Mateo 14

Juan Ti Doquëre Huaiye

(Mr 6.14-29; Lc 9.7-9)

1Ja̱ mu'seña Herodes Galilea cua̱ñequë paji'i. Ja̱je pa'ipi Jesús pa̱i yo'o ti̱'a ma'ñere yo'oyere asapi. 2Asani i̱ ja̱'re co̱ni pa'icohua'ire capi:

“Juan oco doquëpi huëni tutu paquë yo'oma'quë.”

3Ja̱je cuasapi, Herodes cato Juanre tse̱ani hue̱ni co'acohua'ire co hue̱'ñana cosiquë sëte yo'jei Felipe nëjo do'ire. 4Juan cato caëña, Herodesre:

“Më nëjore payeje̱ pama'ë pa'ijë̱'ë.”

5Ja̱je caquëna, Herodes Juanre huani je̱osi'i caquëta'a pa̱ini ca'raquë pa̱pi, si'aohua'i Juanre Maija'quë coca quëaquë api ca do'ire ca'raquë. 6Ja̱je pa'iquëta'are i̱te Herodesre co̱asi mu'seña ti̱'asi maca Herodías mamacopi pa̱i tsi'sisicohua'i ñajëna, etani pairacona, Herodes ñani ai sihuaquë. 7Ca nëopi si'aye më'ë se̱ñe pa'ito i̱sisi'i, co'amaña. 8Ja̱je ca maca pëca ja'copi du'ru yëhuosico sëte cao, Herodes:

“Juan oco doquë si̱opëre quë̱na de'huana ayasiconi i̱sijë̱'ë.”

9Ja̱je ca maca Herodes oi ëayerepa asapi. Ja̱je i̱pi tsoe si'aohua'i soisicohua'i asajëna, i̱sisi'i, më se̱ñere ca nëo huesosiquë sëte jëjo saopi, i̱sijë̱'ë caquë. 10Ja̱ maca cua̱ñeiña, sani Juan cosiquë pa'iquëre si̱opëse'e tëto tëaja̱ni, 11quë̱na de'huana ayasiconi dani i̱sihuë, nomi tsi̱ona. Ja̱opi se i̱sio, pëca ja'cona.

12Ja̱je yo'orena, Juanre ye'yecohua'ipi dani i̱ ca̱pëse'e sani ta̱huë. Ta̱ni ja̱ jeteyo'je sani Jesure quëahuë, i̱ti yo'ose'ere.

Cinco Mil Ë̲mëohua'ire A̲oñe

(Mr 6.30-44; Lc 9.10-17; Jn 6.1-14)

13Ja̱ropi ja̱re asani Jesús saji'i, pa̱i peo hue̱'ñana yohuëja̱'a. Ja̱je saisiquëta'are pa̱ipi asa ti̱'ani i̱te tui huëohuë, yejaja̱'a pa̱i daripë pa'icohua'ipi. 14Jesús yohuëpi etaquë ñaquëna, jai pa̱i paë'ë. Ja̱je pa'ijëna, teaye oi ja̱ohua'ire ñani jujupi, ju̱'icohua'ire i̱ohua'i dacohua'ire. 15Tsoe na'iquëna, ñani i̱ ye'yacohua'ipi Jesús quë'rona dani cahuë:

“Tsoe na'iji. I̱ño pa̱i peo hue̱'ña'ë. De'oji. Ja̱ macaja̱'a ca tëjijë̱'ë, sani pa̱i pa'i hue̱'ñana hueroni a̱o maña a̱ijajë.”

16Cajëna, Jesupi capi, ja̱ohua'ire:

“Saiye peoji. Ja̱ohua'ire mësarupi a̱ojë'ë.”

17Caquëna, ja̱ohua'ipi cahuë, i̱te:

“Peoyë. Coa cinco pan cui'ne caya hua'ire pare payë, i̱ño.”

18Cajëna, Jesupi capi:

“Dajë̱'ë, i̱ñona i̱tire.”

