Matie 14

Zhan Batisì wú vra

(Nyɛ́n nyan Markɛ̀n 6:14-29; mán Lükɛ̀n 9:7-9 wrú lɔ mɛ̀n)

1Hɩ vra lɔ, Herɔdɛ̀n léyi dú Galile govràn nɔn, yá yɛ dɔ́ Zhezü ankà. 2Herɔdɛ̀n kɛ dɔ́ n'ɛci-bɩtan-bɔ̀ le: “Ɔwrɔn lɔ Zhan Batisì, nɛ̀n dú owúbɔ̀ mɛ̀n nɛ̀n vá ɔkɔrɛ-bɔ̀ mɛ̀n! Nyàn eci le kruhú nɛ̀n ẅɛ̀n ɛkɔrɛ̀srɔn nɛ hán anvɛmɛ̀n-frɛ́n-ci nɔn.”

3Annànwɔrɛ mɛ̀n lɔ, Herɔdɛ̀n de wá tán yɛ ẅɛn Zhan, nɛ̀n hán yɔ yɛ kora Zhan ye di anwɔn-mɛ̀n-wá-wɔn-mɛ̀n. Herodiadɛ̀n léyi dú nɛ́n muan-ẅì Filipɛ̀n hi nɔn kruhú de Herɔdɛ̀n hán eci ndɔ lɔ nɔn. 4Ɔmuhi Zhan kɛ dɔ́ Herɔdɛ̀n le: “Ke sɩ̀ zrɔ tán le è bɩ́ Herodiadɛ̀n è yrì!” 5Herɔdɛ̀n ke ji Zhan ewri-yri, tɛ́n ne sú Zhüifɛ̀n-bɔ̀ fɛcüè, ɔmuhi yɔ krɛ́ Zhan Ɔwɔ-mùanwú-ankà-dɔ́-wrɔn tɔ̀n nɔn. 6Ɛnbì tɔ̀n, Herɔdɛ̀n kɛ koran n'ebî-vra-koran, Herodiadɛ̀n nyɔnwrɔn-ẅì brí ɛmràn anwrɔn hɔ̀n léyi ye bi ɔkoran mɛ̀n nɔn zìwú. N'ɛmràn-brì lɔ zeze zrɔ Herɔdɛ̀n 7kɩ wá ɔmùan le nɛ lɛ tán ɛnnyɔnwrɔn-ẅì lɔ eci lɔ fɛn léyi yi kɛ lɛ sán nɔn. 8N'ɔmùan ankà-dɔ̀ lɔ wú, Herodiadɛ̀n nyɔnwrɔn-ẅì kɛ dɔ́ Herɔdɛ̀n le: “Ɛ̀ tán mɛ̀n ɛnu lɔ Zhan Batisì kru kpokpo trɛtrɛ mɛ̀n!” 9Ɛnnɛ̀ncüì lɔ dú obòto mɛ̀n; tɛ́n ɔmuhi nɛ̀n wá ɔmùan anwrɔn zìwú nɔn, nɛ̀n wá tán yɛ và sɩ́ ɛnnyɔnwrɔn-ẅì lɔ eci léyi nɛ̀n wá ɔmùan nɔn. 10Herɔdɛ̀n wá ɔwrɔn tɔ̀n ɔkɔ̀hɔ̀n anwɔn-mɛ̀n-wá-wɔn-mɛ̀n ke wí Zhan ɛnkru. 11Ye sɩ́ Zhan Batisì kru lɔ kpokpo trɛtrɛ mɛ̀n kɩ yɛ tán sùgbán nyɔnwrɔn-ẅì lɔ hɔ́n sɩ́ nɛ́n muan. 12Zhan sɛ̀nkɛn-bɔ̀ vá bɩ́ Zhan dùwrú lɔ hɔ́n wá ezhe-nànmàn mɛ̀n; Zɛtɛn yɔ hɔ̀n yɔ dɔ́ Zhezü ankà léyi wɔɛ̀n nɔn.

