If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

हेरोदेस राजे चे ङिहां मां जिसे बेले यहूदिया चे बैतलहम मां ईशु चा जनम हुला तां पूरब कनु कई ज्योतिषी लौक यरुशलेम मां आती कर पूछु लाग़ले, यहूदिया चा राजा जाया जनम हुला, किठे छै? कांकि अम्ही पूरब मां ओचा तारा ङेखला ते ओनु प्रणाम करने वास्ते आले।
ईं सुणती कर हेरोदेस राजा ते ओचे लारे यरुशलेम चे सारे लौक घब़राती गेले। बल्ति ओणे लौका चे सारे प्रधान याजका नु ते शास्त्रीया नु भेले करती कर वाकनु पूछले “मसीह चा जनम किठे हुवणा चाही छै?” वाणे ओनु केहले, “यहूदिया चे बैतलहम मां, कांकि भविष्यवक्‍ता चे जरिये ईं लिखले आले छै।
“ ‘हे बैतलहम, तु जको यहूदा चे प्रदेस मां छी,
तु कुई वी रीति लारे यहूदा चे
अधिकारीया मां सबकनु छोटा कोनी,
कांकि दुधे महु हेक अधिपति निकली,
जको माई प्रजा इस्राएल ची रखवाली करी।’ ”
बल्ति हेरोदेस ने ज्योतिषिया नु चोप-चाप हकारती कर वाकनु पूछले कि तारा ठीक किसे बेले ङिसला हुता, ते ओणे ईं केहती वानु बैतलहम भेज़ले जावा ओ ब़ाला चे बारे मां ठीक-ठीक पता करा, ते जिसे बेले मिलती जाये तां मनु बावड़जा कि मैं वी आती कर ओनु प्रणाम करे।
वे राजे ची बात सुणती कर चाह्‍ले गेले, ते जको तारा वाणे पूरब मां ङेखला हुता ओ वांचे आग़ु-आग़ु टुरला, ते जिठे ऊं ब़ाल हुते, वे जग़हा चे उपर रुकती गेला। ओ तारे नु ङेखती कर वे ब़ोहत खौश हुती गेले बल्ति वे घरा चे भीतर गेले ते वाणे ओची आई मरियम लारे ब़ाला चे वी दर्शन करले ते वाणे ओनु मत्थे टेकले ते आपणा-आपणा थैला खोलती कर ओनु सोने, ते लोबान, ते गन्धरस ची भेंट चढ़ाली। तब नरीकारा ने वानु हेक खाबा मां चौकस करती ङिले, कि हेरोदेस चे गोढु बल्ति ना जजा, वे ङुजे मार्ग़ा कनु आपणे देशा नु चाह्‍ले गेले।

ज्योतिषिया चे चाह्‍ले जाणे चे बाद, यूसुफ नु खाबा मां प्रभु चा हेक स्वर्ग़दूत ङिसला ते ओणे केहले, “उठती कर ब़ाला नु ते ओची आई नु गेहती कर चोप-चाप करती मिस्र नु चाह्‍ला जा, ते जब तक मैं ना किहे, तब तक उठी रिहो, कांकि हेरोदेस ऐ ब़ाला नु सोता फिरे कि ओनु मरवाती नाखे।” यूसुफ खड़ा हुला ते ब़ाला नु ते ओची आई नु गेहती कर राती नु ही मिस्र वास्ते टुरती पला। ते हेरोदेस चे मरणे तक यूसुफ उठी रेहला। ईं ऐवास्ते हुले कि प्रभु ने भविष्यवक्‍ता चे जरिये जको केहले ले पुरे हो सग़ो, “मैं आपणे पूता नु मिस्र कनु हकारले।”

हेरोदेस ने जिसे बेले ईं ङेखले कि ज्योतिषिया ने माये लारे धोक्‍का करला, ओनु गुस्सा आला, ते लौका नु भेज़ती कर, ज्योतिषिया चे केहले आले समय चे अनुसार, बैतलहम ते ओचे आस-पास ची जग़हा चे सारे छोरा नु जको ङुंहु साला ची जा वाकनु छोटी हुती मरवाती नाखले।
बल्ति जको वचन भविष्यवक्‍ता यिर्मयाह चे जरिये केहला गेला पूरा हुला।
“रामाह गांवा मां ङोख भरला आला हेक शब्द सुणला गेला,
रोवणे ची अवाज ते ब़ोहत ङुखा ची बात,
राहेल आपणे ब़ाला चे वास्ते रोवे पलती,
ते वा चोप ना हुवणे चाहवेली,
कांकि वे ब़ाले मरती गेलती।”

बल्ति हेरोदेस ची मौत चे बाद मिस्र मां यूसुफ चे खाबा मां प्रभु चा स्वर्ग़दूत प्रकट हुला, ओनु केहले, “ऊठ आपणे ब़ाला नु ते ओची आई नु गेहती कर इस्राएल ची धरती उपर चाह्‍ला जा कांकि जको ब़ाला ची जान गेहणे आले हुते, वे मरती गेले।” यूसुफ खड़ा हुला ते ब़ाला नु ते ओची आई नु गेहती कर इस्राएल देशा मां पुज़ला।
बल्ति जिसे बेले यूसुफ ने ईं सुणले कि यहूदिया उपर आपणे ब़ा हेरोदेस ची जग़हा उपर अरखिलाउस राज़ करु लाग़ला ते ओ ओठे जाणे कनु ङरु लाग़ती गेला, बल्ति खाबा मां नरीकारा ची चितावनी गेहती कर ओ गलील प्रदेस सनु चाह्‍ला गेला। ओठे नासरत नांवा चे शहरा मां जती बसला, ताकि ओ वचन पूरा हो, जको भविष्यवक्‍ता चे जरिये केहला गेलता, “ओ नासरी किहवावी।”

Hør på मत्ती 2