Kaba for CAR - ACATBA; 2020  Drama (NT)

Goe tə̂ a, Jeju pa arə dəwje kə̂ banya kə njê-njaje goe tə̂ nan: «Kula lə njê-gərəje-Ndu kə lə Parijinyɛje to kula tɔju nduje lə Mɔyijə karə dəwje. Yeenn a, maji karə ooje tade ngaâ ə-ddaje nɛ̂nje tɔyn kə̂ n̂-dujuse. A nɛ̂n-ddaje ləde â ta ə-ndajije ang, mba nɛ̂n-ddaje ləde to kâra baa kə nɛ̂n-tɔju ləde ang. Nɛ̂n-koto kə̂ ɔɔy â n̂-tɔje dundaje dɔ dəwje tə̂, a dede, ndɔn-jide kara n̂-ndikije ta kɔru nɛ̂n nɛ̂n-koto le ang. Daw ddaje nɛ̂nje tɔyn mba karə dəwje aajede. Mba yeenn bba, daw ddaje bbɔl əndaarje darə bo ngaâ daw dunguje makəturuje lə Lubba məɛ tə̂ ngaâ n̂-ddaje ta-kubbuje ləde darə ngal. N̂-ndikije nya ta kisi nɛ̂n-kisi tə̂ kə̂ to kete ta nɛ̂n-kusa tə̂ ddəm kəy mbɔn-naanje tə̂ ddəm. N̂-ndikije karə dəwje ddade lapiya natâ ngaâ karə dəwje bbarde ‹Nje-nɛ̂n-tɔju.› A sese, dang bba arəje dəwje bbarse ‹Nje-nɛ̂n-tɔju› ang. Mba sese tɔyn ə-toje to ngakɔn-naan ngaâ nje-nɛ̂n-tɔju ləse kâra baa. Ə-bbarje marə dəw kə̂ nangə̂ nəənn ‹Bɔ› ang, mba Bɔsese kâra baa kə̂ isi darâ. Arəje dəwje bbarse ‹mbay› ang, mba Kristə kâra baa â to Mbay ləse. Maji karə dəw kə̂ bo horose tə̂, ddee to nje-kula ləse. Dəw kə̂ dda rɔɛ̂ bo a, a təl ddee to dəw kə̂ tɛn. A dəw kə̂ dda rɔɛ̂ tɛn, a təl ddee to dəw kə̂ bo.»

