MATEO 21

Yesu Labuo Yerusalem Fɛle Ɔka Ku Suoto Lɛyɔɔ.

1Di obe wɔ di Yesu ku basaateketetɛ nɔɔ kɔtɛtɛɛ ni Yerusalem, babadu ni Betfage di Nnɔnyi Awoso Kobokote ɔlɔɔkɔ yi, Yesu lakpee basaateketetɛ nɔɔ banyɔ alɛ balekatũ. 2Ni aatɔkɔ ma alɛ, “Bitɔɔkyɛ kakpaayotũ ka ninte ye ni siitũ kamɛ, bibanya bɔkɛɛ wɔ ninte ni fɛ pɔnkɔ antuka ni aatoo beekpee nwɔ okũ, diibi kafɔɔ n-yɛ nwɔ ni di ɔlɔɔkɔ. Bidiki nwɔ di okũ biɛkpaa ma biwakoe. 3Nse otii owo lɛkaalɛ ye ɔlaa owo yi, biɛtɔkɔ nwɔ bilɛ, ‘Saate nwu nikomiɛ ma.’ Abakplesa ma kafɔɔ anwako ye nunua.”

4Nle mmle lawa kaanya fɛ mmle okle di Yaa ɔlaa buɛtɛtɛ onwii labuɛ aatɛ ni alɛ,

5“Bitɔkɔ Sion batii bilɛ,

‘Binyu! Ɔka lee kɔwa ɔkyɛ lee.

Ɛɛwakosa suoto kasɔ asi di bɔkɛɛ wɔ nintuka ni atoo

ku dibi suoto ɔɔwa.’ ”

6Nkpo oso basaateketetɛ banyɔ nwu nkpo, lakyɛ baalaabla fɛ mmle okle di Yesu lakpee ma alɛ balaabla nii. 7Ni baakyɛ baalaakpaa bɔkɛɛ wɔ nintuka ni atoo ku dibi nwu nkpo baawako nwɔ nɛ. Ni baablɛfɛsa abula lɛma baatika di suoto lɛma, ni di Yesu layie aasiɛ ma di suoto nɛ. 8Ni baatii kpinwu di batii dikudi nwu nkpo kamɛ latɔtaa siwidi baadiki abula lɛma baatɛ di osuku suoto. Ni baawo kafɔɔ labudi sɛkaafɛ baatɛ di osuku suoto nɛ. 9Ninfɛ di batii dikudi le niale Yesu katũ ku mba niakpi ni sɛmaa latɔɔtaa siwidi alɛ,

“Bitansa Ɔka Dawid Obi nwu!

Yaa lekusɛkusɛsa otii wɔ nikɔwa ni

di Saate leyooto kamɛ!

Bitansa Yaa!”

10Di obe wɔ di Yesu labuo ni Yerusalem, kudu niamu di okpoo omuu. Ni baatii latɔɔkaalɛ alɛ, “Owe dile?”

11Ninfɛ di batii dikudi nwu nkpo labuɛ alɛ, “Yaa Ɔlaa Buɛtɛtɛ Yesu wɔ niekye ni Nasaret di Galilea kasɔ suoto dile!”

Yesu Latososa Asaa Basunsutɛ Aadiki Di Yaa Olekatakɔ Kamɛ.

12Yesu lakyɛ Yaa Olekatakɔ ni aalaatososa batii ba bamuu niatoosunsu ni asaa ku mba niatɔɔya ni asaa ninfa odiki leeyo nwu kamɛ nɛ. Aatutukusa koto babiɛtɛ siipunu aayu. Aatukusa mba ninsi boosunsu ni ablonuma kafɔɔ akpomii aayu. 13Ni aatɔkɔ ma alɛ, “Bɛɛkpana di Kɔkpana Klekle Kukũ kamɛ alɛ, ‘Baalɛɛ mi leyo alɛ ɔlaa ɔpɛ katakɔ.’ Kafɔɔ aye, bitɔɔyɔ biɛbla bayu kawofakɔ!”

