Ala Kalɔ Buse 10
10
Noa Bebi Bédie Kaba
1Noa bebi bani ndi Sem ku Ham ku Yaƒet na ama lɛnɔ bawɔ bebi na ɔnantu bɔna kama ni, bana lɛlɔ kɔtɛ na bɔdubo bunu mɛni.
Yaƒet Ɔ́wɔ Bebi
2Yaƒet bebi bani na ɔ́wɔ ndi
Gomer ku Magog ku Madai ku Yawan ku Tubal ku Mesek ku Tiras.
3Na Gomer bebi bani na ɔ́wɔ ndi
Askenas ku Ripat ku Togarma.
4Na Yawan bebi bani na ɔ́wɔ ndi
Elisa ku Tarsis ku Kiti kadi bekyuli ku Dodan kadi bekyuli. 5Na kaba kamɛni négyingya bákya kayawi ekpo ƒui lɛlɔ na bana adua ku kadi kenye. Na baatɛmi bana kadi lidu adi lɛnɔ.
Ham Ɔ́wɔ Bebi
6Ham bebi bani na ɔ́wɔ ndi
Kus ku Misraim ku Put ku Kanaan.
7Na Kus bebi bani na ɔ́wɔ ndi
Seba ku Hawila ku Sabta ku Raama ku Sabteka.
Na Raama bebi bani na ɔ́wɔ ndi
Saba ku Dedan.
8Kus ɔ́wɔ Nimrod. Na Nimrod ɔmɛni úbenwini ukpone ɔyikune geen na kalɔ lɛlɔ. 9Na ɔdi ɔgbini unengudi geen na Unwoti anumi. Na básu lɛgba lɛdi banini, “Ukyuli ɔmmɔ use aani Nimrod, ɔgbini unengudi geen.” 10Na lɛma lideedi lɛni kemmo na úse nwuna lɛga kadikɔ úse ndi Babel ku Erek ku Akad ku Kalne na kalɛkɛ kani baalɔ banii Sinear kemmo. 11Ka ɔ́si kalɔ kammɔ kemmo ni, úsie Asiria kalɔ lɛlɔ. Na mmɔ ni, ɔ́da Niniwe ɔma ku Rehobot-Ir ku Kala. 12Na ɔ́da Resen ɔma ɔni nkya Niniwe ku Kala ntɛ. Na anwu ndi ɔma unengudi.
13Na Misraim bebi ndi
Lud kadi bekyuli ku Anamiƒuɔ ku Lehabiƒuɔ ku Naƒtuhiƒuɔ. 14Na anwu kani náwɔ Patrusiƒuɔ ku Kasluhiƒuɔ. Na bana kemmo na Ƒilistiƒuɔ bálɛ bási ku Kastoriƒuɔ.
15Na Kanaan ubidi udeedi ndi
Sidon ku nwuna kaba kemmo bebi babambadi bani ndi Hitiƒuɔ ku 16Yebusiƒuɔ ku Amoriƒuɔ ku Girgasiƒuɔ ku 17Hiwiƒuɔ ku Arkiƒuɔ ku Siniƒuɔ 18ku Arwadiƒuɔ ku Semariƒuɔ ku Hamatƒuɔ.
Ɔmmɔ kama ni, Kanaan adua bekyuli bégyingya, 19na kalɔ kamɛni lɛmii lísie ɔgyu geen ɔ́si Sidon úti úsela Gerar laa útédu Gasa. Na ɔkɛ útádanku Sodom ku Gomora ku Adma ku Seboim. Na ɔ́via útálɛ Lasa.
20Anwuɔsu Ham bebi bani na ɔ́wɔ ku bana adua ku adi ku kɔlɛkɛ ku kalɔ ni, ama badi mmɔ.
Sem Ɔ́wɔ Bebi
21Sem lɛnɔ úti uleku na ɔ́wɔ bebi. Na ɔnwani unengudi ndi Yaƒet. Sem ɔmɛni nédie Eberƒuɔ kaba ƒui.
22Na bebi bani na Sem ɔ́wɔ ndi
Elam ku Asur ku Arƒaksad ku Lud ku Aram.
23Na Aram ɔ́ta ɔ́wɔ
Us ku Hul ku Geter ku Mesek.
24Na Arƒaksad ɔ́ta ɔ́wɔ Sela.
Na Sela ɔ́wɔ Eber.
25Uleku ɔni na Eber úti ni, ɔ́wɔ bebi bananabi inyɔ úte-nwu. Na unwi baalɔ banii Peleg, ɔni kalɔ ndi bule, ɔsika nwuna uwi na Katɔti úle kayawi kammɔ. Na ɔnwani baalɔ banii Yoktan.
26Yoktan ɔ́wɔ Almodad ku Seleƒ ku Hasarmawet ku Yera. 27Anwu kani náwɔ Hadoram ku Usal ku Dikla. 28Na ɔ́wɔ Obal ku Abimael ku Saba. 29Na ɔ́wɔ Oƒir ku Hawila ku Yobeb. Anwuɔsu bebi bamɛni ƒui badi Yoktan bebi.
30Na kalɛkɛ kani lɛlɔ na bélie kewi kási kesii kani baalɔ banii Mesa úti úsela Seƒar kakɛ na ɔƒɛ katukɔ na abi lɛlɔ.
31Bebi bani na Sem ɔ́wɔ ku bana adua ku adi na bana kɔlɛkɛ ku kɔlɔ na badi mmɔ.
32Ɔmɛni ɔsu Noa bebi ku bana adua ku kalɛ na bana bati báwɔ-ma kenye na bana kɔlɔ lɛlɔ na badi mmɔ. Na ama ndi bekyuli bani nédie kadi lidu kaba bekyuli na báƒɔ kayawi ƒui lɛlɔ na ɔnantu bɔna bɔmmɔ kama.
Markert nå:
Ala Kalɔ Buse 10: lef
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
