Matyu 7
7
Yesus ami bokoya-lomda: Kabi kap-tunum kaa kabi kanubap o, kal-bomdap dibii yang liipmin disa yo, kemsa kaami sang kaata ko
Luk 6:37-38,41-42, Rom 14:1-12, 1Kor 5:12–6:6, Jems 4:11-12
1Asuk Yesus ayo bokola: Kabi God ami abiin kaata, kuluu-lomdap ami okok keba uta nasiik kuluulila okok kemon i, kemin daa yo. Kabi kap-tunum kusal kii itafii-bamdap boko-lom: Ibi kukup mafak kebip te! kemin disa, kambolap namti, God akal win bakap-tam-bamda bokop-ta-lom: Kabi kukup mafak nuubap o, tokokoma disa. 2Aa, kabi kaptum kusal kii ibi kanubip te! kal-bomdap win bakayap namti, aa ti God akal kapni kanubap kaakal, tam-kayaku-lom ale, kapni kaptum kusal imi dok kanolin kukup kaata, kukaayim-bam ilolap namti, God akal ti kanolin kukup kulaata ti, kapkal kukup-tokoma. Kemin, kaptum kusal kii weng mafak kaa kukaayin dinim kayi! 3Kaptum kusal imi kukup mafak katip katip kuuli, sung ilol tal tiin uneba tap ale, kapni kukup mafak sakbaalim dukum kanubap kaata as daang tiin fuk-duup-ta-yaaba tap. La, kapni kap-tunum ami bokola-lomdap: Tiin sung tal aba yak unan i! ken-umbap. Katale, aket fukun-ilom as daang tiin faka-tanip-na kulaa laap bombu kemin, am ma daanula disa ke-lokomu. Kemin, aket uluum kep-nokomu disa yo, kem-laabap. Kemin, kabi kaltapni kap-tunum kusal imi kukup mafak katip katip kulaa utamsap. Katale, mep kaltapni kukup mafak awak sakbaalkan dukum kanubap kabak-ali kabi utabap e? disa? 4Kanimin o, kalalapla kap-tunum kaa bokola-lomdap: Nak-tunum kapyo, dong dokop-ta-lomdi tiin sung ayo kukan-tiip-ton o, kalbap i? Daa! As daang ta tiin faka-tanip-ta tiin bokol ke-salap kalaali, kabi dok kano-somdawa dong dokolokomap i? 5Kabi kukup alep fukumin tunum kapya! Kamosinim as daang uyo kaltapni tiin diim bombe kaali, kukan-tii-somdawa kawu, yak kap-tunum ami tiin sung uyo talalu utam-ilomdap kukan-telamap ko.
6Kulaata weng kusnum ma bokop-ton o, kala-somdila ko. Kemin, kabi dok nolin unang tunum ita God ami weng kaa weng sanamup disa yo, kemip namti, kabi kiili God ami weng kaali, maso bakayin disa yo. Kemin, kapkal utaman! Man ma miyaan ami samsamala namti, miyaan ayo fal-siki-taba man kaayo, aalokoma. Ultap kemin, dok-nolin tunum ata God ami weng kaa unang tunum daal-dap-tiiyimba imi kukaayin-kup kema namti, kiili aket atul dap-tiiyule, tam taba dap-mafak-daalokomip. Kemin ale, kanumin siim o, kanola kap kayuum kiit ayo kulaalap daak tawaal diim abam-nokoma ayo kang iyo tal yaan biil tap-tap-kelip maaklo ke-lokoma. Kemin, kanolin o. Tunum unang iyo kanta God ami weng kaa, weng sanamup disa yo, kalbip kiili, suunkup kukaayokomap kaali, ili God ami win ayo ku-mafak-daalokomip o, kala Yesus ayo almi kalaan tunum imi kanum bakayila ko.
