Lûqa 11
11
Dua Do Senî Bibo
(Matta 6:9-13; Matta 7:7-11)
1Îsay cayên di fina duay kerdê. Wexto ki duayê xo qedînê, jew telebeyê ci Ey rê va: “Rebbî, zeki Yehyay telebeyê xo misnay, ti zî ma winî bimisni ki ma do senî duay bikerim.”
2Îsay înan rê va: “Şima ki duay kenê, wuna vajê:
“Pîyê ma, boka nameyê to mibarek bo.
Hukumdareya to bîro.
3Hirg roj nano ki ma rê lazim o, bidi ma.
4Gunayanê ma ef ki,
Çiki êyê ki ma rê neheqey kerda,
Ma yê zî înan hemin ef kenê.
Ma xirabeya mecerbin.”
5Bahdo Îsay înan rê wuna va: “Şima ra jewê, nîmedê şew di şiro jew embazdê xo ew ey ra reca bikero, vajo: ‘Embazê mi, mi rê deyna hîrê nanî bidi, 6çiki jew meymanê mi ray ra ameyo ew teba çinî yo ki ey rê rona, o bûro.’ 7Wexta qe embazê şima zerre ra wuna vano: ‘Mi rehat veradi, kêber kilîtkerde yo, ew qeçê min ê zî ca di, mi het di rakewte yê, ez qe nêşena werza û tebayê bida to.’ 8Ez şima rê vaja, qandê embazey o do nêwerzo, hima qandê bêrîyeyda ey, o do werzo ew çiçî lazim o, do bido ci.
9“Ay ra ezo şima rê vana: Buwazê, o do şima deyo, bigeyrê ci, şima do bivînê, kêberî bicenê, o do şima rê abîyo. 10Çiki kamo ki buwazo, o gêno. Kamo ki bigeyro ci, o vîneno ew kamo ki kêberî biceno, ey rê abîyeno.
11“Şima mîyan ra kamcî pî, eki qeçê ci ci ra mase buwazo, marr dano ci? 12Yazî jew hak buwazo, demaşkul dano ci? 13Eki şima na zerrîda xiraba zanê ki qeçandê şima rê çiçî rind o ew ey danê înan, Pîyê şimayo ki azmîn di, kamo ki Ci ra Rihê Mibarekî buwazo, O do heqûnheq bol vêşî nêdo ci?”
Îsa û Rihê Xirabî
(Matta 12:22-30; Marqos 3:22-27)
14Rojê Îsay jew riho xirab o lal jew mêrdekî ra vet teber, a çeq di mêrdeko ki lal bi, ziwanê ey abîya ew qisey kerdî. Mileta ki uja di bî, ecêb mend. 15Hima înan ra tayin vatê: “O yo rihanê xiraban hukumdê Belzebûlîya vejeno, Belzebûl serdarê heme rihandê xiraban o.”#11:15 Îsay no name Belzebûl qandê Şeytanî vato. Orîjînal nameyê ci Baal-Sebub o, o jew putê Filistiya bi, mahneyê ci Serdarê Mêsan o. (Bewnîrê kitabdê 2. Krallar'î di 1:1-6.)
16Taynandê ci zî Îsa cerbinayê, înan waştê ki Îsa azmîn ra elematênda gird înan misno. 17Îsay fikrê înan zanayê, qandê coy Ey înan rê wuna va: “Kamcî hukumdarey xo mîyan di bibo di hetî, a hukumdarey bena xirabe. Ew jew keye zî xo mîyan di bibo di hetî, o keye zî beno xirabe. 18Naqor şima yê vanê, ezo hukumdê Belzebûlîya rihanê xiraban qewirnena, hima eki Şeytan zî xo mîyan di bîyo di hetî, o yo hewna senî şeno hukum bikero? 19Ew eki ezo hukumdê Belzebûlîya rihanê xiraban qewirnena, merdimê şima yê hukumdê kamîya înan qewirnenê? Merdimê şima do bixo hesabê nê qisan şima ra pers kerê. 20Hima eki ezo destdê Ellaya rihanê xiraban qewirnena, winî bizanê ki Hukumdareya Ellay ameya şima ser. 21Jewê hewna hendik hukmê ci esto, rextê ci ew tifinga ci ci dest di, o keyeyê xo paweno, tebayê ey zirar nêvîneno. 22Hima jewna ki hukmê ci êdê ey ra vêşî yo, wexto ki o ame ew o kerd bindest, rext û tifinga ci ci ra girot û heme çîyê ci kerd vila. 23Kamo ki heta mi nîyo, o yo mi vero vindeno, ew kamo ki mina pîya nîyarêdano, o yo keno vila.”
