Эклц 15
15
Абрамла кесн Бурхна бооцан
1Энүнә хөөн Абрамд үзгдл болҗ Деед Эзн келнә:
– Бичә ә, Абрам, Би чини халхцв. Чини ачлвр йир ик болх.
2Болв Абрам иигҗ келнә:
– О, Деед Эзн Бурхн, кемр би үрн уга үлдҗәхлә, мини өлг-эдиг Элиезер гидг Дамаскин күн авх болхла, Та нанд ю өгч чадхвт? 3Та нанд хөөт үй өгсн угат, мини эдл-ахуг һардҗах ялч мини өнч авх күн болх.
4Деед Эзнә үг терүнд хәрүнь болв:
– Терчнь чини өнч авх күн болшго, чамас һарсн күн чини өнч авх күн болх.
5Деед Эзн Абрамиг һазаран дахулҗ һарад иигҗ келнә:
– Теңгрүр хәләлч: кемр одд тоолҗ чадх болхла, тедниг тоол. Чини хөөт үйин улс тооһарн тиим болх.
6Абрам Деед Эзнд иткнә. Итксн төләднь Деед Эзн Абрамиг чик седклтә күн гиҗ тоолна.
7Деед Эзн терүнд бас иигҗ келнә:
– Чамаг эзн болтха гиһәд, эн һазр өгхәр Би халдеймүдин Ур гидг балһснас чамаг дахулҗ һарһсн Деед Эзмб.
8Болв Абрам сурна:
– О, Деед Эзн Бурхн, энүнд эзн болхан би яһҗ медхмб?
9Деед Эзн терүнд келнә:
– Чи нанд һунта туһл, һунта яма болн һунта хуц, көглҗрһ болн баахн көглҗрһ авад ир.
10Заасн зүсн-зүүл малыг, шовудыг Абрам авч ирәд, чавчад, тедниг хойр әңгләд, нег-негнәннь тус оркна, зуг шовудыг чавчсн уга. 11Махсг зерлг шовуд махн тал нислдәд бәәв, болв Абрам тедниг көөнә.
12Нарн суух кемлә, Абрам нөөртән икәр авлгдна: эн цагла терүн деер әәмшгтә таг харңһу бууна. 13Деед Эзн терүнд келнә:
– Чини хөөт үйнр күүнә һазрт оруд улс болх, тенд мухла болх, чини хөөт үйнр 400 җилдән даҗргдхиг медҗ ав. 14Тедниг мухлалсн улсиг Би зарһла харһулхв, энүнә хөөн тедн тендәс ик өлг-эдтә һарх. 15Чини тускар болхла – әвр көгшн насндан оршагдад өвкнртән күрхич. 16Чини хөөт үйнр болхла – дөрвдгч үйдән нааран хәрү ирх. Яһад гихлә амореймүдин килнц кевтән күцгдәд уга.
17Нарн сууһад харңһу болхла, утан һарчах хәәсн болн ассн заль генткн һарч ирәд, чавчад хойр әңглсн махна хоорндаһур һарна. 18Тер өдр Деед Эзн Абрамла бооца кеһәд келнә:
– Чини хөөт үйнрт Би эн һазр өгчәнәв – Египетин һолас Епрат гидг нертә алдр Һол күртл: 19кенеймүдин, кенезмүдин, кадмонмудын, 20хетмүдин, перизмүдин, рефаимүдин, 21амореймүдин, кананахна, гергашмудын болн евүсмүдин һазрмуд чамд өгчәнәв.
Markert nå:
Эклц 15: ХКО_ӘБ
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Институт перевода Библии, 2002-2023
