San Mateo 14

Juan biꞌini rugadi ca benni inda uttibi

(Mr. 6:14-29; Lc. 9:7-9)

1Laniaguaba nua bina Herodes nu rinnabia lo yu gue Galilea gue nu rinne ca benni gue nu run Jesús. 2Nianna rána ca benni run sina gueniha:

—Juan biꞌini begadi ca benni indaha bunna beaquinna attu libe, nuarca ridána runna ca milagru-na.

3Cumu Herodes benna mandadu ca nu güia guadaxxucana Juan, ca unnuha nna bexxicacan biꞌiniha len cadena atti bedelhacan bi lisiyya. Lo niꞌa gue nuila gueni lá Herodías nu uca nuila gue betsini Felipe, 4de biaca rá Juan Herodes: “Bittu dica edo lenlu nuila gue betsilha.” 5Herodes nna rdacana uttina Juan, ttiaca rasbinna lo ca benni, cumu iyábacana rácana anca Juan profeta gue Tata Do Iyyabaaha. 6Ttiaca la sá atti raca laní de binna lá Herodes, xiꞌiniunná Herodías nna utaꞌattebana beyaꞌana lo iyába ca nu sia len Herodes nía. Herodes nna attulade beꞌo leni gue nua. 7Denuala nna begüeena tisa aní lo iyá ca nu sia nía utena len uncuitiha bixaba innába nua. 8Uncuitiha nna dequide chi uluꞌu tisa nan gueniha na, ráttebana:

—Neti nna raca lasia utelu len neti choettuiqui Juan nu rugadi ca benni inda-na yuꞌuna lheꞌe ttu platu.

9Herodes nna attulade siꞌirurba runna atti bieninna nu rá nua, ttiaca cumu chi begüeena tisa aníba lo ca nu sia lenna nía, nuarcala nna benna mandadu utecana nu rinnaba uncuitiha. 10Laniala nna benttebana mandadu sachecucana iqui Juan lheꞌe lisiyyaha. 11Nianna besintteba lencana choettuiqui biꞌiniha deyuꞌuna lheꞌe ttu platu begüeecana uncuitiha. Uncuitiha nna begüeettebana nan gueniha nua. 12Laniala nna güia ca benni bedheti nu beleꞌe Juan guaxícabi cuerpu gue biꞌiniha qui guacatsicabi cuerpuha lheꞌe baa, atti güiattebacabi guattixxiꞌaquinbi Jesús gue nu ucaha.

Jesús begoe guatela gayu mil benni

(Mr. 6:30-44; Lc. 9:10-17; Jn. 6:1-14)

13Atti bina Jesús nu guate Juan, ubiattattebe nía. Ttube die lo ttu barco daca atta nuttu benni seꞌe. Ttiaca atti bina ca benni nna biríattebacana lheꞌe ca lheꞌesi guecaniha, niꞌabacani diacana denocana Benniha. 14Atti guadi Jesús lo barcoha nna biláttebanie ixeru benni chi seꞌe nía. Lee nna besiꞌittebanie ca nua, nianna beonttebe ca benni yuꞌu isagüe dia len ca unnuha. 15Daba raquela nna ubigatteba ca benni rudheti ca tisa ruleꞌe Jesús, rácabi Benniha:

—Chiba ulha sá nna ni nna tsa lägabi yoꞌo sia. Larcala nna bechú tisa ca benni seꞌe-ni qui eyyacana ca lheꞌesi-na sayoꞌocana ttu bixa gocana.

16Jesús ráttebe cabi:

—Lägabi raca duelha eyya ca unná. Lebiꞌiba gualute nu gocana.

17Ca biꞌiniha nna becabicabi rácabi:

—Tsa lägabi nu gori nuja riꞌitu, sunruba gayu ttaxtila len chupa belha te-ni.

18Jesús re ca biꞌiniha:

—Gualute ca ben-na nii.