Rihê Xirabî Senî Peyser Ageyrenê
(Matta 12:43-45)
24“Wexto ki jew merdimî ra riho xirab vijya teber, geyreno ki xo rê cayêndo rehat bivîno. Çimhal ki cayê nêvîneno, xo bixo rê vano: ‘Ez fina ageyra keyedê xo yo verên rind beno, keyeyo ki ez ci ra vijyaya!’ 25Wexto ki peyser yeno keye, vîneno ki heme ca pak gezi bîyo ew arêbîyayo pêser. 26Ney sera o şino, hewtna teney rihê xirabîyê ki hewna ey ra zî arî yê, înan gêno yeno ew ê uja di roşenê. Ew soyin di, halê nê merdimî verî ra deha beno xirab.”
Werrekê A Cenîyer
27Îsay ki nê qisey kerdê, jû cenîyer şêligî mîyan ra veynda va: “Werrekê a cenîyer ki ti wegirotê, ardê dinya ew şit dayo to!”
28Îsay zî wuna va: “Raşta ci, werrekê înan, êyê ki goştareya qisandê Ellay kenê ew înan anê herun!”
Milet Nişanî Nêvînena
(Matta 12:38-42)
29Çorşmedê Îsay di milet verî ra bîyê bol, wexta Ey wuna va: “No cisno, cisnêndo xirab o, o yo nişanê wazeno, hima bê nişandê Yûnis Pêxemberî, jûna nişan do nêdêyo! 30Yûnis senî miletda Nînova rê bi nişan, Lajê Însanî do zî nê cisnî rê winî nişan bo. 31Rojda Hesabî di, hukumdara ki verarojî di hukumdarey kerdbî#11:31 Hukumdara Verarojî: Na Qiraliçe welatdê Saba (newe vanê Etyopya) ra bî, ew a amê Îsraîl ki hîkmet û zengîneya Qiral Silêmanî bivîno. (Bewnîrê kitabdê 1. Krallar'î di 10:1-13.), a do merdimandê nê cisnîya pîya werzo ew a do nê cisnî mahkûm kero. Çiki na Hukumdara Verarojî, tax o kijdê dinyay ra amê tîya ki goştareya hîkmetdê Silêmanî#11:31 Qiral Silêman lajê Dawidî bi ew bol aqil û bol zengîn bi. bikero. Halbik Oyo ki nika tîya hewna Silêmanî sera yo! 32Roja Hesabî, mileta Nînova#11:32 Nînova sûka gird da Aşûrî bî. Ê Aşûrijî Tewratê Yawudîyan nêzanayê, hima wexto ki Yûnisî wahzî daybî, înan pêro tewbe kerdbi. (Bewnîrê kitabdê Yunus'î.) zî do werzo ew nê cisnî mahkûm kero. Çiki senî Yûnisî înan rê wahzî day, înan tewbe kerd. Ew Oyo ki Yûnis Pêxemberî sera yo, O yo nika tîya di!”
Mesela Roşney
(Matta 5:15; Matta 6:22-23)
33“Qe jew merdim, çila fîneno a ci se, a çiler nênimneno ew lênî bina nêronano. Vera ney, çiler cado berza ronano ki kam yeno zerre, wa roşnî bivîno. 34Çim roşnîya bedenî ya. Eki çimê to rind vînenê, wexta bedenê to pêro beno roşn, naqor çimê to rind nêvînenê, wexta bedenê to pêro beno tari. 35Winî rind xeyal bik ki roşnîya ki to di, wa tari nêbo! 36Eki bedenê to pêro roşn o ew cayêndê ci tari nîyo, o do pêro roşn bo zeydê çilaya ki roşn dana to.”
