Mateo 11

Juan Ti Doquë Jëjo Saocohua'i Jesuna

(Lc 7.18-35)

1Jesús i̱ doce ye'yacohua'ire i̱ohua'i yo'o ja̱'ñe quëa tëjini saji'i, ye'yaquë cui'ne quëasi'i caquë ja̱ yeja pa'i daripë̱ana.

2Juan co sitore ñu'iquëpi Cristo yo'oyere asani i̱ ye'yacohua'ire Jesús quë'rona jëjo saopi, se̱ni asaja̱'cohua'ire. 3Më'ë a'ë, Cristo i̱ti daija̱'quëre ca nëosiquë pa̱nita'a yequëre uteye pa'iquë cajë.

4Jëjo saosicohua'ipi se̱jëna, Jesupi sehuopi, ja̱ohua'ire:

“Sani Juanre cajë̱'ë, mësaru ñase'ere cui'ne mësaru yure asase'ere. 5Ñama'cohua'i pa'isicohua'ipi ñañere, cu'ima'cohua'i pa'isicohua'ipi cu'iyere, si̱'si dahuë ju̱'icohua'i pa'isicohua'ipi to̱me sayere, asama'cohua'ipi asayere, ju̱'isicohua'i pa'isicohua'ipi huajëcohua'i huëoyere, cui'ne co'amaña peocohua'ina de'o coca quëayere quëajë̱'ë. 6Yë'ëre jëa coema'cohua'ipi de'oye sihuajë pa'ija̱'cohua'i a'ë, i̱re papi cuasacohua'ipi.

7Ja̱ohua'i saisi maca Jesús Juan pa'iye ayere ca huëopi, pa̱ire. Ñeje capi: ¿I̱quere mësaru so̱quë peo hue̱'ña saisicohua'i ñare'ni, ca̱të ja'ore tutupi ju'aquëna, huahuëquëna, ñare? 8¿I̱queini ñare'ni, ja̱je pa'ito? ¿De'o ca̱ña su̱ñasiquëni ñare? Tsoe mësarupi ñacohua'i a'ë, pa̱i ëjaohua'i huë'e pa'icohua'i cato de'o ca̱ña ju'icohua'i pa'iye. 9Ja̱je pa'ina, tëjiyerepa cayë. ¿I̱queini ñare'ni, sani? ¿Maija'quëre quëacaiquë? Ja̱je pa'ijë̱'ë. Ja̱ëpi Maija'quëre quëacaicohua'i aquë ja̱ëje pa'iohua'i peoa̱huë'ë, iquë Juan cato jerepa pa'i api. 10Jaë, Juan ayere toyase'e caji, ñeje:

Yë'ëpi jëjo saoyë, yë'ëre quëacaiquëre më'ë ña hue̱'ñana,

Më'ëre ma'a ne de'huacaija̱'quëre.

11Nuñerepa cayë, mësarute. Si'a pa̱i tsoe pa'isicohua'ipi cui'ne yure pa'icohua'ije̱ Juan oco doquëre tëto saisicohua'i peoyë. Ja̱je pa'iquëta'are ma'tëmo cua̱ñe te̱'tere a'riquë pa'iquëpi Juanre tëto saisiquë pa'iji.

12Juan oco doquë daisi maca acohua'ipi yureje̱ tutu yo'oyë, ma'tëmo cua̱ñe te̱'tena ti̱'añu'u cajë. Ja̱je yo'ojë tutu quë'iohua'ise'e de'hue ti̱'añë. 13Si'aohua'i Maija'quëre quëacaicohua'i cui'ne Moisés cua̱ñese'e ye'yacohua'i cahuë, ma'tëmo ayere, Juan dai macaja̱'a. 14Juan cato Elíaspi ja̱ëni Maija'quëre quëacaicohua'i ca'a̱huë'ë, ‘daija̱'quë api’. Ja̱je pa'ina, mësarupi i̱ api cuasajë̱'ë. 15Ca̱joro hue'ecohua'ipi asajë̱'ë, iye.

