San Mateo 16

Unnabacana un Jesús ttu milagru

(Mr. 8:11-13; Lc. 12:54-56)

1Laniala bisína ca fariseo lhe ca saduceo lhe atta du Jesús qui cuꞌu biacane. Lacana nna unnabattebacana unie ttu milagru nu uleꞌe lo gansi gualí Tata Do Iyyabaaha udhelhe Benniha. 2Ttiaca lee nna becabie gue ca nua re:

—Ca ulha-na gansi chi radi tatubisa-na, lebiꞌi nna rále: “Yaniba uxxea, cumu de anca xinaa lo bea-na.” 3Ca dila-na nna rále: “Nnanna nna iyya lhaba aca, cumu yuꞌu bea lhe anca xinaa lo bea-na lhe.” ¡Lebiꞌi, ca nu ni lo ni tisaba runle dequi ancale nu runi nu anca tsee! Gua ritedaabinle gue nu raca lo bea-na. ¿Biacala nna bittu ritedeenle gue nu rilenle raca tiempu seꞌele-ni? 4Lebiꞌi, ca benni runi nu lä anca tsee seꞌe nnanna nu chi bedhá iquini Tata Do Iyyabaaha lhe rinnabale unia ttu milagru nu uleꞌe lo gansi gualí Tata Do Iyyabaaha udhelhe neti, ttiaca bittu uleꞌetia le attu milagru subi gan läba loesi milagru uca len profeta Jonás.

Nianna níaba beseꞌe bixxie cana güequie deyye.

Gualudo cuidadu len nu ruleꞌe ca fariseo-na

(Mr. 8:14-21)

5Atti chi belhá Jesús attu ladu gue indattooha lenie ca benni rudheti nu rulheꞌe, ca biꞌiniha nna utedaaquinbi bittu nojacabi ttaxtila. 6Nianna rá Jesús ca biꞌiniha:

—Gualdo cuidadu len levadura gue ca fariseo-na len levadura gue ca saduceo-na lhe.

7Ca benni rudheti ca tisa ruleꞌe nna rá loescabi:

—Anába rá Ben-na cumu de bittu nujari ttaxtila.

8Atti utedaani Jesús gue nu rá ca biꞌiniha nna ráttebe cabi:

—¿Biaca rinnele rále dequi bittu ttaxtila te guele, lebiꞌi, ca nu bittu ria tsitsi leni? 9¿Si itú ttuhaba bittu radú lele? ¿Bittuguaba rexxa lele gue gayu ttaxtila utidhia len gayu mil benni lhe gue a balhaxa sumi bisá ca pedazu ttaxtila bottupaleha lhe? 10¿Si bitturguaba rexxa lele begoguaba ttapa mil benni len gasi ttaxtila lhe gue balhaxa sumi bisá ca pedazu ttaxtila bottupaleha lhe? 11¿Biaca bittu radú lele, läga gue ttaxtila rinnea atti ria? Gualudo cuidadu len levadura gue ca fariseo-na lhe len levadura gue ca saduceo-na lhe.

12Lania liba guadú lecabi, läga gue levadura ria lheꞌe cua raca ttaxtila-na nua rinne Benniha atti re anía, sinuqui gue nu rulheꞌe ca nu fariseo lencana ca nu saduceoba nua rinne Benniha.

Pedro rixxiꞌabi Jesús anque Cristu

(Mr. 8:27-30; Lc. 9:18-21)

13Atti bisína Jesús lo yu gue yiesi nu te láni Cesarea gue Filipo, unnaba tisattebe ca benni rudheti ca tisa ruleꞌe, re cabi:

—Neti Benni unbiyuu daa iyyabaaha, ¿nú rá ca benni dequi anca?

14Ca biꞌiniha nna becabicabi rácabi:

—Ttulhe benni rácana lu ancalu Juan biꞌini begadi indaha. Adí benni nna rácana lu ancalu profeta Elías. Attu lhecana nna rácana profeta Jeremíasba lu, o nuxaba attu ca benni uca profeta gue Tata Do Iyyabaaha lhe.

15Laniala nna rá Jesús ca biꞌiniha:

—Lebiꞌi nna ¿núla rále anca?

