SAN MATEO 4
4
Nchcui' cuayá' xu'na cuiñaja lo'o Jesús
1Lo'o li' ndyaa lo'o Xtyi'i ycui' Ndyosi ji'i̱ Jesús ca ne' quixi̱' su btyi tsa yuu, su ná ndi'i̱ ñati̱, cha' tyacua tya'a yu lo'o nu xu'na cuiñaja cajua. Ngua ti' nu bi' tyiji̱loo ji'i̱ Jesús. 2Lo'o li' tu'ba tsa̱ tu'ba talya ná ndyacu Jesús tsiya' ti, ntyute' tsa yu li'. 3Lo'o li' ndyu'u tucua nu xu'na cuiñaja bi', cha' chcui' cuayá' lo'o Jesús:
―Si chañi cha' nu'u̱ laca nu sca ti Sñi' ycui' Ndyosi ―nacui̱ nu xña'a̱ bi' ji'i̱ Jesús―, xñi nu'u̱ sca quee re lacua, cha' jua'a̱ cuiñá nu'u̱ xlyá lo'o quee re cha' cacu na.
4Lo'o li' nguxacui̱ Jesús cha' ji'i̱:
―Cua nscua sca cha' lo quityi ji'i̱ ycui' Ndyosi ―nacui̱ Jesús ji'i̱―. Ndi'ya̱ nchcui' cha' bi': “Si'i na cu'ú ñati̱ chalyuu lo'o cacu ngu' tyaja ti, masi lo'o cuna ngu' lcaa cha' nu nchcui' ycui' Ndyosi, li' chañi cha' tyu'ú ngu'”. Jua'a̱ nscua lo quityi.
5Lo'o li' ndyaa lo'o nu xu'na cuiñaja ji'i̱ Jesús nde quichi̱ Jerusalén, su tyaca'a tsa ji'i̱ ycui' Ndyosi; ca hique laa tonu ji'i̱ quichi̱ bi' ndyaa ngu', cua̱ tsa ntucua ngu' li'.
6―¿Ha chañi cha' nu sca ti Sñi' ycui' Ndyosi laca nu'u̱? ―nacui̱ nu xña'a̱ ji'i̱ Jesús―. Tso'o si tyú nu'u̱ ca lo yuu lacua, cha' cua nscua sca cha' lo quityi ji'i̱ ycui' Ndyosi ndi'ya̱:
Culo ycui' Ndyosi cña ji'i̱ xca̱ ji'i̱ Ni cha' ña'a̱si̱i̱ ngu' jinu'u̱, nacui̱ quityi.
Lo'o jua'a̱ nscua chaca cha':
Lo'o ya' ti xca̱ ji'i̱ Ni xatu̱ ngu' jinu'u̱,
cha' ná ca quicha quiya' nu'u̱ su tyú nu'u̱ chu̱' quee.
Jua'a̱ nscua lo quityi ―nacui̱ nu xña'a̱.
7Li' nguxacui̱ Jesús cha' ji'i̱ nu xña'a̱ bi':
―Pana ndi'ya̱ nscua cha' lo quityi ji'i̱ ycui' Ndyosi: “Ná chcui' cuayá' ma̱ lo'o ycui' Ndyosi nu Xu'na ma̱”, nacui̱ quityi.
8Lo'o ndye nchcui' ngu', xa' ndyaa lo'o nu xu'na cuiñaja ji'i̱ Jesús nde sca lo xlya ca'ya nu cua̱ tsa. Li' ngulu'u nu xña'a̱ bi' lcaa nasiyu̱ tyucui ña'a̱ chalyuu ji'i̱ Jesús, cha' tso'o tsa ña'a̱ chalyuu bi'. 9Lo'o li' nchcui' cuayá' nu xña'a̱ bi' lo'o Jesús chaca quiya':
―Ta na' chacuayá' caca nu'u̱ loo ji'i̱ lcaa chalyuu nu ña'a̱ nu'u̱ ca ndacua ―nacui̱ nu xña'a̱ ji'i̱ Jesús―, sca ti si tyu̱ sti̱' nu'u̱ loo na', si cua'ni tlyu nu'u̱ jna', li' caca nu'u̱ loo.
