Hadiyya - 1992 BSE Non-Drama (NT)

Hadiyya - 1992 BSE Drama (NT)

Shaashshiqqi Uguda yakkam Qorosho'i Uguxxi balli hincaa hee'ukko. Qeessa awwonsaanii Seera losisaanii Yesuusa shiteena manna baddito'i bikkina hinkid issita'a shitamda'e e'lloo googo hassam hee'llo'o.


Ee lasage tommiinsii lam losaaniinsii mat hee'u Asqorotokkichchi Yihudanne Sheexaanchi aagukko. Ixxim qeessa awwonsaaninnee Keesammi Mine egettam keeninnee Yesuusa ixxuwwina hinkid issaa uwwooda'e a'llamukko. Ixxuwwim liiranta'a diinate uwwiteena iittanto'o. Yihudim ee woshshanne iittamaa manni bee'i beyyonne higisaa uwweena makki ammane hasam hee'ukko.


Shaashshiqqi Ugudina geex ambula durakkam Qorosho'i Uguxxi balli afukko. Ee bikkina Yesuusim Pheexiroosaa Yohaannisaa «Mattakka'a uguxxi hurbaata intona gudissehe» yaa asse'ukko. Ixxuwwim ixxena dabatta'a «Uguxxi hurbaata hannonne gudinso?» yita'a xa'mmito'o.
Yesuusim ixxuwwina dabaraa «Oono'o! Mattakka'a beero'o aaggakkam ammane wo'i harachcho iyyaakkoo mat manchinne edantakkamo. Oo manchi aagoo mine awwontakka'a aaggehe. Ee mi'n annichchinam ‹Losisaanchi «I losaaninne maqirem uguxxi hurbaata itoommi koyyi min hannonnette?» yoolla› yi'llehe. Oo mi'n annichchim hundem luwwim gudaakkoo haraar mine fooqanne moo'isookko; eekke'enne gudissehe» yukko. Ixxuwwim Yesuus kurukkisam luwwi hundim ihaa siiddo'o; Shaashshiqqi Uguxxi maaddi hurbaatam ee beyyonne gudisso'o.
Hurbaata itakkam amman afukkaare Yesuus ixxi asse'amaaninne maqirem hurbaata iteena afuurukko. Yesuusim ixxuwwina «An hawwonne aageena illageen ki'nnuwwinne maqire ka uguxxi hurbaata iteena lobakata mixam hee'ummo. An ki'nnuwwina kuroommo; ka uguxxi hurbaaxxek tirat Waa'i adillanonne caakkaa la'ameebe'e ka lasage uguxxi hurbaata hore'em itoommoyyo» yukko.
Ee lasage Yesuus humbullonne yoo woyi'n diqaasa ki'isaa amadaa Waa'a galaxxukko. Ixxim «Hii'nnehe; kaka ki'nnuwwi baxxammehe. An ki'nnuwwina kuroommo; kabadiinsi ki'isaa Waa'i adillan waareebe'e woyi'n mishiinsi ciinsamu diqaasa agoommoyyo» yukko.
Odim qorosho'om ki'isaa amadaa Waa'a galaxxukko. Ee qorosho'om iiqaa ixxi losaanina «Kuk ki'nnuwwina uwwamu i maara; ki'nnuwwi kaka eese tiirimmina issehe» yaa uwwukko. Ee'isam hii'm hurbaata itta'a lasage humbullonne yoo woyi'n diqaasam ki'isaa amadaa «Kuk ki'nnuwwi bikkina dunamoo i xiiginne wo'mmoo haareechchi hidiro.
«Oono'o! Eese higisaa uwwoo manchi ka maaddanne iinninne maqirem itoolla. Manchi Beeta'i yamamukkisam lehookko; ihukkaarem ixxo higisaa uwwoohaannina aayye!» yukko. Ee bikkina ixxuwwina'i ixxuwwim «Ni woriinsi kaka issookkok ayyette?» yita'a xa'mmaqancha asheetto'o.