19Cani cui'ne pa̱ire cua̱ñepi, tayahuëna ja'ru sajë̱'ë, caquë. Ja̱ jeteyo'je i̱ jë̱ñapi cinco pan pë̱a cui'ne cayaohua'ire i̱ni ca̱jiquë ma'tëmona ñaquë, Maija'quëre de'oji caquë pëpapi. Pëpani panre jë'yeni i̱ ye'yacohua'ina i̱sipi. I̱sina, ja̱ohua'ipi pa̱ire se a̱ohuë. 20Si'aohua'i a̱ni huajësicohua'i paë'ë. Ja̱ jeteyo'je a̱ni jujase'ere doce do'rohuë̱arepa ayahuë. 21Ja̱ a̱isicohua'i cato paë'ë, cinco mil ë̱mëohua'ise'e. Nomiohua'ire cui'ne tsi̱re cue̱cueye peoyerepa ja̱ohua'ique pa'ini ai jerepa pa'iyë.

Jesupi Oco Ë̲mëjeja'a Cu'ise'e

(Mr 6.45-52; Jn 6.16-21)

22Ja̱ jeteyo'je Jesús pa̱ini pëpa tëjiquë i̱ ye'yacohua'ise'ere du'ru jai yohuëna aya mëijë'ë caëna, aya mëtena, jaira je te̱'tena jëjo saopi. 23Pa̱ire pëpa tëjini mëji'i, jai cu̱tihuëna te'i, Maija'quëre se̱si'i caquë. Ñami de'osi maca Jesús ja̱rote te'i paji'i. 24Jai yohuë cato jopo jairare ja̱ yë'ta'a saio nëco'ë, to̱'añepi yohuëna tutu ju'aquëna, saë'ë. 25Ñataquëna, Jesús i̱ohua'i quë'rona tsioja̱ji'i, oco da'ca ë̱mëjeja'a nëcaquë. 26Ja̱ maca i̱ ye'yacohua'i tsiayaja̱'a nëcaquë daina, ñani quëquë huesëjë ca'rajë cuihuë:

“¡Pa̱i joyo huatio!”

27Ja̱je cajëna, Jesupi capi, ja̱ohua'ire:

“Quëcojë̱'ë, yë'ë a'ë. Ca'rama'pë pa'ijë̱'ë.”

28Caquëna, ja̱ maca Pedropi capi, ñeje:

“Ejaë, më'ërepa pani yë'ëreje̱ cua̱ñejë'ë, tsiayaja̱'a nëcaquë sasi'i, më'ë quë'rore pana.”

29Caquëna, Jesupi capi:

“Daijë̱'ë.”

Caëna, Pedropi yohuëpi cajeni tsiayaja̱'a nëcaquë sai huëopi, Jesús pa'i hue̱'ñana ti̱'asi'i caquë. 30Ja̱je saiquëta'a tutu ju'ayena asaquë, quëquëquë du'i huëoquë cuipi:

“¡Huasojë̱'ë, Ëjaë!”

31Ja̱re i̱ti macapi Jesús jë̱ñana tse̱aquë capi, i̱te:

“¡Yë'ëna quëcoyere a'ri maña paquë, më'ë! ¡Me yo'oquë nema'quëje̱ pa'ire cuasaë'ni!”

32Jai yohuëna aya mëisi maca tutu to̱mepi. 33Ja̱ maca jai yohuë pa'icohua'ipi Jesuna do're ja'runi cahuë:

“Nuñerepa më'ë Maija'quë mamaquëre pa'ë.”

Genesaret Pa'icohua'ire Jujuse'e

(Mr 6.53-56)

34Je̱'ejë ti̱'ahuë, Genesaret yejana. 35Ti̱'arena, pa̱ipi Jesús daise'ere asa ti̱'ani si'a hue̱'ña i̱ti yeja pa'icohua'ire quëahuë. Quëarena, i̱ pa'i hue̱'ñana ju̱'icohua'ire dahuë. 36Dajë se̱i'ë, i̱ ju'i ca̱na patoni co'yato de'oma'quë cajë. Ja̱je cani si'aohua'i i̱ ju'i ca̱na patocohua'ipi co'ya sahuë.

Nu geselecteerd:

Mateo 14: sey

Markering

Deel

Kopiëren