Mat 11

Joon Nfoo Moo tum ghon-ɛyfɛl nə wen se Jesus

(Luk 7.18-35)

1Jesus nɛy mɛyse se dinte əbnəə wɛ əb nè kɛŋen ge ghon-ɛyfɛl nə wen ghɛ njio-sebaa ɛyvəm yɛ nɛɛy, è me lòò se fo, è se ghane ɛ ntɛkse dinte gese fekte kenəə ə Feyin se ghele.

2Nè lu əbliy fô nɛ Joon Nfoo Moo lu ɛ nchak. Əb yio əbnəə wɛ Jesus wɛ mboyse nè nɛɛyen, è me tum ghon-ɛyfɛl nə wen ge 3ɛ́ bif se wen ge: Lu wɛ̀ mboyse wɛ əb nɛ̂y se gwiy moo ghɛs yɛ chiyte ɛychin-a? 4Jesus fise ge: Ghɛn fiile è ndu è suuy se Joon əbnəə wɛ ghɛne yɛnen gese yio; 5Əmnfefe se yɛne əblik, nɛ̀ ɛkɛblene jɛle, nɛ̀ ghɛ ɛ́ yafen nɛ̀ kensaasee bonene, nɛ̀ əbchichii yio əbnəə, nɛ̀ ghel ghɛ ɛ́ kuonmen kase loole se ɛykuo, nɛ̀ ghel ghɛ nchɛke nchɛke kiile sakghɛ əbjuŋ ka ɛ́ fekten. 6Nɛ ke lu kejuŋ se vi di wɛ əb báà se maanen mɛ.

7Ghon-ɛyfɛl nə Joon ghii loo lòò Jesus se suŋnene se ngose wel yi kum Joon ge: Ghɛn nè ndu ɛ əbkwak əbyume se yɛne ghɛ? Ghɛn nè ndu se yɛne əbgii ka əbfiɛfe shiksen-a? 8Ghɛn nè ndu se yɛne ghɛ? Ghɛn nè ndu se yɛne wel nɛ əb mak ndəy se juŋe-a? Yɛn-a! Tenkii ghel nɛ̂ ghi sɛɛ lu nɛ lu ɛ ntokse. 9Ghɛn nè ndu se yɛne ghɛ? Ghɛn nè ndu se yɛne wele ntum nə Feyin-a? Mɛ suuy əbluuy ge ghɛn nè yɛn wel nɛ əb chia wele ntum nə Feyine. 10Lu Joon nɛ̂ vin wɛ ɛ́ nyaken ɛ ŋwaale-Feyin kum wen ge: Feyine nè suuy ge mɛ nɛ̂y tum wele ntum nə mɛ ɛ wɛ̀ mbiy, é əb siyse jii ə yiɛ. 11Mɛ suuy əbluuy se ghɛn ge se ghel ghɛ ɛ́ nè shiin ɛ ketuu ntiɛ fɛn lu nɛ wele báà se lu wɛ əb chian Joon Nfoo Moo. Dî nɛ wel wɛ əb layten è ləysen ɛ məme ɛysak nə əbfon ɛyyio chia Joon. 12Se kɛ̀ɛ̀tè se əbchii nə Joon Nfoo Moo se chin lan lu nɛ ɛysak ə Əbfon Ɛyyio komen bàbàŋ nɛ lu kɛn ɛghoo bàbàŋ ka ghele luun se sə̀ə̀ke. 13Ghele ntum nə Feyine ghene ŋwaalese ɛysak nè fekte nɛ lu kenəə kɛ kum ɛysak ə əbfon ɛyyio nɛ̂ yin se kok se chin se kechii nə Joon. 14Loo lu nɛ ghɛn koŋe se beeme kenəə ten, fene Joon lu Elija wɛ ɛ́ nè suuyen ge əb náà gwiy. 15Naa ndɛ wɛ əb kiin əbtuule se yio, əb yio.

