Amarku 10
10
Onyenye Eyesu eshri obgaeble
1Eyesu a kso osku he lo a bmyi ondzu ba Ordu a ba obiŋ Eyahuda. Moarehwi nzenze a ba okro baŋ nga a nye mo eka baŋ a la a kpo.
2MoaEfarisikyeŋ a ba okro Eyesu okyku o kpyi ŋa. Moa a zhĩ ŋa a lu mi le, Eyesu, o lu o da gi, odaŋ o bmi ba are a kyu ashe baŋ abgo, o wo baŋ a klo ma? 3Eyesu a tno mo ma a lu mi le, Odaŋ Omusa a shri a da gimi eshri obgaeble o lu eshi? 4Moa a tno ŋa ma a lu mi le, Omusa a da gi ekʼpo bi e ta akpa o bga eble e shri e da ashe, okyku o daŋ a yi eŋa. 5Eyesu a nyuŋ mo a lu mi le, O wo eka he lo a mi la, ambo Omusa a shri odaŋ he lo a da gimi, okyku bimi e shye eshri nzenze angyiŋ. 6Agimi e ka, omba ba Ahogbrẽ a zga esĩ a kpo obiŋ hi, a kpo arealom, ta la ashe. 7Okyku eka he o dzu omgbybi ba arealom a dzu adaŋ ta la anaŋ a zga nga a yi a pu ta la ashe baŋ. 8Moa aha á dzu eka moa a wo okyekyeŋ angyiŋ. Moa á gʼba emo nga mbo, moa a wo okyekyeŋ angyiŋ a mo. 9Arehwĩ á gʼba ekplo ba Ahogbrẽ a sheŋ a kŋe a bga mbo. 10Ambla moanwyeotum a gre odne ta la Eyesu nga, moa a zhĩ ŋa odlo a ta ma eshri obgaeble he lo. 11A nyuŋ mo a lu mi le, Are la a kyu ashe baŋ abgo nga a kyu ashekyeŋ le, a ri eshra angyiŋ ka la ŋa. 12O wo ba ashe a tla alom baŋ nga a kyu alom ahe le, a ri eshra angyiŋ ta la alom lo.
Eyesu a fa anyuadzi a ygi moanwye afifi
13Moarekyeŋ a shri moanwye mo a shri a ba okyku o da Eyesu a fa anyuadzi a ygi mo, ambo moanwyeotum baŋ a kyku mo. 14Omba ba Eyesu a ka eka he nga a kpo olom pa la moanwyeotum baŋ nga a lu mi le, Agimi e da moanwye afifi a ba okro me, e kyku mo mbo, okyku eshi Oreŋ Ahogbrẽ o wo okyku moa la a wo eka moanwye he lo angyiŋ. 15E gno, areyaŋ a mbo la a yga Oreŋ Ahogbrẽ eka moanwye afifi he lo mbo, á yi Oreŋ Ahogbrẽ mbo ku-ku. 16Eyesu a tslo moanwye lo a shki adga nga, a lom abgo baŋ eshri mo akyakyakyeŋ nga a fa anyuadzi a ygi mo.
Are angyiŋ
17Omba ba Eyesu pa la moanwyeotum baŋ a klo o kso o yi egi ehwõ, are angyiŋ-akyeŋ a knye a ba a kʼpu egi ayi baŋ nga a zhĩ ŋa a lu mi le, Andakʼpo ba Shasha, ame é kpo eshi okyku o da me e hwiŋ esõ ba gbabgu-amo? 18Eyesu a tno ŋa ma a lu mi le, Okyku eshi aŋo o lu mi ma ame e wo shasha? Arekyeŋ a wo shasha mbo o wo le Ahogbrẽ sha. 19Eyesu a nyuŋ ŋa a lu mi le, Aŋo o yi odaŋ la o lu mi le, O bga ebga mbo, nga o ta ekpa mbo, nga o si osi mbo, nga o sheŋ akpro mbo, nga o kpʼgo moare mbo, nga o fa olbi o da adoŋ ta la anoŋ. 20Alom lo a tno ma a lu mi le, Omba ba ame e wo ola anwye, ame e kpaŋ odaŋ he lo mvye. 21Eyesu a ka ŋa la eyayi ba oklo nga a nyuŋ ŋa a lu mi le, Ekplokyekyeŋ e ra ohuhuhi boŋ o bli lo, o yi o shri angyiŋ boŋ o wo alo ma mvye o gbmo, nga o shri amgbaŋ lo o gʼba moaekŋe, okyku eshi aŋo ó hwiŋ angyiŋ Ongyeŋ, nga o ba o lu me ma. 22Omba baŋ a gno eka he a khwo nga, o so ŋa ayi nga a zhiŋ ogbu a gre la esõ-etpiayi, okyku eshi a wo angyiŋ ma nzenze.