14Ninfɛ di batii bawo lakpaa banumbiɛtɛ ku abafa baawako nwɔ di Yaa Olekatakɔ nwu nkpo nɛ. Ni di Yesu layɔɔsa ma sifiɛ nɛ. 15Obe wɔ di olebatatɛ banɔɔfo ku kufiofa batuotɛ lanya sɛkpɛ se niɛbla ni ɔkpɛ aabla nii ku mmle okle di babisɔ latɔɔfaa batoobuɛ di Yaa Olekatakɔ nwu kamɛ alɛ, “Bitansa Ɔka Dawid Obi nwu nkpo” yi, ɔblɔ lafiɛ ma osie kanya.

16Nkpo oso baakaalɛ Yesu alɛ, “Foonu ɔlaa wɔ baabisɔ nwu nkpo kobuɛ ni?”

Ni di Yesu ladiki kanya alɛ, “Lenu. N-ye kafɔɔ nlɛ bitɔɔka di Kɔkpana Klekle Kukũ kamɛ alɛ,

‘Fɛɛbla babisɔ ku babifɔɔle alɛ baayɔ katansa

ka niewo ni niimu manta fɔ.’ ”

17Di nni nkpo kamaa, Yesu ladiɛ olebatatɛ banɔɔfo nwu nkpo ku kufiofa batuotɛ aadie di okpoo, aasifi Betania, aalaate nfa.

Yesu Lakpaani Kole Woso Kunwii.

18Obe wɔ kaale ntɔɔsɛ nii, di Yesu ntɔɔpɛ ankple ansifi ni okpoo ku kuolesɛtũ yi, kɔka laklee nwɔ. 19Ni aanya kolewoso kunwii di osukulɔɔkɔ nɛ, ni aakyɛ kũ ɔlɔɔkɔ nɛ. Kafɔɔ atanya lɛwosobi kuninwii, dilenkee afata lete. Nkpo oso aatɔkɔ kowoso nwu nkpo alɛ, “Diɛyɔ di miɛ diesifi nii, flabasintika abi diidii.” Nfanwu, kolewoso nwu nkpo niayɔɔ.

20Obe wɔ di basaateketetɛ nwu nkpo lanya ni nle mmle, diabla ma ɔkpɛ osie kanya. Ni baakaalɛ alɛ, “Lɛ diɛbla fiɛ koolewoso ko mmle lefuo ɔyɔɔ nkpo wla?”

21Ninfɛ di Yesu ladiki kanya alɛ, “Nwaako kɔtɔkɔ ye nlɛ, nse biefũ bienu siitu lee kamɛ, minanta dibla ye ɔtanfũ onu, bibafuo lɛsaa le lɛbla ni kolewoso ko mmle ɔbla. Diele bia nle mmle lete, kafɔɔ, bibafuo kobokote ko mmle ɔtɔkɔ bilɛ, ‘Taka ninfũ falaabuo di lekpo kamɛ,’ dibawa kaanya. 22Lɛsaa lele biɛpɛ ɔlaa biɛkaalɛ Yaa di ofũ onu kamɛ, bibafũ.”

Baakaalɛ Yesu Nfũ Ɛɛwɛ Osuku Fiɛ Ɛɛbla Ni Asaa Nwu Nkpo Okle.

23Yesu lakple aakyɛ Yaa Olekatakɔ nwu nkpo. Di obe wɔ ootuo ni asaa, ni di Yaa olebatatɛ banɔɔfo ku okpoo banɔɔfo lawa nwɔ ɔkyɛ babakaalɛ nwɔ alɛ, “Ɔmɛnsuku fakpe fɔɔbla asaa ya mmle? Owe kafɔɔ niɛta fɔ osuku nwu nkpo?”

