Populære bibelvers fra 5. Mosebok 5

Del

Du skal heidra far din og mor di, slik HERREN din Gud har bode deg. Då skal du få leva lenge, og det skal gå deg vel i det landet HERREN din Gud gjev deg.

Følg alltid den vegen som HERREN dykkar Gud har pålagt dykk å gå! Då skal de få leva. Det skal gå dykk vel, og de skal få bu lenge i det landet de tek til eige.

Du skal ikkje tilbe dei og ikkje la deg freista til å dyrka dei. For eg, HERREN din Gud, er ein nidkjær Gud som straffar borna i tredje og fjerde slektsledd for synda til fedrane når dei hatar meg, men viser trufast kjærleik i tusen slektsledd mot dei som elskar meg og held boda mine.

Du skal ikkje laga deg gudebilete av nokon skapnad oppe i himmelen eller nede på jorda eller i vatnet under jorda.

Du skal ikkje ha andre gudar enn meg.

Du skal ikkje misbruka namnet til HERREN din Gud, for HERREN lèt ikkje den gå fri som misbruker namnet hans.

Måtte dei berre ha eit slikt hjarte at dei fryktar meg og held alle boda mine så lenge dei lever! Då skal det alltid gå dei og borna deira vel.

Du skal akta på sabbatsdagen og halda han heilag, slik HERREN din Gud har bode deg!

Du skal ikkje trå etter kona til nesten din. Du skal ikkje ha lyst på huset eller jorda til nesten din, slaven eller slavekvinna, oksen eller eselet hans eller noko anna som høyrer nesten din til.

Du skal ikkje bryta ekteskapet.

Du skal ikkje vitna falskt mot nesten din.

Du skal ikkje slå i hel.

Du skal ikkje stela.

Kom i hug at du sjølv var slave i Egypt då HERREN din Gud førte deg ut derifrå med sterk hand og utstrekt arm. Difor har HERREN din Gud pålagt deg å halda sabbatsdagen.

Seks dagar skal du arbeida og gjera all di gjerning, men den sjuande dagen er sabbat for HERREN din Gud. Då skal du ikkje gjera noko arbeid, korkje du eller son din eller dotter di, korkje slaven din eller slavekvinna di, korkje oksen eller eselet eller noko anna av dyra dine, eller innflyttaren som bur i byane dine, slik at slaven og slavekvinna skal få kvila, dei som du.

Eg er HERREN din Gud som førte deg ut frå Egypt, ut frå slavehuset.