Mwanduso 11
11
Lingo da Babeli
1Baho haichanduso wanhu wa mwiisi yose wakala olonga ulonzi umoja na mbuli zizija. 2Avo wanhu viwafungile mwanza kuchola isi za mwambu wa kudilawila zuwa wayona isi ya bawe ako Shinali, na wakala kuko. 3Avo wailongela wao kwa wao, “Amweye! Tutende matofali na tugasome moto vinogile.” Avo wakala na matofali badala ya mabwe na tongo tongo badala ya matope. 4Wailongela, “Tuizengele buga na lingo donda divike mbaka kuulanga, ili tutende matwaga getu gajuwigwe na sikutupwililike mwiisi yose.”
5Abaho Mndewa Imulungu kahumuluka hasi yalole dibuga na dilingo diwakalile ozenga wanhu awo. 6Mndewa Imulungu kalonga, “Wanhu wano ni wanhu wa isi imoja na olonga ulonzi umoja, na kino acho kiwosonga kutenda, avo jojose diwolonda kutenda oditenda. 7Leka tuhumuluke hasi, tukawakanganye ulonzi wao ili walemelwe kuitegeleza wao kwa wao.” 8Avo Mndewa Imulungu kawapwililisa mwiisi yose na waleka kuzenga idibuga. 9Buga dijo dikemigwa Babeli, kwavija aho Mndewa Imulungu hayawakanganye wanhu na kuwagwaa ulonzi mbasakanyo mbasakanyo na kulawa aho kawapwililisa wanhu mwiisi yose.
Ulelo wa Shemu
(1 Umwaka 1:24-27)
10Uno awo ulelo wa Shemu. Miyaka mibili vigeshile mazi mengi, Shemu viyavikize miyaka gana, kamulela Alifakisadi. 11Shemu viyamulelile Alifakisadi, kakala miyaka magana matano na kalela wana wayagwe wa kimbigalo na wa kitwanzi.
12Alifakisadi kakala na miyaka malongo madatu na tano, kamulela Shela. 13Alifakisadi viyamulelile Shela, kakala miyaka magana mane na midatu, na kalela wana wayagwe wa kimbigalo na wa kitwanzi.
14Shela kakala na miyaka malongo madatu, kamulela Ebeli. 15Shela viyamulelile Ebeli, kakala miyaka magana mane na midatu, na kalela wana wayagwe wa kimbigalo na wa kitwanzi.
16Ebeli kakala na miyaka malongo madatu na nne, kamulela Pelegi. 17Ebeli viyamulelile Pelegi, kakala miyaka magana mane na malongo madatu, na kalela wana wayagwe wa kimbigalo na wa kitwanzi.
18Pelegi viyakalile na miyaka malongo madatu, kamulela Leu. 19Pelegi viyamulelile Leu, kakala miyaka magana mabili na tisa, na kalela wana wayagwe wa kimbigalo na wa kitwanzi.
20Leu viyakalile na miyaka malongo madatu na mibili, kamulela Selugi. 21Leu viyamulelile Selugi, kakala miyaka magana mabili na saba, na kalela wana wayagwe wa kimbigalo na wa kitwanzi.
22Selugi viyakalile na miyaka malongo madatu, kamulela Naholi. 23Selugi viyamulelile Naholi, kakala miyaka magana mabili, na kalela wana wayagwe wa kimbigalo na wa kitwanzi.
24Naholi viyakalile na miyaka malongo mabili na tisa, kamulela Tela. 25Naholi viyamulelile Tela, kakala na miyaka gana dimoja na longo na tisa, na kalela wana wayagwe wa kimbigalo na wa kitwanzi.
26Tela viyakalile na miyaka malongo saba, kamulela Abulamu na Naholi na Halani.
Ulelo wa Tela
27Uno awo ulelo wa Tela, tatao Abulamu na Naholi na Halani. Halani kakala tatake Lutu. 28Kipindi Tela yang'ali mgima Halani kafa ako Uli buga da Wakalidayo kuyaleleke. 29Abulamu na Naholi wasola wehe. Mwehe wa Abulamu kakemigwa Salai na mwehe wa Naholi kakemigwa Milika biti Halani, vivija Halani kakala tatake Isika. 30Salai kakala mgumba. 31Tela kamsola imwana Abulamu na imzukulu Lutu, yakalile mwanage Halani, na imukwe Salai mwehe wa Abulamu, kalawanya nao ako Uli buga da Wakalidayo, kachola na hewo mwiisi ya Kanaani, viwavikile kudibuga da Halani wakala kuko. 32Tela kafa ako Halani viyakalile na miyaka magana mabili na tano.
Markert nå:
Mwanduso 11: King'hutu
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
NT: © 2014 Pioneer Bible Translators and The Word for the World
OT: © 2019 Pioneer Bible Translators
