San Mateo 6

Cuywa Comam Jesús yin̈ tzet chu cocolwa yin̈ jet anmahil

1Yalni Comam Jesús:

—Caw nann̈e heyu yin̈ tzet chewatxꞌe, machn̈ehojab yin̈ sat anma cꞌul cheyute heba, yuto ta yun̈e heyillaxi yuxin chewatxꞌe iscꞌulal, mach chechah ispaj selel tet Comam Dios ay yul satcan̈.

2Yuxin yet chexcolwa yin̈ hunu mebaꞌ, mach chepujbacꞌo hacaꞌ chute ebnaj chal isba cꞌulal. Ebnaj tuꞌ chꞌakꞌ ebnaj issabehal yulaj capilla yeb yulaj calle, yun̈e yallax ebnaj cꞌulal. Yin̈ caw yeli chiwalan teyet, yet chihallax cꞌulla tzotiꞌ yin̈ ebnaj tuꞌ lan̈an ischahnina ebnaj ispaj selel. 3Wal hex tiꞌ xin, hayet chexcolwa yin̈ anma mebaꞌ machi mac tet cheyala, nitam tet hunu heyamigo. 4Wal xin yin̈ ewantajil cheyakꞌ tet, haxinwal Comam ay yul satcan̈ chiilni tzet chawatxꞌe yin̈ ewantajil, cat yakꞌni Comam ispaj selel teyet, ẍi Comam.

Cuywa Comam Jesús yin̈ tzet chu cotxahli

(Lc 11:2-4)

5Yalnipaxo Comam Jesús:

—Hayet chextxahli tet Comam Dios, mach cheyute hacaꞌ chute ebnaj chal isba cꞌulal. Haꞌ ebnaj tuꞌ yun̈e yillax ebnaj yu anma, yuxin ton̈eticꞌa choche islin̈ba isba istxahli yulaj iscapilla ebnaj Israel, yebpaxo yin̈la istxiquin txon̈bal. Yin̈ caw yeli chiwalan teyet, yet chitxahli ebnaj hacaꞌ tuꞌ chischahnina ebnaj ispaj selel tet anma. 6Walex hex tiꞌ, mach cheyute hacaꞌ tuꞌ. Wal xin hayet chextxahli, chexocto yul heyatut cat hepeban ispultahil teꞌ, cat hetxahli tet Comam Dios, Comam chiaben tzet cheyala. Chil Comam sunil tzet cheyu yin̈ ewantajil cat yakꞌni Comam ispaj selel teyet.

7Hayet chextxahli, machojab chexoc hecayen̈e tzotiꞌ matzet chaliloj hacaꞌ chute anma maẍto ohtan̈eho Comam Dios. Yuto chistxum ebnaj ta yu caw nimej chute ebnaj yoj istxah, caw chabe Comam Dios tzet chal ebnaj yalni. 8Wal xin mach cheyute hacaꞌ tuꞌ, yuto Comam Dios yohtaxa tzet chiocnico heyu yalan̈to yet maẍto chekꞌan tet Comam.

9Hayet chextxahli, hac tiꞌ cheyute heyalni hacaꞌ tiꞌ:

Hach Comam, hach coDios, ayach yul satcan̈, nimanojab yelapno habi yul sat anma.

10Hulan̈ cat hawoc jahawilojan̈ yul sat yiban̈kꞌinal tiꞌ. Yijab isba tzet chawoche sat txꞌo txꞌotxꞌ tiꞌ hacaꞌ chu yijni isba yul satcan̈.

11Mamin, chicokꞌanan̈ tawet, akꞌ tzet chicolohan̈ hunun tzꞌayic.#Pr 30:8-9

12Akꞌ nimancꞌulal yin̈ istxꞌojal chicowatxꞌehan̈, hacaꞌ chu jakꞌni nimancꞌulalan̈ yin̈ anma chiwatxꞌen istxꞌojal jin̈an̈.

