Oosana 11
11
Babiroonnia maqusasaa kisaaqa maaqa usakoo ufafa.
1Indaaru nammari taikoo kamuqoo aiqama maqasaa qaraasa moodaa ufa faqaasa maridaqa moodaa ufa kai qimariqau. Aiqama ainainara moodaa auqu kai ree mariqau. 2Misa suani oosana qaannai oonuree aniree iqa niniufaqa Babiroonia afaasa paqurimmasee miqoo mariqau.
3Misa miqoo maridaqa maaqi qimasee narí qimami narí qimami qidaqa qiqau. Anifaqa innisaimbaqa maqa qumareeqa atakuseeqa idara saananoo afeekaikamma finaqa minannai maaqa usakaa. Maasa miqimmaseeqa aaku aakummaseeqa koorootaqa mina apootaanaki akusaananoo atukaraani. 4Miqi qimaseeqa maqee innisaimbaqa fuka maqusa indufusee kisaaqa maaqa auqiqa ooru fiinaqa innaaruna amana kai ooruraanaura. Miqimmasee maasa duqu faqaasa moodaanaki maridaqa sia aiqama maqa maaqaki daraanianaura. Miqi qimaseeqa doo miqimmiqau.
5Mi maqusana auquseeqa kisaaqa maaqa faqa usakasoofanoo Karaambaiqa qumu nindafeenoo maaqi qinau. 6Maqee maasauqa moodaa maqannaasa maridaqa moodaa ufa qidaqa. Misa nári auqararee qia ainainna oosana araidaqa. Qusasaa misa nári nidimari ainainna auqeefaranoo. 7Doo anifaqa inni saimbaqa ooquree misa ufa furufaramma nimaqasaanaqa sia narí ufa narí ufa iriaqa.
8Anutufa miqi qimasee misa ufa furufaramma nimaqasoofaqa misa mi maqusana auquanee quna minniseeqa maqa maaqaki daraaniqau. 9Mi maqusana auqu Babiroonnia fee qimariqau. Miqoo karaambaiqa fannoo misa ufa furufaramma nimaqoonara miqi qimasee auqu raqau. Miqoo maruna Karaambaiqa furufaramma nimaqasoofaqa aiqama maqa maaqaki daraaniqau.
Seemmana aiku asauku nuqu.
(1 Stori 1:24-27)
10Seemmana saaqari kambiqoosa maaqimmiqa mariqau. Nammari aufirafa taika fufanoo miqooqari qaara aukuana aiqarama fufanoo Seemmafa 100 aukuana maraseenoo akoonaiqi Arafasadana maqanau. 11Arafasadana maqooqooqari Seemafa 500 aukuana marinoo akoonaiqi maanaaqa moomoo maqanau.
12Arafasadafa 35 aukuana maraseenoo narí faiqi Seeraana maqanau. 13Seeraana maqooqooqari Arafasadafa 403 aukuana maraseenoo akoonaiqi maanaaqa moomoo maqanau.
14Seeraafa 30 aukuana maraseenoo narí faiqi Eebeerana maqanau. 15Eebeerana maqooqooqari Seeraafa 403 aukuana maraseenoo akoonaiqi maanaaqa moomoo maqanau.
16Eebeerafa 34 aukuana maraseenoo narí faiqi Peereekana maqanau. 17Peereekana maqooqooqari Eebeerafa 430 aukuana maraseenoo akoonaiqi maanaaqa moomoo maqanau.
18Peereekafa 30 aukuana maraseenoo narí faiqi Reeuna maqanau. 19Reeuna maqooqooqari Peereekafa 209 aukuana maraseenoo akoonaiqi maanaaqa moomoo maqanau.
20Reeufa 32 aukuana maraseenoo narí faiqi Seerukana maqanau. 21Seerukana maqooqooqari Reeufa 207 aukuana maraseenoo akoonaiqi maanaaqa moomoo maqanau.
22Seerukafa 30 aukuana maraseenoo narí faiqi Naqoorana maqanau. 23Naqoorana maqooqooqari Seerukafa 200 aukuana maraseenoo akoonaiqi maanaaqa moomoo maqanau.
24Naqoorafa 29 aukuana maraseenoo narí faiqi Teeraana maqanau. 25Teeraana maqooqooqari Naqoorafa 119 aukuana maraseenoo akoonaiqi maanaaqa moomoo maqanau.
26Teeraafa 70 aukuana maraseenoo Abarammana faqa Naqoorana faqa Qarana faqa maqanau.
Teeraana aiku asauku nuqu.
27Teeraana faiqi namu mi oosanausa maaqimmiqa mariqau. Teeraafa Abarammana faqa Naqoorana faqa Qarana faqa nikoofa marinau. Qaranafa Rootana akoofa marinau. 28Qaranafa Babiroonia maqa maaqaki narí maqusa Uraa maqusaki mina akoofa faqa kaqi marufanoo kuqinau. 29Abarammafa Sarai nammarina maranau. Naqoorafa Mirakaa nammarina maranau. Mirikaa nammarifa Qarana araamuna maranau. Qaranafa Isakana akoofa marinau. 30Sarai nammarifa sia faiqi maqoofa aafa anaasee marinau.
31Teeraafa narí amaaku Abarammana faqa Qarana amaaku narí anaiqi Rootana faqa Abarammana anaaqa narí aanaakuqu Sarai nammarina faqa Babiroonia maqa maaqaki Uraa maqusaindari nifiqeenoo Kannaana maqa maaqai fiqau. Teeraafa narí aiku asauku faqa Kannaana maqa maaqai fuanee qimasee Qarana auqu amarana maqusai oonu aana kasaaqai mariqau.
32Miqoo mariiufanoo Teeraafa miqoo kuqinau. Teeraana aukuana aiqama moodaanaki 205 maraseenoo kuqinau.
Nu geselecteerd:
Oosana 11: bjr
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2017 Wycliffe Bible Translators, Inc. All rights reserved.
