Génesis 8
8
Tej twe' q'eqab'
1Ultzun Noé tuj t-ximb'etz Dios kyuk'ix kykyaqil qe txkup ate'kxtoq tuk'il tuj matij barc. Tzaj tq'o'n Dios jun kyq'iq' tib'aj tx'otx' ex kub' laq'e' a'; 2e maqet qe twi a' t-xe nintz mar, maqet ttzi kya'j ex we'tzun jb'al. 3Cheb'ale kub' ti'j a'. Tb'ajlenxi 150 q'ij, otoq kub' laq'e' a'. 4Atzun kub' ten matij barc kywi witz tuj Ararat tuj wuqlaj tajlal twuqin xjaw. 5Atzunte a' in kub' laq'e'toq, ex tuj tnejel q'ij tuj tlajin xjaw, maxitzun tq'ancha'lin kywi' junjun witz mas nmaq kywa'l.
6Tb'ajlenxitzun 40 q'ij, okx tjaqo'n Noé aju tventanil matij barc otoq b'ant tu'n. 7Etztzun ttzoqpi'n jun joj; atzunte joj noq o lipan tik', nne'lxi laq'e' ex nnu'lxi laq'e' ti'j matij barc tejxi tkub' tzqij a'. 8Te tib'ajxi joj, etz ttzoqpi'n Noé jun paloma tu'ntzun tke'yinte qa otoq tzqij a' twitz tx'otx'. 9Minti' knet jatum tu'n tkub' we' tu'nju atxtoq a' twitz tx'otx'. Ajtzun meltz'aj jatum ta'toq matij barc. Etz tq'o'n Noé tq'ab' tzyulte ex okx ti'n tuk'il.
10Ayon Noé wuq q'ijtl. Etztzun t-sama'n juntl maj aju paloma. 11Ch'ixtoq tok yupj tej tul meltz'aj paloma q'i'ntoq jun tal t-xaq tze' olivo tu'n ttzi'. Tu'ntzun jlu el tnik' Noé ti'j kyja'toq tkub' tzqij a' twitz tx'otx'. 12Ayon Noé wuq q'ijtl. Etztzun t-sama'n juntl maj aju paloma; atzunte paloma minti' ul meltz'aj juntl maj.
13Tuj ab'q'i tej tjapun Noé twi' 601 ab'q'i, tuj tnejel q'ij tuj tnejel xjaw, tzqij twitz tx'otx'. Eltzun ti'n Noé aju tmaqsil matij barc ex o til otoq tzqij twitz tx'otx'. 14Tuj 27 tajlal tkab'in xjaw otoq b'aj tzqij twitz tx'otx'. 15Tzajtzun tma'n Dios te Noé kyja': 16Tetza tuj matij barc, tuk'ix t-xu'jila, kyuk'ix qe tky'ajala ex qe tlib'a. 17Q'i'metza kykyaqil qe txkup ate' tuk'ila: Qe chyu'j ex txqantl txkup in che lipan twitz kya'j, qe alumaj, ex qe txkup in xi kyjaqu'n kyk'u'j twitz tx'otx', tu'n t-xi kysipan kyib' twitz tx'otx', tu'n kypoq'l ex tu'n tchmet kyb'aj twitz tx'otx', chi Dios. 18Etztzun Noé, kyuk'ix qe tky'ajal, tuk'ix t-xu'jil ex qe tlib'. 19E je'tz tuj matij barc kykyaqil txkup in che yukch twitz tx'otx', kykyaqil qeju in xi kyjaqu'n kyk'u'j ex qeju in che lipan twitz kya'j, teyle te junjun tiyjil. 20Kub'tzun tb'incha'n Noé jun altar te patb'il chojb'il twitz Qman, e tzaj ti'n qe txkup ex qe chyu'j saq qe, jun ti'j teyle junjun wiq, ex e kub' tpatun te jun oyaj tib'aj altar. 21Tejtzun tna'nte Qman tb'anilxix tk'ok'jal oyaj, tma tuj tanmi kyja': Mlay tzaj nq'o'ntle sentens tib'aj tx'otx' tu'n tlaj xjal, porke ate xjal atxix tuj tku'xumal o'kx in ximan ti'j mya b'a'n, ex mlay che najtl tkyaqil txkaj jil wu'ne ik tza'n o nb'inchaye.
22Akux atx tx'otx', kukx ktel tq'ijlalil awb'il ex chemb'il twitz awal, tq'ijlalil kyaq ex che'w, tq'ijlalil jb'alil ex koresma, kukx ktzajel q'ijl ex qonik'an, chi Qman.
Markert nå:
Génesis 8: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