10Li' nguxacui̱ Jesús cha' ji'i̱ nu xña'a̱ bi':
―Tyaatsu' nu'u̱ slo na', Satanás ―nacui̱ Jesús―. Yaa clya nu'u̱. Cua nscua sca cha' lo quityi ji'i̱ ycui' Ndyosi ndi'ya̱: “Sca ti ji'i̱ ycui' Ndyosi nu Xu'na ma̱ cua'ni tlyu ma̱ ji'i̱, sca ti cha' ji'i̱ ycui' Ni nga'a̱ cha' taquiya' ma̱ ji'i̱ nde chalyuu”, nacui̱ quityi.
11Li' ndu'u xu'na cuiñaja ndyaa. Li' ndu'u tucua xca̱ ji'i̱ ycui' Ndyosi cha' xtyucua ngu' ji'i̱ Jesús, cha' ta ngu' xi juersa ji'i̱ yu.
Nguxana Jesús ndyu'ni cña ji'i̱ ycui' Ndyosi nde loyuu su cuentya Galilea
12Ca tiya' la ndu'u Jesús ndyaa, cha' ndyuna yu cha' cua ntejeya' ngu' ji'i̱ Juan, ndyaa lo'o ngu' ji'i̱ yu ne' chcua̱. Li' nguxtyu̱u̱ Jesús chaca quiya' nde quichi̱ Nazaret, nde loyuu su cuentya Galilea. 13Pana ná ndyanu yu nde Nazaret; nguxcutsa'a̱ yu su ndi'i̱ yu, ndyaa yu ca quichi̱ Capernaum to' tayu'. Nscua quichi̱ bi' loyuu su ndu'ni ngu' sa'ni cha' su cuentya Zabulón lo'o su cuentya Neftalí laca bi'. 14La cui' ti cha' bi' cua nchcui' jyo'o Isaías nu ngua tu'ba ji'i̱ ycui' Ndyosi cua sa'ni la. Ndi'ya̱ nacui̱:
15Ntsu'u loyuu su cuentya Zabulón lo'o su cuentya Neftalí ca chaca tsu' sta'a̱ Jordán.
Tyeje tacui na loyuu bi', li' tyalaa na to' tyujo'o,
cha' loyuu bi' laca Galilea su ndi'i̱ ñati̱ nu si'i ngu' judío laca.
16Cua ngujui'i̱ sca xee tlyu slo ngu' nu ndi'i̱ su talya ña'a̱;
juani cua nguxee ji'i̱ ngu', cua caja ti chalyuu nu ná nga'a̱ cha' tye ji'i̱ ngu' bi',
masi cua tye ti chalyuu ji'i̱ ngu' bi' tya tsubi' la.
Jua'a̱ nchcui' jyo'o cusu' bi'. Bi' cha' loyuu bi' nguti'i̱ Jesús li'.
17Lo'o li' nguxana nchcui' Jesús lo'o ngu' nu ndya'a̱ slo:
―Ca tyuju'u ti' ma̱ ―nacui̱ Jesús ji'i̱ ngu'―, xtyanu ma̱ ji'i̱ lcaa cha' cuxi nu ndyu'ni ma̱, cha' cua tyalaa ti hora cha' caca ycui' Ndyosi loo ne' cresiya ji'i̱ ma̱.
