Mateo 12

Jesure Ye'yecohua'ipi Huajë Mu'se Yo'oye

(Mr 2.23-28; Lc 6.1-5)

1Jesús ta̱ sitoja̱'a saji'i. Ja̱je saina, i̱ ye'yacohua'i a̱o ëaye nëina, trigo sa̱'ñare tëa huëohuë. Tëani i̱ti ca̱re a̱ë'ë. 2Ja̱je yo'ojëna, fariseohua'ipi ñani cahuë, Jesure:

“Ñajë'ë, më'ë ye'yacohua'i co'amaña neñere. Co'amaña nema'a mu'se a'ë.”

3Ja̱je cajëna, i̱pi ja̱ohua'ire capi:

“¿Ñama'cohua'i a'ni, mësaru, David yo'ose'e i̱ cajeohua'i ja̱'re co̱ni a̱o ëa ju̱'i maca? 4A̲o ëa ju̱'ijë Maija'quë huë'e necaicohua'ise'e a̱iñere Maija'quë huë'ena cacani David cui'ne i̱ cajeohua'i a̱ë'ë, i̱te cui'ne yecohua'ire ë̱sese'ere, Maija'quëna i̱sise'ere. 5Moisés cua̱ñese'epi toyase'e caji: ‘Maija'quë huë'e necaicohua'i cato huajë mu'seje̱ neñe payë.’ Ja̱je pa'iquëta'are i̱ohua'ire sa̱ñope caye peoji. 6Ja̱je pa'ina, cayë mësarute ‘i̱ñore pa'iji, Maija'quë huë'e se̱ña maca pa'ire papi.’ 7Iye toyase'e caye asama'pë paë'ë, mësaru. Ja̱pi caji: ‘Mësarupi pa̱ire teaye ñajë oicohua'i pa'iyere yë'ë cato yëyë. Coeye nëicohua'ire huaijë i̱siye cato.’ Pa̱ire oiyere asacohua'i pani pa̱ire do'i peocohua'ini co'acohua'i a'ë caye pa̱ra'huë, mësaru. 8Ja̱je pa'ina, Pa̱i Mamaquë cato huajë mu'se Ëjaëpi.”

Jë̱të Cue̱nesicore Paquëre Jujuye

(Mr 3.1-6; Lc 6.6-11)

9Ja̱ maca Jesús ja̱ropi sani pa̱i tsi'si huë'ena cacapi. 10Ja̱rote te'i jë̱të cue̱nesicore hue'equëpi paji'i. Ja̱je pa'ina, ñani Jesupi tayo caëna, i̱te sa̱ñope cayeque pa'iji cuasajë se̱i'ë:

“¿Ju̱'iquëre jujuye de'oquë huajë mu'se pa'itoje̱?”

11Cajëna, Jesupi sehuopi:

“¿Nepi mësaru acohua'i yëi ñamapi cojena duquëna sani dutama'cohua'i a'ni, huajë mu'se pa'itoje̱? 12Ja̱je pa'ina, pa̱ipi do'iji, yëi ñamare jerepa. Ja̱je huajë mu'se pa'itoje̱ de'oye yo'oye pa'ito yo'oye pa'iji.”

13Cani ja̱ maca i̱te capi:

“Jë̱tëre mëajë'ë.”

Ja̱je caquëna, i̱pi se mëaquëna, yequë te̱'te jë̱tëje̱ pa'io huajëco po̱nëo. 14Ja̱ maca fariseohua'ipi etani Jesure huani je̱o ja̱'ñere ca huëohuë, ¿me neni huani je̱oja'cohua'i a'ni? cajë.

Jesús Ayere, Tsoe Quëase'e

15Jesús ja̱re asani ja̱ropi yequë hue̱'ñana saji'i. Saina, jai pa̱i i̱te tuë'ë. Jesupi coa si'a ju̱'i dahuë ju̱'icohua'ire jujupi. 16Jujuquë cui'ne ë̱sepi, yecohua'ire se quëayeje̱. 17Iye cato yo'oreña, Maija'quëre quëacaiquë Isaías toyaquë caquë pa'ise'epi ti̱'a ja̱'ñere, ñeje:

18Iquë api, yë'ë jo'yaë yë'ë sahuani tse̱asiquë,

I̱te oiyë, cui'ne i̱ni sihuaquë pa'iyë.

I̱na, yë'ë joyo je̱ocaija̱'quë a'ë.

Cui'ne i̱pi si'a pa̱ire yë'ë nuñerepa pa'i yo'oyere quëacaija̱'quë api.

19Pa̱ini co'a cocare cama'ë pasipi, cuima'ë pasipi.

Cui'ne i̱ cayeje̱ asacaiye pa̱ja'cohua'i a'ë, cu'i hue̱'ñana.

