Genesis 11
11
Anaarrawindi ana-lhaagi.
1Anubani-yumbaa, warraawurru-yung warra-wurru-wurruj aynjaabugij ana-lhaagi wuu-yambini. Wuu-yambini dani-yung-bugij. 2Warraawurru-yung wurru-yanggi yaanuwuy ramaliyaj. Wirri-lhangarrmayn lhal a-wumayamaya-rruj. Anaani wu-mayini ana-lhal, Shinar. Nga bagu waadurru-yung wurru-burri.
3Wuu-yambiynjini anubagu, “Gurruwaj, ngagurru ngaani-mani marri ngaani-dhurrmana arrmaṉngal, ngaanggaaban-baḻii yadhu, ngaanggu-nangana,” wurru-yamayn.
Anubanila-wala, wirri-maṉdhangi arrmaṉngal-wala, nguynju wu-yamaa a-brick-jii, waari yamba anubagu maaynjaari mana-ṉuga. Wuu-rigandi aban-maṉḏuj-maṉḏuj wirriiban-dhangarrmayn. Wu-yamaa nguynju a-cement-jii. 4Wurru-yamayn “Numburraaṉiyn ngaanggu-maṉdhii runggal wumurrng, ngagurraa yungguyung. Marri ngaanggu-maṉdhii yuuguni arrwiyaj-bindiyung anggu-yaarri marri ambarr-yarrdang ana-tower yuwaagu-windiyung arrwar. Nguynju yadhu ngagurri-nyinyung ana-muwaj anggu-mayina anggu-runggal. Nguynju yadhu yagi yungguyung nguu-rajaarri anuguni ana-lhal-aynbaj ana-lhal, yaaji-wugij ngaambu-burraa ngaambu-muṉḏugana.” Dani-yung wurru-yamayn.
5Na-Yawei na-God ni-dhirridangi, ni-warranggayn, niwu-nani wubani a-wumurrng marri wubani-yung wugambarr niwu-nani. 6Ni-yamayn, “Yigaj, warraawurru wurru-manda-galiynjina,” ni-yamijgini, “Wuu-yambina aynjaabugij yamba ana-lhaagi. Anaani aynjaabugij wirri-maṉdhangi ana-wulhu-wulhurr ana-wumurrng. Bagala marri, ambirri-maṉdhii ambirri-runggal-wana. Anubani-yung-maynji amburru-wijangayii, marri bani-yung amburru-waṉbina. 7Anaani ngaynjaminggarrina? Nga-ngu-dhirridang, ngambaa-gaynbijgang ana-lhaagi, nguynju yadhu yagi yungguyung wurraajangaynji ana-lhaagi.” Dani-yung ni-yamaa na-Yawei na-God.
8Anubanila-wala wani-rajaarrijgayn. Anubani waari aḏaba ambirri-maṉdhangi ana-wumurrng. 9Anubani-yung ana-wumurrng wu-mayini Babel, anaani wiijamana, na-God wani-gaynbijgayn anubani ana-lhaagi, warraarrawindi-lhangu-yinyung warra-wurru-wurruj. Na-Yawei anubanila-wala, wani-rajaarrijgayn aḏaba, wuu-manda-ḏajaarriyn, wuu-ngarra-janggi a-lhal-wuy yuuguni yaanuwuy, wuu-ngarra-janggi.
Na-Shem-jinyung warra-mijburrayung.
10Yaani ana-lhaawu warra-mijburrayung-jinyung na-Shem-jinyung.
Na-Shem naagi-yung 100 ni-burri-yinyung anaagalhal-aḻirr. Nga naagi-yung nu-lhamayn na-niwiyayung Arpaksad. Wulawaa anaagalhal-aḻirr manubamala-wala mana-ngugu-wala. 11Anubanila na-Shem ni-burri 500 anaagalhal-aḻirr wurrugu. Wani-lhamaa warra-miniwiyayung marri warra-miyn.ngarriwayayung.
12Nigaayung na-Arpaksad nigaayung 35 anaagalhal-aḻirr. Marri nu-lhamayn na-nimuwaj-jung Shelah. 13Naagi-yung na-Arpaksad anubanila ni-burri 403 anaagalhal-aḻirr. Wani-lhamaa warra-miniwiyayung marri warra-miyn.ngarriwiyayung, naagi-yung.
14Nigaayung naagi-yung na-Shelah, naagi-yung 30 ni-burri-yinyung anaagalhal-aḻirr. Nu-lhamayn marri bani-yung na-Eber. 15Anubanila na-Shelah naagi-yung ni-burri 403 anaagalhal-aḻirr. Wani-lhamaa warra-miniwiyayung marri warra-miyn.ngarriwiyayung.
