If you would like a copy of this version please contact info@davaraudiobibles.org

Ladakhi New Testament, CC-BY-SA-4.0, The Love Fellowship. Ladakhi New Testament Audio Bible, CC-BY-SA-4.0, Davar Partners International, The Love Fellowship, 2022.

Ladakhi New Testament

Ladakhi Bible by The Love Fellowship is licensed under Creative Commons Attribution-ShareAlike 4.0 License.

تینے حضرت عیسیٰ مسیح کھونگونلا رومسگون گیُودتے لابچیس گوزوگ زادس، ”میجیگی کھورانگی جینّگا رگون ژُوگستے گیانگسکور تانگس۔ رگون تسیرسے ناسّا ٹوس، یانگ رگونتشاسلا ستاچیسّی پھیا ناسّا تھونپو سیگس۔ تینے رگونتشاسپو جان جینگبادپاگونلا شاسلا تانگستے کھورانگ ژانیولجیگّا دوگّا سونگ۔ ستونتھوگی توسلا رگونتشاسّی سکالّا لینّالا کھوے کھورانگی یوگپوجیگ شاسلا تانگکھانگونّیکا لامچوگس۔ اِین نانگ کھونگونی یوگپوبو زومستے ردونگس، یانگ کھو لاگستونّگا لوگستے لامچوگس۔ جینگی داگپوے جانیانگ یوگپوجیگ لامچوگس، اِین نانگ کھونگونی کھوا گویکا ردونگس یانگ ٹھیلبا ستانس۔ جانیانگ یوگپو لامچوگکھانبو سادس۔ کھوے جان یوگپو مانگپو لامچوگکھانگونّانگ تینّا ژوگس چوس، کھاچیگّا ردونگس، یانگ کھاچیگ سادس۔ تا لامچوگالا چیگ چیگ لوستے یودپین، کھورانگی چیسپا چوکھانّی بُوژا۔ ستینگجوگا جینگ داگپوے کھو لامچوگستے، ’کھونگونی تانتانلا نگے بُوژا سیوا چوانوگ‘ سام۔“
”اینّانگ شاسپاگونّی چیگ تانگ چیگّا زیرس، ’ای جینگ نورسکالّا تھوبچیسچانبو یونّگالا، یونگشیگ، کھو ساداین تینے کھوے نورسکالبو نگاتانّگا تھوبین۔‘ تیبویپھیا کھونگونی کھو زومستے سادس، یانگ کھوے زوگسپوبو رگونتشاسنے پھیلوگا پھانگستانگس۔“
حضرت عیسیٰ سی ٹیا زادس، ”تینے رگونتشاسّی داگپوے چی چوین؟ کھو یونگستے، شاسپاگون ساداین، یانگ رگونتشاسپو جان جینگبادپا ریگّا شاسلا تانگین۔ چی کھیوجاگونّی ہلژخمہ شوقبُو بوے نانگنے ایبو ماسیلپینّا؟
’کا ردوابو کھانگپا سیگکھانگونّی پھانمیتھوگس تھیس،
تینّا ردوابو کھانگپے ٹُوردوابو گیور
کا بو تشانگمیسانگ کھاگچان ردوابو اینوگ۔
ایبو مسیح چوا زادتے اینوگ،
تیبو تھونگتے نگاتانگ ہالاسین۔‘“
اِمام ُسکیونگون، شریعتی عالِم گون تانگ یہُودی پے اُسکیونگونلا، حضرت عیسیٰ سی زومچیسّی دودپا یودپین، چیازیرنا رومسپو کھونگونی گیابگالّا شادتے اینکھانبو ہاگو۔ اِین نانگ کھونگون میتشوگس چھینموا جیگسشیسپے حضرت عیسیٰ سی بورتے تیکانے سونگ۔

