Genesis 6
6
Iqmoeq 6
Miltsaq tsaol-aq yaq-i mail haqeiv nail phaq nl nail ganl
1Aq-u phao, miltsaq bhai tsaol-aq yaq juq mao dai mao lal-a nail ngaol. Aqyu juq nail galduq, yaqmiq juq mao dai bhao-a nail ngaol.
2Miqyail nail yaqyov juq neq, tsaol-aq yaq nail yaqmiq juq meeq nail bhai ya moel-u phao, aqyu juq-i mail khal hevq movq lal thaq nail gaq hevq-a nail ngaol.
3Al heel ngel-i mail, Heeqphaq Miqyail ge nail: "Ngaq nail aqhaqlal neq, khaqmao kev dai, tsaol-aq yaq nail lavqkhoel bhai, maq ya bhi jail lai-ail. Aqyu juq neq, aqsivq haqjoil nail tsaol-aq pevq nail ngaol. Aqyu juq-i mail ya doevq nail aqkovq gail, 120 kovq pevq dei-eiq" dai, ge bhiq-a nail ngaol.
4Aq-u phao dai khi, haoqnao bha kev dai, miltsaq kovtavq bhai tsaol-aq nail yaqmiq juq dai khi mail Miqyail nail yaqyov juq nee mail doevq lee-a nail, Neiphilo dai khul nail juq mao dai jaol nail ngaol. Aqyu juq neq, khilgaoq lavqgaoq gaoq ma eeq khi kav al kav khe aqmil dov nail aqnia juq pevq nail ngaol.
5Milkhaoq doi dai tsaol-aq yaq juq al jaiq-ail doil khi, neenoeq neema phao gail al jaiq-ail haqeiv nail phaq khaqmao iqsanl aol nail bhai, Heeqphaq Miqyail ya moel-u phao,
6tsaol-aq yaq bhai teivq khi miltsaq kovtavq bhai bhi jaol-a nail neq, aivq bhai noeq haq lal bhiq khi neema al jaiq-ail nal lal bhiq-a nail ngaol.
7Al heel ngel-i mail, Heeqphaq Miqyail ge nail: "Ngaq-i mail teivq-a nail tsaol-aq yaq juq nee mail teevq gaq khe-ai, jaiqyaq juq iqsanl, keivq-avq juq iqsanl, soiq soiq-ail tsao nail jaiqyaq juq iqsanl bhai, ngal miltsaq kovtavq nee mail lav peivq gil nail ngaol. Aqyu juq bhai teivq-a nail ngel-i mail, ngaq nail neema nal-il" dai, ge nail ngaol.
8Thail hai ngaol-aoq, Nol-avq neq, Heeqphaq Miqyail nail sivtavq bhai neekhaol sil nail teevq gaq pevq nail ngaol.
Nol-avq nail ganl
9Nol-avq dai khi aivq nail phaqyaq ma yaq nail ganl neq, niail hai ngaol:
Nol-avq neq, tsaq nail daol nail teevq gaq pevq nail ngaol. Aqyanq al yanq miltsaq kovtavq bhai, teevq gaq teevq-eel oeqbal thaq duq maq jiav nail gaq pevq nail ngaol. Aivq neq, Miqyail nail sivtavq bhai ail lal khi aqdoevq doevq nail gaq pevq nail ngaol.
10Nol-avq neq, Seiqmav, Haqmav dai khi Yaqphai dai khul nail yaqyov hail gaq jaol nail ngaol.
11Miltsaq yaq juq neq, Miqyail nail sivtavq bhai luq-ail seil-ail thail thaiq nail ngaol. Aqyu juq teevq gaq nee teevq gaq, haqeiv nail phaq nl nail al milkhaoq doi dai, doi ail-a nail ngaol.
12Miqyail miltsaq kovtavq bhai hel daiq-u phao, kha dai haqeiv nail bhai ya moel-a nail ngaol. Khul khi mail dai ngal-aq, tsaol-aq yaq juq iqsanl oeqbal mail bhee nail ngaol.
13Aq-u phao, Miqyail Nol-avq bhai ge bhiq-a nail: "Ngal tsaol-aq yaq iqsanl bhai lav cov nail galduq noeq ceiv-aoq nail ngaol. Miltsaq niil neq, aqyu juq nail haqeiv nail phaq-i mail bhee nail ngel-i mail, aqyu juq khi miltsaq niil iqsanl bhai, ngal lav peivq gil nail ngaol.
14Al heel ngel-i mail, naol, haoqlil nail aqbhaol-i mail laovq laovq ma teevq laovq cov yaoq. Lavqkhoel phao aqkhaon lav sav khi lavqniil lavqkhoel iqsanl mail teivqnav-i mail leivq tsoiq gil yaoq.
15Laovq al laovq neq, heelma phao 300 cav, eeq nail phao 50 cav dai khi, daqmoe phao 30 cav ya bhi bhee nail ngaol.
16Laovq nail kovtavq bhai khaolpoiv lav sav khi laovq nail teevq jaoq khaolpoiv nee mail teevq cav ya bhi khaiq nail ngaol. Hail tiv dai, ya lav sav khi jail-nq phao neq, lolgov ya lav sav gai nail ngaol.
17Ngal neq, aqdoevq doevq nail phaq iqsanl mail lav heivq gil nail galduq, miltsaq kovtavq bhai ulcuvq-i mail bhi deq pheeq gil nail ngaol. Miltsaq kovtavq khe khal jaol khal jiav nail iqsanl mail, ya sil gil nail ngaol.
18Thail hai ngaol-aoq, ngal naoq-ai nee mail daoqma saljial jaq nail ngaol. Naoq-ai nee mail teevq gaq khe-ai, naoq nail khaqma, naoq nail yaqyov juq dai khi mail, aqyu juq nail khaqma bhai laovq nail lavqkhoel bha bhi aol gil lai yaoq.
19Ulcuvq deq pheeq nail gaiqlaq bhai, aqdoevq bhi doevq nail galduq, aqdoevq khal doevq nail jaiqyaq juq iqsanl mail, teevq phaq nail aqphoil aqma teevq gu dai, laovq lavqkhoel bha, naoq-ai nee khul bhoel gil laivq yaoq.
20Keivq-avq juq teevq phaq nail teevq gu, jaiqyaq juq teevq phaq nail teevq gu dai khi, miltsaq kovtavq khe soiq soiq-ail tsao nail jaiqyaq juq teevq phaq nail teevq gu neq, aqdoevq ya doevq nail galduq, naol jaol nail bha lal gil nail ngaol.
21Naoq nail phaqyaq ma yaq nail galduq dai khi, jaiqyaq juq nail galduq, yaoq phaq yaoq-aol nee lovq lai dai jaq jaq daol daol oil bhoel gai yaoq" dai, ge bhiq-a nail ngaol.
22Nol-avq neq, Miqyail-i mail daoq bivq-a nail khe-ai nl-a nail ngaol.
Markert nå:
Genesis 6: aeu
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2016, Wycliffe Bible Translators, Inc. All rights reserved.