Wax Bi Şima Rê, Alîmê Kitaban û Ferîsî!
(Matta 23:1-36)
37Çeqa ki Îsay qiseyê xo qedînay, jew Ferîsî O dahwet kerd keyedê xo ki pîya nan bûrê. Îsa şi keyedê ey ew sifre di ronişt. 38Nê Ferîsî senî dî ki Îsay verdê nanî destê xo nêşitî, ecêb mend.
39Wexta Rebbî ey rê wuna va: “Şima Ferîsî, şima teberê tas û sihanan#11:39 Yazî: tabaxan kenê pak, hima zerreyê şima xirabey û çimveyşaneya pirr o. 40Şima bêaqilî yê! Zeki Ellay teberê kesî viraşto, ma zerrî zî Ellay nêviraşto? 41Naqor çîyo ki tas mîyan di, şima ey bidê feqîran, wexta heme çîyê şima beno pak!
42“Wax bi şima rê, şima Ferîsî! Şima nehnî ra, vaşdê sedefî ra ew heme zerzewat ra zikatê xo danê Ellay. Hima heqê jewnay nêdanê ew Ellayê xo nêsînenê. Hima lazim o ki şima nê çî bîyarê herun ew ê çîyê bînî zî pey goş nêkerê! 43Wax bi şima rê, şima Ferîsî! Şima sînagogan di cayê rindî gênê, ew çarşi di şima qayilî yê milet şima rê silam bido. 44Wax bi şima rê! Mezelê ki cayê ci beli nîyê, şima manenê înan! Merdimê ki sera ravêrenê zî nêzanê ki ê mezelî yê.”
45Uja di jew Alîmê Kitaban Îsay rê wuna va: “Mehlîmê ma, tî yê nê qisana ma rê xedir kenê#11:45 Yazî: haqaret kenê.”
46Îsay va: “Wax bi şima rê zî, Alîmê Kitaban! Baro ki nêwegêryeno, şima merdiman rê vanê, ey wegîrê, hima şima bixo qandê nê barî gişta#11:46 Yazî: engişta xo xo zî nêlûnenê. 47Wax bi şima rê, çiki şima mezelanê pêxemberan virazenê, halbik kalikanê şima ê pêxemberî kiştî. 48No wina şima yê sucê kalikandê xo rê şahîdey kenê ew înan qebul kenê. Çiki kalikanê şima ê pêxemberî kiştî ew şima yê zî mezelanê înan virazenê. 49Qandê coy Hîkmeta Ellay wuna vato: ‘Ez do înan rê pêxemberî ew wekîlî birişa, hima ê do taynanê ci bikişê ew taynanê ci zî eskence kerê.’ 50No hesaba siftedê dinyay ra hetanî nika çend pêxemberî kişyayê, 51Habîlî#11:51 Habîl lajê Ademî bi. Habîl merdimêndo raşt bi ew merdimo ki en sifte kişyabî, o bi. (Bewnîrê kitabdê Yaratılış'î di 4:8-10.) ra hetanî Zekeryay#11:51 Zekerya jû pêxember bi ew wextê verî di qiseyê Ellay vatê, hima milet o kişt. (Bewnîrê kitabdê 2. Tarihler'î di 24:20-22.) , Zekeryayo ki mîyabeyndê sekûda qurbanî û Keyedê Ellay di kişyayo, gûnîya nînan hemin do no cisn ra pers bo. Ezo şima rê vana, no cisn ra o do pers bo. 52Wax bi şima rê, Alîmê Kitaban! Kêbero ki kes heme çî fahm keno, şima kilîtê ê kêberî girot û berd. Şima bixo o kêber ra zerre nêşîyê ew êyê ki qayilî bî şirê zerre, şima ê zî nêverday zerre.”
53Wexto ki Îsa no keye ra vijya şi, Alîmê Kitaban û Ferîsîyana tim xeyalê ey kerdê ew Ci ra bol qisey pers kerdê ki 54Ey fek ra qiseyênda çewt vejê ew Ey neheq kerê.
Markert nå:
Lûqa 11: diq
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