19Laniala nna benie mandadu ebía ca benni lo ixxiha. Atti bedaxxuttebe gayu ca ttaxtilaha len irupaba ca belhaha, nianna ulhidhatteba loe begüie iyyabaaha, begüee xquixaru Tata Do Iyyabaaha, atti ulhaꞌattebe lheꞌe ca ttaxtilaha, begüee ca benni rudheti ca tisa rulheꞌe. Ca biꞌiniha nna utidhittebacabi benniha gue ca benni seꞌe nía. 20Iyába ca benni seꞌe nía utocana bedaa belbaquinna. Bodaparlacabi a tsiꞌinu (12) sumi ca pedazu bexxa gue ca ttaxtilaha. 21Attiba tu gayu mil ca benni uto ttaxtilaha, sunruba ca benni unbiyuu bibaba, bittu la bibaba ca benni nuila lencana ca unto.

Jesús ridee lo indattooha

(Mr. 6:45-52; Jn. 6:16-21)

22Dequide unnuha nna bentteba Jesús mandadu eyopi ca benni rudheti ca tisa ruleꞌe lo barcoha qui enerucabi elhácabi attu ladu gue indattooha, laca lee nna rechú tise ca benni seꞌe nía. 23Dequide chi bechú tise ca benni seꞌe nía nna gopittebe lo lhilhi do nía qui uca ttube unne lenie Tata Do Iyyabaaha. Níaba du ttube atti chi uca ela, 24laca barcoha nna rulha gue indattooha lí chi dia nua, cumu nu ridulí lo indattooha nna rigapana nua de daa xxatta be daca atta diacabiha. 25Atti chi daa raniha nna udátteba Jesús lo indattooha die daca atta seꞌe ca biꞌini rudheti ca tisa ruleꞌe. 26Atti biláquinbi Benniha die ridee lo indattooha nna usttebaquinbi, de rasbaquinbi nna uresiꞌacabi rácabi:

—¡Ni ttu nu iꞌiya!

27Ttiaca Jesús unnettebe re ca biꞌiniha:

—Neti bunni. ¡Tsitsi gualcuequi lele, bittu gasinle!

28Laniala becabi Pedro rábi Benniha:

—Gansi luba unná, xa Benni banani neti, beni qui dhaya lo inda-na isíaya axta atta dulha.

29Benniha nna re Pedro:

—Utá ganna.

Laniala nna guadi Pedro lo barcoha udábi lo indaha diabi atta du Jesús. 30Ttiaca atti bilenbi tsitsiba idí daa beha nna usttebinbi, atti xeaba diattebabi rettibi lheꞌe indaha. Laniala nna uresiꞌabi rábi:

—¡Bodiláchi neti, Benni banani neti!

31Laniala nna becatteba ná Jesús bedaxxue ná Pedro, nianna re biꞌiniha:

—¿Biaca bedú chupana lelu, xa nu lä ria tsitsi leni?

32Cuentusiba beopique lo barcoha nna bebe sitteba beha. 33Nianna ca benni sia lo barcoha nna ubigattebacabi bedú xibicabi lo Jesús rácabi Benniha:

—Gualíba ancalu xiꞌini Tata Do Iyyabaaha.

Jesús beonie ca nu rani

(Mr. 6:53-56)

34Dequide chi ulhácabi ttu ladu gue indattooha nna bisínttebacabi lo yu nu te láni Genesaret. 35Cuantusiba beonbia ca benni seꞌe nía Jesús, begunattebacana ca benni seꞌe lheꞌe iyába ca yiesi seꞌe itúba nía. Ca unnuha nna uchettebacana iyába ca nu rani guecaniha lo Jesús. 36Lacana nna benttebacana ruegu lo Benniha qui ugüelhe ca nu raniha udaxxucana ladiba roꞌo xoe. Iyába ca nu radaxxu roꞌo xo Benniha nna reacattebacana.

Markert nå:

San Mateo 14: zaq

Marker

Del

Kopier