Aatumen God ami dik-dakalin sang kaata ko
Luk 11:9-13, Mat 18:19, 21:22, Mak 11:24, Jon 14:13-14, 15:16
7Kuno asuk Yesus ayo weng kusnum ma boko-lomda: Kabi dok kanolin mafek mafek ma dululap namti, suunkup God ami dik-dakaan-balapla, ayo kup-tokoma ko. Mafek mafek ma utamon kalalap fenbap namti, God ata dong dokop-tala uta-mokomap. Kuno kabi, tunum ami din ap-tunum ami am saal suunkup dok-dok-ke-balala, aptum ayo am saal baskaanba tap ke, ti suunkup God ayo dik-dakaalin-kup kemapla, kaata God akal, kapyo dong dokop-tokoma. Kemin, suunkup God ayo dik-dakaalin-kup ke-balawa yo. 8Kawanta dik-dakamin ma dik-daalokoma namti, mafek mafek uyo kuluulokoma. Ale, kawanta mafek mafek ma uyo kuluulon o, kala din fenokoma namti, ata-mokoma. Aa, kawanta din saal dok-dok-ke-mokoma namti, saal uyo busolokoma no. 9Awak-aalap kipyo, kapni man ayo ma dik-daap-ta-lomda: Ima ma kup-nap inamnon o, tokokoma kaa, yak tuum kaata kolokomap o? Disa ti! Ima kaata kolap inam-nokoma te! 10Kemin ultap o. Asuk dik-daap-ta-lomda: Aniing ma kup-nalap inamnon o, kala kaali, kuno kela yak inap mafak kaata kolap inam-nokoma nema? Disa ti! Aniing kaata-kup kolap inam-nokoma. 11Ti kapkal utaman! Kabi ban wakamin tunum kemin, mafek mafek mafak kaayo, kapni man imi ma kuyilalap. Kata, kapni man ayo mafek mafek tangbal ayo man kukaayin-bam ilolap. La, Kaalap abiil tikiin kayaak God akal fan ban kemin disa tambal-kup tabasa. Kemin, almi man ipkal dik-daalip kaali, akal mafek mafek mafak kaali ma kuyokoma disa. Tifan mafek mafek tambal kaata-kup kukaayim-bam iloma no.
12Kuno ti kapni aket fukunin ayo, nami nak-tunum kusal ita kukup tambal kukaap-nam-biliwa, yaap tambal-kup ilon o, kemap namti, kamosinim kawu kapsiik kanolin kukup tangbal kaata, kukaayim-balawa yo, kala-somla kemin; weng kalawaali, asiin sawaayak Moses aso le, weng ku-fatap-dakamin tunum iso, imi weng God ami Sukon Tem dola kutii-silip kaami miit namti kalabu. Kemin, kaata kanu-balawa yo, kala Yesus ayo almi kalaan tunum imi bakayinsa ko.
Yesus ayo liip alep umi sang bakayinsa kaata ko
Luk 13:24
13-14Yesus ayo weng kusnum ma bokola: Suunkup as kiinin abip ami amitom liip kaali, sakbaalim dukum ale, liip kaa unsa kabang-ali fiitmin dinim o, kalaliwa, tunum unang deng yaapkan iyo liip kabang-ali tambal kawo! kalale, de kulii kabang balip unem-laabip. Katale, ili God kaa kambola biyang samaan kabang ban-ilomdiwa, maaklo ke-lokomip. Lale, God ami abip liip kaptam unemin amitom kaatale, atin liip katip kaptam bansa uyo ti fiitmin liip unsa kalaliwa, tunum unang yaapkan iyo kabang-ali fiitmin liip o, kalaliwa, kulaka-biliwa, unang tunum iip maakup maakup kiita-kup kabang liip unem-yaabip. Kemin, God ami suunkup ilin abip uyo kiita-kup ilokomip o, kala ko.
Kasen-fakamin tunum imi sang kaata ko
Luk 6:43-44, Jon 15:6, Ap 20:29, Jems 3:11-12, 2Pit 2:1-11
15Yesus ayo bokola ko: Tunum malo ma tal baka-bamdip: Nuli God ami weng ku-fatap-dakamin tunum o, ken-umbip. Lale, ili fan kasen-fakan-umbip. La, saak miyaan apliip tal sipsip ipnaal ayo kuluu kulaak tikila namti, kabi kaali sipsip atul dinim faluum ata no, kalokomap. Lale, kaa tifan siip miyaan atulim namti kulube. Kemin, telokoma te! Tunum kasen-fakamin tunum ili iltap, ita taba-lom tam-mafak daalokomip kanolin o. Kemin, utafii-bamdiwa yi! 16Nuli yang ulup as tiyup diim kaa titam-daalupla, yet lap abuubu kalalup duk-duulokomup ema? Aa, yang ulup, misiil sok diim damaang abuuba kalalup duk-duulokomup o? Disa, nuli as kaa ma tabamna atafiimup tal aba tam lap ayo abuulu utam talaalupya, Lap tangbal abuubu ne? lap mafak abuubu ne? kebup tap, kasen-fakamin tunum imi kukup ayo dotu utafii-mokomap. Ayo ilmi kukup mafak uta kukup-tuya imi aket fukunin ayo mafak kayi! tukuya uta-mokomap ko. 17Kanum bokosu kemin, ti kapkal as lap abuumin umi kukup uyo utam tam! As lap tambal abuumin uyo ukol ulmi lap tambal kaata-kup abuulokomu. Ale, as lap mafak abuumin ukol kuno ti as lap mafak kaata-kup abuulokomu kalin o. 18Kemin, as tambal uyo mulo kawu, asuk as lap mafak ayo abuulokomu disa; as mafak abuumin ukol mulo kaa asuk as lap tambal kaa abuulokomu dinim; ti tituun ulmi abuu-bulu abuu-bulu ke-mokomu no. 19As uyo ma lap tambal abuumin disa kemu namti, as kayaakim ayo tam aba-lom as uyo an-duula kuyak daala, as kiin-abam-nokoma. Ultap kemin, ilom am ma daanokomu kaali, kasen-fakamin tunum kiili, God alalta fokola yang as kiinin abip unokomip. 20Kemin kabi mep profet ilmi kukup mafak kabak-ata utamdawa, kiili kasen-fakamin tunum namti kulu-bom-bilip o, kalokomap kayi! kala Yesus ayo almi daang bakaalin tunum imi kanum bokoyila ko.
