Matiu 25
25
A warwara larlar ana ning a bonot a basbas
1“Ana pukakiarla ning, a matanitu misaot na langit ir arlar ana ning a bonot a basbas, ning la kibas pas anunla na lam, pa la han sur lar barat a tona tinaulai. 2Dilima onla, la tastasmai, pa dilima, bel la tastasmai. 3La ning bel la tastasmai la los anunla na lam, ika bel la los al koto na wel otleng taum onla. 4Ika, la ning la tastasmai la los anunla na lam pa la los otleng na koto na wel taum onla. 5A tona tinaulai bel i hanot kapit, pa a matanla i sulam, pa la borbor duman rop.
6“Ana tnan morom di arkabah mang, ‘Wo, a tona tinaulai ma! Mulo iap, mulor barati.’ 7A basbasla rop la mata, pa la sang anunla na lam. 8La ning bel la tastasmai, la nunung la ning la tastasmai mang, ‘Mulor tabar mila anal siklik wel, anasa anumila na lam la ka mang sur lar mat.’ 9La keles la mang, ‘Bel, sakana bel ir arlar ondala rop. Mulor han tetek la ning la siuran wel pa mulor lolou pas anumulo.’ 10Ika ning la han sur lar lolou, a tona tinaulai i hanot. Dilima ning la ka sang tar, la han taum onoi sur a ngasa na ataulai, pa di tagar alar a taman.
11“Lamur dilima otleng la hanot, pa la arkabah mang, ‘Leklek, leklek, ur sapang pas mila.’ 12I keles la mang, ‘A atong momoli ta mulo, bel a tasman mulo.’
13“Larning, mulor tumarang mulo, anasa bel mulo tasman a pukakiar o a puka kamis ning a Leklek ir hanot ono.
A warwara larlar ana natol a tena titol oros ning di saran a mani tanditol
(Lk 19:11-27)
14“A matanitu misaot na langit i arlar otleng ana ning a barsan ning i sang sur ir han ana tinan bakbak. I kabah pas anuna natol a tena titol oros, pa i saran tar anuna na ululeng tanditol sur ditol ir titol ono. 15I saran tar dilima na rip a mani tana ning, pa naur a rip tana ning, pa ning a rip otleng tetek ning. I saran tari tetek ditol taktakai arlar ot ana nunditol a tastasmai. Pa lamur i han ana nuna tinan. 16Esaning di saran tar dilima na rip tana, ono otning i han pa i titol ono, pa i agomo ulak pas dilima na rip a mani taguni. 17Larka otleng tetek esaning di saran tar naur a rip tana, i agomo ulak pas naur a rip a mani taguni. 18Ika, esaning di saran tar ning a rip tana, i han, i kel pas a tung, pa i por kumnan tar a mani anuna leklek.
19“Ning ka bongnani, a leklek anuna natol a tena titol oros, i hanot pa i kabah pas ditol sur ditol ir atai talapori ana nuna mani. 20Esaning di saran tar dilima na rip a mani tana i han teteki ana dilima na rip ulak, pa i atongi tana mang, ‘Leklek, u saran tar dilima na rip a mani tak. Oroi i, ia ka agomo otnan pas dilima na rip taguni.’ 21Anun a leklek i kelesi mang, ‘Wakak kol, u a wakak a tena titol oros, u momol ana num a titol. Ar suah tar u sur ur warkurai on al galis a utna, anasa u momol ana natar a utna ne. Lamut pa dar gas taum.’
22“Esaning di saran tar naur a rip a mani tana i han teteki, pa i atongi mang, ‘Leklek u saran tar naur a rip a mani tak. Oroi i, ia ka agomo otnan pas naur a rip taguni.’ 23Anun a leklek i kelesi mang, ‘Wakak kol, u a wakak a tena titol oros, u momol ana num a titol. Ar suah tar u sur ur warkurai on al galis a utna, anasa u momol ana natar a utna ne. Lamut pa dar gas taum.’
