Yakkha 2023 WBT/NEBS  (NT) Drama

न्‍नाबे निकोदेमास बाङ्‌ना एको फारिसि याॽमि वाया, उङ् याहुदि माछुम्‍मागा एको सादास्‍या साया॥ उङ् इलेन नाॽमासेक येसु वायानाबे तायाहोङ् येसु खाॽला लु, “चिन्‍खुबा, कानिङ् था वान्‍ने न्‍दा निङ्‌वाफुमाङा पाक्‍सागाना चिन्‍खुबागान॥ इजाङ्‌बाङ्‌निङ् न्‍दा चोगुघा खा चिङ्‌गो निङ्‌वाफुमागा साक्‍ति मेॽनिङ् इसाङा चा चोक्‍मा ङ्‌यास्‍वानिन्‍हा॥”
येसुङा उङ् लु, “जेप्‍पा का न्‍दा लुमेॽनेन, ओछोङा वाम मेलेङ्‌ले सोम्‍मा इसाङा चा निङ्‌वाफुमागा राज्‍या निमा ङ्‌यास्‍वान्‍ना॥”
निकोदेमासङा लु, “पाहोबा लेक्‍साब्‍याना याॽमिगा फेरि इमिन वाम लेङ्‌मेॽना? इना उङ् फेरि उमागा ओफोकपे उमेहोङ् हिम्‍ना खेप वामा यामेॽनायि?”
येसुङा पोलोवा पि, “जेप्‍पा का न्‍दा लुमेॽनेन, माङ्‌च्‍वा नुङ् आत्‍माभाङ् वाम मेलेङ्‌ले सोम्‍मा इसा चा निङ्‌वाफुमागा राज्‍याबे उमा ङ्‌यामेन्‍ना॥ सालुङ्‌भाङ् वाम लेक्‍साना सालुङ् ओम, न्‍हाङ् आत्‍माभाङ् वाम लेक्‍साना आत्‍मामाङ् ओम॥ का न्‍दा ओछोङा वाम लेङ्‌माहा लुमेॽनेन्‍निङ् आच्‍चाम्‍मा ङ्‌ङेतान॥ हिॽवा हेखाॽला खेॽमा मिमे, ङ्‌खाॽलामाङ् खेमे॥ हिॽवा फेनाना गो खेप्‍स्‍वाम्‍गा, ङ्‌खाॽनिङ्‌गो न्‍ना हेॽनाहाङ् फेम्‍मेॽना न्‍हाङ् हेखाॽला खेमेॽना, न्‍निङ्‌दा था न्‍दोक्‍त्‍वाम्‍गान॥ आत्‍माभाङ् वाम लेक्‍साना याॽमि चा ङ्‌खाॽलामाङ् सामेॽना॥”
निकोदेमासङा येसु छिम्‍दु, “खा इमिन लेङ्‌मायामेहा?”
येसुङा लु, “न्‍दा गो इजिरेलिचिगा चिन्‍खुबागान, ङ्‌खोङ्‌चा खा चेॽया ङ्‌ङास्‍वागान्‍हा? का जेप्‍पा न्‍दा लुमेॽनेन, कानिङ् इहा निस्‍वाम्‍ङा ङ्‌खागा उतुम्‍बेॽमाङ् चेक्‍तिॽवाङ् न्‍हाङ् कानिङ् निसुम्‍ङाहा चेॽयामाङ् खेम्‍मेॽमेनेनिन॥ ङ्‌खाॽनिङ्‌गो न्‍निङ्‌दा च्‍हेन कानिङ् लुॽनेनिन्‍हा चेॽया पात्‍ते न्‍जोग्‍वाम्‍गान॥ का न्‍निङ्‌दा कायुङ्‌लेनबेॽहा चेॽया लुॽनेनिन, ङ्‌खोङ्‌चा का बिस्‍वास न्‍जोङ्‌मेकान्‍हाभोङ्, वालोक्‍का उतुम्‍बे लुॽनेनिन्‍भोङ् गो झान इमिन बिस्‍वास चोङ्‌मेकाहा? वालोकपाहाङ् उङ्‌खुबा याॽमिगा उच्‍या से वालोकपे ख्‍यामा, हेकोहा इसा चा ङ्‌ख्‍यामानिन्‍हा॥ इजिरेलिचि इसा चा मेॽनिङ्‌ना सुन्‍नेना ठोङ्‌बे ङ्‌वायानिङ् मोसाङा पित्‍तालगा पुछाक चोगुहोङ् सिङ्‌ङा थेन्‍दुना लोॽवा याॽमिगा उच्‍या चा तो थेम्‍मेॽना॥ न्‍हाङामाङ् इसा-इसाङा उङ्‌बे बिस्‍वास न्‍जोग्‍वा ङ्‌खाचिङा हेॽनिङ्‌चा मेन्‍सिमाना हिङ्‌लुङ् न्‍दोक्‍त्‍वाना॥ निङ्‌वाफुमाङा कायुङ्‌लेनबेॽहा याॽमिचि प्‍याक उलुङ्‌मा तुक्‍तुचिहोङ्‌माङ् उका एकोना उच्‍या चा पिचि॥ ङ्‌खोङ्‌माङ् उङ्‌बे बिस्‍वास चोक्‍खुबा इसा चा न्‍सिमेनिन, ङ्‌खाॽनिङ्‌गो हेॽनिङ्‌चा मेन्‍सिमाना हिङ्‌लुङ् न्‍दोक्‍त्‍वाना॥ निङ्‌वाफुमाङा कायुङ्‌लेनबेॽहा याॽमिचि आप्‍दिक एम्‍मागा उका उच्‍या पाक्‍सुना मेन्‍ना, ङ्‌खाॽनिङ्‌गो ङ्‌खाचि उङ्‌भाङ् ङ्‌हिङ्‌निभोङ् पाक्‍सुना ओम॥ इसाङा उङ्‌बे बिस्‍वास चोग्‍वा, न्‍ना दान्‍डाबे ङ्‌ङामेन, ङ्‌खाॽनिङ्‌गो बिस्‍वास मेन्‍जोक्‍खुबागा गो ओन्‍दाङ्‌माङ् निरिक लेक्‍साब्‍यामाहा, इजाङ्‌बाङ्‌निङ् उङा निङ्‌वाफुमागा एको सेॽना उच्‍याबे बिस्‍वास न्‍जोगुक्‍सुन॥ निरिक खा चेॽयाभाङ् लेङ्‌मेहा, जोति कायुङ्‌लेनबे तायामा, ङ्‌खाॽनिङ्‌गो याॽमिचिङा जोति हाक्‍निङ् कुइम्‍नामाङ् साप न्‍थाक्‍तु, इजाङ्‌बाङ्‌निङ् ङ्‌खाचिगा काम इसिॽहा साया॥ इसिॽहा काम चोक्‍खुबा घाकङा जोति उङ्‌चि साप न्‍थाक्‍त्‍वानिन न्‍हाङ् उङ्‌चिगा इसिॽहा काम जोतिबे ओमेहाभोङ् किसिॽमाङा ओम्‍नाबे न्‍दामेनिन॥ ङ्‌खाॽनिङ्‌गो सात्‍याताबे लाम्‍खुबा याॽमि च्‍हेन जोतिबे तामेॽना॥ खाॽला उका काम निङ्‌वाफुमाभाङ् लेक्‍साहा ओमभोङ् उचुन ओमेहा॥”

न्‍हाङा येसु उका चेलाचिनुङ् याहुदिया लिङ्‌खामबे ख्‍याहोङ् न्‍नाबे ङ्‌खाचिनुङ् एहिलेन वाया, न्‍हाङ् बाप्‍तिस्‍मा पिचि॥ ङ्‌खिङ्‌बेला युहान्‍नाङा सालिमगा उयुम्‍बेॽना एनोन बाङ्‌ना ठोङ्‌बे बाप्‍तिस्‍मा पिॽमास्‍या, इजाङ्‌बाङ्‌निङ् न्‍नाबे प्‍याक माङ्‌च्‍वा वाया॥ न्‍नाबे याॽमिचि बाप्‍तिस्‍मा लियाचोक्‍से न्‍दायामासा॥ (ङ्‌खिङ्‌बेला सोम्‍मा युहान्‍ना छेक्‍पाङ्‌बे ङ्‌ङायामासान॥)
