If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

जेबा यीशु देहुरे रे बरांडे में इंदअ लागअ थी, तेबा तेऊरे चेले देहुरे री बनाबटा रिहाउंदे तेऊ सेटा बे आउए। तेऊ तयाबे बोलू, तमे यह सब हेरदे लागदे! हाऊं तमाबे सच बोला, अखे पाथरा पैंदे पाथर भी नांई छुटणअं जोह नांई ढोलणअ ।

जेबा सह जैतूना पहाडा पैंदे बेठअ दअ थी, तेबा चेले एकान्ता में तेऊ सेटा इच्छी करे बोलू, हामा बे खोझ कि या गला कधु हूँणी? तेरे ईहंणे रा होर संसारा रा अन्त रा कैह चिन्ह हूँणा? यीशु तयाबे उतर दीना, साबधान रहा! कोई तमा ना भरमाई पाए, किबेकि बहू एडे हूँणे जासू मेरे ना का इच्छी करे बोलणा, हाऊं मसीह साहा, होर बहू भी भरमाउंणे। तमा लड़ाई होर लड़ाई री चर्चा शुंणनी, तेबा नांई डरे किबेकि याह रा हूँणा जरूरी साहा, पर तेऊ वक्ते अन्त नांई हूँणा। किबेकि जाति पैंदे जाति, होर राज्य पैंदे राज्य चढाई करणी, होर जागा-जागा पैंदे अकाल पड़ने, होर ज़ाज़री हूँणी। या सबे गला दाहु री शुरुआत हूँणी।
तेबा क्लेश दींणे री तणी तमे ढाकणे बझयाल़णे, होर तमे मारी पाउंणे, होर मेरे ना री बजा का सभी जाति रे लोका तमे संघे बईर डाहंणा। तेबा बहू कै ठोकर खाणी, होर एकी दूजे ढाकणे बझयाल़णे, होर एकु दूजे संघे बईर डाहंणा। बहू जेहे झूठे भविष्यद्वक्ता खड़े हूँणे, होर बहू भरमाउंणे। अधर्मा रे बडने का बहू रा प्रेम ठाण्डा पडणा, पर जोह अन्त तणी धीरज धरी रहलअ, तेऊरा उद्धार हूँणा। होर राज्य रा यह सुसमाचार सारे संसारा में प्रचार करे करना, कि सभी जाति पैंदे गुआही हो, तेबा अन्त इहंणा।


एतकी तणी जेबा तमे तेऊ उजाड़णे आली घृणित चीजा बे जासू की चर्चा दानिय्येल भविष्यद्वक्ता रे का होई, पवित्र ज़ागा में खड़ी होई हेरा (जोह पढ़े सह समझे), जेबा जोह यहूदी में हो त्या पहाड़ा बे नाहे। जोह छता पैंदे हो, त्या आपणे घरा मेझा का समाना नीदे नांई ईछे; होर जोह खेछे हो, त्या आपणे झिकड़े आणदे पीछे नांई फिरे।
त्या दुही में जोह सुइंदी होर दुधा पलाउंदी होली, तयाबे हाय। होर प्रार्थना करा की तमा सर्दी री धयाडी या सब्त री धयाडी का ठुरणा नांई पड़े। किबेकी तेऊ वक्ते एडा ज्यादा क्लेश हूँणा, जेड़ा संसारा में पहिले का एबरे तणी ना होऊ होर नाह कधी हूँणा। किबेकी सह त्याहा धयाडी थोड़ी नांई करलअ तेबा एक भी मणशा रा शरीर नांई बचणा। पर त्याह चुनीदे री बजहा का तेऊ थोड़ी धयाडी घटाऊणी। त्याह धयाडी तमावै कुछ बोले, हेरा मसीह अखे साहा! या तखे साहा, तेबा तमे त्याह री गला रा बुशाह नांई करे।
किबेकि झूठे मसीह होर झूठे भविष्यद्वक्ता खड़े हूँणे, होर बड़े चिन्ह, होर बड़े अदभुत काम रिहाउंणे कि अगर होई सके कि चुनीदे भी भरमाउणे। हेरा, माईए तमावै सारी गला पहिले खोजी। एतकी अगर त्या तमाबे बोले, हेरा सह बूणे साहा, तेबा बागे नांई निखल़े; या हेरा, सह कोठरी में साहा, तेबा बुशाह नांई करे।
किबेकि जेहडी बिजली पुर्बा का निखल़ी करे पशिचम तणी चमका, तेहडे सावै मणशा रअ शोहरू भी आपणी धयाडी में प्रगट हुणअ। जखे लास साहा, तखे शषणी भी कठे हुणी।


