Make 15
15
Pacicin da si Yeso do tangain ni Pilato
(Matay 27:1-2,11-26; Locya 23:1-5,13-25; Yowani 18:28-36; 18:39-19:16)
1Apnezak do ikadwa na araw am meykaygi rana sira o panipanirsirngen da no mapatanatanang so nakem da si Ama ta do to a kano kamanrarakehan a kano mangnanao no iwawalam ni Ama ta do to a kano aro a panipanirsirngen. Karahan am pamnekan da na o vazay da. Meyratateng am vaoden da na si Yeso a yangay ji Pilato. 2Maniring si Pilato jya am, “Panirsirngen da imo no tao do Yotay?” Maniring si Yeso am, “Noon, manoyong ori.” 3So nikaro no marahet a vazay a iraherahet da si Yeso no panipanirsirngen da no mapatanatanang so nakem da si Ama ta do to. 4Am ori o nipacicyan na pa si Yeso ni Pilato. Maniring am, “Amizing pala o aro a vazay a da iraherahet jimo. Manngwa, yabo ciring mo a yamo ipasapa jira?” 5Akman sang ta abo o asa ka ciring a nipasapa na jira ni Yeso. Am ori o savasavakan na nya ni Pilato.
6Mangday no mamaring sira so kanen do Iyeci o kato na mangozayan jya ni Pilato do kapamnekan da no tao a mapasaway so asa ka tao a nipteng da. 7Nimacinao o meyngaran so Palapa a macizavoz do aptengen da. Iya rana ori am mapasobsobna do seyvo a kapanwakwak na so tao. 8Malovot sira o aro a tao a manci ni Pilato so kapasaway na so asa ka tao. 9Maniring si Pilato jira am, “Manngo kamo a apyapya kapasaway ko so panirsirngen nyo a tao do Yotay an?” 10Am katenngan na rana ni Pilato o nyahapan da si Yeso a itoro jya no panipanirsirngen no mapatanatanang so nakem da si Ama ta do to do keynanahet da nya. Am ori o nyangayan da nya jya. 11Am kapasozisozi da so aro a tao no panipanirsirngen da no mapatanatanang so nakem da si Ama ta do to a manci ni Pilato a mapasaway si Palapa. 12Ipidwa na pacicin sira o aro a tao ni Pilato am maniring jira am, “Kongwen ko so wanjin o nyo ipanci a panirsirngen nyo a tao do Yotay ang.” 13Maniring sira o aro a tao a amlololos am, “Padketen do jyojika!” 14Maniring si Pilato am, “Ikongo na mina vazay a yamarahet.” Ikeykavevek da amlololos no aro a tao. Maniring sira am, “Padketen do jyojika!” 15Ji na pasovoy o aro a tao ni Pilato am to na rana norwan jira si Palapa a kapanci na rana no tao a somipsipzot ji Yeso a katoro na rana ni Yeso jira yangay da padketen do jyojika.
Peyyaliliman da si Yeso
(Matay 27:27-31; Yowani 19:2-3)
16Karahan am yangay da no itaysang no Loma si Yeso do tezantehed no vahay ni Pilato a kapeylovolovot da na so aro a itaysang. 17Meyratateng am payoben da si Yeso so akmey ayob no panirsirngen a kapamalikawag da so akmey tazici a pasakopen da jya, 18a kalogologod da nya. Maniring sira am, “Makapintek ka Panirsirngen no tao do Yotay an.” 19Karahan am bakbakan da no vazit o oo na a kacicipa da jya a kapeylilitod da amlogologod nya. 20Teyka da peyyaliliman am opsowen da na o nipeyyayob da sya akmey ayob no panirsirngen a kapayob da na jya so meyngongyod a ayob na a kangay da rana nya padketen do jyojika.
