Populære bibelvers fra MÁFIYU 7

Del

Jísu i ɣɛ ti w̃a, “A Ngalá mɔɔní ŋani haáw̃a, aa fe wú yáa. A yakpá wú ŋani wɔlí Ngalá ngeyá, aa fe wú yáa. A Ngalángi góngi laa lúba, aa ndaawó wú yɛ́.

Sífaa, nuí fíli áá Ngalá mɔ́ɔ́ni ŋani haáw̃a, maa w̃ɔ́i aa maahɔ́lɔ. Nuí fíli pá áá ŋani wɔlí Ngalá ngeyá, aa fe maa w̃ɔ́i yaá. Nuí vá áá Ngalángi góngi laa lúba, aa ndaa wó maa w̃ɔ́i yɛ.

Jísu í mɔ́ɔ́ ɣɛ ta, “Náá hááw̃a, nuí fíli áá ndáá wói sítii mɛni í híya ngáá ti ye, aa ɣɛ gulaí ngáá siỹɛndópoi ki máángɔ í ɣɛ́i lá, í ngi vɛ́lɛi lóni kɔtuí w̃a.

Faalɔ, a wú mbála nuu búsaitii suuhóu kɛ kíya wáá ɣɛ́ lói ti wú h̃úúhou. Bɔw̃álale savaí Ngala ngí féni Muusé yaá ɛ́ɣɛ kalambongí Ngalá ndaa háá lé mbélaitii tí mbóni, ti h̃úúgulamai w̃úl̃ɔ.”

Kɛ́ geétii í peleí sí h̃u áá lí tɔɔỹaá lɛɛh̃úi ŋál̃a, ndaa bɛ́ɛ́ngɔɔ lé, aáva maa vélei h̃uu híyalai bangɔ́ɔ́ lé. Nungáitii pá taa pélei sí lɔ, taá bíh̃i.”

Jísu i mɔ́ɔ́ ɣɛ ti w̃a, “A wala geéti laa bɛ́ɛ́ngɔi la, bɔw̃álale, geétii sí í njahááma vélei, ndaa wɔ́ɔ́lɔngɔɔ lé. Peleí vá í lííngɔ í ló njahááma wá, suuhíyalai aa baní, laáva nuu bíh̃iw̃aa lɔɔ híya ngáá peleí ná.

Kɛ kíya bɛ́lɛ wú ngáá nuu ỹɔ́u ỹɔ́ungaa, kɛ́ wú náá wɔlɔ́ kíya wáá ŋani vandá hé wú léngaitii ngeyá, kɛlaa maa wú Kɛ́ɛ́ɣɛ Ngalá í ngelegóóh̃u, laa ɣéle p̃ɛ́ɛ́ aa ŋani vanda hé bih̃í sítiini ngeyá taá mɔɔní faaw̃a!

Jísu i mɔɔ ɣɛi ti w̃a, “A waá nungáá vékaa waaléve ngáá kɛ taa vélei. Ná lɔ́ áá kɛ́ Ngalá bɛ́lɛ nɔ ɛ́i wú wááleve ngáá kɛ wáá vélei. Sífaa, Ngalá ngáá wú wááleve kíya nɔ́ɔ jɔ́ wáá nungáá vékaitii mbaaléve. Laáva sí wáá gitó mba wáá nungáá vékaitii mbaaléve, kɛɣɛ́lai lɔ nɔ́ɔ jɔ́ Ngalá ngáá gitó mba laá bɛ́lɛ nɔ í wú wááleve.

Kɛ́ nuí fíli áá ndáá wói sítii mɛni aáva ɛi híya ngáá ti ye, aa ɣɛ gulaí ngáá tamál̃a síỹɛndopoi sí í ngi vɛ́lɛi lóni kahaí h̃u

Ndeénii le yáá kaa kúlo kw̃ɛ́ɛ́ngi lɔ í mbálai yaah̃ú kɛ yɛ́i wolíɣɛ ngulú búsa wálai w̃a áá ɣɛ́ lááni í ndá yááh̃ui w̃a? Yáá ɣéle ɣɛ́ náa í mbálai w̃a, ‘Yí vélei kái bɛlɛ́ ngí kaa kúlo kw̃ɛ́ɛ́ngi gúla í yááh̃u,’ ná ngulú búsa wálai áá ɣɛ́ lááni í ndá yááh̃ui w̃a?

Kɛ Jísu í mɔ́ɔ ɣɛa ta, “A w̃ááh̃u béle ngáá sítii taá nde ngáá tiyá lɔ́ ngáá Ngalá ndaa háá lé mbélaa kɛ́ ɛi ɣɛ ngáá tɔɔỹaá. Sífaa ná taa ɣɛ́a vá wu yelé, taá ɣɛ ngáá mbaala ɣɛ kíli ti luwúi w̃a, kɛ́ ti h̃úú vélei ti ɣɛ kíli aa ɣɛ ngáá fula húwa ỹɔu ỹɔungaa. Wáá ɣɛ́ ti wɔlɔ́ ti gɛɛhɔ́ngi wa. Tɔɔỹáa hááw̃a, Gilépi ɛi wa ngali ngáli ngulu ya kɛlaa maa féki ɔ́ɔ́ wa ngali ngáli ngulu ya.

Ngimɔ́ɔ́ í na, ngulúi fíli faa ɛ́i ɣɛ́ mba, ngi wángi áá héi nga aa ɣɛ vaní, kɛ́ ngulúi fíli faa áá ɣɛ́ mba, ngi wángi áá héi nga ɛi ɣɛ vaní.

Kɛ́ ngulúi fíli faa ɛ́i ɣɛ́ mba, ngi wá nyɔ́u ỹɔ́u ngɛi héi nga. Ngulúi sí va faa áá ɣɛ́ mba, ngi wá pánda ɛi heí nga.

Aáva ngulúi fíli ngí wá pánda ɛ́i ɣɛ́ héini nga, taá téve, tí pilí ngɔmbuí ya.