San Mateo 19

Bittu dica udhá iqui ttu unbiyuu nuila gueni

(Mr. 10:1-12; Lc. 16:18)

1Atti uluxa unne Jesús ca tisa-ni nna biríattebe lo yu gue Galilea, die daca lo yu nu te láni Judea nu te attu ladu gue yoo Jordán. 2Ixe tsitsia benni dia denocana Benniha. Lee nna beonbe ca benni rani seꞌe nía.

3Ttulhe ca fariseo ubigattebacana atta du Jesús, qui cuꞌubiacana Benniha nna unnaba tisattebacane, rácane:

—¿Gua dica udhequi ttu unbiyuu nuila gueniha lo niꞌa gue ttu bixaba?

4Lee nna becabie guecani, re:

—¿Si bittuba chi belabale lo ca sitsi gue Tata Do Iyyabaaha atta rá atti primerba ben Tata Do Iyyabaaha ca benni, “benie ttu unbiyuu nna ttu nuila nna”?#19:4 Génesis 1:27, 5:2 5Ráguabe: “Denuala nna ocaꞌana unbiyuu-na tata nan gueni qui utsá náni leni nuila aca latselani. Lania nna irpabacana eyacacana attiba ttuba benni.”#19:5 Génesis 2:24 6Larcala nna lärga anca ca nua chupa benni, sinuqui ttuba benni chi beaca ca nua. Nuarcala nna läga dica elhaꞌa ttu benni lheꞌe loesi ca benni chi bequeti Tata Do Iyyabaaha.

7Ca fariseo nna becabicana rácana Benniha:

—¿Biacala rá lo ca ley bocaꞌana Moisés, dequi guadicaba elaꞌa ttu unbiyuu len nuila gueniha leni ttu sitsi ilhidhana utena len nua atta rixxiꞌa bixa lo niꞌa gue elaꞌacana?

8Jesús becabie re cana:

—Uxielha galá Moisés udhequile ca nuila guele-na, cumu de yatterba de ditile. Ttiaca Tata Do Iyyabaaha desdeba atti beseꞌe ca primer benni, läga uca lee aca aná. 9Neti nna ria le, unbiyuu nu cuentaba udhequini nuila gueniha qui aca edína attu nuila subi, gan läba de bisá nua attu unbiyuu subi, ttu nu satsaba nua uni unbiyuuha. Anáguaba unbiyuu nu edí nuila bedhá iquicaniha, ttu nu satsaba nua unna.

10Ca benni rudheti ca tisa ruleꞌe nna ráttebacabi Benniha:

—Gansi anála rate ca benni rutsá nácani, tsa lägabi lheaca anca utsá ná benni.

11Jesús becabie re ca biꞌiniha:

—Läga iyá benni ancacana nu dica sadú leni gue nu ria-ni, sunruba ca benni chi ancani Tata Do Iyyabaaha ttedaaquinna gue nu ria-ni gua radú lecani gue unní. 12Seꞌe ca unbiyuu bittu rutsá nácani, cumu lheꞌe nan guelicani chi ancacana nu bittu dica dho len nuila. Seꞌe adí ca unbiyuu bittu rutsá nácani cumu ca benni seꞌe yies lo yu-niba roquinna iquicani guecani. Seꞌeguaba ca unbiyuu ca nu la labacana roquinna iquicani bittu utsá nácani qui aca itú iqui itú lecani ixuucana lo sina gue Tata Do Iyyabaaha, anía nna qui tsani ca benni rinnabia Benna. Larcala nna benni rudhaca leni guadána unna nu ria-ni nna unbana aná.

Jesús unnabe elha nabani gue ca unto lo Tata Do Iyyabaaha

(Mr. 10:13-16; Lc. 18:15-17)

13Nianna ca benni nna uchecana ttu lhe ca unto guecaniha lo Jesús qui uxxúa nee iquicani, innábe elha nabani guecani lo Tata Do Iyyabaaha, ttiaca ca benni rudheti ca tisa ruleꞌe nna bedhaca disattebacabi ca benni che ca untoha. 14Laniala nna rá Jesús:

—Gualgüelha ca unto-na itacana len neti, bittu usunale, cumu ca benni anca attiba ca unní liba ancacana benni rinnabia Tata Do Iyyabaaha.