13Mach chon̈hachayojan̈ xol ilwebal, caw colon̈ilojan̈ yul iskꞌab naj matzwalil, quexchi yin̈ hetxah, ẍi Comam.

14Yalnipaxo Comam:

—Ta cheyakꞌ nimancꞌulal yin̈ anma chiwatxꞌen istxꞌojal teyin̈, haꞌ Comam Dios ay yul satcan̈ chꞌakꞌnipaxo nimancꞌulal teyin̈. 15Yaj ta mach cheyakꞌ nimancꞌulal yin̈ heyet anmahil chiwatxꞌen istxꞌojal teyin̈, mach chakꞌpaxo nimancꞌulal Comam Dios teyin̈, ẍi Comam.

Cuywa Comam Jesús yin̈ yet mach chon̈waꞌ yu cotxahli tet Comam Dios

16Lahwi tuꞌ yalnipaxo Comam Jesús:

—Hayet mach chexwaꞌ yu hetxahli tet Comam Dios,#6.16 Yet mach chon̈waꞌ yu cotxahli, haꞌ chalilo ayuno yin̈ castilla. mach biscꞌulalo cheyute hesat hacaꞌ chute ebnaj chal isba cꞌulal, yuto ebnaj tuꞌ caw biscꞌulal chute ebnaj sat yun̈e yillax ebnaj yu anma tato ayco ebnaj yin̈ yet mach chon̈wahi yu cotxahli tet Comam Dios. Yin̈ caw yeli chiwalan teyet chischahna ebnaj ispaj selel yet chiillax ebnaj yu anma tuꞌ. 17Walex tiꞌ xin, yet mach chexwaꞌ yu hetxahli tet Comam Dios, chetxꞌahwe hesat cat hexínito xil hewiꞌ, 18yun̈e mach chalilo isba tato ayexico yin̈ yet mach chexwaꞌ yu hetxahli tet Comam Dios. Wal xin han̈cꞌan̈e Comam ewan yehi, haꞌ chiilni tzet cheyu cat yakꞌni Comam ispaj selel teyet, ẍi Comam.

Jakꞌaweto cokꞌalomal satcan̈

(Lc 12:33-34)

19Yalnipaxo Comam Jesús hacaꞌ tiꞌ:

—Mach chetenba hekꞌalomal sat txꞌo txꞌotxꞌ tiꞌ, yuto chioc noꞌ ih yetaꞌtoj, cat xin yocpaxo iskꞌuxewal. Macato chul ebnaj elkꞌom yin̈ cat yinito ebnaj. 20Wal xin haꞌ huneꞌ cheyute, tenbawe hekꞌalomal yul satcan̈ bay machi noꞌ ih chietantoj, bay mach chiocpaxo iskꞌuxewal, yeb bay mach chiapni ebnaj elkꞌom yin̈. 21Yuxin haꞌ bay ay hekꞌalomal haꞌ tuꞌ cheyapaxico heyanma, ẍi Comam.

Isbakꞌ cosat hacaꞌ cantil yehico yin̈ conimanil

(Lc 11:34-36)

22Isbakꞌ cosat cantil yehico yin̈ conimanil, yuxin ta han̈cꞌan̈e iscꞌulal choche yilaꞌ hesat tuꞌ, sunil henimanil ayco yin̈ sajilkꞌinal. 23Yajaꞌ ta yin̈n̈e istxꞌojal ayco hemujlubal; sunil henimanil ayco yin̈ kꞌejholo. Ta huneꞌ issajilkꞌinal ayco teyin̈ tuꞌ chimeltzoco yin̈ kꞌejholohal, chexcancano xol kꞌejholo, ẍi Comam.

¿Aymico janma yin̈ Comam Dios mato yin̈ kꞌalomal?