Nxi'ya Jesús ji'i̱ jacua tya'a ngu' nu ndyaa cuta cualya
18Lo'o ngua sca tsa̱ ndya'a̱ Jesús to' tayu' Galilea bi'. Li' na'a̱ yu ji'i̱ Simón lo'o Andrés tya'a ngula Simón, nchcu̱ ngu' taraya lo hitya cha' xñi ngu' cualya, cha' bi' laca cña nu ndu'ni ngu' bi' lcaa tsa̱. Lo'o nu Simón bi' ni, Pedro ndu'ni ngu' ji'i̱. 19Lo'o li' nchcui' Jesús lo'o tyucuaa nu qui'yu bi':
―Tsaa ma̱ lo'o na' juani ―nacui̱ Jesús ji'i̱ ngu' bi'―. Ñi'ya̱ ngujui cualya ji'i̱ ma̱ lo'o nguta'a̱ ma̱ cuta cualya, jua'a̱ caja xa' cña ji'i̱ ma̱ juani cuentya jna'; culu'u na' ji'i̱ ma̱ ñi'ya̱ nu clyana ma̱ ji'i̱ ñati̱ chalyuu re nu nguna' tsa ndu'ni, cha' caca ngu' ñati̱ 'na.
20Hora ti nguxtyanu ngu' ji'i̱ taraya ji'i̱ ngu', ndyaa lca'a̱ ngu' ji'i̱ Jesús li'.
21Lo'o nde loo la xi na'a̱ Jesús ji'i̱ Jacobo sñi' Zebedeo lo'o Juan tya'a ngula yu; nga'a̱ ngu' ne' yaca ni'i̱ sube ji'i̱ ngu' lo'o sti ngu', ndyu'ni cho'o ngu' taraya ji'i̱ ngu'. Li' ngusi'ya Jesús ji'i̱ ngu' bi', cha' tsaa ngu' lo'o. 22Hora ti nguxtyanu ngu' ji'i̱ sti ngu' lo'o yaca ni'i̱ ji'i̱ ngu', ndyaa ngu' lo'o Jesús li'.
Ngulu'u Jesús ji'i̱ quiña'a̱ tsa ñati̱
23Lo'o li' ndyaa ngu' lcaa quichi̱ su cuentya Galilea lo'o Jesús. Lcaa quichi̱ ndya'a̱ nclyu'u yu ji'i̱ ngu' ne' laa ji'i̱ ngu' judío; nchcui' yu lo'o ngu' ñi'ya̱ laca cha' tso'o ji'i̱ ycui' Ndyosi, cha' cua ngulala ti caca Ni loo ne' cresiya ji'i̱ ngu'. Lo'o jua'a̱ ngua'ni yu jo'o ji'i̱ lcaa nu quicha, masi quicha ti ti' ngu' ngua'ni Jesús cha' ndyaca tso'o ngu'. 24Li' nguañi cha' ji'i̱ Jesús lcaa quichi̱, hasta ca nde loyuu Siria nguañi cha' ji'i̱ yu; bi' cha' ñaa lo'o ngu' ji'i̱ lcaa ngu' quicha slo ycui' yu, cha' cua'ni yu jo'o ji'i̱ ngu'. Ñaa lo'o ngu' ji'i̱ nu quicha, masi ti'í tsa ngu' xqui'ya quicha nu ntsu'u ji'i̱ ngu'; ñaa lo'o ngu' ji'i̱ ngu' nu ntsu'u cui'i̱ cuxi ji'i̱ ngu', masi nxalú cui'i̱ ji'i̱ ngu', masi nchcu̱' tyucuí̱ tyucui ña'a̱ ngu', masi nchcuti sca tsu' ya' ngu'. Lo'o li' ngua'ni Jesús cha' ndyaca tso'o lcaa ngu' quicha bi'. 25Bi' cha' ndu'u lca'a̱ quiña'a̱ tsa ñati̱ ji'i̱, masi ngu' Galilea, masi ngu' lcaa quichi̱ nde Decápolis, masi ngu' quichi̱ Jerusalén, masi ngu' xa' quichi̱ nde loyuu su cuentya Judea, masi ngu' quichi̱ chaca tsu' sta'a̱ Jordán. Quiña'a̱ tsa quichi̱ ngutu'u ngu' ndyaa lca'a̱ ngu' ji'i̱ Jesús li'.
Nu geselecteerd:
SAN MATEO 4: cta
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 1981, Wycliffe Bible Translators, Inc. All rights reserved.