24“Lamur esaning di saran tar ning a rip a mani tana i han teteki, pa i atongi mang, ‘Leklek, a tasmani mang u a tena ngalngalia. U sol pas a utna ning bel u oman tari, pa u git pas a wana utna ning bel u sapran tari. 25A matatan u, pa a han a por kumnan tar anuma mani. Oroi i, anuma mani i ulak mane.’ 26Anun a leklek i kelesi mang, ‘U a laulau a tena titol oros, a tabun a titol u. U ka tasmani mang, a sol a utna ning bel a oman tari, pa a git pas a wana utna ning bel a sapran tari. 27Sur asa ning bel u suah tar anuka mani ting na beng, sur ar kibas pas anuka mani pa ta tuk otleng saot ono, ana pukakiar ning ar hanot? 28Mulor los sen a mani kusuni, pa mulor sarani tetek esaning anuna ning a bonot a rip a mani. 29Anasa esining anuna al ututna, dir tabar ulaki sur anuna ututnala ir galis kol, pa esining bel anuna al utna, dir kepsen otleng siklik ning kaning tana. 30Pa a tena titol oros ne, ning bel i tolsot pas ta utna, mulor minggen purum seni uting na mormorom, a pukna ning di tangtangis pa di arngingit ngesendi ia.’
A Nat a Barsan ir asalar a tarai ana pukakiar a warkurai
31“A Nat a Barsan ir hanot ana nuna matatar, taum ana nuna angelola, pa ir kes ana nuna keskes a king. A keskes ning a tnan matatarna. 32A taraila miting na matanitu rop lar han taum namatana, pa ir asalar la, arlar ana tena tai alar anuna sipsipla i asalar a sipsipla kusun a memela. 33Ir sune a sipsipla uting na sot a kuna, pa a memela uting na kair. 34A king ir atai la ning kaning na sot a kuna mang, ‘Mulo han ute, mulo ning e Tata ka angis tar mulo. Mulor kibas pas a matanitu ning ka sang tari sur anumulo, tagun nating ot na kamkama rakrakan hanua. 35Anasa a murak pa mulo tabar iau, a mos pa mulo agang iau, a wasira pa mulo ben kas iau uting na rumai. 36Bel ta kaen anuki pa mulo saran a kaen tak, a sasam pa mulo tai alar iau, pa a kes ting na rumai a dodot pa mulo geren iau.’
37“Na tena tostos lar dekeni mang, ‘Leklek, nangse mila oroi u ning u murak pa mila tabar u, pa u mos pa mila agang u? 38Nangse mila oroi u ning u wasira pa mila ben kas u uting na rumai, pa bel ta kaen anumi pa mila saran a kaen tam? 39Nangse mila oroi u ning u sasam, o u kes ting na rumai a dodot, pa mila geren u?’
40“A king ir keles la mang, ‘A atong momoli ta mulo, asaning mulo toli tetek ta barsan oros ka tagun a tastasikla ne, mulo toli hok.’
41“Lamur ir atai la otleng ning na kair a kuna mang, ‘Mulor han masik kusun iau. A rakrakai a warkurai a arkeles ka kes o mulo. Mulor han uting na tnan iah ning bel i sira mat, ning di ka sang tari sur e Satan pa nuna angelola. 42Anasa a murak pa bel mulo tabar iau, a mos pa bel mulo agang iau. 43A wasira pa bel mulo ben kas iau uting na rumai, bel ta kaen anuki pa bel mulo saran ta kaen tak, a sasam pa a kes ting na rumai a dodot pa bel mulo geren iau.’
44“La maleng lar dekeni mang, ‘Leklek, nangse mila oroi u ning u murak, u mos, u wasira, bel ta kaen anumi, u sasam, pa u kes ting na rumai a dodot, pa bel mila nangan u?’
45“Ir keles la mang, ‘A atong momoli ta mulo, asaning bel mulo tol tari tetek ta barsan oros ka, bel mulo toli hok.’ 46Lamur lar han sur a akadik tikin. Ika a tena tostosla lar han sur a lalaun tikin.”
Markert nå:
Matiu 25: lbb
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2019, Wycliffe Bible Translators, Inc. All rights reserved.
