Génesis 3
3
Adán Evajai Yuusa chichamen umikchamu
1Apu Yuus kuntinan ashi najankauwa nuiya nápi ima nekau ajakuiti. Tumau asa nuwan tari iniak: ¿Yuuscha wari turamma, ju ajanam numi nere iruna juka chikichkiksha yuawaipa turammaka? tusa tinaiti. 2Tama nuwa ayak: Ju númi iruna juna neregka yumainaitji. 3Turasha númi ajanam ajapeen waja auna neregka yuawairpa, tura achitkesha achikairpa, nu turakrumka tunau jastatrume, tusa Yuus turammaji tinaiti. 4Tama nápi nuwan chicharuk: Atsaa, tunauka jaschattarme. 5Antsu nu yuakrumka Yuusa numamtuk jasrum pegker, tura pegkerchausha nekamainaitrum nuna Yuus nekau asa turamnaitrume, tusa tinaiti.
6Tama nuwa numi neren pegker asamtai, juna yuanka wisha yachapi atatja, tusa yuattsa wakerukuiti. Tuma asa numi neren akak yuawaiti. Tura nina aishrincha susauwaiti, turam nisha yuawaiti. 7Tumamuik mai misuk wajau wainmamkaru, tumawar árak higuera tutai nuken aparar itipruawaruiti. 8Tura etsa agkuantai apu Yuus nasenam pachitkau ajanam wekan nekaawaru. Tumawar ajanam númi irunmaunam apu Yuusan uumrukaru. 9Turasha apu Yuus shuaran untsuak: ¿Tui pujame? tusa tinaiti. 10Tama shuar ayak: Ame ajanam wekamun nekaan, misu pujau asan amina ashamakun uumrukjame, tusa tinaiti. 11Tama Yuus iniak: ¿Ya ame misu pujamuncha ujatmakume? ¿Wii amina ju numi nere yuawaipa timajam nu yuachumek? 12Tama shuar ayak: “Ame wijai tsanig pujustin nuwa surusmam nu, juki itan surusmatai wisha yuajai”, tusa tinaiti.
13Takai apu Yuus nuwan iniak: “¿Urukamtai nusha nutikam? Tama nuwa ayak: Nápi tsanuramtai yuajai”, tusa tinaiti. 14Takai apu Yuus napin chicharuk: Ame ju nutika asam, chikich kuntin aina nu nagkasau pegkerchau atinaitme. Tura japintsam wekasam nugka tuke yu wekaitinaitme, tusa tinaiti. 15Aminka yamai nagkamsan nuwajai kajernain amajsattajme. Amina uchiram weantu ainajaisha, tura nuwa uchiri weantu atina nuka tuke kajernaitin ainawai. Tura ame nina sagkanin asaitnaitme, turam ni amina muukmin nekentramkatnaiti, tusa tinaiti. 16Tura nuwan chicharuk: “Ameka uchirmakmesha waittsam uchirmatnaitme. Turasha aishrumjai pujutka tuke waketinaitme, tura amina aishrum aminka inatmatnaitme”, tusa tinaiti.
17Tura aishmagnasha chicharuk: “Ju numi nere yuawaipa tusa timaitiatam amina nuwemin chichame umirkum yua asaakmin, ame tunau takasmaunam nugkasha pegkerchau jastatui. Tura ame yuatnuram takákum tuke waittinaitme. 18Nugkanmagka nupa jagkirtin ainasha nupaktin ainawai. Tura ikamia numi nere aina yutinaitme. 19Tura ameka takákum waitakum yuatnaitme. Tuma pujau jakum ikuktinaitme. Ameka nugka jukir najanamu asam, ame jakmesha nunismek nugka jastinaitme”, tusa tinaiti.
20Adán nina nuwen Eva anaikauwaiti. Nunaka ashi shuar ainan nukuri atin asamtai, tu anaikauwaiti.
21Apu Yuus shuaran nina nuwejai nugkurtintrin nuapen najana susauwaiti. 22Nutika apu Yuus chichaak: “Ju shuar aina juka yamaika iya jumamtinak jasaru asar, nitasha pegkeran, tura pegkerchauncha nekainawai. Tumawaru asar númi pujutan sukartina nuna nerenka yuacharti”, tusa tinaiti.
23Tusa apu Yuus shuaran ajanam pujuinan, jiiki nugka ni takastinnum apujsauwaiti. 24Nutika shuar ajan utua númi pujutan sukartina nuna neren yuawarai, tusa ajan kuitamatnun nayaimpinmaya shuar ainan apujsauwaiti. Tura etsa watainmani ajanam kuchiya numamtinan kean pepertu atinan apujsauwaiti.
Nu geselecteerd:
Génesis 3: hubDBL
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2010, Wycliffe Bible Translators, Inc. All rights reserved.
