तोलिङ्सोमु 14
14
अब्राम्मिल्ले़ लुते़न् से़ःप्तुॽ
1अम्रापेले़न् सिनारबा हाङ् वये़बा ये़म्मो, एल्लासारबा हाङ् आर्योके़न्, एलामबा हाङ् कदोरलाओमेरे़न् हे़क्क्याङ् गोयिम्बा हाङ् तिदाले़न् थिक्हुप् मे़बोःक्खे़॥ 2हे़क्क्याङ् सदोमबा हाङ् बेरा, गमोराबा हाङ् बिर्सा, अद्माबा हाङ् सिनाब, सबोयिम्बा हाङ् सेमेबेर खे़ब्याङ् बेलाबा (खे़न् सोअरआङ् मे़मे़त्तु) हाङ्हाॽरे़ खुन्छि तक्ले़ङ्वाओ थङ् थक्से़ मे़बे॥ 3कन् के़रे़क् हाङ्हाॽ थिक्हुप् तुरा मे़बोःक्खे़आङ् सिद्दिम्बा (युम् वरःङ्) ते़म्बेॽओ मे़भुङ्सिङ्॥ 4थिबोङ्ङाङ् ने़त्छि तङ्बे थारिक् खे़ङ्हाॽ कदोरलाओमे़रले़ कुयुक्को मे़वये़॥ कर थिबोङ्ङाङ् सुम्सिगेक्पा तङ्बेओ खे़ङ्हाॽरे़ हाङ् बिप्फ्युङ् मे़जोगु॥
5थिबोङ्ङाङ् लिसिगेक्पा तङ्बेओ कदोर्लाओमे़रे़न्नु थिक्हुप् के़बोङ्बा हाङ्हाॽ मे़बेआङ् अस्ते़रोत् कर्नेम्बा रपाइहाॽ, हाम्बा जुजिहाॽ, साबे किर्यातैमबा एमिहाॽ, 6हे़क्क्याङ् होरिहाॽ सेइरबा थे़गु माङ्वा लाजेॽओबा एःक्सादे़न्निल्ले़ कुबेसाङ् के़ने़बा ए़ल्पारान् थारिक् मे़नाःन्दुसि॥ 7खे़ब्याङ् खे़ङ्हाॽ मे़नुःक्खे़आङ् एनमिस्पातो (कादेस) मे़बेआङ् अमाले़किहाॽरे़ खुनिॽ के़रे़क् लाजेॽहाॽ नु हासेसोन् तामारओ के़युङ्बा एमोरिहाॽआङ् मे़नाःन्दुसि॥
8खे़ब्याङ् सदोम, गमोरा, अद्मा, सबोयिम नु बेलाबा (खे़न् सोअर) हाङ्हाॽ मे़लःन्दे़आङ् सिदिदम् ते़म्बेॽओ थिक्हुप् मे़बोःक्खे़आङ् मे़जुप्से़॥ 9एलाम लाजेॽबा हाङ् कदोरलाओमे़र, गोयिम्बा हाङ् तिदाल, सिनारबा हाङ् अम्रापेल्, हे़क्क्याङ् एल्लासारबा हाङ् आर्योक्के़न्, कन् लिसि हाङ्हाॽ खे़न् ङासि हाङ्हाॽनु थङ् चोःक्मा फाॽआङ् यारिप् मे़बोःक्खे़॥ 10सिद्दिम्बा ने़ने़बा ते़न्निन् अलकत्रा इस्सेःङ्बा लुम्बाःत्ते लुम्बात् के़ने़बा चोगे़॥ हे़क्क्याङ् सदोम नु गमोराबा हाङ्हाॽ थङ्ङोलाम् खे़त्ने़त्छिल्ले़ खे़ङ्हाॽरे़ कुभा खुन्छिॽ मनाहाॽ लुम्बाःत्हाॽओ मे़हुमे़ मे़लासे़॥ हे़क्क्याङ् वेॽ मनाहाॽग कोःक्मा फाङ्जङ् हे़ङ्हात्ति मे़घे़त्छिङ्॥ 11खे़न् लिसि हाङ्हाॽरे़ सदोम नु गमोराबा पगुगे़न् कुजाहाॽ हे़क्क्याङ् के़रे़क् चिगक्वाहाॽ मे़याङ्सिङ्ङाङ् मे़धासिङ्॥ 12खे़ङ्हाॽरे़ सदोम्मो के़युङ्बा अब्राम्मिल्ले़ कुन्नाक्पा लुते़न्नाङ् मे़देॽरु हे़क्क्याङ् कत्तुबा के़रे़क् कुजिगक्वाहाॽ मे़देॽरु॥
13के़दाङ्बा के़याःक्पाआङ् के़घे़त्छिङ्बा लत्छा मनाधिक्ले़ हिब्रु अब्राम्मिन् कन् पाःन्निन् चे़क्तु॥ अब्राम्मिन् ए़स्कोल नु आनेरले़ कुन्साॽ एमोरिरे़ मम्रेबा यहिबा कुसिङ्हाॽरे़ कुबेसाङ् युङे़॥ खे़ङ्हाॽ अब्राम्मिल्ले़ कुन्देःङ्बा वये़सि॥ 14अब्राम्मिल्ले़ कुगाॽइन् मे़दे़म्सु मे़देॽरु के़लॽबा इङ्घङ् खे़प्सुआङ् कुहिम्मोए सागे़वाःन्छिङ्बा नु थङ् थक्मा के़हुॽसिङ्बा किप् सुम्सिआङ् थिबोङ्ङाङ् ये़त्छि कुसे़वारोबाहाॽ फुक्सुसि हे़क्क्याङ् खे़ङ्हाॽ दान थारिक् नाःत्तुदेॽरुसि॥ 