Эклц 17
17
Керчлһнә бооцан
1Абрамиг йирн йистәднь Деед Эзн терүн тал баралҗ ирәд келнә:
– Би Хамгин Күчтә Бурхнв, Мини эв-арһар бә, нерән бичә һута. 2Би чамла бооца кенәв, чамд йир олн тоота хөөт үйнр өгнәв.
3Абрам Бурхна өмн түргүр унна. Бурхн терүнд келнә:
4– Чамла кеҗәх Мини бооцан эн: чи олн келн-улсин эцк болхич. 5Чамаг дәкҗ Абрам гиҗ келшго, чини нерн Абрахам#17:5 Абрахам – эн нерн «олн улсин эцк» гидг чинртә. болх. Чамар Би олн келн-улсин эцк кенәв. 6Би чамаг йир өслттә кү кенәв. Чамас келн-улс үүдҗ төрдгәр кенәв. Чини хөөт үйнр хан болцхах! 7Би чамла бооца кенәв. Мини болн чини хоорнд, чини иргч үйнрин хоорнд мөңк бооца кенәв. Би чини Бурхн болнав, чини хөөт үйнрт Бурхн болнав. 8Чи оруд күн болҗ бәәх Канана һазриг чамд болн чини хөөт үйнрт мөңк эзллһнд өгнәв, теднә Бурхн болхв.
9Бурхн Абрахамд иигҗ келв:
– Чи болхла, Мини бооца күцәх йостач. Чи болн чини хөөн хөөт үйнрчнь терүг күцәх йоста. 10Чамла болн чини хөөн хөөт үйнртәчнь кесн, чини күцәх Мини бооцан эн: таднас эр күн болһн керчүлгдтхә. 11Залу күн болһн бий махмудын үзүринь керчүлх йоста болҗана. Эннь Мини болн тадна хоорнд кесн бооцана темдг болх. 12Төрәд 8 өдр күцсн эр күн танад керчүлгдх йоста. Үйәс үйд тиим болтха. Чини хөөт үйнр, цуг зарцнр: чини герт төрснь чигн, хәр күүнәс мөңгәр хулдҗ авгдснь чигн керчүлгдх йоста. 13Цугтан керчүлгдх йоста. Тегәд Мини мөңк бооцан тадна махмудт бооцана темдг болх. 14Керчүлгдәд уга эр күн болхла, эврәннь келн-улсасн уга болх зөвтә. Яһад гихлә тер Мини бооцаг эвдсн күн болх.
15Бурхн дәкәд Абрахамд иигҗ келнә:
– Чини гергн Саран тускар болхла, терүг дәкҗ Сара гиҗ келшгоч, терүнә нернь Сарра#17:15 Сарра – еврей келәр эн нерн «хатн» гиҗ келгднә. болх. 16Терүг Би әдслнәв, чамд Сарраһас көвү өгнәв. Сарраг келн-улсин эк болдгар Би әдслнәв, терүнәс олн келн-улсин эзн хад үүдҗ төрцхәх.
17Абрахам түргүр унна. «Зун наста күүнәс көвүн һархий? Йирн наста Сарра көвү һарһхий?» – гиҗ инәһәд санна.
18– Зуг Ишмаил әмд бәәһәд, Тана әдс авв чигн болх, – гиҗ тер Бурхнд келнә.
19– Чини гергн Сарра чамд көвү һарһх. Терүнд чи Ицхак#17:19 Ицхак – еврей келәр эн нерн «тер инәҗәнә» гиҗ келгднә. гидг нер өгхич. Би Ицхакла болн терүнә хөөт үрдтә Эврәннь мөңк бооцаһан кенәв. 20Ишмаилин туск чини сурвр Би соңсув. Терүг Би бас әдслнәв. Терүг Би өнр-өсклңтә болһнав, тооһарн олн болдгар бас икдүлнәв. Арвн хойр нойна эцк тер болх. Би терүнәс алдр улс үүдәҗ һарһнав. 21Болв Эврәннь бооцаһан Би Ицхакта кенәв. Дарук җилд эн цагла Сарра чамд тер көвү һарһҗ өгх, – гиҗ Бурхн келв.
22Абрахамла күүндврән чиләһәд, Бурхн йовҗ одна.
23Минь тер өдр Абрахам Ишмаил гидг көвүһән болн цуг эврә гертнь төрҗ һарсн әмтиг, мөңгәр хулдҗ авгдсн цуг залу улсиг цуглулад, Бурхна келсәр керчүлв. 24Тиим керчлһ бийдән келгүлхләрн, Абрахам 99 наста бәәҗ, 25Ишмаил көвүнь арвн һурвта бәәҗ. 26Абрахам болн терүнә Ишмаил көвүн тер өдртән хоюрн керчүлгднә. 27Абрахамин герт бәәсн цуг залу улс, тедн дунд терүнә герт төрҗ һарсн, һазадын орнас хулдҗ авгдсн әмтн Абрахамла хамдан керчүлгдсн болдг.
Markert nå:
Эклц 17: ХКО_ӘБ
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Институт перевода Библии, 2002-2023