24Ninfɛ di Yesu ladiki kanya alɛ, “Bitɛɛ nkaalɛ ye ɔlaa onwii, nse biediki kanya yi, ni amii matɔkɔ ye osuku wɔ nkpe fiɛ kɔbla ni asaa ya mmle nwu nkpo. 25Ɔfɛ di Yohane lawɛ osuku fiɛ aatookpeesa batii Yaa ntu? Yaa nfũ kuakye ɛɛ, sɛɛ batii nfũ kuakye?”

Ninfɛ baamumufũ ɔlaa nwu nimanima baanyu alɛ, “Be nfɛ buabuɛ? Nse buobuɛ bulɛ Yaa nfũ kuokye yi, abakaalɛ wo alɛ, ‘Ni be oso bitafũ Yohane bianu mɔ?’ 26Kafɔɔ nse buobuɛ bulɛ ‘otii nfũ kuokye’ yi, buɔyɛkɛ bulɛ batii ba mmle mabla wo lɛsaa, diekye bamuu lɛma beefũ beenu alɛ Yohane yi, Yaa ɔlaa buɛtɛtɛ aale.”

27Nioso baatɔkɔ Yesu alɛ, “Buoye.”

Ninfɛ di Yesu latɔkɔ ma alɛ, “Nkpo okle kafɔɔ di amii, namatɔkɔ ye otii wɔ niɛtɛɛ ni osuku fiɛ kɔbla ni asaa ya mmle nɛ.

Yesu Latuo Asaa Aakyeko Basɔtɔbi Banyɔ Banwii Niale Ni Bawo Babilɛma Suoto.

28“Bibu ɔlaa wɔ mmle disi binyu. Osuɔtɔ onwii lawɛ babi suɔtɔbi banyɔ banwii. Ni aakyɛ aalaatɔkɔ ɔnɔɔfo le alɛ, ‘Obi, kyɛ falaabla ɔkpɛ koofe nii miɛ.’

29“Ninfɛ di obi nwu nkpo latɔkɔ ote alɛ, ‘Namafuo ɔkyɛ.’ Kafɔɔ sɛmaa, aakyɛlɛnsa disibu nɔɔ, ni aakyɛ nɛ.

30“Ninfɛ di ote nwu nkpo lakyɛ obi nyɔɔfa nfũ, aalaatɔkɔ nwɔ ɔlaa nwu nkpo okle kafɔɔ. Ni aatuna alɛ, ‘Teete lenu, makyɛ.’ Kafɔɔ atakyɛ.

31“Di babi ba mmle banyɔ kamɛ, owe niabla ote dibiesaa?”

Ninfɛ baatɔkɔ nwɔ alɛ, “Obi nɔɔfo le nwu nkpo.”

Ninfɛ di Yesu latɔkɔ ma alɛ, “Nwaako kɔtɔkɔ ye nlɛ, akpooto bafuntɛ ku basɔnɔkpeetɛ makaye Yaa sɛka kalekɔ nwu nkpo obuo. 32Diekye Yaa Ntu Kpeesatɛ Yohane lawa abatuo ye osuku biene wɔ suoto biafe nii, kafɔɔ bitafũ nwɔ bianu. Kafɔɔ akpooto bafuntɛ ku basɔnɔkpeetɛ lafũ nwɔ baanu. Kuntɛ bianya nle mmle, bíekyisa disibu lee bifũ nwɔ binu.”

Yesu Lapɛ Lɛkpa Aakyeko Kofe Nyuntɛ Kpile Onwii Suoto.

33Yesu lakple aatɔkɔ ma alɛ, “Bikple binu lɛkpa bamba. Fekpɛntɛ onwii lakpɛ awosobi ya man-yɔ mambla ni nta kofe, ni aakpee kɔba aakyisa kofe nwu nkpo nɛ. Aabla lɛba le manka ni awosobi nwu nkpo mandiki ni nta. Aatofo lɛba le niataka ni kle, baayila mantoonyu ni kofe nwu. Ninfɛ aayɔ kofe nwu nkpo aakpee di bakpɛntɛ banwii nnɛɛ kamɛ alɛ batoonyu, ni aadie aasifi osuku nɛ. 34Di obe wɔ di awosobi nwu nkpo ɔtɛsɛbee lawo nii, kofe saate nwu nkpo lakpee bakpɛmblatɛ nɔɔ alɛ bakyɛ kofe nwu banyuntɛ nfũ baalaafũ kalekɔ nɔɔ bawako nwɔ.