Padketen da si Yeso do jyojika
(Matay 27:32-44; Locya 23:26-43; Yowani 19:17-27)
21Makanavak do rarahan na am masinmo da o asa ka tao a meyngaran si Simong a omoli a apo do takey. Masinmo da ori am pahanhanen da ori a somabway no jyojika ni Yeso. (Si Simong rana am tao do Cidinay a inyapwan da ni Yadisanta kani Lovo.) 22Yangay da si Yeso do meyngaran so Keketa. O peypeypangayan no nang am Yanga no oo no tao. 23Amyan sira do dang am peyyopen da si Yeso so nipazavozan da so kosozi a makopad a ranom. Am ji na ngyopa ni Yeso. 24Padketen da rana si Yeso do jyojika am macipangoyongoyot sira amvonong so mina ayob na. 25Ikasyam no vatvatek do apnezak am padketen da si Yeso do jyojika. 26O nivatvatkan da raraten na am, “Iya ya am Panirsirngen da no tao do Yotay,” 27a kapazanod da so rarwa nimanakaw a tao ji Yeso a padketen do jyojika. Asa am pain da do wanan na. O asa am pain da do ozi na. 28[So na nipangononong rana no akman sang a ciring do Seysyo. Ta o domket dang am, “Nipazasing da do meyraraten a tao.”]#15:28 Isayya 53:12. 29O meyhatay do dang a tao am to da ligaligana o oo da mapasnesnek si Yeso. Maniring sira am, “Ka jyapya yamanci no kakavakava mo so rako a panaralayan a kapakatlo na araw no ipatnek mo sya. 30Peyhekas do jyojika sicyaikwaya kavyay mo so kataotao mo am.” 31Akman sang sira o panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a meykeykaming nya. Maniring sira am, “Na mavyay o karwan no tao a na jyatenngi o kataotao na avyain. 32Kizisto a Panirsirngen no Isedi, peyhekas pala do jyojika, ta citahen namen, ta ori o anoyngan namen jimo.” Akman sang sira o kararay na nipadket da do jyojika mapeyleylak sya.
Mawakwak si Yeso
(Matay 27:45-56; Locya 23:44-49; Yowani 19:28-30)
33Meyigen o araw am mina todakedep o teyrahem so atlo a ka vatvatek. 34Ikatlo na ka vatvatek do makoyab am amlololos si Yeso. Maniring am, “Idi, Idi, lama sapahetani.” O peypeypangayan na am, “Mo Ama do to, mo Ama do to, mo peymakarwan jyaken.”#15:34 Anwanood 22:1. 35Mamizing da no tao am maniring sira am, “Na tawagan si Idiya.” 36Amyan so asa ka tao a mangay omahap so nitahem do makopad a ranom a akmey tapaik a palibden do anaro a avyao a itoro ji Yeso ipeyyop na sya. Maniring am, “Nanalahen ta pala ang, ta ala mai si Idiya mangay mapakas sya do jyojika an.”
37Ipisa kalolos na ni Yeso am mazavat o inawan na. 38O bengbeng no rako a panaralayan a milakayob am mina todapising. 39O amyan do tangain no jyojika a panirsirngen no itaysang no Loma am macita na si Yeso a amlololos a mawakwak am maniring am, “Manoyong o tao eya Anak no Tao do to.”
40Amyan so aro a mavakes a makacita sya a macyatovang jya. Sira rana am Matelyan Madiya kano ina na ni Yake a kani Yoseyvo a Madiya kani Salomey a kano karwan da icyamavavakes da. 41No keyyan ni Yeso do Cyadidi am sira ori o nimacilolo jya a mapeyveyveken sya. Amyan pa sira so aro a mavavakes a nimacihza jya do Yelosaleng.
Nipakakasa da si Yeso
(Matay 27:57-61; Locya 23:50-56; Yowani 19:38-42)
42-43Maseyrem rana do vekhas na no ipeywalam da no tao do Yotay am nimai si Yoseyvo. Iya rana am tao do Adimatay a tey kanig da ori no panipanirsirngen a kararay na. Iya rana am tey saray na no nang o kapananala na so katalamozong na nyaten ni Ama ta do to. Ji na mamman si Pilato. Am ori o yangay na a manci nya ji Pilato so kakas na so kataotao ni Yeso a pakakasahen. 44Nisavasavak na ni Pilato o mina kapakamizing na rana si Yeso a nimawakwak. Am ori o nipancyan na no asa ka panirsirngen no itaysang no Loma a mai. Maniring jya am, “Manngwa, yarana nimawakwak si Yeso?” 45Mamizing na do panirsirngen da no itaysang no Loma o kanimawakwak na rana ni Yeso am ori o nipyan na si Yoseyvo a mahap rana so kataotao na ni Yeso. 46Karahan am manazang si Yoseyvo so milakayob a kangay na rana omkas so kataotao ni Yeso a pongosan no milakayob a mangay pakakasahen do nidokdokan na rana mao a kalolog na so rako a veysen a pazevngen na do heseb na. 47Si Matelyan Madiya kano ina na ni Yoseyvo a Madiya am nimacilolo sira. So pakatenngan da do nipakakasan da si Yeso.
Markert nå:
Make 15: snt
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Bible Society in Taiwan
