Mt 2

Bə̂d mbe nɨ nyaʼa kyerɨ ənû ɨmbə̀ʼ rɨtəmɨ nyaʼa wò zə ə Yeso

1Mbɨ nyaʼa gywɨ ə Yeso ə Betlehem we rɨ ə Jùdeyà. Mbɨ nyaʼa gywɨ əməd ənɨ ə nyùmə̀ we nɨ Herɔ̀d nyaʼə ɨfɔ̂n. Ənɨ əgha ə nyaʼa tɔ sààrɨ̀, bə̂d mɔʼɔ nɨ nyaʼa kyerɨ ənû ɨmbə̀ʼ rɨtəmɨ nyaʼa nɔ̀ʼ rɨ əbà ze nɨ nyùmə̀ ə jwɨ̀ rəŋgu wò ə Jèrusalèm. 2Mbɨ nyaʼa pè biirɨ ni, “Wan we mbɨ gywɨ nɨ yeʼ ɨfɔ̂n mɨ̀Jû kɨ ə yi ə? Tɨ̀ kə̀ʼ zə fɨtəmɨ məd əbà ze nɨ nyùmə̀ ə jwɨ̀ rəŋgu, əne tɨ̀ fə yeʼe ɨ wumnɨ əməd.”

3Ənɨ ɨfɔ̂n Herɔ̀d nyaʼa zu ənû zɔ̂, zɨə nyaʼa tɔb əməd bə̀ tɔb bə̂d mɨ̀jìm mbe nɨ nyaʼa ə Jèrusalèm. 4Əne wɨ̀ nyaʼa tɔŋ bə̂d kyeŋ mbe rɨ ə mbàn Ŋwìə̀ bə̀ tɔŋ məchwiə̀ rɨ̀kə̌, biirɨ əmbɨ mɨ̀mə̌d ni, “Mbɨ kɨə wo gywɨ Wə̀d we nɨ Ŋwìə̀ zɔʼɔ ə yi ə?”

5Mbɨ nyaʼa wììrɨ̀ ɨ bɔ ni, “Mbɨ bɨrɨ gywɨ əməd ə Betlehem we rɨ ə Jùdeyà, ɨchî nɨ wə̀d ɨ̀kə̀n Ŋwìə̀ nyaʼa fə ŋwaʼnɨ ni:

6'Àwɔ̀ Betlehem nɨ yeʼ ɨŋga əba əbeŋ ze rɨ ə Judà,

ka àwɔ̀ yɨ əwe əsɨ ze nɨ kə chè ɨsɨ jìm mbe nɨ mɨfɔ̂n mbe rɨ ə Judà ə tùmbɨ̀ə̀,

ɨmbə̀ʼ ɨghəm nɨ ə̀tùmbɨ̀-bə̂d mɔʼɔ bɨrɨ jwɨ̀ rɨŋga ne

nɨ bɨrɨ tumbɨ mbɨ bə̂d mɨ̀Izre.'”

7Ənɨ Herɔ̀d nyaʼa zu əne, wɨ̀ nyaʼa tɔŋ bə̂d mbe nɨ nyaʼa kyerɨ ənû ɨmbə̀ʼ rɨtəmɨ ənjìm ənjìm, nwèndɨ̀ nyùmə̀ we nɨ fɨtəmɨ fe kəʼ jwɨ̀. 8Wɨ̀ nyaʼa nwèndɨ̀ əne, chà mɨ̀mə̌d ə Betlehem ghà ni, “Mbə̀ wo jeŋgɨ kə̀b wan we. Ənɨ mbə̀ zə əməd, mbə̀ wɨrɨ yeʼe ghà ɨ num ɨmbə̀ʼ mə̀ bə wò wumnɨ əməd.”

9Ənɨ mbɨ nyaʼa zu ənû ze nɨ ɨfɔ̂n we nyaʼa ghǎ əmbɨ mɨ̀mə̌d, mbɨ nyaʼa nɔ̀ʼ kɔ wò əwən. Mbɨ nyaʼa pè ɨnə̂njɨ̀, zə fɨtəmɨ fe nɨ mbɨ nyaʼa be zə əbà ze nɨ nyùmə̀ ə jwɨ̀ rəŋgu. Fɨtəmɨ fe fə nyaʼə wo ɨmbì mɨ̀mə̌d. Fɨ nyaʼa pè təm ɨgwɨ əsɨ ze nɨ wan we nyaʼa əngu. 10Ənɨ mbɨ nyaʼa zə fɨtəmɨ fe, ɨghaʼi nyaʼa swi ɨŋga fîŋ tɨ mɨ̀mə̌d. 11Mbɨ nyaʼa wò nyɨ ɨŋga nəb ze nɨ fɨtəmɨ fe kəʼ təm ɨgun, əne zə wan we nɨ nyaʼa mbɨ ɨŋgɔb məd Mèri. Mbɨ nyaʼa zə əne, chìndɨ̀ ɨtu ɨnywɨ ə si, wumnɨ əməd. Mbɨ nyaʼa bə̀ zà mbə ɨ̀bàmɨ̀, chɨ̀ ə gôl fɔrɨ ə frankɨnsèns mbɨ ə myrrh nèʼ wan we əŋgu. 12Ŋwìə̀ nyaʼa patɨ mɨ̀mə̌d ə njə̀m ni tɨ mbɨ wɨrɨ chè əwən əsɨ Herɔ̀d. Ənɨ mbɨ nyaʼa zu əne, mbɨ nyaʼa nɨŋ ɨnə̂njɨ̀ cherə wò əwən ɨŋga ə əbeŋ.