Tunum God ami weng talalu weng san-kaamin dinim tunum imi sang kaata ko
Luk 13:25-27, Luk 6:43-46, 2Tim 2:19, Jems 1:22,25, Rev 20:11-15
21Kulaa, Yesus ayo titil tibin weng ma bokoyila ko: Tunum unang yaapkan yam iyo bakap-nam-bamdip: Kabi numi kamokim kemin, Nuli kapni ok kaata-kup kutal-fukup-tokomup o, kem-yaabip. Lale, disa; ilmi weng baka-bamdip: Nami Aatumen abiil tikiin kayaak ami weng uyo weng san-kaamin disa, kem-yaabip. Kemin, kiili imbii tam God almi abip daalokoma disale, atin ti disa. Dok nolin tunum kipta God ami weng uyo kutal-fukusip namti, kiita-kup im-tam God almi abip kaa daalokoma no. 22Am mafiing diim tiltam tabamnula, unang tunum lii-bam afet-mokomi diim kaali, unang tunum yaapkan ili tal nami tiin diim mepso kuluba bokop-na-lomdip: Kamokim kapyo, Nuli kapni win diim God ami weng ayo kukaayinsup. Kapni win diim sinik mafak iyo fotabamnup yak bane-bam ale, kukup kusnum akal alik akal alik iyo kuyim-bam kem-yaabup te! Kulaa, kapkal utamsap kemin, nuli kapni tunum unang te! ke-mokomip. Katale, 23nali bokoya-lomdi: Ibi God ami weng uyo kutal-fuku-tabuulalip dinim ke-lom kukup mafak kaata-kup kutal-fukusip. Kemin, ibi nami unang tunum disale, ibi nali ma itamsi disa. Kemin, kuno kep-na unin aa, yokokomi no, kala Yesus ayo almi daang bakaalin tunum imi kanum bokoya ko.
Am dinamin kukup alep imi sang Yesus faldak kulu tii bokosa kaata ko
Luk 6:47-49, Mak 1:22
24Yesus ayo asuk faldak-tiimin sang ma bokola ko: Dok nolin tunum ata nami weng kala bakabi kaayo, weng san-kaa-bamda nami kukup tangbal uyo kutal-fukula namti, ali kanolin weng kala bokolokomi umi kukup tabuulin tunum alaltap namti kulube. Am tangbal dinamin tunum ma ayo din am kun bobi kulii-tal tii kelale, afun tem ayo kala-bala umbilaak unu kela, am kun ayo kumola daak daak keba, kambola am ayo de kulaa kela, tam am un-ilomdip alimal sin-yaa-biliwa, 25kulaata om so, ati so, tiltam taba-lom ok fakan tiltoop ilomda am ayo balata kulii-unokin. Yale, am ayo tangbal ma kela dese kemin, disa tiltoop dik-yak saanbi kewa ko. 26Ale, dok nolin tunum ata nami weng kala bakabi kalaayo, disa tinang-kup umu-bomda nami kukup tangbal ayo kutal-fukulin dinim kema namti, kalanolin sang kala bokoyokomi umi kukup tabuulin tunum alaltap namti kulube. Tunum ayo aket tangbal ma fukunin disa ke-lomda daal-kup tibin tunum ma ayo taang-kala titil foko am tangbal kaa delokoma disa. Am kun tem ayo kala-somdala disa ti. Disa kulu kuyak tip kulu tii delaya, 27kulaata om so, ati so, tiltam taba-lom ok namti fakan-tiltoop ilomdu am uyo wela daak abamnuya, ok ta balata kuliila unsa no, kala Yesus ayo weng do kala bokoya ko.
28Yesus ami weng uyo bakayinsi alik dinim nu, kelale kulu, tunum unang yaapkan weng, weng san-kaabip iyo tiin alik tambanu aket fukun-bam, 29ap-tunum kusal bokola una-tala-ke-bamdip bokolip ko: Kwin! kaami weng kukuyin kukup kaali ti akal almi kusnum ti! God ami aket fukunin uta utam kaal ke-somdaya, numi dotu kukuyimba. Lale, numi lo utamsip tunum kalawiita nuli kanola dotu kukuyilalip dinim o, kemip ko.
Markert nå:
Matyu 7: TIF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 1999, Wycliffe Bible Translators, Inc. All rights reserved.