16¿I̱quena co̱ni quëa i̱ñora'ye iye'në pa̱i pa'iye? Cani capi: Tsi̱pi co'amaña huero hue̱'ñana ja'rusicohua'ipi dujë cajeohua'ire. 17‘Ñeje cuiyeje̱ pa'iohua'i a'ë. Pi̱'cohuë̱api juitoje̱ pairama'pë paë'ë, mësarupi. Oi ëaye jë̱jëtoje̱ mësarupi oima'pë paë'ë.’ 18Juan cato daji'i, jaiye a̱o a̱ima'quëpi cui'ne o'sa co̱no u̱cuma'quëpi. Ja̱je pa'ini mësarupi cayë, huati quë'i api. Ja̱je pa'iquëta'are Maija'quë ta̱'ñe yo'oye cato i̱ñoji, i̱ti yo'oyepi. 19Ja̱ jeteyo'je daji'i, Pa̱i Mamaquë a̱o a̱iquëpi cui'ne o'sa co̱no u̱cuquëpi. Ja̱je pa'ini cayë, jai a̱upi, cui'ne jai co̱noupi, co'aye yo'ocohua'i cajeipi cui'ne curiquë tsi'sohua'i cajeipi. Ja̱je cajëta'are Maija'quë ta̱'ñe yo'oye cato i̱ñoji, i̱ti yo'oyepi.”

Sehuoma'cohua'i

(Lc 10.13-15)

20Ja̱ maca Jesús pa̱i yo'o ti̱'a ma'ñere ne i̱ñosi darire tutu yëhuopi, i̱ohua'i pa'iye po̱nëma'pë pa'isi do'ire caquë.

21Yëhuoquë capi:

“¡Teayerepa Corazín daripë! ¡Betsaida daripë! Mësarute ne i̱ñose'eje̱ pa'ye Tiro cui'ne Sidón darina ne i̱ñoñe pa'ito tsoe asani po̱nëra'huë, ja̱'rë pa'ise'e je̱oni. Cui'ne oijë su̱ña ca̱ñani hua̱tapi co'ye jo'jëni oijë i̱ñora'huë, i̱ohua'i oiye. 22Ja̱je pa'ina, mësarute cayë. Pa̱i yo'ose'e ña mu'se ti̱'asi maca ai co'ayerepa mësarute sa̱iñe pa'iji, Tiro cui'ne Sidón daripë̱a sa̱iñe se̱ña maca pa'yepi. 23Capernaum daripë ¿Më'ë ma'tëmore pana sa cua̱ñoja'coa'ë, cuasaco? Coa ai jerepa më'ë cato meñe caje huesëja̱'coa'ë, ju̱'isicohua'i quë'rona. Sodoma yejañana, mësarute i̱ñoñeje pa'ye i̱ñoñe pa'ito i̱ohua'i yo'oye je̱oni po̱nëra'huë, cui'ne ja̱ pa̱i daripë ja̱ yë'ta'a yureje̱ patira'o. 24Ja̱je pa'ina, cayë, mësarute. Pa̱i ñape yo'ose'e ña mu'se ti̱'asi maca mësarupi ai jerepa co'ayerepa sa̱i cua̱ñoja'cohua'i a'ë, Sodoma yejaña quë'ro pa'icohua'ire yo'ose'e jerepa pa'yepi.”

Jesuna Sani Pëa Huajëye

(Lc 10.21-22)

25Ja̱ mu'seña Jesús capi:

“Sihuayë, ja'quë më'ëre ma'tëmo cui'ne yeja ëjaëre. Më'ëpi i̱ñohuë, teaye pa'iohua'ini, ta̱'ñe pa'iohua'ire cui'ne ta̱'ñe asacohua'ire yahuesi co'amañare. 26Ja̱je pa'ijë̱'ë. Ja'quë më'ëpi yë ja̱je yo'ohuë.

27Yë'ë ja'quëpi yë'ëna si'a co'amaña i̱sipi. Pëca ja'quëse'e mamaquëre ñaji. Cui'ne mamaquëse'e pëca ja'quëre ñaji. Cui'ne mamaquë i̱ñoñe yëcohua'ise'e asaye pa'iji, i̱te. 28Daijë̱'ë, yë'ëna. Si'aohua'i co'amaña nejë, cui'ne hue'ejë jë'josicohua'i yë'ëpi pëa huajëye i̱sisi'i, mësarute. 29Yë'ë pa'iyere ñani cui'ne yo'oñu'u cuasajë̱'ë caquë yë'ë yo'oye i̱siyë. Ye'yejë̱'ë, yë'ëni. Yë'ë cato esa yo'o jujama'quë a'ë cui'ne jerepa pa'i a'ë cuasama'quë a'ë. Ja̱je yo'onita'a ti̱'aja'cohua'i a'ë, joyo pëa huajë hue̱'ña. 30Yë'ë quërë saihuëre mësarute i̱siyë, a̱'jiñe sayere cui'ne pe̱añe hue'eyere.”

Nu geselecteerd:

Mateo 11: sey

Markering

Deel

Kopiëren