16Jesus me se kante ge: Lòó mɛ feksen ghele ghɛ́ ntem fɛn se ghɛ-ɛ? Ghene lu ka ghon ɛtɛlɛɛ ghɛ ɛ́ diom ɛ kelik əbwɛy è se jaŋnen se sunse ghene ge: 17Ghɛse toŋe ndoŋ nɛ ghɛn bine wiy, ghɛse make giɛ ɛykuo nɛ ghɛn fiisen wiy. 18Joon Nfoo Moo nè gwiy è se loo ghàà əb yɛ yiɛ gese nəə wiy əmnduk əmtaa, ghele se suuy ge əb ki ɛyfim. 19Wanwel nɛy gwiy è se yiɛ gese nəə, ɛ́ me se suuy ge: Ghɛn yɛn chamenchi gese nɛ̀ ɛshiɛ əmnduk vin. Əb lu sun ə ghele ɛyfii shile gese nɛ̀ ghele mbeese. Dî nɛ lòó ɛ́ keele ge wel ki ɛytof ə Feyin se kenəə kɛ əb nɛɛyen.

Ntɛk sɛ se nè báà beeme

(Luk 10.13-15)

20Jesus me se ghame ntɛk sɛ əb nè nɛɛyen ndio əbnəə əbchio əbyúméné ɛ ten ghele ghɛ́ ghoo jia chèmè kubsen tetem ə ghen. 21Əb me suuy ge: Lon se ghɛne ghɛ́ Kolazin! Lon se ghɛne ghɛ́ Betsaida! Mɛ nè bóy se nɛɛy əbnəə əbchio əbyúméné wɛ mɛ nè nɛɛyen ɛ ghɛne ntɛk nɛ lu ɛ Taya ghene Sidon, fene ghele ghɛ́ ghoo nè yimen mak əbaame è gese fək kebvəle ɛkiy se ghene ɛyghun naa se nguk se din ge ghene lu nɛ ɛ́ kubsen tetem ə ghen è fiile se ɛybam ə mbee. 22Mɛ suuye se ghɛn ge ɛ́ náà loo lu ɛ kechii kɛ Feyine tenen nsak, é kɛ́ ghele ghɛ́ Taya ghene Sidon yɛ ghoblen chia kɛne. 23Se ghɛne ghɛ́ Kabanaume, ɛ́ lɛ náà lose ghɛn, é ghɛn chin naa ɛyyio-a? Ɛngaŋ. Feyine náà səkse ghɛn səksen è lɛm kɛn ɛ ɛybee. Ɛ́ nè bóy sɛɛ nɛɛy əbnəə əbchio əbyúméné wɛ ɛ́ nè nɛɛyen se ghɛn nɛ lu ɛ Sodom, fene ghele ghɛ́ foo nè bo bɛɛy è chin lan vin. 24Mɛ suuy se əbluuy ge ɛ́ náà loo lu ɛ kechii kɛ Feyine tenen nsak, é kɛ́ ɛylake Sodome yɛ ghoblen chia kɛne.

Ghɛn gwiy se mɛ è kiile ɛyzəəte

(Luk 10.21-22)

25Se lu əbliy fo Jesus me suuy ge: Ba ə wom, wɛ̀ lu Ba ɛyyio ghene ntiɛ. Mɛ bɛ́ɛ̀lè wɛ̀ bek ge wɛ̀ letemen əbluuy se ghel ghɛ ɛ́ dinen ɛytof, è din nɛ lu se ghon ɛtɛlɛɛ. 26Ɛɛne Ba ə wom! Ke lu ka wɛ̀ nè koŋen ge ke yɛ lu.

27Ba ə wom viimen əbnəə əbjim ɛ mɛ keghoo. Wele báà se ke Wán buu kɛn Bay, nɛ wel ke wiy Bay buu kɛn Wán ghene ghii dii ghɛ Wan koŋen se dine wen se ghene. 28Ghɛn gwiy se mɛ, ghɛn ɛjim ghɛ ɛ́ bɛɛymen kediile ke se chia ghɛn é mɛ giamten ghɛn. 29Ghɛn tuŋ kembuŋ ə kom è yɛ yio se mɛ bek ge mɛ lu ge wɛ̀ɛ̀, giɛke nɛ̀ ghele giɛken. Ghɛn gwiy se mɛ è kiile ɛyzəəte ɛ ghɛne tetem. 30Kembuŋ ə kome bonene, nɛ kebɛɛy ə kome yaŋsee.

Markert nå:

Mat 11: oku

Marker

Del

Kopier