23Ambla ba alom lo a zhiŋ ogbu a gre a khwo nga, Eyesu a ka moanwyeotum baŋ tki nga a lu mi le, O wo ewu o gre eshri ba are angyiŋ á gre Oreŋ Ahogbrẽ. 24Odlo ba Eyesu a lu o suŋ moanwyeotum egʼba, ambo a sa a lu mi le, Agimi eyi anwye ba esõ me e ka, o wo ewu o gre eshri ba are la a sko eshri baŋ a zga oklo angyiŋ sha á ba a yi Oreŋ Ahogbrẽ. 25O wo ohli ba ebyikyeŋ moa a bzi lo ma arakumi e gre ewyle adne o gre ba are angyiŋ a yi Oreŋ Ahogbrẽ. 26Ambla ba Eyesu a lu eka he a khwo nga, moanwyeotum baŋ a ka egbregbre nga moa a zhĩ ŋa a lu mi le, O wo eka he le, ayi angyiŋ á ba a gro? 27Eyesu a ka mo tki nga a tno ma a lu mi le, Ogrogro o wo ewu okro moarehwi, ambo o wo ewu okro Ahogbrẽ mbo. Okro Ahogbrẽ ekployaŋ a mbo e kpo e gbu.
28Ebitru a kso a lu mi le, O ka, agi e dzu ekployaŋ a mbo e zga okyku o lu ŋo ma. 29Eyesu a nyuŋ mo a lu mi le, Adlidzi, ame e lu e da gimi, areyaŋ a mbo la a dzu osku baŋ pa la moanáŋ-alalom, pa la moanáŋ-alashle, ta la anaŋ, ta la adaŋ, pa la moanwye, ta la agbi a zga okyku me, nga okyku o nyum oshpa me, 30á hwiŋ ayakplo la a gre ayakplo baŋ a dzu a zga ekplu hi engyi endgaekyeŋ. Á hwiŋ adne, pa la moanáŋ, pa la moanáŋ-alashle, pa la moanaŋ, pa la moanwye, ta la agbi nzenze la a gre a baŋ a dzu a zga. Ewu a mbo é hwiŋ ŋa. Ambo omba la ó ba mi, á hwiŋ esõ ba gbagbu-amo. 31Moare ba ori á dzu moa ba ambla, moa ba ambla á dzu moa ba ori.
Eyesu a lu odlo eshri eku baŋ odgo otra
32Eyesu pa la moanwyeotum baŋ, pa la moare nzenze a wo ozhẽ moa a yi Orushalima. Eyesu a gre ozhẽ. Moanwyeotum baŋ pa la moare la a lu ŋa ma, esõ e tpi mo ayi okyku ekplo la é ba e kpo ka la ŋa. Eyesu a sa a gre agba pa la moanwyeotum baŋ nga a lu ayakplo la á ba a kpo ka la ŋa a da mo. 33A nyuŋ mo a lu mi le, Agimi e ka, agi e vre akũ e yi Orushalima a mo. Orushalima, moa á vu Anwye Arehwĩ á da moandakʼpo olu ba Ahogbrẽ, pa la moa la a nye odaŋ. Moa á sõ Anwye Arehwĩ ombgu ba eku, nga moa á shri ŋa á da moa la a wo moaEyahuda mbo. 34Moa á nyuŋ ŋa ega, nga á ta akyi á ygi ŋa, nga moa á taŋ ŋa andzu, nga á bga ŋa. Ambo Ahogbrẽ á kso ŋa eku olum ba otra.