15से़न्दिक् निङ्मिहाॽ फप्मासिरे़ लागि खुने़ॽ कुमनाहाॽ कुलुप् कुलुप् से़सुसि॥ हे़क्क्याङ् खे़ङ्हाॽरे़ निङ्मिहाॽ मे़नाःन्दुसि, दमस्कसबा थाङ्गे़त् पिसाङ् के़ने़बा होबा थारिक् मे़नाःत्तुसि॥ 16खुने़ॽ के़रे़क् चिगक्वाहाॽ याङ्ना नाप्तुसि हे़क्क्याङ् खुने़ॽ कुगाॽइ लुते़न्, कुजिगक्वाहाॽ हे़क्क्याङ् मे़न्छुमाहाॽ नु वेॽ मे़दे़म्सु मे़देॽरुसिबा मनाहाॽआङ् नुःक्तु तारुसि॥
मल्किसे़दे़क्के़ल्ले़ अब्राम्मिन् मुॽइसाम् पिरु
17अब्राहाम्मिल्ले़ कदोरलाओमेरे़न् हे़क्क्याङ् खुने़ॽनु थिक्हुप् के़बोङ्बा हाङ्हाॽ नाःन्दुसिआङ् नुःक्खे़ फे़रे़ल्ले़ साबेबा ने़ने़बादे़न्नो इग्र हाङ्ङिल्ले़ कुने़ने़बा ते़न्नो सदोमबा हाङ्ङिन् खुने़ॽ कुदुम्से़ त्ये़॥
18हे़क्क्याङ् सालेम्बा#१४:१८ यरुसले़म हाङ् मल्किसे़दे़क्के़न् खरे़ःङ् नु चे़ल्ले़क्सेॽ थि याङ्सिङ्ङाङ् अब्राम्मिल्ले़ कुदुम्से़ फे़रे़॥ मल्किसे़दे़क्के़न् पयम् यम्बा निङ्वाॽफुमाङ्ङो#१४:१८ पयम् यम्बा निङ्वाॽफुमाङ्—हिब्रुओ एल-एल्योःन्, १४:१९, २०, २२ओ आङ् पत्॥ से़वा के़जोःक्पा निङ्वाॽफुसाम्बा वये़॥ #हिब्रु ७:१-१० 19खुने़ॽ अब्राहाम्मिन् अक्खे मे़त्तुर हाङ्वागे़न् मुॽइसाम् थासुपिरु,
“साङ्ग्राम्पेदाङ् नु इक्सादिङ् खाम्बेःक्मान्
नावागे़न् चइःत् के़ने़बा के़रे़क्नुःल्ले़ पयम् यम्बा
निङ्वाॽफुमाङ्ङिल्ले़ अब्राम्मिन् हाङ्वागे़न् मुॽइसाम् पिरुररो॥
20हे़क्क्याङ् के़रे़क्नुःल्ले़ पयम् यम्बा निङ्वाॽफुमाङ्ङिल्ले़
कुमिङ्ङिन् मिमिदिङ् पोङ्लरो,
खुने़ॽए के़निङ्मिहाॽ खे़ने़ॽ के़हुक्को हुक्के़सुःप्ते़ के़बिरे़रो॥”
हे़क्क्याङ् के़रे़क् पाःन्हाॽरे़न् थिबोङ्लक् मल्किसे़दे़क्के़न् पिरु॥
21हे़क्क्याङ् सदोमबा हाङ्ङिल्ले़ अब्राम्मिन् मे़त्तु, “आङ्गाॽ मनाहाॽरक् पिराङ्ङे़ॽ, कर चिगक्वाहाॽ खे़ने़ॽए लारे़ॽ॥”
22कर अब्राम्मिल्ले़ सदोमबा हाङ्ङिन् मे़त्तु, “साङ्ग्राम्पेदाङ् नु इक्सादिङ् खाम्बेःक्मोबा यहवे दाङ्बा, के़रे़क्नुःल्ले़ पयम् यम्बा निङ्वाॽफुमाङ्ङो अक्खेलॽरिक् माङ्हुप् चोगुङ्ङाङ् वाॽआ, 23लत्छा खिधिक्काङ् इग्र लाङ्सुःप्पिल्ले़ कुनाम्धिक्काङ् खे़ने़ॽ के़जिगक्वा थेधिक्काङ् मे़देॽआन्, मेःन्ने़भग्र ‘अब्राम्मिन् आङ्गाॽ याङ्साकुन्धेसाबा चोगुङ्’ लॽरिक् खे़ने़ॽ के़बाःत्तुॽ॥ 24आङ्गाॽनु के़बेःक्पाआङ् के़वाॽबा आमनाहाॽरे़ मे़जबा लक्काङ्धो वेॽ लक्किन् मे़दाःक्कान्लो, हे़क्क्याङ् कन् वेॽ मना आनेर, ए़स्कोल नु मम्रेरे़ खुन्छिॽ लक्किन् मे़दाःक्तुररो॥”
Markert nå:
तोलिङ्सोमु 14: LIF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2009, 2023, Wycliffe Bible Translators, Inc. All rights reserved.