ستینگنے اُسکیونگونی، فریسی پا کھاچیگ تانگ ہیرودِیس چھوگسپا کھاچیگ حضرت عیسیٰ مسیح مولکھانّی سپیراریگ گیُودتے کھونگ کھادچوگچیسلا لامچوگس۔ کھونگون یونگستے کھونّگا زیرس، ”لوبپونلے، نیرانگ ٹانگپو زادکھانبو نگاجا گیوسیود۔ نیرانگی می نانّگا یاپھیس زادّا مانوگ چیازیرنا نیرانگی کھونگون سو اینکھانبویکا سنانّگا مازادّا ٹانگپو نیامپو خُدے لامیکا ڈولچیس لابّا زادّانوگ۔ رومی گیالپوا ٹھال شالچیسپو اوسپا اینّوگا یا مانوگ؟ نگاجا گُونی ٹھال شالگوسّا یا ماگوس؟“
کھونگونی کھاچھوس چوکھانبو کھیینتے حضرت عیسیٰ سی مولس، ”چیا نگا سپیرے نانّگا سکارچیسّی سونڈوس چواد؟ رومپے مولّی پینے جیگ کھیونگستے نگا ستونّانگ۔“ کھونگونی پینیجیگ کھیونگس، یانگ کھونگی ٹیا زادس، ”ای پینیکا یودکھانّی پار تانگ مینگ سوی اینوگ؟“
کھونگونی لانتانگس، ”رومی گیالپوے۔“
حضرت عیسیٰ سی کھونگونلا مولس، ”گیالپوے اینکھانبو گیالپوا تونگ یانگ خُدے اینکھانبو خُدا پھول۔“ کھونگی لان سالکھانبویکا، کھونگون ماثانٹے ہالاس۔

تینے شیکھانگون سونتیا لانّگا مانوگ زیرکھانّی صدُوقی پاگون حضرت عیسیٰ سی یودسا ٹیواجیگ ٹیالا یونگس یانگ زیرس، ”لوبپونلے حضرت مُوسیٰؔ سی نگاتانگونلا ٹھیمسشیگ سالّا زادتے دوگ، کالتیس بُوژا جیگ ٹھوگو میدپا شینا، کھوے فونو یا نوے ماگپا شیکھانّی بوموا ناما چوستے، شیکھانبوے میرگیود لوسشیسّی پھیا ٹھوگو سکییچوگ گوس۔ تا فونو نو ردون یودپین، فونو چھیشوگپوے باگما چوس، یانگ ٹھوگو میدپا شی۔ تینے نو نییسپابوے، انے مارانگموبو نیامپو ناما چوس، اِین نانگ کھوانگ ٹھوگو میدپا شی۔ تینّا ژوگس سومپابو نیامپو سونگ ماتشاد کھونگ ردونکو ٹھوگو میدپا شی، یانگ ستینگجوگا بوموبوانگ شی۔ بوموبوے کھونگ ردونکو نیامپو ناما چوسپا، شیکھانگون سونتیا لانگی توسلا کھو کھونگونی نانگنے سوی ناما گیورین؟“
حضرت عیسیٰ سی مولس، ”کھیوجے نورٹھولبو نی کھیوجاگونلا خُدے ستوبس یا ہلژخمہ شوقبُو بو ہاماگوا اینوگ۔ خُدے شیکھانگون سونتیا لانّگا زاد زانے، کھونگونی ناما میچو یا باگما می تانگ، کھونگون نامکھے فرشتا ژوگس گیورین۔“
”اینّانگ شیکھانگون سونتیا لانگسچیسّی سکوربو، کھیوجاگونّی حضرت مُوسیٰؔ سی ڈِیستے یودکھانّی شوقبُوئ نانّگا ماسیلپینّا؟ لچانگما میا بارکھانّی رومسّی نانّگا خُدے حضرت مُوسیٰؔ مولّا زادس، ’نگا نی، حضرت اِبراہیم خُدے، حضرت اِضحاقؔ گی خُدے تانگ حضرت یعقُوبؔ ی خُدے این۔ کھونگ نی شیکھانگونّی خُدے مانپا، سونپوگونّی خُدے اینوگ۔ کھیوجاگونّی نورٹھول چھینمو چوستے اینوگ۔‘“