त्या धियाड़ी रे क्लेशा रे तेभरी बाद ध्याडअ न्याहरा हूँणअं, होर जोहथा रा सामर्थ्य नाहंदा रहंणा, होर तारे सरगा का पडने होर सरगा री शक्ति हिलाउंणी। तेबा मणशा रे शोहरू रा चिन्ह सरगा मेंजे हेरणा, होर तेबा धरती रे सभी कुला रे लोका हिक ठोकणी, होर मणशा रे शोहरू बे बड़ी सामर्थ्य होर बैभब संघे सरगा रे बादला पैंदे इहंदे हेरने। त्या तुरही रै बड़े वाजणे संघे आपणे दूत भेज़णे, होर त्या सरगा रे एउ छोरा का तेऊ छोरे तणी, चहु दिशा का तेऊरे चुनीदे कठे करणे।


अंजीरा रे बूटे का यह दृष्टान्त सिखा जेबा तेऊरी डाल़ी नर्म हूँदा होर पाच निखदे लागा तेबा तमे जाणा कि गर्मी रे धयाडे नेड आउये। एसी रीति का जेबा तमे याह सभी गला हेरा, तेबा जाणना की सह नेड साहा, दुआर सेटा ही साहा। हाऊं तमाबे सच बोला कि जेबरे तणी या सभे गला पूरी ना हो, तेबरे तणी एसा पीढ़ी रा अन्त नांई हूँणा। सरग होर धरती टल़नी, पर मेरी गला कधी नांई टल़णी।


तेसा धियाड़ी तेऊ वक्ता रे बारे में कोहे नांई जाणदे नाह स्वर्गदूत होर नांई शोहरू पर एक स्वर्गीय बापू जाणा। जेड़े नूहा रे धयाडे थी, तेहडा ही मणशा रे शोहरू रा इहंणा हूँणा। किबेकि जेड़े जल प्रलय का पहिले रे धयाडे में, जासू धियाडी तणी कि नूह जहाजा में नांई चढने तणी, तेसा धियाडी तणी लोका खांदा पींदा थी, होर त्यामें ब्याहा हूँदा थी। होर जेबरे तणी जल प्रलय इच्छी करे त्या सभे नांई बहाई, तेबरे तणी त्या किछे भी पता नांई पडू; तेडे ही मणशा रअ शोहरू रा इहंणा भी हूँणा। तेऊ वक्ते दुई मणश खेचे हूँणे, एक निणअं होर दूजअ छाडणअं। दुई बेटड़ी घरटे पीश्ती हुणी, एक नीणी होर दूजी छाडणी। एतकी तणी ज़ागदे रहा, कि तमे नांई ज़ाणदे कि थारअ परमेश्वर कासु धियाड़ी इहंणअं। पर यह जाणा कि अगर घरा रअ मालक जाणा हूँदअ कि चोर कासु पहरे इहंणअं तेबा जागदे रहंदा, होर आपणे घरे चोरी नांई हूँणे दींदअ। एतकी तणी तमे भी त्यार रहा, किबेकि जासू घड़ी रे बारे में तमे सोचते भी नांई आंह्धे, तेसी घड़ी मणशा रअ शोहरू इहंणअं।


पर सह बुशाह लायक होर बुद्धिमान नोकर कुण साहा, जो मालके आपणे नोकरा चाकरा रअ सरदार डाहू कि वक्ता पैंदे तयाबे रोटी दे? धन्य साहा सह नोकर ज़ासरअ मालक इच्छी करे एडा ही करदे हेरे। हाऊं तमाबे सच बोला, तेऊ सह आपणी सारी सम्पति रअ अधिकारी डाहंणअं। पर अगर सह दुष्ट नोकर मना में सोचदअ लाग कि मेरे मालका रे ईहंण में देर साहा, होर आपणे संघी नोकरा चिकदअ लागे होर झूटण आल़े संघे खाए झूटे। तेबा तेऊ नोकरा रे मालका एडे ध्याड़े इहंणअं, जेबरे सह तेऊरी निहाल़ा में नांही होलओ, होर एडे वक्ते ईहणअ जासू वक्ते थोगे नांई लागे। तेबा मालक तेऊबै भारी ताड़ना दींणी होर तेऊर भाग कपटी संघे डाहंणा तखे लेरना होर दाँदा रा चाबणा हूँणा।

Hør på मत्ती 24