16Simón biꞌini láguaba Pedro, becabittebabi rábi:

—Lu ancalu Cristu xiꞌini Tata Do Iyyabaaha, Benni doe anque Benni bani.

17Laniala nna rá Jesús biꞌiniha:

—Carbárulu, xa Simón, xiꞌini Jonás, cumu läga benni utixxiꞌenna lu nu unnelha, sinuqui Tata quia do iyyabaahaba utixxiꞌenie lu nu ralha. 18Anáguaba neti upeguaba lu, lu ancalu Pedro.#16:18Pedro dienna innána iyya. Iqui iyya-ni nna dhuloa useꞌa ca benni tsia lecabi neti, ni elhuttiha bittu dhana locabi. 19Neti utea derechu lenlu qui acalu nu banani ca benni innabia Tata Do Iyyabaaha, Larcala nna iyába nu innálu bittu dica un ca benni yies lo yu-ni nna chiba boquinna iqui Tata Do Iyyabaaha bittu aca nua atta doe. Nu innálu gua dicaba un ca benni yies lo yu-ni nna chiguaba boquinna iqui Tata Do Iyyabaaha aca nua atta doe.

20Laniala nna bentteba Jesús mandadu ca benni rudheti ca tisa ruleꞌe qui tsa nuttu nu quixxiꞌencabi, labe nua Cristu.

Jesús rixxiꞌe utticane

(Mr. 8:31–9:1; Lc. 9:22-27)

21Desdeba lania nna udulo Jesús utixxiꞌenie ca benni rudheti ca tisa ruleꞌe, lee nna raca duelha tsie Jerusalén. Lheꞌe yiesiha nna satexxatte lo ná ca benni teru elha rieni gueni gue ca benni Israel, lo ná ca nu lo gue ca bixxudiha lhe ca nu ruleꞌe nu rá lo ca ley bocaꞌana Moisés lhe. Utixxiꞌaguabe re, ca unnuha nna utticane, ttiaca eyonna ubisa nna eyacanie. 22Laniala nna ulequiesi Pedro Jesús attu atta subi, nianna utisabi Benniha rábi:

—¡Tata Do Iyyabaaha tsa läga ugüelha Benniha satelu aná, xa tata!

23Ttiaca Jesús bodequitteba loe begüie lo Pedro nianna re:

—¡Ubietta atta dua-ni, nu xxegüi! Rdacabalu ichecua lo neda gue Tata Do Iyyabaaha, cumu lu nna läga rulaba lelu atti rulaba le Tata Do Iyyabaaha. Attiba rulaba le ca benni seꞌe yies lo yu-ni rulaba lelu.

24Laniala nna rá Jesús ca benni rudheti ca tisa ruleꞌe:

—Gansi nuxale raca lele acale benni udheti ca tisa quia-ni, raca duelha erú iqui erú le nua elha nabani gueni, uchíana lo iyába nu satena lhe attiba ttu benni diana noja crusi gueni atta utácan na lo nua, lana nna ettenobana neti, masquiba uttican na. 25Cumu iyába ca benni rdaca odilá elha nabani guecani yies lo yu-ni, unnittiba elha nabani guecani, iyába ca benni erú iqui erú lecani gatticana lo niꞌa quia nna aca banba ca nua ttu dia lii lo Tata Do Iyyabaaha. 26Cumu tsa lägabi ixuu len ttu benni ganna eꞌeyuna acana nu banani iyá nu te yies lo yu-ni, elha nabani gueniha nna dia nittibana. Tsa lägabi te dacarna atti elha nabani gueri. 27Cumu neti Benni unbiyuu daa iyyabaaha esíaya dedaaya lheꞌe xieni gaꞌana tsee gue Tata quia do iyyabaaha lenia ca ingeli gue Ben-na. Lania nna utea nu ralha ttu ttu benni dhína, gue cua nu benbacana. 28Neti nna gualíbatia ria le, ttulhele ca nu seꞌe-ni nna läga gattixxile antisla ilenle neti Benni unbiyuu daa iyyabaaha dedaaya anca Benni rinnabia.

Markert nå:

San Mateo 16: zaq

Marker

Del

Kopier