Eyakubu ta la Eyohana a vẽ
35Eyakubu ta la Eyohana moanwye Azabadi, a ba okro Eyesu a lu mi le, Andakʼpo, agi e klo boŋ o kpo gi ekplokyeŋ. 36Eyesu a tno ma a lu mi le, Agimi e klo me e kpo gimi eshi? 37Moa a tno ma a lu mi le, Agi e klo, omba boŋ o gre Oreŋ ba esesla, o boŋ o da gi e dzu ka la ŋo, ba akyeŋ a dzu obgori ba ahwõ a dzu obgoehre. 38Eyesu a zhĩ mo a lu mi le, Agimi e yi ekplo bimi e vẽ okyku lo mbo. Agimi é kpo ewu ba ame é kpo é gbu? Abaptisma moa á ba a kpo me, agimi é kpo lo é gbu? 39Moa a tno ŋa ma a lu mi le, Agi é kpo lo é gbu. Eyesu a lu mi le, Adlidzi angyiŋ agimi é kpo edgu ewu ame é ba e kpo, nga abaptisma moa á ba a kpo me, moa á kpo gimi alo. 40Ambo ame e wo ekʼpo ma ba ame e lu mi le, Ahi a dzu obgori me, a mi a dzu obgoehre me mbo. Ahogbrẽ sha angyiŋ á ba a shri ekro he lo a da moa baŋ a kpo lo okyku mo. 41Omba moanwyeotum okʼpo ohwõ a gno eka he a ghwo nga, esõ e tpi mo ayi eshri Eyakubu ta la Eyohana. 42Eyesu nga a bzi moanwyeotum baŋ mvye nga a lu mi le, Agimi e sheŋ e yi moa la a ri ekʼpo eshri moare, a wo ekʼpo eshri moare lo. 43Ambo ozhẽ bimi o wo ondundum. O wo ba arekyeŋ a klo a dzu anyuanyuŋ eshki bimi le, á dzu eka anwye afifi. 44O wo ba akyeŋ eshki bimi a klo o dzu andakʼpo eshri bimi le, á dzu awaghrẽ moahwõ mvye. 45E ka, Anwye Arehwĩ a ba okyku o da mo a hlu ŋa eshko angyiŋ mbo, ambo okyku o kpo ewu okyku moahwõ nga o shri esõ baŋ o di okyku o shla moarehwi.
Eyesu a shaŋ avgayi Abatimu
46Eyesu pa la moanwyeotum baŋ a ba Ejeriko. Omba ba moa a yi a mo nga, eshki nzenze e lu mo ma. Avgayikyeŋ moa a bzi ŋa Abatimu, anwye Etimu, a dzu akaŋ ozhẽ a la a vẽ algo. 47Omba baŋ a gno ma Eyesu ba Anazarata a ba nga, a lu angyangyeŋ a lu mi le, Eyesu Anwye Adawuda, o ka me ayiekŋe! 48Moare nzenze eshki lo a shrom ŋa ma a dzu tki. Ambo aŋa a bzi angyangyeŋ a lu mi le, Anwye Adawuda o ka me ayiekŋe! 49Eyesu a tspi nga a lu mi le, E bzi me avgayi lo. Moa a bzi avgayi lo nga a nyuŋ ŋa a lu mi le, O kpo ovye, o kso, Eyesu a bzi ŋo. 50Avgayi lo a kso nga a ndba oknye baŋ a ta egi ehwõ nga a ta egba a gre okro Eyesu. 51Eyesu a zhĩ ŋa a lu mi le, Aŋo o klo me e kpo ŋo eshi? A tno Eyesu ma a lu mi le, Andakʼpo, o wo boŋ o bmi, o hwile me ayi. 52Eyesu a nyuŋ avgayi lo a lu mi le, Aŋo o yi eŋo. Obmi ba adlidzi boŋ o shaŋ ŋo. Ebuebu nga ayi baŋ a hwile nga a lu Eyesu ma.
Markert nå:
Amarku 10: EGONT74
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Eggon New Testament © United Bible Societies, 1974. Bible Society of Nigeria