20Ca̱tëpë ca'huere quë'ioreje̱ ne jëyoma'ë pasipi.

Cui'ne picose'e mëicoreje̱ yayoma'ë pasipi.

I̱ nuñerepa cua̱ñeñe ne macaja̱'a ja̱je yo'oja̱'quë api.

21Si'a pa̱i maña i̱ni necaija̱'quë api cajë utejë pa'ija̱'cohua'i a'ë.

Jesupi Huati Tutupi Yo'oji, Coa Caye

(Mr 3.20-30; Lc 11.14-23; 12.10)

22Jesús quë'rona sahuë, ñama'quëre cui'ne coca cama'quëre huatire hue'equëre. Sarena, Jesupi jujupi. Jujuna, ñaquë cui'ne coca caquë po̱nëpi. 23Ja̱re si'a pa̱i ña quëquëni cahuë:

“¿Iquë David mamaquëre papi?”

24Ja̱je cajëna, fariseohua'ipi asani cahuë:

“Iquë cato huatiohua'ire eto saoji, i̱ohua'i ëjaë Beelzebú tuture hue'equëpi.”

25Jesupi i̱ohua'i cuasaye asani capi, ja̱ohua'ire:

“Te'e yeja ëjaëpi jopore paja̱'a huani i̱ti pa̱ija'a sa̱'ñe uihuajë yo'ocohua'i pani peo hue̱'ñarepa caraja̱iñe pa'iji. Pa̱i daripëpi, panita'a te'e tsëcapëpi sa̱'ñe pë̱icohua'i pani quëcoye peoji, yecohua'ire. 26Ja̱je cui'ne huati ëjaëje̱ i̱ja'a co'ye eto saoquë pani ¿Me cui'ne i̱ tutu paquë'ni, i̱ja'a sa̱ñope yo'oquë pani? 27Mësarupi yë'ëre cayë, Beelzebú tutupi huatiohua'ire eto saoji. Ja̱je pa'ito ¿nepi tutupi i̱siye'ni, mësarute tuicohua'ire eto sao tutu? Ja̱ohua'ini se̱ni asato mësarupi coa tayo huesëhuë, caja̱'cohua'i pa'ini. 28Yë'ë cato huatiohua'ire eto saoyë, Maija'quë joyo tutupi. Yë'ë yo'oye cato quëaji, Maija'quë cua̱ñe te̱'tepi mësaruna ti̱tase'ere.

29¿Tutu quë'i huë'e pa'ito cacani i̱ co'amaña sioye peoji, du'ru i̱ni tse̱ama'cohua'i pani? Ja̱je pa'ina, i̱ni tse̱anita'a de'hue cacani i̱ co'amaña i̱ñe pa'iji.

30Yë'ë yo'oyere co̱ yo'oma'quë cato yë'ëre sa̱ñope yo'oquë api. Cui'ne yë'ë ja̱'re co̱ni tëama'quë cato coa ne ña'ñe saoquë api.

31Ja̱je pa'ina, cayë, mësarute. Si'aye co'aye pa̱ire yo'ose'e pa'itoje̱ sa̱i de'huacaiye pa'iji, si'aye co'aye case'e pa'itoje̱. Ja̱je pa'iquëta'are Maija'quë joyore co'aye casicohua'i pa'itota'a ti sa̱i de'huacaiye peoji. 32Cui'ne yë'ë Pa̱i Mamaquëni co'aye casicohua'ireje̱ sa̱i de'huaye pa'iji. Ja̱je pa'iquëta'are Maija'quë joyore sa̱ñope casicohua'ire sa̱i de'huacaiye peoji.

So̱quë Yë Ñañe Pa'iji, I̱o Quë̱iñena

(Lc 6.43-45)

33De'o so̱quë yëpi de'o ca̱re quë̱iñe pa'iji. Co'a so̱quë yëpi ja̱re co'a ca̱re quë̱iñe pa'iji. Ja̱je pa'ina, i̱o quë̱iñena ñañe pa'iji, so̱quë yë. 34¡A̲ña tsëcapë acohua'i! ¿Me de'oye ca ti̱'añe'ni, mësaru, ja̱re mësarupi co'acohua'i pa'ini? Ja̱je pa'ina, yë'opo cato joyo pa'iyere caye pa'iji. 35De'o pa̱i cato de'o cocare caji, ja̱re i̱ joyo pa'iyepi. Cui'ne co'a pa̱ipi caji co'ayere, ja̱re i̱ joyo co'aye pa'iyeje̱ pa'ye. 36Ja̱je pa'ina, yë'ë cayë. Ja̱ohua'ire pa̱i ñape yo'ose'e ña mu'se ti̱'asi maca si'aohua'i i̱ñoñe pa'iji, si'aye i̱ohua'i cuasama'pë case'ere. 37Ja̱je pa'ina, më'ë case'eje̱ pa'ye ña de'hua cua̱ñoñe pa'iji, do'i peoquë pa̱nita'a do'i quë'i.”

