Génesis 16
16
Tej tul itz'j Ismael tal Agar
1Mib'antoq alin Sarai aju t-xu'jil Abram, ex attoq jun tmajen, jun xu'j aj Egipto Agar tb'i. 2Xitzun tma'n Sarai te Abram: B'a'n wu'ne, tu'n Qman mib'an chin aline. Chin kub'sale twitza tkub' moje'ya tuk'il nmajene xu'j, qape jaku che tzaj wale ti'j, chi Sarai.
Xitzun tniman Abram tyol Sarai aju t-xu'jil. 3Tzajtzun ti'n Sarai aju tmajen xu'j, aju aj Egipto, Agar tb'i, ex xi tq'o'n te Abram tu'n tjaw t-xu'jla'n. Otoq b'ant laj ab'q'i tkub'len ten Abram najal tuj tx'otx' Canaán. 4Kub'tzun tan Abram tuk'il Agar ex ok ten tal Agar. Tejtzun tna'nte Agar otoq tz'ok ten tal, ok ten ik'ul ti'j Sarai aju tpatrón. 5Tmatzun Sarai te Abram kyja':
—Tu'n tlaja ma chin el ik'une tu'n Agar. Ax qine inx q'onte nmajene teya tu'n tok te t-xu'jila, tejtzun ma til ma tz'ok ten tal, ma chin el ik'une tu'n. E tmante Qman alkye at til, qa aqine ex qa aya, chi Sarai.
6Xitzun ttzaq'we'n Abram te kyja':
—Tuj tkwenta ta' tmajena. B'inchama ti'j alkye b'a'n tuj twitza, chi Abram.
Oktzun ten Sarai yajlal te Agar. Tu'ntzun jlu el oq Agar. 7Ok noj aju t-anjel Qman ti'j tuj tzqij tx'otx', niqayin jatum nne'tz jlet jun a' tuj tb'eyil Shur. 8Xitzun tqanin anjel te:
—Aya Agar tmajen Sarai: ¿Jatum saja, ex jatum ma txi'ya?
Ajtzun ttzaq'we'n Agar:
—Ma chin el oqe twitz npatrone Sarai.
9Xitzun tma'n t-anjel Qman te:
—Taj meltz'aja tuk'il tpatrona ex nimanxa tuj tkyaqil.
10Xi tma'ntl t-anjel Qman te kyja':
Kchmetel nimxix tiyjila wu'ne, ex mi a'l jun kb'antel tajlante kye.
11O tz'ok ten tala ex tzul itz'j jun tala xinaq. Ismael tb'i k'okel tq'o'na tu'nju o tb'i Qman aju yajb'il teya.
12Ate jlu k'okel te jun xinaq tx'u'j twi'; kq'ojlel kyi'j kykyaqil xjal, ex che q'ojlel kykyaqil xjal ti'j, ex part knajal kyi'j kykyaqil terman, chi Dios.
13Oktzun tq'o'n Agar tb'i Qman aju in yolintoq tuk'il: Aya Dios in chin tke'yin, porke tma: Ma wile tzalu aju in ke'yinte weye. 14Tu'ntzun jlu ok tq'o'n tb'i xoch lu: Beer-lahai-roi.#16.14 Beer-lahai-roi. Tuj yol ebrey atzun in tma'n xoch teju Itz' ex in ke'yinte weye. Aju xoch lu, atzun tkub' t-xol Cades ex Bered.
15Ultzun itz'j jun tal Agar, tky'ajal Abram, ex Ismael tb'i ok tq'o'n Abram. 16Otoq japun Abram twi' 86 ab'q'i tej tul itz'j Ismael aju tal Agar.
Markert nå:
Génesis 16: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