ڈولدورلا نیانین، تیرو شریعتی عالِم جیگ یودپین۔ حضرت عیسیٰ مسیح لان گیالّا سالکھانبو تشورتے کھوے حضرت عیسیٰ سی ٹیس، ”حُکم تشانگمے نانگنے کا بو تشانگمیسانگ کھاگچان اینوگ؟“
حضرت عیسیٰ سی لانسالس، ”تشانگمیسانگ حُکم کھاگچانبو نی ایبو اینوگ ’نیون وا بنی اِسرائیل پاگون، مسیح نگاتانگونّی خُدے، مسیح چیگ چیگ جُوگستے اینوگ۔ مسیح کھیوجے خُدا سنینگ گانگپو، سیمس گانگپو، سامبا گانگپو تانگ ستوبس گانگپونے چیسپا چوس۔‘ نیسپابو، ’رانّگا چوکھان ژوگس کھیرانگی کھییمتشیسپا چیسپا چوس‘ ایگونّی سانگ چھیا جانیانگ کاگیاجیگ مید۔“
شریعتی عالِم بوے لانتانگس، ”گیالّا مولس لوبپونلے، نیرانگی خُدے چیگ چیگ مانے، جانیانگ میدتے اینوگ مولچیسپو ٹانگپو مولتے اینوگ۔ میے نانّگا قُربان تانگ ثوگی چھودپا تشانگما پھولچیسّی سانگ مانّگا کھاگچان خُدا سنینگ گانگپو، ہاگو گانگپو تانگ ستوبس گانگپونے چیسپا چوچیس ماتشاد رانّگا چوکھان ژوگس کھیرانگی کھییمتشیسپا چیسپا چوگوشیسپو اینوگ۔“
کھوے ما شیسرابسچانّی لانتانگکھانبو کھیینّا زادتے حضرت عیسیٰ سی کھوا مولس، ”خُدے گیالثیدنے کھیرانگ تھاگرینّگا میدوگ۔“ تے جاگنے پھارلا سوجیگیانگ کھونّگا ٹیوا ٹیچیسّی ہامپا ماچوس۔

حضرت عیسیٰ مسیح میگونلا بیت المقدِس سی نانّگا لابجا سال زانے، کھونگی ٹیا زادس، ” شریعتی عالِم گونّی خُدے لدامّا زادکھانّی مسیحا، گیالپو حضرت داؤد ّی اولاد اینوگ کازوگی زیرّانوگ؟ حضرت داؤد، کھورانگی ہلژخمہ رُوح گیُودتے ایزوگ زیرس،
’خُدے نگے مسیحا مولس،
نگے کھیرانگی ڈاو تشانگما،
کھیرانگی کانگپے یوگا بوربور تشوگپا،
کھیرانگ نگے لاگپا یاسپے ٹھیسّیکا دوگ۔‘
کالتیس حضرت داؤد ّی مسیحا ’مسیح‘ زیرّادنا، تینے کازوگی مسیحا کھوے اولاد اینوگ؟“ میتشوگس چھینموے کھونّگا گامو نیامپو نیانّادپین۔
لابجا سال زانے حضرت عیسیٰ سی مولس، ” شریعتی عالِم گونّی کانے شانگ چوس۔ کھونگون شریعتی کوسلاگ رینگمو گونتے ڈولّالا، یانگ ٹھومسّی نانّگا میگونّی کانے سیوا تھوبچیسلا تھادّانوگ۔ مجلِسی نانّگا سیواچانّی ناسّیکا یانگ ڈونّی نانّگا ڈالگوا دوگّالا تھادّانوگ۔ انے مارانگموگونلا گوبسکورتے کھونگی کھانگپاگون کھیرچیس، یانگ میگونلا ستانچیسّی پھیا دُعا رینگمو جُودوگ۔ تیبوے جاستے کھونگونلا چھادپا ثانٹے پھوگین۔“

بیت المقدِس سی نانّگا حضرت عیسیٰ مسیح پینے لدوچیسّی گھامّی لدُونلا سیکا جُوگستے تینانّگا پینے پھولکھانّی میتشوگسلا زیگسّادپین۔ می چھوگپو مانگپوے پینے مانگپو پھولس۔ نیالباچان انے مارانگموجیگ یونگستے زانگسّی پینے نیس پھولس، کا بو ما نیونگون رینگتھانگچانّی پینیبو اینپین۔
حضرت عیسیٰ سی کھونگرانگی لوبٹوگسگون بودّا زادستے مولس، ”نگے کھیوجا لدینبا زیرّاد، ای انے مارانگمو نیالباچانبوے بولّدوسّی گھامّی نانّگا پینے جان تشانگمے سانگ مانّگا پھولس، کھونگ تشانگمے کھورانگّونلا مانگپو یودکھانّی نانگنے نیونگونجیگ تانگس، اِین نانگ ای انے مارانگموبوے نیالباچان اینتیانگ کھو سونتیا لوسشیسّی گھوسدوم یودکھان تشانگما تانگس۔“

Hør på مارکوس 12