Co'acohua'ipi Se̱ñe, Pa̱i Yo'o Ti̱'a Ma'ñere

(Mr 8.12; Lc 11.29-32)

38Ja̱ maca Jesure fariseohua'i cui'ne cua̱ñese'e ye'yacohua'i co̱ni cahuë:

“Ye'yaquë, yëquë ñañe yëyë, më'ëpi pa̱i yo'o ti̱'a ma'ñe yo'oquëna.”

39Cajëna, Jesupi sehuopi, ja̱ohua'ire:

“Co'a pa̱ipi nuñerepa cuasama'cohua'ipi pa̱i yo'o ti̱'a ma'ñe yo'oquëna, ñañu'u cajë, se̱ñë. Ja̱je se̱jëta'are Maija'quëre quëacaiquë Jonás i̱ñoquë pa'ise'eje̱ pa'ye jerepa i̱ñoñe peosipi. 40Coa Jonás jai hua'i ë̱tapë pa'ise'eje̱ pa'yese'e i̱ñoñe pa'iji. Ja̱ë je̱'quë toaso̱ mu'seña cui'ne toaso̱ ñami pa'a̱ji'i. Ja̱je pa'ye Pa̱i Mamaquëje̱ toaso̱ mu'seña cui'ne toaso̱ ñami pa'ija̱'quë api, yeja sa̱'nahuëre. 41Tsoe hue̱'ña Nínive daripë pa'isicohua'ipi huëni pa̱i ñape yo'ose'e ña mu'se ti̱'aëna, iye'në pa'icohua'ire nejoja'cohua'i a'ë. Nínive acohua'i cato de'hue asani ja̱'rë pa'ise'e je̱oni po̱nëahuë'ë, Jonás Maija'quë coca quëaquëna, asani. Yure i̱ñore pa'iji, Jonás se̱ña maca pa'ipi. 42Cui'ne huë'ehuë te̱'te pa̱i ëjaoje̱ huëija̱'coa, nejo mu'se ti̱'asi maca. Huëni iye'në pa'icohua'i yo'ose'e ñani cui'ne nejoñe pa'iji, caja̱'coa. Ja̱o cato so'o yejapi Salomón ta̱'ñe yo'oyere asasi'i caco daisico sëte. Yure i̱ñore pa'iji, Salomón jerepa pa'ipi.

Co'a Joyo Co'iye

(Lc 11.24-26)

43Huatipi pa̱ire pa'isiquëpi etani saisiquë pani cu'iji, cue̱nesi yejañare pëa huajë hue̱'ñare co'equë ti̱'ama'ë co'e jujani cuasaji: 44‘Co'isi'i, cui'naona, yë'ë huë'ena yë'ë etani daisicona.’ Ja̱je cani co'iquë ñaquëna, pa̱i peo huë'epi coa yuasicopi cui'ne de'oye ne de'huasicopi pa'iji. 45Pa'ina, ñani ja̱ maca sani siete huatiohua'ire i̱ jerepa co'acohua'ini quërëja̱ni, dani i̱na cacani pëayë. Pëarena, ja̱ maca ja̱'në pa'ise'e se̱ña maca co'aquë pa'ija̱'quë api. Ja̱je cui'ne iye co'a pa̱ire yo'oye pa'ija̱'coa.”

Jesús Pëca Ja'co Cui'ne I̱ Yo'je Tsi̱

(Mr 3.31-35; Lc 8.19-21)

46Jesús ja̱ yë'ta'a pa̱ini caquëna, ti̱tahuë, pëca ja'co cui'ne i̱ yo'je tsi̱ co̱ni. Dani hue'sena pëahuë, i̱ni cajë daisicohua'ipi. 47Ja̱je pa'ijëna, yecohua'ipi Jesure quëahuë:

“Më ja'co cui'ne më yo'je tsi̱ hue'sere pa'iyë, më'ëni cajë dani.”

48Caquëna, i̱ti quëaquëre capi, Jesús:

“¿Ne a'ni, yë'ë ja'co cui'ne ne a'ni, yë'ë yo'je tsi̱?”

49Cani i̱ ye'yacohua'ire i̱ñoquë quëapi:

“Icohua'i a'ë, yë'ë ja'co cui'ne yë'ë yo'je tsi̱. 50Pa̱ipi yë'ë ja'quë ma'tëmo pa'iquë yëyere yo'ocohua'ipi ja̱ohua'i a'ë, yë'ë yo'jei pa̱nita'a yo'jeo cui'ne ja'co.”

Nu geselecteerd:

Mateo 12: sey

Markering

Deel

Kopiëren