YAPHANG 4
4
Kain bai Abel
1Tabuk Adam Ebi bai thu khe-chá khe, Ebi sakderiya wngwi Kainno#4.1. Kain: O mung Hibru kógo manma hwnmano kosol. man kha, Ebi hai hwnwi sa kha, “Subraiyungni jarwi ang sajla khoroksa man kha.” 2Bo bono Kain hwnwi mung phar kha. Tei haino hai bo Kainni takhuk Abelno man kha. Abel khe mera rinai tei Kain khe hukba khlaiwi chánai wng kha. 3Sal kisa lái khe Kain bini hapharni bwthái-bumukrokno Subraiyungni thani yapharna tubu kha. 4#Hib 11.4.Tei Abel khe merarokni bisingo swkang bwsa bá gramano tei bini buphamrokno Subraiyungni thani tubu kha. Subraiyung Abel tei bini yapharmano bwkha phurjak kha. 5Tamo khe Kain yapharmano khe bwkha phurjak li ya, hakhe Kain belai khe jolijak kha tei mwkhang som kha. 6Subraiyung Kainno hai hwnwi hwn kha, “Nwng tamni aswk jolijak. Tamo nini mwkhang som lang? 7Nwng samung kaham tang khe tamo yachakjak ya tong kha mun? Nwng samung kaham khlai ya wngmani bagwi sumsok nini duglamo habwi tong phai kha; abo nono se béngna nai-o, tamo khe nwng bono ma mechennai.”
8 #
Mat 23.35; Luk 11.51; 1Jn 3.12. Kain bini takhuk Abelno hai hwnwi sa kha, “Phai di hukba bwkhak tháng lai anw.” Hakhe hukba-o sógwi khe Kain bini takhuk Abelni bwkhak joliui bachasa kha tei buthar kha.
9Subraiyung Kainno hai hwnwi sẃng kha, “Nini takhuk Abel buko, biyang tháng kha?”
Bo hai hwnwi sa kha, “Ang saui man ya. Ang ba tamo ani takhukno mwrwgwi da tong?”
10 #
Hib 12.24. Hakhe Subraiyung hai hwnwi sa kha, “Nwng tamo khlai kha de? Nini takhukni thẃi hani ano kabwi saui tong kha. 11Nwng tabuk ha-o swraimung nang kha, nwng nwphayungno buthar phuru bono yachakna bagwi ha khua tẃi khe bo nini takhukni thẃino nungwi pái kha. 12Nwng o ha-o hukba khlai phano tei mungsa bwthái thái glak kha, nwng nok-huk kwrwi wngwi ha saka-o kitingwi ma tongnai.”
13Hakhe Kain Subraiyungno hai hwnwi sa kha, “Ani sátokjakmung khe ang soiwi manmani bára wng kha. 14Nai di nwng ano o hani tei nini bwskangni hakchal khe rwkhlaiwi rohor kha, ang nok kwrwi wngwi ha gwnangwi kitingwi ma tong ja sinai tei ano nuknai borok ano butharnai.”
15Hakhe Subraiyung bono hai hwnwi sa kha, “Ahai le wng glak! Khoroksa swk Kainno buthar khe bo abo hai khe tei uáisni jora yagul sujaknai.” Hakhe bono nuknai khoroksabo ta buthar si thung hwnwi Subraiyung Kainni sago mari bu-ui rw kha. 16Hakhe Kain Subraiyungni bwskangni nongkhorwi tháng kha tei Edenni salkabai, Nod hwnwi kaisa ha-o tongwi kha.
Kainni bosong
17Kain bihik bai thu kha-chá kha, hakhe Enokno man kha tei bo kamiyung kaisa snam kha tei a kamiyungni mung bwsla Enokni mungwi phar kha. 18Enokni nogo Irad achai kha tei Irad wng kha Mehujaelni bupha tei Mehujael wng kha Methusaelni bupha, Methusael wng kha Lamekni bupha. 19Tei Lamek hik khoroknwi na kha, khoroksani mung khe Ada tei khoroksani mung khe Jilla. 20Ada Jobalno man kha; bo wng kha ríni nogo tongnai tei mal-mata rinairokni bupha. 21Bini takhukni mung khe Jubal, bo wng kha bebak chongpreng tei sumui tamnairokni bupha. 22Jilla, Tubal-Kainno man kha; bo pitol bai sorni manwi taknai#4.22. pitol bai sorni manwi taknai: Kaisa kwcham kók sema-o khe bebak sor tei pitolrokni manwi taknairokni bosong. Tubal-Kainni bukhukni mung khe Nama.
23Lamek bihiksongno hai hwnwi sa kha:
“Ada bai Jilla norok khna di;
ano swprakma bai ang sikla khoroksano buthar kha.
24 #
Mat 18.22. Kainno butharma yagul kusungsni bai sujak khe,
Lamekno buthar khe kusungsni-chisni butharwi yagul sujaknai.”
Set bai Enos
25Adam bihik bai thu khe-chá khe bo sajla khoroksa man kha. Bono Set#4.25: Set: O mung Hibru kók bai khe rw kha hwnmano kosol. hwnwi mung phar kha. Tamo khe bo hai hwnwi sa kha, “Kaitor ani bagwi Abelni sak slái-o tei khoroksa bwsa rw phi kha, tamni hwn ba Kain bono butharwi pái kha.” 26Setbo sajla khoroksa man kha tei bo Enos hwnwi bini mung phar kha. Aphuruni simi’-no borokrok Subraiyungni mungno ringnani cheng lai-o.
Markert nå:
YAPHANG 4: KOKBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