Losaanim issena'i issem «Niinniinsi lophphookkok ayyette?» yita'a fitanto'o. Yesuusim ixxuwwina «Mulli minaadaphphi adilluwwi minaadabanne moollannooma moo'ixxitamo. Ee minaadaphphi gassaanim minaadabina eroomma issitam keeno yamantamo. Ihukkaarem ki'nnuwwi ee'isa ikkakkotte. Ki'nnuwwi lambe'iinsi loban ihookkok hoffan ihona. Moollanni ihookkokim awwaadaanchi ihona. Afuuraa itoohaanniinsii uullaa itisoohaanniinsii hinki lobane? Lophphookkok afuuraa itoohaneyyonnihe? Ee'isam an ki'nnuwwi lambe'enne awwaadaanchisa.
«Eesenne afu hawwonne hundannem ki'nnuwwi iinninne maqirem qoxxitakka'a uullitakko'ookko. Iyyanni iina gassimmi malaayye uwwukkisam anim ki'nnuwwina gassimmi malaayye uwwoommo. Ki'nnuwwim i adillanonne maaddiinsi ittakkamoo aggakkamoo. Odim adilla'n barcumanne afuuttakka'a tommonnee lamem Isra'ee'l sullonnee oogattakkamo» yukko.


Moollannim «Simi'oona, Simi'oona! Oono'o! Sheexaanchi ki'nnuwwa arasisa ufeeseena xa'mmaakko. Ihukkaarem at ki amma'nnatiinsi ubboobee'isa an ki bikkina Waa'a uunxaammo. At saxxitaa daba'llitti ammane kiyyabbaayyuwwa qoxxise» yukko. Pheexiroosim Yesuusina «Moollanna! An kiinninne maqire karameenaa leheenaa gudaammo» yukko. Yesuusim ixxena «Pheexiroosa, an kiina kuroommo; at ‹Ixxo la'oommoyyo› yitaa eese sas kore laggeebe'e ka hiimo antabaa'i muunooyyo» yukko.
Ee lasage Yesuus ixxi losaanina «An ki'nnuwwa gonoona, canaa caamma'aa amaddakkoo'nnim asse'ummi ammane ki'nnuwwina mah hanqatukko?» yaa xa'mmukko. Ixxuwwim «Mahim hanqatukkoyyo» yita'a dabatto'o.
Yesuusim ixxuwwina dabaraa «Ihukkaarem kaba gonoon yookkok gonoonam amaxxona. Can yookkokim cana amaxxona. Bisa'i bee'ekim eddechcha biteesaa mat bisa'a bita'llona. An ki'nnuwwina kuroommo; ‹Boqqi keeninne xigamukko› yamamaa kitaabamu woshshi eesenne wo'mmimmi hasisookko. Mashka'oomim i bikkina kitaabamu woshshi hundim wo'mmoo'isinatte» yukko. Ixxuwwim «Moollanna! Moo'e; kuno'o, lam bisa'i keyye yookko» yito'o. Yesuusim ixxuwwina dabaraa «Ihookko» yukko.


Yesuusim beero'iinsi firaa eraare losukkisam Wee'l duuna firukko. Ixxi losaanim ixxo awwonta'a matto'o. Wee'l duuna afaa ixxi losaanina «Keennaanchonne aaggakkambee'isa Waa'a uunxehe» yukko.
Ixxim ixxuwwiinsi kina huushakka'a afisakkamqax beyyo qee'llaa maraa guruphphaa «Iyyanna! Ki doo'l ihulas ka hawwi humbullo at iinniinsi higise. Ihukkaarem i doo'llisa ihoo'n ki doo'llisa ihona» yaa Waa'a uunxukko. Ee ammanem Waa'i asse'amaanchi iimaniinsi waaraa ixxo qoxxisukkuuyyi ixxena moo'amukko. Ixxim u'nnanne hee'u bikkina qoxxaa Waa'a uunxukko. Ixxeensi firoo biincim xiiqqisa uullanne daadam hee'ukko. Waa'a uunxatiinsi ki'aa losaa'n beyyo maru ammanenne losaan kichchechchiinsi ki'ukkok diriitta'a hee'llo'o. Ixxim dabaraa «Mahina diriittakkamuulla? Keenanchanne aaggakkambee'isa baqitakka'a Waa'a uunxehe» yukko.