Zhezü tán anwrɔn tɛ̀bru-kru-ɛnrì ɛci-zî

(Nyɛ́n nyan Markɛ̀n 6:30-44; Lükɛ̀n 9:10-17; mán Zhan 6:1-14 wrú lɔ mɛ̀n)

13Ɛnvra léyi Zhezü yá Zhan Batisì ankà lɔ nɔn, nɛ̀n cɔhɔ́ ɛyri léyi nɛ̀n dù nɔn, nɛ̀n bru anhàka tɔ̀n mɛ̀n, ô nɛ́n zri nɛ̀n hɔ́n ɛyri tramɛ̀n. Tɛ́n fɛcüè hɔ̀n ncɔ́ nyrì; yɔ dú anmàn yɔ srɔ kɩ yɔ nán esù ɛnshi mùan kɛ́n Zhezü ɛsɛ̀n. 14Ɛnvra léyi Zhezü dú anhàka mɛ̀n kakɛ nɔn, nɛ̀n kán fɛcüè vri tɔ̀n; ɛnhyɔ̀bɔ̀ yɩ́ n'ɛnbɔrɛ lɔ mɛ̀n anwrɔn ndɔ hɔ̀n lɔ kruhú kɩ nɛ̀n bukru nɛ kɔrɛ y'ɛnlɔẅiɛ-bɔ̀. 15Ɛnvra léyi ɔwɔɛmɛ̀n ncɔ́ nɔn, Zhezü sɛ̀nkɛn-bɔ̀ sɔnba nɛ̀n ɛtɛ̀sɛ̀n kɩ kɛ dɔ̀ le: “Ɛnvra bru ɛmɛ̀n, kɩ ɛnu lɔ dú ɛyri tramɛ̀n. Ɛ̀ hán fɛcüè lɔ kɛ̀ hɔ́n anmàn, ô kɛ̀ wɔ́ ɛci-zî-ci.” 16Zhezü mrɛ́n yɔ ɔmùan le: “Kè sɩ̀ zrɔ tán le ye teze yɔ, yɔ hɔ̀n; nyɛ́n dùku nyɛ́n tán yɔ ɛci yɔ zî!” 17Tɛ́n yɔ dɔ́ nɛ̀n le: “Abùtùkumɛ́n ɛnrì mán ɛcàn anhyrɛ̀ kɩ bɔ̀ ẅɛn ɛnu lɔ.” 18Zhezü kɛ dɔ́ yɔ le: “Nyɛ́n bɩ́ abùtùkumɛ́n ɛnrì mán ɛcàn anhyrɛ̀ lɔ nyɛ́n và sɩ́ mɛ̀n.” 19Zɛtɛn, Zhezü wá tán fɛcüè lɔ kɛ yɛ́ ɛfi wú; kɩ nɛ̀n bɩ́ abùtùkumɛ́n ɛnrì mán ɛcàn anhyrɛ̀ lɔ, nɛ̀n sɩ́ anvɛ̀ ɛwú kɩ nɛ̀n tán Ɔwɔ ɔkùɛn. Nɛ̀n voyan abùtùkumɛ́n lɔ kɩ nɛ̀n tán n'ɛsɛ̀nkɛn-bɔ̀ dɛ́ fɛcüè lɔ. 20Anwrɔn lɔ fɛn zî ɛci kɩ ɛmɛ̀ntɛ̀ yɩ́ yɔ. Zhezü sɛ̀nkɛn-bɔ̀ bi ɛci léyi wɔrɔ nɔn ankɛ́ ɛvà-anhyrɛ̀. 21Anwrɔn hɔ̀n léyi zî ɛci nɔn, yɔ dú anwrɔn tɛ̀bru-kru-ɛnrì, ye sɩ̀ krɛ̀ wúyɔ̀ mán ɛẅì hɔ̀n.

Zhezü kɛ nán esù nɛnbà cɛ wú

(Nyɛ́n nyan Markɛ̀n 6:45-52; mán Zhan 6:15-21 wrú lɔ mɛ̀n)

22Ɛnvra zri léyi Zhezü tán anwrɔn ɛci zî trɔ nɔn, nɛ̀n hán n'ɛsɛ̀nkɛn-bɔ̀ ku anhàka mɛ̀n ô kɛ̀ vɔ́n ɛnshi nɛnbà cɛ wú kɛ̀ hɔ̀n kɛ̀ vrá nɛ̀n ɛnshi mɛẅi, nɛ tɛn, nɛ lɛ hán fɛcüè lɔ ke vru ɛmɛẅi kɛ̀ hɔ́n y'edúyri. 23Ɛnvra léyi nɛ̀n hán fɛcüè lɔ hɔ̀n nɔn, Zhezü hɔ́n ɛnkpò cɛ tɔ̀n wú kɛ sɛ́n Ɔwɔ. Ɛnvra léyi ɛnnyran gɔ̀n nɔn, Zhezü zri dú ɛnkpò cɛ lɔ wú; 24Anhàka lɔ dú esù she enhi tɛ̀sɛ̀n, ecüe-afù ke gorɛ anhàka lɔ, ɔmuhi ɛndɔ̀nwrɔ̀n crɛ ezì kɛ́n nɛ̀n nɔn. 25Ɛnnyran gɔ̀n bru ɛmɛ̀n, kɩ Zhezü kɛ nán esù ɛnshi wú wrɔ́ n'ɛsɛ̀nkɛn-bɔ̀ lɔ hɔ̀n. 26Tɛ́n ɛnvra léyi yɔ kán nɛ̀n, nɛ nán esù ɛnshi wú nɔn, yɔ dú gbɔ̀gbɔ̀mɛ̀n kɩ yɔ dɔ̀ le: “Ezhe tɔ̀n de kɛ và nɔn!” Kɩ yɔ di ɛnjansú bobo.