16Nigaayung naagi-yung na-Eber 34 anaagalhal-aḻirr ni-burri naagi-yung. Marri bani-yung nu-lhamayn na-Peleg. 17Naagi-yung na-Eber anubani ni-burri 430 anaagalhal-aḻirr. Warra-miniwiyayung marri warra-miyn.ngarriwiyayung wani-lhamaa anubani-yung.
18Naagi-yung na-Peleg nigaayung 30 anubani anaagalhal-aḻirr. Nu-lhamayn naagi-yung na-nimuwaj-jung Reu. 19Anubanila-wala na-Peleg naagi ni-burri 209 anaagalhal-aḻirr. Wani-lhamaa warra-miniwiyayung marri warra-miyn.ngarriwiyayung.
20Naagi-yung na-Reu ni-burri 32 anaagalhal-aḻirr. Marri nu-lhamayn naagi-yung Serug na-nimuwaj-jung. 21Anubanila-wala naagi-yung na-Reu ni-burri 207 anaagalhal-aḻirr. Marri wani-lhamaa warra-miniwiyayung marri warra-miyn.ngarriwiyayung.
22Naagi-yung na-Serug ni-burri 30 anaagalhal-aḻirr. Nu-lhamayn naagi-yung na-nimuwaj-jung Nahor. 23Na-Serug naagi-yung ni-burri 200 anaagalhal-aḻirr. Marri wani-lhamaa warra-miniwiyayung marri warra-miyn.ngarriwiyayung, naagi-yung.
24Naagi-yung na-Nahor ni-burri 29 anaagalhal-aḻirr. Marri bani-yung nu-lhamayn na-Terah. 25Anubani-yung naagi na-Nahor ni-burri anaagalhal-aḻirr 119. Wani-lhamaa warra-miniwiyayung marri warra-miyn.ngarriwiyayung.
26Nigaayung na-Terah 70 anaagalhal-aḻirr. Marri wani-lhamaa Abram marri Nahor marri Haran, wani-lhamaa.
Na-Terah-yinyung warra-mijburrayung.
27Yaani ana-lhaawu warra-mijburrayung-jinyung na-Terah-yinyung.
Naagi na-Terah wani-lhamaa na-Abram marri na-Nahor marri na-Haran. Nigaayung na-Haran nu-lhamayn na-Lot.
28Na-Haran ni-ngawiiyn, wubani-rruj-jinyung a-lhal-uj niimbuḻwiiyn-duj. Anubani na-ninyarra-yung na-Terah niga ni-wiri-wugij. Ana-muwaj Ur wu-mayini, marri anaani ana-runggal ana-lhal wu-mayini Babylonia. 29Naawiṉi-yung na-Abram marri na-Nahor winiiynji-yaay aḏaba, nga-rangarrina-yung-biiyung. Naagi-yung na-Abram, nga-rangarrina-yung ngi-mayini Sarai. Nigaayung na-Nahor, nga-rangarrina-yung ngi-mayini Milcah. Ngarra-Milcah ngaadagi-yung ngarra-ngarrilharriyung ngi-mayini ngarraagi-yung Iscah. Na-Haran naagi-yung ninyarra-yung ngaadirrngi-yumbaa-yinyung. 30Ngarra-Sarai ngiga waari ambangi-waṉagaa warra-mijburrayung.
31Na-Terah naadagi-yung nu-miyn na-Abram na-niwayayung, marri na-Lot na-rangan-muruyung na-Terah nu-miyn, na-niwiyayung na-Haran-jinyung, marri Sarai ngigaayung ngi-yanggi, na-niwiyayung-jinyung nga-rangarrina-yung. Anubani wurraanggarra-yanggi, bagala wirriirruyn aḏaba ana-Ur ana-lhal, wubani a-runggal a-lhal Babylonia. Wurru-yanggi yuuguni Canaan-guy. Warraawurru-yung wurru-yanggi, nga aḻagaḻa wurru-waliyn Haran ana-lhal. Nga bagu wurru-burri wurrugu.
32Baḏag wurru-burri anubagu aḏaba wurrugu. Naagi-yung na-Terah 205 nigawi-nyinyung manaarmag ni-burri. Bani-yung marri ni-ngawiiyn a-lhal-uj Haran-duj wu-mayini.
Markert nå:
Genesis 11: nuyNTPO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2007, Wycliffe Bible Translators, Inc. All rights reserved.