Jòsêf mbɨ Mèri nyaʼa nɨŋ ə Yeso mbɨ nòrə̀ wò ə Ijìpt

13Ənɨ bə̂d mbe nɨ nyaʼa kyerɨ ənû ɨmbə̀ʼ rɨtəmɨ nyaʼa fə wò əwən, aŋgɨrə̀ Ə̀nùŋɨ̀sɨg nyaʼa wò əsɨ Jòsêf ə njə̀m pè ghà ni, “Nɔʼɔ nɨŋ wan wɔ̂ mbɨ ɨŋgɔb məd mbə̀ nòrə̀ wò ə Ijìpt. Mbə̀ chub əŋgu pè ənɨ mə̀ ghà ɨ nən ni mbə̀ wɨrɨ yeʼe, ɨmbə̀ʼ ɨghəm nɨ Herɔ̀d wɨə kə̀b zwiirɨ wan wɔ̂.” 14Jòsêf nyaʼa nɔ̀ʼ àmei ɨzimɨ we nɨŋ wan we mbɨ ɨŋgɔb məd mbɨ wò ə Ijìpt. 15Mbɨ nyaʼa chub əŋgu pè ənɨ Herɔ̀d nyaʼa kwɨ. Ɨŋgam we nɨ Ə̀nùŋɨ̀sɨg nyaʼa che ənjìm i wə̀d ɨ̀kə̀n ghà nyaʼa jwɨ̀ ənɨ rəsìʼ ni, “Mə nyaʼa tɔŋ mɨ wan rɨ ə Ijìpt.”

Mɨ̀sɔgyɨ̀ nyaʼa zwiirɨ bɔn mbaŋə̀ bɔd

16Ənɨ Herɔ̀d nyaʼa zə ni bə̂d mbe nɨ nyaʼa kyerɨ ənû ɨmbə̀ʼ rɨtəmɨ nyaʼa fə tam əwi, wɨ̀ nyaʼa sə ɨtəm kwàʼ rɨŋgəʼ. Əne wɨ̀ nyaʼa chà mbi mɨ̀sɔgyɨ̀ ə Betlehem bə̀ fɔrɨ ɨŋga ɨsɨ mbe nɨ nyaʼa ɨban ɨban ni mbɨ zwiirɨ bɔn mbaŋə̀ bɔd mɨjìm mbe nɨ nyaʼa fə sɨ ɨghəm ɨwu be fɔrɨ mbe nɨ chəi mbɨ nyaʼa kɨrɨ pe ɨghəm ɨwu be. Wɨ̀ nyaʼa ghà əne beenɨ əbɔʼ nyùmə̀ we nɨ bə̂d mbe nɨ nyaʼa kyerɨ ənû ɨmbə̀ʼ rɨtəmɨ nyaʼa gha ɨ bɔ. 17Əne ənû ze nɨ Ŋwiə̀ nyaʼa che ənjìm i wə̀d ɨ̀kə̀n Jèrèmià ghà, ə nyaʼa jwɨ̀ ənɨ rəsìʼ ni:

18“Gɨ̂ wə̀d mɔʼɔ zɨə ghàm ə Ramà.

Ɨ wɨə chweŋə mɨsɨ bə̀ dìə̀ kwàʼ rɨ̀kǎ.

Rashèl wɨə dìə̀ mbi bɔn.

Chəi wɨ̀ ben ni mbɨ nəərɨ əwi,

ɨmbə̀ʼ ɨghəm nɨ bɔn mbe fə kwɨ.”

Jòsêf mbɨ Mèri nyaʼa bə̀ndɨ̀ rɨ ə Ijìpt

19Ənɨ Herɔ̀d nyaʼa fə kwɨ, aŋgɨrə̀ Ə̀nùŋɨ̀sɨg nyaʼa jwɨ̀ əmbɨ Jòsêf ə njə̀m ənɨ wɨ̀ nyaʼa kɨrɨ ə Ijìpt, ghà ɨ bɔ ni, 20“Nɔʼɔ nɨŋ wan wɔ̂ mbɨ ɨŋgɔb məd mbə̀ bəndɨ wò ə Izre, ɨmbə̀ʼ ɨghəm nɨ bə̂d mbe nɨ nyaʼə kə̀b zwiirɨ wan wɔ̂ fə kwɨ.” 21Əne Jòsêf nyaʼa nɔ̀ʼ nɨŋ wan we mbɨ ɨŋgɔb məd mbɨ bə̀ndɨ̀ wò ə Izre. 22Àyɨə ənɨ Jòsêf nyaʼa zu ni Àchelùs fə jɨg ətən ə Herɔ̀d nɨ nyaʼə mbǎʼ məd, əne sɨə tùmbɨ̀ ə Jùdeyà, wɨ̀ nyaʼa bɔ nɨ wò əŋgu. Aŋgɨrə̀ nyaʼa bə̀ patɨ əməd ə njə̀m, əne wɨ̀ nyaʼa wò əbà əbeŋ ze rɨ ə Galiliî. 23Wɨ̀ nyaʼa pè chub əsɨ ze nɨ mbɨ nyaʼə tɔŋ ənɨ ə Nazàret, ɨmbə̀ʼ ənû ze nɨ bə̂d ɨ̀kə̀n Ŋwiə̀ nyaʼa gha, ə jwɨ ənɨ rəsìʼ ni, “Mbɨ bɨrɨ sɨə tɔŋ əməd ənɨ wə̀d rɨ ə Nazàret.”

Markert nå:

Mt 2: mgo

Marker

Del

Kopier