ङ्‌खिङ्‌बेलामाङ् युहान्‍नागा चेलाचि एको याहुदि याॽमिनुङ् सुद्‌दा लेङ्‌माना चेॽयागा उतुम्‍बे लुखुसा न्‍जाया॥ ङ्‌खाचि युहान्‍ना वायानाबे न्‍दायाहोङ् न्‍लु, “चिन्‍खुबा, यार्दान होङ्‌मागा योप्‍पारिक न्‍दानुङ् एको याॽमि वाया, न्‍नागा उतुम्‍बे न्‍दा कानिङ् गाबाहि पियामासागा॥ उङा लोप बाप्‍तिस्‍मा पिॽमासिमेॽना न्‍हाङ् घाक याॽमि उकाबेॽले खेॽमा न्‍सिमेहा॥”
युहान्‍नाङा पोलोवा पिचि, “निङ्‌वाफुमाङा वालोकपाहाङ् मेम्‍बिॽले सोम्‍मा याॽमिङा इहाचा तोक्‍मा ङ्‌यास्‍वान्‍हा॥ ‘का खिरिस्‍ट मेॽङान्‍ना, का गो उका ओन्‍दाङ्-ओन्‍दाङ् निङ्‌वाफुमाङा पाक्‍साङ्‌ना याॽमिसेॽङान’ भोङ् लुॽनेनिनाहा चेॽया न्‍निङ्‌दा आफाइ खेप्‍सुक्‍सुम्‍गा॥ इसानुङ् थाङ्‌स्‍योङ्‌मा वान्‍ने, न्‍नामाङ् थाङ्‌स्‍योङ्‌बा ओम॥ थाङ्‌स्‍योङ्‌बागा उयुम्‍बे येप्‍खुबा उकाम्‍निभाकङा उका ओसेम्‍ला खेप्‍स्‍वाहोङ् इब्‍बे-इब्‍बे चोन्‍सिमेॽना॥ न्‍हाङामाङ् आका ना आनान्‍दा हाकु पुरा लेक्‍सामा॥ हाकु उङ् पुसाङ् खेॽमा न्‍हाङ् का च्‍हेन छुसाङ् खेॽमा आवास्‍याक्‍ना॥”

तोन्‍धाङ् उङ्‌खुबा च्‍हेन घाक हाक्‍निङ् माडाना॥ कायुङ्‌लेनबे वाम न्‍लेक्‍साहा याॽमिचि च्‍हेन कायुङ्‌लेनगा न्‍लेङ्‌मे, न्‍हाङ् कायुङ्‌लेनगा चेॽया न्‍जेक्‍त्‍वा॥ वालोकपाहाङ् उङ्‌खुबा च्‍हेन घाक हाक्‍निङ् माडा ओम॥ उङा निसुहा नुङ् खेप्‍सुहा चेॽयामाङ् ल्‍वाचि, ङ्‌खाॽनिङ्‌गो उङा लुचिहा चेॽया इसाङा चा पात्‍तेन्‍जोग्‍वानिन॥ ङ्‌खाॽनिङ्‌गो उका चेॽया पात्‍तेचोक्‍खुबाङा च्‍हेन निङ्‌वाफुमा जेप्‍पा ओम बाङ्‌ना चेॽयागा गाबाहि पिवाचि॥ निङ्‌वाफुमाङा पाक्‍सुनाङा च्‍हेन निङ्‌वाफुमागा चेॽया चेक्‍त्‍वा, इजाङ्‌बाङ्‌निङ् निङ्‌वाफुमाङा उङ् छिक्‍मा मेयामानुङ्‌गा प्‍याक पाबित्‍तारा आत्‍मा पिवा॥ निङ्‌वाफुमाङा उका उच्‍या उलुङ्‌मा तुक्‍त्‍वा न्‍हाङ् घाक चेॽया उका उमुकपे पिक्‍सु॥ इसाङा निङ्‌वाफुमागा उच्‍याबे बिस्‍वास चोग्‍वा, न्‍नानुङ् हेॽनिङ्‌चा मेन्‍सिमाना हिङ्‌लुङ् वामे॥ इसाङा निङ्‌वाफुमागा उच्‍यागा आग्‍गे पालाना न्‍जोग्‍वान, न्‍नाङा हेॽनिङ्‌चा मेन्‍सिमाना हिङ्‌लुङ् न्‍दोक्‍त्‍वान्‍ना, ङ्‌खाॽनिङ्‌गो निङ्‌वाफुमागा दान्‍डा उङ् छोङ्‌बे वान्‍नुङ्‌मेहा॥

Hør på युहान्‍ना 3