To ndoo nya arəse, see njê-gərəje-Ndu kə see Parijinyɛje kə̂ ə-toje to njê-ngəmje. Aw ɔkuje ddəw dəwje kə̂ ndikije ta kandə Bbe-kɔn tə̂ kə̂ darâ. Sese njaa kara andəje tə̂ ang ngaâ ɔkuje ddəw dəwje kə̂ ndikije ta kandə tə̂.
[«To ndoo nya arəse, see njê-gərəje-Ndu kə see Parijinyɛje kə̂ ə-toje to njê-ngəmje. Ə-taaje nɛ̂n-kingaje lə dɛnɛ̂n-ndubbaje jide tə̂ tɔyn. A kar tə̂ənn njaa, aw dujuje Lubba arəje kure əw mba karə dəwje aajese. Mba yeenn bba sariya kə̂ dɔse tə̂ a ngəng nya.]
«To ndoo nya arəse, see njê-gərəje-Ndu kə see Parijinyɛje kə̂ ə-toje to njê-ngəmje. Aw ulaje lo dɔ ba-katə tə̂ ddəm dɔ nangə tə̂ ddəm tɔyn mba kinga marə dəw kâra karə unn gose. Bbo dəw le unn gose a, ə-ddɛɛ̂je arə n̂-ddee to dəw kə̂ asə kaw kəm puru tə̂ kə̂ aw ɔn kə ndɔ kə ndɔ utase gɔl joo bbay.
«To ndoo nya arəse, see njê-tɔjuje ddəw dəwje. Ə-paje nan: ‹Bbo dəw unda yo kə ri kəy-polo Lubba a, dda nɛ̂n ang. A bbo nunda yo kə ri andə kə̂ mə kəy-polo Lubba tə̂ a, maji karə n̂-dda nɛ̂n kə̂ nunda yo ta dda le.› See mbəje ddəm njê-kəm-tɔje ddəm! Kəy-polo Lubba â dda arə andə le ddee to nɛ̂n kə̂ dunda dang mba Lubba. Yeenn a, kəy-polo Lubba le â to nɛ̂n kə̂ ngəng wase andə le wa? Ə-paje bbay nan: ‹Bbo dəw unda yo kə ri dɔ bann a, dda nɛ̂n ang. A bbo dəw unda yo kə ri nɛ̂n-polo kə̂ to dɔ bann tə̂ a, maji karə n̂-dda nɛ̂n kə̂ nunda yo ta dda le.› See njê-kəm-tɔje! Bann â dda arə nɛ̂n-polo ddee to nɛ̂n kə̂ dunda dang mba Lubba. Yeenn a, dɔ bann le â to nɛ̂n kə̂ ngəng wase nɛ̂n-polo le wa? Dəw kə̂ unda yo kə ri dɔ bann, unda yo kə ri bann le ddəm unda yo kə ri nɛ̂n tɔyn kə̂ to dɔ bann tə̂ le ddəm. Dəw kə̂ unda yo kə ri kəy-polo Lubba, unda yo kə ri kəy-polo le ddəm kə ri Lubba kə̂ to mə kəy-polo tə̂ le ddəm. Dəw kə̂ unda yo kə ri dara, unda yo kə ri ngende-mbay lə Lubba ddəm ri Lubba kə̂ isi dɔ ngende-mbay tə̂ le ddəm.
«To ndoo nya arəse, see njê-gərəje-Ndu kə see Parijinyɛje kə̂ njê-ngəmje. Sese kə̂ aw dinje dɔ ngann nɛ̂n-ndɔɔje ləse tɔyn arəje to dim, a aw mbətəje nɛ̂nje kə̂ ngəng nya uta kəseje kə̂ Ndu aw tɔju. Nɛ̂nje tokə: Nɛ̂n-dda kə̂ gatə gatə, koo kəm-to-ndoo lə dəw kə nayn ddəw mə-kunn tə̂. Nɛ̂njeenn â to tar ləse ta dda, a ta kinya kəseje ər kâra tə̂ ang. See njê-kəm-tɔje kə̂ aw tɔjuje ddəw dəwje le, nayn to aw ndəəyje maann-kay ləse mba kɔru ngann kəmje kə ddang, a inyaje arəje jambalje ndayje aw məse tə̂ wa?
«To ndoo nya arəse, see njê-gərəje-Ndu kə see Parijinyɛje kə̂ njê-ngəmje. Aw tokoje giri əngo kə giri ka. A nɛ̂n-bbokoje kə nɛ̂nje kə̂ toje kə ddəwe ang â ddusu mə əngo kə mə ka le. Əi Parijinyɛ kə̂ nje-kəm-tɔ, maji karə ə-toko mə əngo le bba gire a karɛ tɔ.
«To ndoo nya arəse, see njê-gərəje-Ndu kə see Parijinyɛje kə̂ ə-toje to njê-ngəmje. Ə-toje tokə lə dɔbarəje nəənn kə̂ dɔru pɔr gire tə̂ darə nda darə kura gire tə̂ ddaka, a singa dəwje kə̂ oyje kə nɛ̂n-yərəwje dang dang ddusuje məɛ̂. Sese kara ə-toje tokə baann. Kəm dəwje tə̂, undaje rɔ dəwje kə̂ aw bbəəlje Lubba. A ngəmje kə nɛ̂n-ddaje kə̂ maji ang ddusuje məse.
«To ndoo nya arəse, see njê-gərəje-Ndu kə see Parijinyɛje kə̂ ə-toje to njê-ngəmje. Aw ddaje dɔbarə njê-kilaje mbər tar lə Lubba ngaâ aw ddaje dɔbarə dəwje kə̂ gatə gatə arəje kura, ngaâ aw paje nan: ‹Jeje bbo dɔ ndɔ tə̂ lə kajejedede jee tə̂ a, ja kumande tɔl nɛ̂n njê-kilaje mbər tar lə Lubba ang.› Yeenn pa nan sese njaa ə-tɔjuje to njê kə̂ gəlse tə̂ â tɔlje njê-kilaje mbər tar lə Lubba le. Maji, baann a, sese le, maji karə uwaje kula lə kasese le arəje ngəng awje nɛ̂n kə kete kete! See lije, ko əmbakaraje, â kasəje ta tee ta sariya puru tə̂ kə̂ aw ɔn kə ndɔ kə ndɔ tokə baânn wa? Mba yeenn bba, mâ kula njê-kilaje mbər tar lə Lubba, njê-kəm-karɛje kə njê-gərəje-Ndu rɔse tə̂. Â tɔlje marɛ̂je, ta â bbərəje marɛ̂je dɔ kakə-dəsə tə̂. A tundaje marɛ̂je kə ndəy mə kəy mbɔn-naanje tə̂ ləse ngaâ â tubbajede kə bbe bbe. Yeenn bba karə tar məsə dəwje kə̂ gatə gatə tɔyn kə̂ ə-tɔljede dɔ nangə tə̂ nəənn le təl dɔse tə̂. Unn kute dɔ məsə Abɛl tə̂ kə̂ to dəw kə̂ gatə gatə le ndərəng dɔ Jakari tə̂ kə̂ to ngonn lə Barasi kə̂ ə-tɔlɛ̂je horo kəy-polo Lubba tə̂ kə bann le. Tɔkɔrɔ m-pa marəse, sariya nɛ̂njeenn tɔyn a koso dɔ dəwje tə̂ kə̂ bbokənɛn nəənn.»

«See dəwje kə̂ Jerujalɛm! See dəwje kə̂ Jerujalɛm! Sese kə̂ aw tɔlje njê-kilaje mbər tar lə Lubba ngaâ aw tilaje dəwje kə̂ Lubba ulade arəse kə ər aw tɔljede. M-ndiki nya ta mbɔnse tokə kɔn-kunja aw mbɔn ngannɛ̂ kɔ bakɛ̂ tə̂, a ə-ndikije ang. Bbasinɛn mâ tusu kəy ləse kinya ngaâ mə kəy le a to baa. Mba, m-pa marəse, unn kute bbokonɛn, â koomje ang ngaa ndərəng ndɔ kə̂ â paje nan: ‹Maji karə Lubba bbar tar kə̂ maji dɔ dəw tə̂ kə̂ ddee kə ri Əbbə-dəwje.› »

Hør på Matiye 23