27Tɛ́n ɛnvra zri lɔ, Zhezü dɔ́ yɔ ankà; nɛ dɔ̀ le: “Nyɛ́n bɩ́ edùyì, mɛ̀n Zhezü, ɛnjansù ke bɩ́ ẅɛn nyɛ̀n!” 28Zɛtɛn Piɛrɛ̀n bɩ́ ankà-dɔ̀ kɩ kɛ dɔ́ nɛ̀n le: “Ɛẅɛnwrɔn, ke dú kɛ vɛ́n dùku hô, ɛ̀ wá tán mɛ̀n, mɛ̀n nán esù ɛnshi wú mɛ̀n và cɔ́ mɛ́n.” 29Zhezü mrɛ́n ɔmùan le: “Và!”

Piɛrɛ̀n dú anhàka mɛ̀n kakɛ kɩ bukru kɛ nán esù ɛnshi wú wrɔ́ Zhezü hɔ̀n. 30Tɛ́n ɛnvra léyi nɛ́n kàn le ɛndɔ̀nwrɔ̀n kɛ ẅɛn ecüì nɔn, ɛnjansù bru nɛ̀n. Nɛ̀n bukru nɛ sɔ́n, kɩ ne di nkù le: “Ɛẅɛnwrɔn, bɩ́ mɛ̀n die!” 31Ɛnvra zri lɔ Zhezü trɛ́n ɛkɔrɛ̀, ẅɛn nɛ̀n kɩ kɛ dɔ́ nɛ̀n le: “Nyàn ɔmuhi v'ankàẅì-bùtan lɔ cɛcɛ nɔn! Cɛci kruhú kɛ ɛ wá ɛnbɔrɛ anhyrɛ̀ hà?” 32Yɔ, anwrɔn anhyrɛ̀ lɔ, yɔ bru anhàka lɔ mɛ̀n kɩ ɛndɔ̀nwrɔ̀n sannyɔn. 33Zɛtɛn ɛsɛ̀nkɛn-bɔ̀ léyi dú anhàka lɔ mɛ̀n nɔn, shɛ́n Zhezü ezìwú annankruemɛ̀n kɩ kɛ dɔ̀ le: “Annànwɔrɛ mɛ̀n lɔ è dú Ɔwɔ Ẅì!”

Zhezü kɔrɛ ɛnlɔẅiɛ-bɔ̀ Zhenezarɛtɛ̀n tɛ̀sɛ̀n

(Nyɛ́n nyan Markɛ̀n 6:53-56 wrú lɔ mɛ̀n)

34Zhezü mán n'ɛsɛ̀nkɛn-bɔ̀ vɔ́n ɛnshi nɛnbà cɛ wú kakɛ Zhenezarɛtɛ̀n kpɔsɔ wú. 35Nanvrɛn anmàn-bɔ̀ nyri Zhezü kɩ yɔ dɔ́ n'ɛvá-ankà ɔkpɔsɔ lɔ wú, kɩ yɛ vá sɩ́ nɛ̀n ɛnlɔẅiɛ-bɔ̀ lɔ fɛn. 36Yɛ sɛ́n nɛ̀n ô nɛ̀n teze ɛnlɔẅiɛ-bɔ̀ lɔ kɛ̀ tɛ́ n'ɛceci-she lɔ ɛkɔrɛ̀; kɩ ɛnlɔẅiɛ-bɔ̀ lɔ fɛn léyi kɛ tɛ́ nɛ̀n ɛkɔrɛ̀ nɔn kɛ kɔrɛ̀.

Markert nå:

Matie 14: ƐAA03

Marker

Del

Kopier