ซะวัน ตัก ทึห อีเอ ป็อง ซะ ป็อง เน อัห ก็ รีด อุ ตลอด จำ นเดย จำ กวา ไอ มี เปิล เตาะ” เยซู มเบิด ไล อัห จังนะ 59เยซู ไล เลือง เน อน อัห ญาม นำ อุ ตัก ฮ็อง พซุม ตัก งวัล คาเปอนาอุม
ลูกนอง เยซู พระ นำ ดก ล็อง
60ญาม เยซู มเบิด ไล เลือง นัง ออ อน อัห ปัง นัน ปึง ลูกนอง นำ ดก ล็อง อัห ก็ ไอ มี เคาใจ อัห ก็ จ็อก เคิบ นอย จังเน “นำ เค็ย ซีวะ จังนะ ญาก เคาใจ ไบ แอ เจือ กุญ จังนัก บ็อห” อัห อัง
61ตี ปึง ลูกนอง เยซู จ็อก จังนะ เยซู ก็ เม็จ มด นำ ลด ไล อัห ฮุนเน “เอิญ ไล แป ฮุนนัน แป ก็ ไอ มี ตัน เคาใจ อัง 62บัดนะ แป เจือ เอิญ อัน เอิญ เน ตี เอาซาง ระ เกิด เป็น ครำ เน บัดนะ จับ แป เม็จ เอิญ ลบ วัล ก็อห เริล อุ ตัก ซะวัน นทึห นัน ญาม นัน แป เจือ เอิญ อัน
63ครำ จวย นัง ออ ระ รีด อุ ก็ ไอ มี กุญ เตาะ เป็น ซีมาล เอาซาง ฮัก ระ ครำ รีด อุ กุญ แญง ตี เอิญ เลามุน อน แป ปัง เน ก็ เป็น ซีมาล เอาซาง อน แญง เนๆ ระ แป รีด อุ จำ นเดย จำ กวา แญง เน แป เจือ กุญ ดาย 64แต เอิญ เม็จ แลว แป แกด ล็อง ไอ มี เจือ เอิญ เตาะ” เยซู อัง ตี เยซู ไล อัห ฮุนนัน ก็ เป็น ตัก นำ เม็จจึด ใจ ครำ เลาะ นำ เม็จจึด ใจ ครำ เจ็น ตี นา แลว อีเอ เจือ อีเอ ไอ มี กิว เจือ นำ ก็ เม็จ มด อีเอ ฮักลัง นำ บัดนะ นำ ก็ เม็จ มด
65เยซู ก็ ลด ไล อัห คือเน วัล “กัน เอา เอิญ ไอ มี อน ครำ ตัก เอิญ อัห โตะ และ เอิญ ไอ มี กุญ เตาะ ต็อง เป็น เอา เอิญ ซับรวง อัห ฮัก ซัง อัห โตะ และ เอิญ กุญ เคิน เอิญ ไล แป แลว นอ” เยซู ไล อัห จังนะ 66ปึง พซาซน ตี เริล เลิม เคิบ เยซู นัน อัห เม็จ เยซู ไล ออ จังนะ แลว อัห ก็ พระ แอ็ม นำ ดก ล็อง
67เจ็นนัน เยซู ก็ เกล นัง ออ ซวาด ดอม ลูกนอง ซิบซอง ล็อง นัน นำ ลด ซ็วน อัห คือเน “แป ดุห แป พระ แอ็ม เอิญ มอก อัห นัน อัน” นำ อัง 68เปโตร ก็ ซวัล นำ “งกีจ็อง เฮย อิห ไอ มี พระ มัห ดาย กัน อิห พระ แอ็ม มัห อิห เริล และ อีเอ วัล เตาะ อิห ปัง แญง มัห อิห เจือ แญง มัห ฮัก แญง มัห เน ระ ครำ อิห รีด อุ จำ นเดย จำ กวา ฮัก 69อิห เจือ มัห แลว อิห ก็ ลด เม็จจึด เค็ย มัห เป็น ครำ ซักซิด คอง เอาซาง ฮัก” เปโตร อัง#มัดทิว 16:16, มาระโก 8:29, ลูกา 9:20
70เยซู ก็ ลด ไล อัห คือเน “เอิญ เลือก เอิด แป ซิบซอง ล็อง แต ไอ แมน จู ล็อง เจือ เอิญ มี มี ล็อง ตัก ปึง แป เน นำ เป็น ปรอง” เยซู อัง 71ล็อง ตี เยซู เค็ย ปรอง นัน เยซู เค็ย ยูดาด ควัน ซีโมน ครำ คารีโอด ยูดาด ล็อง เน นำ เป็น ลูกนอง ตัก ปึง ซิบซอง ล็อง นัน แต แทะ นัน วัล นำ ก็ ฮักลัง เยซู ซีเละ
Markert nå:
ยอน 6: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