35“Kofe nwu nkpo banyuntɛ lamufũ bakpɛmblatɛ ba mmle, baapɛ onwii, baalo onwii, baasafɔ onwii kafɔɔ afuɔ. 36Nni sɛmaa kofe nwu nkpo saate lakple aakpee bakpɛmblatɛ bamba niapɔ baalenkee ni bakasale. Kafɔɔ kofe nwu nkpo banyuntɛ lakple baabla mankpo kafɔɔ laakpa nwu. 37Lɛyɛntɛle, aakpee ma nnwɔɔ omu nɔɔ obi, aabuɛ alɛ, ‘Lefũ lenu nlɛ babata obi nii nwu dibu.’

38“Kafɔɔ obe wɔ di kofe nwu nkpo banyuntɛ lanya ni obi nɔɔ nwu nkpo yi, ni baatɔkɔ bawo alɛ, ‘Nnya kofe saate obi wɔ nimale ni atesaa ninle nwɔ mmle nɛ. Biwa biɛta bulo nwɔ di atesaa nɔɔ nwu nkpo akple wo ale.’ 39Nioso baamufũ nwɔ baafuki baayu di kɔba nwu nkpo sɛmaa, ni baalo nwɔ nɛ.”

40Ninfɛ di Yesu lakaalɛ ma alɛ, “Ni, nse kofe nwu nkpo saate lɛwa mɔ, be bienyu bilɛ ababla kofe nwu nkpo banyuntɛ?”

41Ninfɛ baadiki nwɔ kanya alɛ, “Abalo kofe banyuntɛ kpile nwu nkpo an-yɔ kofe nwu ankpee di bayuntɛ bamba nnɛɛ kamɛ, mba nimatɔɔ ni kalekɔ nɔɔ di nta awosobi nwu nkpo ɔtɛsɛbee kamɛ di obe kanya.”

42Ni di Yesu lakaalɛ ma alɛ, “Biika di Kɔkpana Klekle Kukũ kamɛ binya? Beebuɛ alɛ,

‘Difuɔ le baayotofotɛ lesĩ alɛ diɛlɛ nii,

nni nintɔbakple difuɔ le niefĩ dilenke ni nɛ.

Saate niɛbla lɛsaa kplɛ le mmle.

Nioso diɛbla wo ɔkpɛ osie kanya!’ ”

43Ninfɛ di Yesu latɔkɔ ma alɛ, “Nkpo oso kɔtɔkɔ ye nlɛ, Yaa maklee sɛka kalekɔ nɔɔ nwu nkpo anfũ ye di nnɛɛ kamɛ, an-yɔ anta batii ba nimabla nwɔ ni dibiesaa. 44Otii lele niɛnɔɔ ɛɛpɛ diifuɔ le mmle suoto mafefee kukuii kukuii. Kafɔɔ nse difuɔ nwu nkpo lɛkpa diɛpɛ di otii owo suoto yi, abakuɔ muɛmuɛ.”

45Nioso di Olekatakɔ banɔɔfo ku Farisi batii lanu ni Yesu akpa ya mmle yi, baatofo alɛ mma alaka. 46Nkpo oso baamiɛ alɛ boomufũ nwɔ. Kafɔɔ baayɛkɛ batii dikudi nwu nkpo, diekye batii kpinwu lafũ Yesu fɛle Yaa ɔlaa buɛtɛtɛ.

Markert nå:

MATEO 21: snw

Marker

Del

Kopier