(Lc 16:13)

24Yalnipaxo Comam Jesús hacaꞌ tiꞌ:

—Machi hunu mac chu yoc chejabo tet cawan̈ patrón, yuto ta chisyije naj tzet chal naj babel, chisman̈cꞌo naj tzet chal naj iscab. Yeb xin tato xahan chil naj naj babel, chisyah naj naj iscab. Hac tuꞌ heye hex tiꞌ, mach chu heyijen tzet chal Comam Dios tato ecꞌbal cheyaco heyanma yin̈ kꞌalomal, ẍi Comam.

Yilal iscawxi cocꞌul yin̈ Comam Dios

(Lc 12:22-31)

25Yalnipaxo Comam Jesús:

—Yuxin chiwalan teyet, mach cheyaco yin̈ hecꞌul yin̈ tzet chelo, yeb yin̈ tzet chu yoc xil hekꞌap yul sat yiban̈kꞌinal tiꞌ. Ta chakꞌ Comam Dios cocawil, ¿haꞌ tom xin tzet chicolo mach chakꞌ Comam, heyalni? Ta haꞌ Comam akꞌn̈e conimanil, ¿haꞌ tom xil cokꞌap mach chakꞌ Comam? 26Ilwecꞌanab noꞌ chꞌic chiecꞌ satcan̈, machi yawal noꞌ chacoj, mach chihatxꞌwi noꞌ, machipaxo iscꞌun̈a noꞌ, yajaꞌ xin chiakꞌlax tzet chislo noꞌ yu Comam ay yul satcan̈. ¡Hajxamex to caw ecꞌbal heyelapno sata noꞌ! 27¿Aymi hunujex tiꞌ yu caw cheyaco yin̈ hecꞌul yuxin chu heyanico hanicꞌoxa yakꞌbil hakꞌinal yul sat yiban̈kꞌinal tiꞌ?#6:27 Ay manuscritos chalni: “¿Aymi hunujex tiꞌ yu caw cheyaco yin̈ hecꞌul yuxin chu heyanico hanicꞌoxa yakꞌbil hetel?”

28¿Tzet yin̈ xin caw cheyaco yin̈ hecꞌul yin̈ tzet chu yoc xil hekꞌap? Ilwecꞌanab teꞌ caj chichꞌib xol kꞌebtaj, mach chimunla teꞌ, mach chichemlipaxo teꞌ, 29yajaꞌ chiwalan teyet, naj rey Salomón yet payat mach apni iskꞌaptzen isba naj hacaꞌ iscꞌulchꞌanil teꞌ. 30Walca caw cꞌulchꞌan jilni isxumaquil teꞌ tinan̈, yajaꞌ yet hecal cabe chin̈uslaxto teꞌ yul horno. Ta chakꞌ Comam iscꞌulchꞌanil teꞌ caj tuꞌ, ¿haꞌ tom xin xil hekꞌap mach chakꞌ Comam? Hex tiꞌ caw mach cheyaco heyanma yin̈ Comam Dios. 31Yuxin mach cheyaco yin̈ hecꞌul cheyalni hacaꞌ tiꞌ: ¿Baytaxca chitit tzet chicolo yeb xil cokꞌap? 32Yuto haꞌ anma mach ohtan̈e Comam Dios chianico huntekꞌan tuꞌ yin̈ iscꞌul. Yajaꞌ wal Comam Dios ay yul satcan̈, yohtaxa Comam tato chiocnico huntekꞌan tuꞌ heyu. 33Wal xin aweco yin̈ hecꞌul hesaynilo Comam Dios babel cat heyijen tzet chala, walpaxo tzet chiocnico heyu yul sat yiban̈kꞌinal tiꞌ xaticꞌa yakꞌaꞌ Comam Dios teyet. 34Mach cheyaco yin̈ hecꞌul yin̈ tzet chu yecꞌ heyu yet hecal, yuto yet hecal tuꞌ nanto tzet cheyaco yin̈ hecꞌul yin̈ tzet cheyu, yuto masan ay isyaꞌtajil yetbi hunun tzꞌayic, ẍi Comam.

Nu geselecteerd:

San Mateo 6: jac

Markering

Deel

Kopiëren