Yesuus woconam ixxi losaa'nnek tommiinsii lamiinsii mat hee'u Yihud awwonsaakkoo dut manni waarukko. Ixxim Yesuusa suunqeena hincukko. Ihukkaarem Yesuus ixxena «Yihuda, Manchi Beeto suunqimminne higissaa uwwitoohonnihe?» yukko.
Woshshika duuha'a ixxi losaan moo'llo'i ammanenne «Moollanna! Ka manna bisa'inne aphphinsonnihe?» yito'o. Ixxuwwiinsim mat manchi hundiinsi lob qeessichchina awwaadaanchika makki kolli macce aphphisaa murukko.
Ihukkaarem Yesuus «Od la'mmeka eddoobee'isa» yaa ee awwaadaanchika macce amadaa fayyiisukko. Ee lasage ixxo amaddeena waatto'i qeessa awwonsaano, Keesammi Mine egettam keeno, ijaajaanoo lommannaa «Fanga amadakkamisa eese amaddakkeena bisa'aa mugaa amaddakka'a waattakko'onnihe? An ballina ballina Keesammi Minenne ki'nnuwwinne hee'ummuuyyi amaddakko'oyyo. Ihukkaarem ku amman ki'nnuwwanee tuunsi gassaanchanee» yukko.


Ee lasage oo manni Yesuusa amadda'a hundiinsi lob qeessichchi mine massito'o. Pheexiroosim qee'llonne ihaa awwonam hee'ukko. Ixxuwwim qash woro'l lambe'enne giira giitta'a iibbixxiteena wixxita'a afuutto'aare Pheexiroosim ixxuwwinnem afuurukko. Ee lasage ixxim gii'l caakkanne afuuraakkoohaannonne mat awwaadaancho ixxo qoossita'a moo'lla'a «Ku manchim ixxenne maqire hee'ukko» yito'o.
Pheexiroosim «Meentichche, an ixxo la'oommoyyo» yaa lagukko. Odim hofqax ammaniinsi lasonne mat manchi «At ixxuwwiinsi mato» yukko. Ihukkaarem Pheexiroos «Mancho, aneyyo» yaa dabarukko. Mat sa'aata ihooqax ammaniinsi lasage mulli manchim «Hanqinam ku manchi Galiiliinsette ihu bikkina ixxenne maqire yoohane» yaa qoxxisaa wocukko.
Ihukkaarem Pheexiroos «Mancho, at yitoottoka an la'oommoyyo» yukko. Ee ammanchom Pheexiroos woconam antabaa'i muunukko. Moollanni Yesuusim Pheexiroosa daba'llaa moo'ukko. Pheexiroosim «Kaballi hiimo antabaa'i muuneebe'e sas kore eese laggootto» yaa Moollanni kuru woshsha tiirukko. Ee lasage ixxim ee beyyiinsi firaa shikkaa wi'llukko.

Ee ammane Yesuusa amadda'a hee'llo'i manni ganimmaa ixxonne naacimmaa asheetto'o. Odim ixxeka ille katta'a aphphissu'uuyyi «Keese aphphisukkok ayyetda'e huno'o, la'e?» yita'a xa'mmitam hee'llo'o. Lobakat mulli game'llaxxi sagalluwwam woccam hee'llo'o.


Uulli soodaa lasage minaadaphphi lommanni, qeessa awwonsaanii Seera losisaanii mat ikka'a Yesuusa ixxuwwi dummichchi beyyo massita'a «At Kiristoosatte ikkaattoolas niina kure» yita'a xa'mmito'o. Ihukkaarem ixxi ixxuwwina dabaraa «Ki'nnuwwina kurummaarem eese amma'nnitakkamoyyo. An ki'nnuwwa xa'mmumta'nnim dabattakkamoyyo. Ihukkaarem kabadiinsi ki'isaa Manchi Beet hundam xanoo Waa'i makkanne afuurookko» yukko. Ixxuwwi hundim dabatta'a «Eehaare at Waa'i Beetonnihe?» yito'o. Ixxim ixxuwwina dabaraa «Eeyya, ki'nnuwwi yitakko'isame» yukko. Ixxuwwim «Neese ni gagima'i ixxi suumiinsi macceensummo; kanniinsi lophphoo naqaash niina mahina hasisookko?» yito'o.

Hør på Luqaas Mishiraachcha 22