15Dequide bexxúa nee iqui ca untoha nna deyyattebe.

Ttu uncuiti texxatta gueni unne lenna Jesús

(Mr. 10:17-31; Lc. 18:18-30)

16Ttu uncuiti nna ubigana lo Jesús unnaba tisane ráne:

—Maestro, ¿bi nu tsee dica unia qui gatta elha nabani quia ttu tsaba?

17Lee nna becabie re:

—¿Biaca neti rálu benni tsee? Cumu tsa läganu te ancana benni tsee, sunruba Tata Do Iyyabaaha anque Benni tsee. Ttiaca gansi raca lelu gatta elha nabani guelu ttu tsaba, bedo tisa gue nu beni benna mandadu unri.

18Uncuitiha nna unnaba tisana rána:

—¿Nú ca na?

Jesús becabie re:

—Bittu uttilu benni, bittu utsá roꞌolu nu bittu anca latselalu lhe bittu lhanalu lhe bittu un lelu cuentaba unlu xiyya gue benni subi lhe 19gapalu respeto tata nan guelu lhe aquinlu gue ca benni attiba raquinlu gue la luba lhe.

20Uncuitiha nna becabina rána:

—Iyába unní, atti ancalia güexxaha uduloa runia. ¿Biruha la reasa unia?

21Jesús becabie gueni re na:

—Gansi rdacalu acalu benni runi nu anca tsee, beyya guattoꞌo iyárecha nu te guelu. Belhi gue nua nna begüee ca benni bittu te guecani. Anía liba nna gatta elha tsee guelu iyyabaaha. Lania nna utátte betteno neti.

22Atti bienin uncuitiha nu rá Benniha na, siꞌirurba runna deyyana, cumu de ancana nu texxatta gueni.

23Laniala nna rá Jesús ca benni rudheti ca tisa ruleꞌe:

—Neti nna gualíbatia rpea le, tsitsi galá anca eꞌeyu ttu benni te gueni acana benni rinnabia Tata Do Iyyabaaha na. 24Attu libe rpea le: Gaxa guaterla ttu nimala te láni camello lheꞌe belea do xan ttu tsioxa atti ttu benni te gueni eꞌeyuna acana benni rinnabia Tata Do Iyyabaaha.

25Atti bienini ca benni rudheti ca tisa ruleꞌe iyába unní nna adílaba de bebanquinbi, nianna rá loescabi:

—Gansi anía anca, ¿núla guadána lhána qui bittu tsia nittina ganna?

26Begüiatteba Jesús locabi, nianna re:

—Ca benni seꞌe yies lo yu-niba bittu dhacana uncana unní, ttiaca Tata Do Iyyabaaha iyába raca guee runie.

27Laniala nna bequi Pedro rábi Benniha:

—Riꞌitu nna iyába nu te guetu bocaꞌantu, atti dattebatu len cuinalu. ¿Bi ralhatu dhítu?

28Jesús re cabi:

—Neti nna gualíbatia rpea le, gansi chi bisía sá ecubi yies lo yu-ni leni iyába nu seꞌe loni, lania nna neti Benni unbiyuu daa iyyabaaha dhoa lo xxila gaꞌana tsee qui innabiaya. Anáguaba lebiꞌi ca benni denoo neti, ebíaguabale lo tsiꞌinu (12) ca xxila qui unle elha uxtisi gue ca tsiꞌinu cue ca benni datía benni lá Israel. 29Nuxaba benni, gansi de lo niꞌa quia chi bedhá iquini yoꞌo gueni lhe betsini lhe danni lhe tata gueni lhe nan gueni lhe nuila gueni lhe xiꞌinni lhe lo yu gueni lhe lana nna ttu gayua (100) libe tteba edína nu bennittinaha, dhína elha nabani gatta ttu tsaba gueni lhe. 30Ttiaca ixe ca nu runi ancacana nu ra xxeni leni nnanna eyacacana nu bittu ra xxeni leni, ixeguaba ca nu bittu ra xxeni leni nnanna eyacacana nu ra xxeni leni.

Markert nå:

San Mateo 19: zaq

Marker

Del

Kopier