Matthew 5

Omunari ogau nina ago

Mt 5.1—7.29

1Kamini, Iesu yaku usi diyadi vene tau gade vesi omunari bosi ameyo ma ini usi dina vene ka bi ina rofu boyadi. 2Ma oteimagasa, makai niyo:

Ada rena rama iniye

(Lk 6.20–23)

3“Kaere amiye ina diba ini vimari Sei di gugura buni yokoi de bi ada regedi;

adina bi Sei di ourefeidena amena sana omari bi ini!

4Isaka isaka nidedi vene bi ada regedi;#Is 61.2

ini adina ini iriyedukari moi ada rego!

5Kaere bi ave nidedi ada regedi;#Ps 37.11

ini adina bi mina kono noibanu moigedi!

6Kaere ini ura bi mokena rorobo rofu rauna rededi kana bi ada regedi;#Is 55.1–2

adina ina bi moi vata baegedi!

7Kaere iriyeduka rena vegu rededi vene bi ada regedi;

Sei yaku ini iriyeduka ina fafau rego!

8Kaere uka kino yokoi de nufa bi ada regedi;#Ps 24.3–4

ini adina Sei vegedi!

9Kaere uka amuta rededi vene bi ada regedi;

ini adina Sei yaku ini mida mida vo nigo!

10Kaere vegu rorobo dada esika esika moidedi vene bi ada regedi;#1 Pet 3.14

ini adina Sei di ourefeidena amena sana omari bi ini!

11“Amiye yaku na dada nifafana resi esika esika masi ya fafau ago no tau ofa ofa ago dudu nibigediri, bi ada regedi.#1 Pet 4.14 12Ada regasa yauta nifa, adina yi obini omari moigedi bi tora, adina makai senagi Sei di ago niyadi vene esika esika maradi.#2 Chr 36.16; Acts 7.52

Ramena ma vabara

(Mk 9.50; Lk 14.34–35)

13“Ya bi kono di ramena kana. Idu ramena di safi koina nigo vonisi, bi gokai ida dudu moi dairigedi ma dudusa ramena nigo? Mina bi kamini no niyo, ye moi makugedi ma amiye yaku etei rigedi.

14“Ya vene bi mina kono di vabara. Taoni yokoi omuna ikari bi de sui nigo.#Jn 8.12; 9.5 15Ma amiye yaku ka ramefa orisi foroka gabireri de aegedi, idu bi ini ikina sanari ikigedi; ye amiye tau yavari ameinu rededi rofu ini vabara kikigo.#Mk 4.21; Lk 8.16; 11.33 16Mina ida dudu maka, yi vabara bi amiye budari vabara niyaine, ye yi beika vegu buni bi amiye yaku vegedi rofu yi Baba omari mina ini roka moi odoro riyaganedi.#1 Pet 2.12

Oteimana ago gira fafau

17“Ga mokefa na bi ago gira ma Sei di ago niyadi vene di ago mina moi uroro regika deyaka; na bi moi rama aegi deyaka, uroro regi de deyaka. 18Rama ya nida, oma ma kono bi roro nigedi, idu ago girari bura keika kuni kuni yokoi kava ma tuta yokoi de roro nigedi bogo mina vegu tau vakoi rama aegedi mamo.#Lk 16.17 19Kaere amiye yaku mina ago gira di ago keika keika yokoi obe resi amiye be ka, ina yaku reyo kana, reyaganedi oteimago bi, Sei yaku ini ourefeidena amena sana omari bi moi keika rigo, idu kaere amiye yaku mina ago gira neidesi amiye be ka oteimabigo, bi Sei yaku ka ini ourefeidena amena sana omari ka ina moi odoro rigo. 20Ye ya nida, yi vegu rorobo rededi bi ago gira oteimana vene ma Pharisee vene di vegu ebuna de reyo vonisi, ya bi Sei di ourefeidena amena sana omari toga toga de dui regedi.

Gubuyo rena di oteimana ago

(Lk 12.57–59)

21“Ya sena tutubena vene rofu beika nigamadi bi neideyadi, ‘Amiye umuyena ga reyaganedi; ye kaere yaku amiye umuyego bi kota rego.’#Ex 20.13; Deut 5.17 22Idu ya nigida bi kaere ini usika ourena rofu gubuyo rego#5.22 gubuyo rego; bura bedakai ini adina de dudu gubuyo rego nufa. bi kota rego. Dudusa, kaere yaku ini usika ourena rofu nigo, ‘Ya bi ada de,’ ina bi kanisoro vene di nemokori are rego, ma kaere yaku nigo, ‘Ya bi mokena de rei tavoi tavoi reisa,’ bi ita moka rofu nena idari amego. 23Mina dada, ya yi ori sisika rena Sei rofu moisi ini fore fata odoro magasa mokegiya yi usika ourena bi yasa gubuyo amedo vonisi, bi 24yi beika gugura magiya bi fore fata adinari ferena siko resi yi usika ourenasa uka yokoi maka nisi mamo dairisi yi beika gugura magiya mina ma.

25“Yasa uka yokoi maka de nido amiye kaere yaku ya kota aegi rena koderi, evade ya kaya yi uka moi nomu risi uka yokoi maka ni. De bi kota neidedo amiye di vanari ya aego baebu, ma ina yaku dibura yava nari redo amiye di vanari ya aego ma dibura yavari ya aego. 26Rama ya nida, mina sanari de yakugiya bogo kota ya ae niyo kana metona fore keika mai vau regiya mamo.

Koa rena di oteimana ago

27“Sena nigamadi ma neideyadi, ‘Koa ga re.’#Ex 20.14; Deut 5.18 28Idu ya nida bi kaere amiye yaku rema vesi inasa varegi di moke moke moigo, bi sena ini ukari mina remasa koa reyo. 29Ye yi vana rama nemoko yaku ya moi vegu no rofu ourefeidego vonisi, kini biyoka resi maku. Buni bi yi mina roaita keika maka makugiya, de bi yi roaita tora noibanu ita mokari makugo.#Mt 18.9; Mk 9.47 30Ma yi vana rama yaku ya moi vegu no rofu ourefeidego vonisi, bi nugai maku. Adina buni bi yi mina roaita keika maka makugiya, de bi yi roaita tora noibanu ita mokari nego.#Mt 18.8; Mk 9.43

Rema mesi ferena di oteimana ago

(Mt 19.9; Mk 10.11–12; Lk 16.18)

31“Mina bi sena ka niyadi, ‘Kaere amiye ini rema ferego vonisi, bi rema ferena fefa masi nifeideyainedi.’#Deut 24.1–4; Mt 19.7; Mk 10.4 32Idu ya nida kaere amiye yaku ini rema feresi nifeidego, idu mina rema bi sena koa de reyo, bi mina rema amiye idana megori bi koa rena vegu nori moi dui rego. Ma mina amiye kaere bi rema mego ka bi koa rego.#Mt 19.9; Mk 10.11–12; Lk 16.18; 1 Cor 7.10–11

Nitore rena di oteimana ago

33“Dudusa, senagi tutubena vene rofu nigamadi ma neideyadi, ‘Yi nitore rena ago bi ga odefa, idu Varika amiye rofu yi beika nitore reyadi mina refa.’#Lev 19.12; Num 30.2; Deut 23.21 34Idu ya nida bi oma fafau nivarika ga refa, adina mina bi Sei di ourefeidena amena fata;#Is 66.1; Mt 23.22; Jas 5.12 35o kono roka fafau ga nitore refa, adina mina bi ini yuka aena sana; o Jerusalem fafau nitore ga refa, adina mina bi Kini tora di taoni.#Ps 48.2; Is 66.1 36Yi ada fafau ka nitore ga refa, adina yi ada iye fini yokoi maka mina de moi gabu o feyo rigedi. 37Idu ya ‘Yo’ nigedi vonisi, bi yo maka mokeyagane ma ya ‘Ide’ nigedi vonisi bi ide maka mokeyagane—beika mina fufuta rofu baedo bi amiye no di.

Obini moina di oteimana ago

(Lk 6.29–30)

38“Sena nigamadi ma neideyadi, ‘Amiye yokoi yaku amiye idana ini nemoko yokoi ugori bi makai kana mina reyo amiye rofu refa ma amiye yokoi yaku amiye idana ini gade yokoi ubaki regori, bi makai kana mina reyo amiye rofu refa.’#Ex 21.24; Lev 24.20; Deut 19.21 39Idu gua na yaku nida bi amiye yaku ya rofu vegu no regori, bi ga gana ri. Ye kaere yaku yi rama rofu ragena famagori, bi berou ka moi kero resi ma. 40Ma amiye yokoi yaku ya kota aegika resi yi serti moigori, bi yi fafau varuka ka ma. 41Ma amiye yokoi yaku ya ni duri duri resi kilometre#5.41 kilometre: Greek agori mina bi “mile”. yokoi bovo ya nigo vonisi, bi kilometre yokoi inasa dudusa bo. 42Ma kaere ya rofu ya usa nigori, bi mina ma; ma kaere ya rofu moisi gabi dairisi ya mago usa nigori, bi ga gedu ma.

Tuma vene uka mana

(Lk 6.27–28, 32–36)

43“Sena nigamadi ma neideyadi, ‘Yi atafu amedo amiye uka masi yi tuma amiye rofu bi gubuyo re.’#Lev 19.18 44Idu ya vene rofu nida, yi tuma vene rofu uka masi#5.44 Bura bedakai ka kaere ya kiraini nigedi bi buni tora gade masi kaere ya gubuyo regedi bi ina rofu buni resi kaere ya vegu no rofu regedi ma nufa. kaere yaku ya esika esika magedi bi ina dada usa usa nifa, 45ye ya bi yi Baba omari di mida mida nigedi. Adina ina yaku ini meda bi vegu no rededi vene ma buni vene fafau mado. Resi mokena rorobo nufa vene ma mokena rorobo nufa de vene fafau ini miya moi dedo. 46Ye ya rofu uka madedi vene maka ina rofu uka magedi vonisi, bi ini buni gabi bi beika moigedi? Ye fore moidedi vene ka mina vegu rededi ba? 47Ma yi usika ourena#5.47 usika ourena; bura bedakai asiyaka nufa. maka yuata nigedi vonisi, ya bi amiye bedakai kana de beika rededi? Ye tutubena idana vene#5.47 tutubena idana vene; bura bedakai fore butu rededi vene nufa. ka makai rededi. 48Mina dada yi Baba omari bi rorobo iniye maka kana ya vene ka rorobo iniye maka dudu ameyaganedi!#Lev 19.2; Deut 18.13

Markert nå:

Matthew 5: kqc

Marker

Del

Kopier